.jpg)
លោកហង់ ជួនណារ៉ុន រដ្ឋមន្ត្រីក្រសួងអប់រំ យុវជន និងកីឡា នាពេលកន្លងមក ។ រូបថតៈ ហ្វេសប៊ុក
ភ្នំពេញៈ រដ្ឋមន្ត្រីក្រសួងអប់រំ យុវជន និង កីឡា បានស្ដីបន្ទាសដល់មន្ត្រីក្រោមឱវាទចំនួន ២៤ នាក់ ជុំវិញការគ្រប់គ្រងមន្ត្រីក្រោមឱវាទមិនបានល្អ និងមិនបានមកធ្វើការងារជាប់លាប់ បន្ទាប់ពីបានលុបឈ្មោះ លោក រ៉ុង ឈុន ចេញពីក្របខ័ណ្ឌ កាលពីថ្ងៃ៣០ខែមករា ។
នៅក្នុងសេចក្តីប្រកាសរបស់ក្រសួង កាលពីថ្ងៃ ៣០ ខែមករា ឆ្នាំ ២០១៨ លោក ហង់ ជួន ណារ៉ុន រដ្ឋមន្ត្រីក្រសួងអប់រំយុវជន និងកីឡា បានស្តីបន្ទោសដល់ថ្នាក់ដឹកនាំនៃនាយកដ្ឋានស្រាវជ្រាវវិទ្យាសាស្ត្រចំនួន ៤ នាក់ក្នុងនោះមាន លោក ច័ន្ទ រ័ត្ន ប្រធាននាយកដ្ឋានស្រាវជ្រាវវិទ្យាសាស្ត្រ លោក លឹម សុខមាន ប្រធានការិយាល័យរដ្ឋបាល លោក សូ សុខុន ប្រធានការិយាល័យស្រាវជ្រាវ លោក ជ័រ ស្តើង ប្រធានការិយាល័យផែនការ។ ការស្តីបន្ទោសនេះ ដោយសារតែការគ្រប់គ្រងបុគ្គលិកមិនបានល្អ ដូចជាការមកធ្វើការមិនជាប់លាប់ជាដើម។
ក្រៅពីនោះ លោករដ្ឋមន្ត្រីក៏បានស្ដីបន្ទោសជាលាយលក្ខណ៍អក្សរចំពោះបុគ្គលិកអប់រំចំនួន ២០ នាក់ទៀតផងដែរ ចំពោះការខកខានមិនបានមកបំពេញកាតព្វកិច្ចការងារជាប់លាប់ពីថ្ងៃទី ៤ ខែមករា ដល់ថ្ងៃទី ៣០ ខែមករា ឆ្នាំនេះ ។
លោក រស់ សាលីន អ្នកនាំពាក្យក្រសួងនេះ បានឱ្យដឹងថា ការសម្រេចលុបឈ្មោះ លោក រ៉ុង ឈុន ចេញពីក្របខ័ណ្ឌនេះ គឺអនុវត្តទៅតាមប្រកាសស្តីពីការដាក់មន្ត្រីរាជការឱ្យស្ថិតនៅក្រៅក្របខ័ណ្ឌដើម ដោយសារតែ លោក រ៉ុង ឈុន បានដាក់ពាក្យចូលបម្រើការវិញហួសពេលកំណត់នៃច្បាប់។
អតីតសមាជិកគណៈកម្មាធិការជាតិរៀបចំការបោះឆ្នោត (គជប) មកពីអតីតគណបក្សសង្គ្រោះជាតិ លោក រ៉ុង ឈុន ត្រូវបានក្រសួងអប់រំយុវជននិងកីឡាលុបឈ្មោះចេញពីក្របខ័ណ្ឌក្រសួងក្រោមហេតុផលអវត្តមានគ្មានការអនុញ្ញាត ប៉ុន្តែសាមីខ្លួនថាពាក់ព័ន្ធនឹងនយោបាយច្រើនជាង ខណៈរូបលោកបានដាក់លិខិតចូលបម្រើការងារវិញរួចហើយក្រោយលាលែងពីគជប។
អ្នកនាំពាក្យក្រសួងអប់រំ លោក រស់ សាលីន បានថ្លែងថា ការសម្រេចលុបឈ្មោះនេះធ្វើឡើងដោយផ្អែកតាមច្បាប់ ខណៈដែលលោក រ៉ុង ឈុន មិនបានសុំចូលបម្រើការងារវិញភ្លាមៗ ក្រោយពីបានបញ្ចប់ការងារពី គជប ភ្លាម។
យ៉ាងណាក្ដី លោក រ៉ុង ឈុន បានហៅករណីនេះថាជារឿងគួរឲ្យអស់សំណើច ខណៈលោកបានដាក់ពាក្យសុំបម្រើការងារវិញនៅថ្ងៃ៣មករាឆ្នាំ ២០១៨ តែបែរជាក្រសួងចេញលិខិតលុបឈ្មោះលោកនៅថ្ងៃ ៣០ មករា ឆ្នាំ ២០១៨ ក្រោមហេតុផលអវត្តមានទាំងលោកមិនទាន់បានចូលបម្រើការវិញផងនោះ៕
