Search form

Login - Register | FOLLOW US ON

Logo of Phnom Penh Post newspaper Phnom Penh Post - មន្ត្រី​ឃុំ-សង្កាត់​ CNRP ​រង​ការ​ព្រមាន​វ៉ៃ​ខ្នោះ

Content image - Phnom Penh Post
កញ្ញា ស៊ិន ចាន់ពៅរ៉ូហ្សេត សង្កាត់​អូចារ​ក្នុង​ក្រុង​បាត់ដំបង​។

មន្ត្រី​ឃុំ-សង្កាត់​ CNRP ​រង​ការ​ព្រមាន​វ៉ៃ​ខ្នោះ

ភ្នំពេញៈ ​បន្ទាប់ពី​រដ្ឋមន្ត្រី​ក្រសួង​មហាផ្ទៃ​ចេញ​លិខិត​កំណត់​បែបបទ​អំពី​ការ​សាងសង់ ជួសជុល និង​កែលម្អ​អគារ​សាលា​ឃុំ-សង្កាត់ អ្នក​នាំ​ពាក្យ​ក្រសួង​មហាផ្ទៃ​កាលពី​ម្សិលមិញ​បាន​ព្រមាន​ចាប់​ដាក់គុក​មន្ត្រី​ឃុំ​សង្កាត់​មកពី​គណបក្ស​ជំទាស់ ដែល​​ប្រើប្រាស់​ឈ្មោះ​បក្ស​ខ្លួន​ក្នុង​ការ​រៀបចំ​កិច្ចការ​នេះ​ជា​ចំណាត់ការ​​ដែល​រង​ការ​រិះគន់​ពី​មន្ដ្រី​គណបក្ស​ប្រឆាំង​ថា​ជា​ការ​រើសអើង​និន្នាការ​នយោបាយ​។

តាម​លិខិត​ចុះ​ហត្ថលេខា​ដោយ​លោក ស ខេង កាលពី​ថ្ងៃ​អង្គារ​​ និង​ផ្សព្វផ្សាយ​លើ​គេហទំព័រ​ក្រសួង​មហាផ្ទៃ​កាលពី​ម្សិលមិញ​លោក​បាន​ណែនាំ​ឲ្យ​អភិបាល​​រាជធានី​ខេត្ត​ទាំង​ ២៥ ​ពិនិត្យ​រាល់​ការ​ «​ការ​សាងសង់ ការ​ជួសជុល និង​ការ​កែលម្អ​អគារ​សាលាឃុំ សង្កាត់​ ឬ​សាងសង់​ទីកន្លែង​បណ្ដោះ​​អាសន្ន​» ​ដើម្បី​បំពេញ​ការងារ​ដោយ​ប្រើប្រាស់​ថវិកា​របស់​សប្បុរសជន​ ឬ​ថវិកា​រដ្ឋបាល​ឃុំ សង្កាត់​ក្ដី ត្រូវ​​ប្រជុំ​ពិនិត្យ​ពិភាក្សា​ និង​សម្រេច​ក្នុង​កិច្ចប្រជុំ​របស់​ខ្លួន​ជា​មុន​សិន​។

ចំពោះ​ការ​សាងសង់​អគារ​ឃុំ​សង្កាត់​ថ្មី​ដោយ​ថវិកា​សប្បុរសជន​ ឬ​ថវិការដ្ឋ​ត្រូវ​មាន​ប្លង់​កម្មសិទ្ធិ​ស្រប​ច្បាប់​និង​ «​ត្រូវ​សាងសង់​ស្រប​តាម​ស្ដង់ដារ​អគារ​សាលាឃុំ សង្កាត់ ដែល​ក្រសួង​មហាផ្ទៃ​បាន​កំណត់​» ​និង​ទទួល​បាន​ការ​​អនុញ្ញាត​ពី​រដ្ឋបាល​ខេត្ត​។

ក្នុង​លិខិត​នោះ​ក៏​បាន​បញ្ជាក់​ដែរ​ថា​ «​មុន​នឹង​ធ្វើការ​សាងសង់​អគារ​សាលា​ឃុំ សង្កាត់ ក្រុម​ប្រឹក្សាឃុំ​សង្កាត់​ត្រូវ​សុំ​ការ​អនុញ្ញាត​​ជា​មុន​ពី​រដ្ឋបាល​រាជធានី​ខេត្ត​តាមរយៈ​រដ្ឋបាល​ក្រុង ស្រុក​ខណ្ឌ​»​។

ទោះ​ជា​យ៉ាង​ណា​លោក ខៀវ សុភ័គ អ្នក​នាំ​ពាក្យ​ក្រសួង​មហាផ្ទៃ​បាន​លើក​ឡើង​ថា​ការ​ចេញ​សេចក្ដី​ណែនាំ​នេះ បន្ទាប់ពី​ពិនិត្យ​ឃើញ​ថា​រដ្ឋបាល​ឃុំ សង្កាត់​ហាក់​បាន​ធ្វើ​សកម្មភាព​ផ្ទុយ​ពី​គោលការណ៍​រដ្ឋាភិបាល​។

លោក​ថា​៖ «​ចៅសង្កាត់​មួយ​ចំនួន​គេ​ឡើង​មក​គេ​ចង់​រៃអង្គាស​​ស្អី ឡើង​ធ្វើ​សាលា​សង្កាត់​របស់​​គេ​ទៅ​។ វា​មាន​បញ្ហា​ហ្នឹង​កើតឡើង​ពេល​គេ​ធ្វើ​រួច​គេ​ហៅ​បក្ស​គេ​មក​សម្ពោធ​សង្កាត់​គេ​»​។

ដោយ​ព្រមាន​មិន​ចំ​ឈ្មោះ តែ​ទំនង​ជា​សំដៅ​ដល់ កញ្ញា ស៊ិន ចាន់ពៅរ៉ូហ្សេត សង្កាត់​អូចារ​ក្នុង​ក្រុង​បាត់ដំបង​លោក​ ខៀវ សុភ័គ បាន​បញ្ជាក់​ថា​៖ «​យើង​មើល​បាត់ដំបង​មាន​ [​ឧទាហរណ៍​] ​តើ​។ គេ​ចង់​ធ្វើ​ស្អី​គេ​នៅ​បាត់ដំបង​ហ្នឹង​...​វា​ធ្វើ​មើល​គេ​មិន​ដែល​គ្រប់គ្រង​​ដូច​មាន​តែ​គាត់​អ៊ីចឹង​»​។

លោក​បាន​បន្ថែម​ថា​៖ «​គុក​ទាំង​​មេ គុក​ទាំង​កូន​។ អាមេរិក​ជាប់គុក​មិន​ទាន់​កាត់ក្ដី​ផង អា​កូន​ចង់​ជាប់គុក​បន្ដ​ទៀត​ឬ​? ​មិន​ខ្វះ​គុក​ដាក់​ទេ​។ តែ​ខុស​ច្បាប់​គឺ​គុក​»​។

យ៉ាង​ណា​ក្ដី​កាលពី​ម្សិលមិញ កញ្ញា រ៉ូហ្សេត បដិសេធ​ការ​ចោទប្រកាន់​នេះ​ដោយ​បាន​ថ្លែង​ថា​​ កញ្ញា​មិន​ដែល​ប្រើប្រាស់​លុយ​របស់​គណបក្ស​ទៅ​ជួសជុល​ដើម្បី​បម្រើ​ផលប្រយោជន៍​បក្ស​ទេ​។

កញ្ញា​បន្ត​ថា​តាំងពី​ឡើង​ជា​ចៅសង្កាត់​មក​មិន​ទាន់​ទទួល​បាន​កញ្ចប់​ថវិកា​ពី​រដ្ឋាភិបាល​ក្នុង​ការ​អភិវឌ្ឍ​មូលដ្ឋាន​ទេ ឯ​ការ​ជួសជុល​ក៏​មិន​ទាន់​បាន​ធ្វើ​ដែរ​គ្រាន់​តែ​ទិញ​គ្រឿង​បរិក្ខារ​ខ្លះ​ប៉ុណ្ណោះ​។

កញ្ញា​ថា​៖ «​ខ្ញុំ​ជា​ចៅសង្កាត់ ថវិកា​ឯកជន​របស់​ខ្ញុំ ខ្ញុំ​យក​ទៅ​បំពាក់​នូវ​បរិក្ខារ​មួយ​ចំនួន ដូចជា កង្ហារ ដំឡើង​ភ្លើង រៀបចំ​ទីតាំង​ប្រជុំ​»​។

កញ្ញា​ថា​ការ​អតា្ថធិបាយ​របស់​​លោក​ ខៀវ សុភ័គ ជា​ «​រូបភាព​គំរាម​កំហែង​មន្ត្រី​អាជ្ញាធរ​មូលដ្ឋាន​ដែល​បាន​ជាប់​ឆ្នោត​ដោយ​ពលរដ្ឋ​បោះ​ឲ្យ​»​។

កញ្ញា រ៉ូហ្សេត​បន្ត​ថា​៖ «​បើ​បុគ្គល​ណា​ ឬ​បក្ស​ណា​យក​លុយ​រដ្ឋ​មក​ធ្វើ​ហើយ​ដាក់​ឈ្មោះ​គណបក្ស​ខ្លួន​គួរ​ណាស់​វ៉ៃខ្នោះ​ទើប​ត្រឹមត្រូវ​»​។

អ្នក​នាំពាក្យ​គណបក្ស​ប្រជាជន​លោក សុខ ឥសាន គាំទ្រ​ចំណាត់ការ​ក្រសួង​មហាផ្ទៃ​ និង​​បញ្ជាក់​ថា​មន្ត្រី​គណបក្ស​លោក​បាន​ជួយ​សាងសង់​ ឬ​ជួសជុល​​សាលាឃុំ សង្កាត់​កន្លង​មក​តែ​មិន​ដែល​ប្រើ​ឈ្មោះ​គណបក្ស​ទេ​។

លោក​ថា​៖ «​សាលា​ឃុំ​មិនមែន​ជា​របស់​គណបក្ស​ទេ​ជា​របស់​រដ្ឋាភិបាល ទោះបី​គណបក្ស​ប្រជាជន​ធ្វើ​ពី​មុន​មក​ក៏​គេ​មិន​ដែល​ដាក់​ឈ្មោះ​គណបក្ស​ដែរ​»​។

លោក អ៊ូរ ច័ន្ទរ័ត្ន តំណាងរាស្ត្រ​គណបក្ស​សង្គ្រោះ​ជាតិ​ហៅ​ចំណាត់ការ​នេះ​ថា ជា​ការ​រើសអើង​នយោបាយ​ប្រឆាំង​មន្ត្រី​មូលដ្ឋាន​ចេញ​ពី​បក្ស​សង្គ្រោះ​ជាតិ​។ ​លោក​ថា​៖ «​ដោយសារ​តែ​រឿង​​បក្ស​ហ្នឹង​ហើយ​ធ្វើឲ្យ​មាន​ការ​រើសអើង​»​។

លោក​បន្ត​ថា​រដ្ឋាភិបាល​គួរ​តែ​លើក​ទឹក​ចិត្ត​ដល់​មន្ត្រី​ក្នុង​ការ​បំពេញ​ការងារ​ពួកគេ​ដោយ​ការ​ទទួល​ខុសត្រូវ​ជា​ជាង​ទប់ស្កាត់​ការ​ខិតខំ​របស់​ពួកគេ​។

លោក​ថ្លែង​ថា​៖ «​ខ្ញុំ​យល់​ថា​គួរ​​តែ​អនុញ្ញាត​ទៅ បើ​កាល​ណា​រដ្ឋ​មាន​លុយ​គ្រប់គ្រាន់​សម្រាប់​ធ្វើ​...​កែ​វា​ទៅ​។ ​ទៅ​ឃាត់​គ្នា​ធ្វើ​អី​»​។

អ្នក​វិភាគ​នយោបាយ​លោក មាស នី គាំទ្រ​ចំណាត់ការ​របស់​ក្រសួង​មហាផ្ទៃ​ក្នុង​ការ​សុំ​ការ​អនុញ្ញាត​ជា​មុន​ដើម្បី​ធ្វើ​កិច្ចការ​ទាំង​នោះ​ដោយ​គ្រប់​គណបក្ស​ទាំងអស់​ត្រូវ​គោរព​ច្បាប់ ប៉ុន្តែ​លោក​បាន​ជំទាស់​ហ្នឹង​ការ​អត្ថាធិប្បាយ​លោក​ ខៀវ សុភ័គ​។

លោក​ថ្លែង​ថា​៖ «​នេះ​មិនមែន​ជា​ភាសា​ដែល​រដ្ឋាភិបាល​ត្រូវ​ប្រើ​​ក្នុង​នាម​ជា​ម៉ែឪ​គេ​ទេ​។ ​ក្រសួង​មហាផ្ទៃ​លើក​ថា បើ​ខុស​ច្បាប់​ត្រូវ​ដាក់​វិន័យ​មិនមែន​រឿង​អី វ៉ៃ​​ខ្នោះ​។ វា​លែង​ជា​ទំនាក់​ទំនង​​របស់​អាជ្ញាធរ​ហើយ​»៕

0

Comments

Please, login or register to post a comment

ព័ត៌មានពាក់ព័ន្ធ