Search

Search form

មន្ត្រី​បក្ស​ប្រឆាំង​ត្រូវ​បញ្ឈប់​លែង​​ឲ្យ​ធ្វើការ​ ឯ​ស្លាក​​សញ្ញា​ក៏​ត្រូវ​រុះរើ

Content image - Phnom Penh Post
បុរស​ ៣ ​នាក់​នាំ​គ្នា​ថត​សកម្មភាព​របស់​បុរស​ម្នាក់​ដែល​ឡើង​លុប​ស្លាក​គណបក្ស​សង្គ្រោះ​ជាតិ​នៅ​ទីស្នាក់ការ​ធំ​កាលពី​ម្សិលមិញ ។ ហុង មិនា

មន្ត្រី​បក្ស​ប្រឆាំង​ត្រូវ​បញ្ឈប់​លែង​​ឲ្យ​ធ្វើការ​ ឯ​ស្លាក​​សញ្ញា​ក៏​ត្រូវ​រុះរើ

ភ្នំពេញៈ អាជ្ញាធរ​មូលដ្ឋាន​បាន​ចាប់ផ្តើម​ហាមប្រាម​មន្ត្រី​គណបក្ស​សង្គ្រោះ​ជាតិ​មិន​ឲ្យ​បន្ត​ការងារ​នៅ​ថ្នាក់​ឃុំ-សង្កាត់​ទៀត​ទេ ខណៈ​ស្លាក​សញ្ញា​គណបក្ស​ប្រឆាំង​មួយ​នេះ​ក៏​មិន​ឲ្យ​មាន​វត្តមាន​នៅ​ទីសាធារណៈ​គឺ​ ១ ​ថ្ងៃ​បន្ទាប់​ពី​ត្រូវ​បាន​រំលាយ​ដោយ​តុលាការ​កំពូល​នៅ​សប្ដាហ៍​មុន ប៉ុន្តែ​មន្ត្រី​បក្ស​នេះ​បាន​អំពាវនាវ​ឲ្យ​មន្ត្រី​បន្ដ​ជំហរ​រឹងមាំ និង​មិន​ទទួល​សាលដីកា​តុលាការ​ទេ​។

កាលពី​ថ្ងៃ​ព្រហស្បតិ៍​ចៅក្រម​ ៩ ​នាក់​បាន​យល់​ស្រប​ទៅ​តាម​មេធាវី​របស់​ក្រសួង​មហាផ្ទៃ​ដែល​ថា​គណបក្ស​សង្គ្រោះ​ជាតិ​បាន​បំពាន​ច្បាប់​ស្តីពី​គណបក្ស​នយោបាយ​ពាក់ព័ន្ធ​នឹង​ការ​ប៉ុនប៉ង​ធ្វើ​បដិវត្តន៍​ពណ៌​បាន​សម្រេច​រំលាយ​គណបក្ស​ប្រឆាំង​ដ៏ធំ​មួយ​នេះ​ដោយ​ចូល​ជា​ធរមាន​ភ្លាមៗ និង​ហាមប្រាម​សមាជិក​ជាន់​ខ្ពស់​ ១១៨ ​នាក់​មិន​ឲ្យ​ចូលរួម​ក្នុង​សកម្មភាព​នយោបាយ​រយៈពេល​ ៥ ​ឆ្នាំ​។

ក្រសួង​មហាផ្ទៃ​ កាលពី​ថ្ងៃ​សុក្រ​ បាន​ផ្ញើ​សេចក្តី​ប្រកាស​ចំនួន​ ៤ ​ដែល​និយាយ​អំពី​ការ​លុប​គណបក្ស​នេះ​ចេញ​ពី​បញ្ជី​គណបក្ស​នយោបាយ​ និង​អំពាវនាវ​ឲ្យ​មាន​ការ​រើ​ស្លាក​គណបក្ស និង​ឡូហ្គោ​ចេញ​ពី​កន្លែង​សាធារណៈ និង​ឯកជន បង្កក​ប្រាក់​ខែ​មន្ត្រី​គណបក្ស​សង្គ្រោះ​ជាតិ​ដែល​ជាប់​ឆ្នោត និង​សុំ​ឲ្យ​អភិបាល​ខេត្ត​អប់រំ​ប្រជាពលរដ្ឋ​អំពី​សាលដីកា​តុលាការ​កំពូល​។

មន្ត្រី​មូលដ្ឋាន​ត្រូវ​បាន​គេ​ឃើញ​​កំពុង​ដក​ស្លាក​គណបក្ស​សង្គ្រោះ​ជាតិ​នៅ​ទូទាំង​ប្រទេស​រួមទាំង​នៅ​ទីស្នាក់ការ​ធំ​គណបក្ស​ក្នុង​សង្កាត់​ចាក់អង្រែ រាជធានី​ភ្នំពេញ​ដែល​គណបក្ស​ខ្លួនឯង​បាន​គោរព​តាម​សេចក្តី​សម្រេច​នេះ​។

ជាង​នេះ​ទៀត​មេឃុំ-សង្កាត់​ និង​សមាជិក​ក្រុមប្រឹក្សា​ឃុំ​សង្កាត់​ត្រូវ​បាន​ជូន​ដំណឹង​ដោយ​អាជ្ញាធរ​ស្រុក​ ឬ​ខេត្ត​ឲ្យ​ចាកចេញ​ពី​ការិយាល័យ​របស់​ខ្លួន និង​ប្រគល់​ត្រា​មេឃុំ​របស់​ខ្លួន​។

ដោយ​សំដៅ​ទៅ​អតីត​ចៅសង្កាត់​អូរចារ ខេត្ត​បាត់ដំបង កញ្ញា ស៊ិន រ៉ូហ្សិត អ្នក​នាំពាក្យ​ក្រសួង​មហាផ្ទៃ​លោក ខៀវ សុភ័គ បាន​ថ្លែង​៖ «​បាទ ពួកគេ​ភាគច្រើន​បំផុត​បាន​ប្រគល់​ត្រា​រួច​ហើយ​។ សូម្បី​តែ​នៅ​សង្កាត់​អូរចារ​ដែល​ស្មោះស្ម័គ្រ​យ៉ាង​ខ្លាំង ​[​ចំពោះ​គណបក្ស​សង្គ្រោះ​ជាតិ​] ក៏​ពួកគេ​បាន​ប្រគល់​ត្រា​រួច​ហើយ​» ដែរ​។

លោក​បាន​បន្ថែម​ថា​៖ «​ប៉ុន្តែ​ការ​អនុវត្ត​កន្លែង​ខ្លះ​លឿន​ណាស់ ហើយ​កន្លែង​ខ្លះ​កំពុង​ស្ថិត​នៅក្នុង​ដំណើរការ​អនុវត្ត​»​។

លោក សុភ័គ បាន​ថ្លែង​ថា​សមាជិក​ក្រុមប្រឹក្សា​ជាន់​ខ្ពស់​បន្ទាប់​នៅ​ក្នុង​ឃុំ​សង្កាត់​នីមួយៗ​នឹង​កាន់​តំណែង​ជា​មេឃុំ​ ឬ​ចៅសង្កាត់​ស្តីទី​។ វិសោធនកម្ម​ថ្មី​ចំពោះ​ច្បាប់​ស្តីពី​ការ​បោះឆ្នោត​ក្រុមប្រឹក្សា​ឃុំ​សង្កាត់​ផ្តល់​រយៈពេល​ ២ ​សប្តាហ៍​សម្រាប់​គណៈកម្មាធិការ​ជាតិ​រៀបចំ​ការ​បោះឆ្នោត​បែងចែក​អាសនៈ​ជាប់​ឆ្នោត​របស់​គណបក្ស​ដែល​ត្រូវ​បាន​រំលាយ​។

Content image - Phnom Penh Post
សមត្ថកិច្ច​ចុះ​ទម្លាក់​ស្លាក​គណបក្ស​សង្គ្រោះ​ជាតិ​បន្ទាប់ពី​តុលាការ​កំពូល​សម្រេច​រំ​លាយ​បក្ស​។ រូបថត ហ្វេសប៊ុក

កាលពី​ម្សិលមិញ កញ្ញា រ៉ូហ្សិត បាន​ថ្លែង​ថា​អភិបាលរង​ក្រុង​បាត់ដំបង លាង វាសនា បាន​រង់ចាំ​នាង​នៅ​សាលា​សង្កាត់​កាលពី​ថ្ងៃ​សុក្រ​ដោយ​បាន​យក​ត្រា​របស់​នាង​ និង​បាន​សុំ​ឲ្យ​សមាជិក​ក្រុមប្រឹក្សា​របស់​គណបក្ស​សង្គ្រោះ​ជាតិ​ចាកចេញ​ពី​សាលា​សង្កាត់​។

កញ្ញា​បាន​អះអាង​ថា​គេ​មក​ហាមប្រាម​មុន​ក្រសួង​មហាផ្ទៃ​ចេញ​សេចក្តី​ប្រកាស ហើយ​កញ្ញា​ចង់​បន្ត​ការងារ​រហូត​ទាល់​តែ​មាន​ការ​ហាមប្រាម​កញ្ញា​ជា​ផ្លូវការ​មិន​ឲ្យ​ធ្វើ​ការងារ​។

កញ្ញា​បាន​បន្ត​ថា​៖ «​ខ្ញុំ​សោកស្តោយ​ដែល​ខ្ញុំ​មិន​មាន​ឱកាស​បម្រើ​ប្រជាពលរដ្ឋ សូម្បី​តែ​នៅ​ថ្ងៃ​ចុងក្រោយ​»​។ នៅ​ថ្ងៃ​ទី​ ១៨ ខែ​វិច្ឆិកា​ កញ្ញា​បាន​ត្រឡប់​មក​សាលា​សង្កាត់​ហើយ​ឃើញ​ថា​មាន​ការ​ប្តូរ​សោ​។

នៅ​ក្នុង​វីដេអូ​មួយ​ដែល​កញ្ញា​បាន​បង្ហោះ​កាលពី​ថ្ងៃ​សុក្រ កញ្ញា រ៉ូហ្សិត បាន​ជម្រាប លោក​វាសនា ថា កញ្ញា​បាន​ទិញ​កុំព្យូទ័រ​ពីរ​បី​​ និង​ម៉ាស៊ីន​ព្រីនធ័រ​ ១ ​សម្រាប់​ការិយាល័យ ប៉ុន្តែ​ចង់​ឲ្យ​មន្ត្រី​ដទៃ​បន្ត​ប្រើ​ដើម្បី​បម្រើ​ប្រជាពលរដ្ឋ​ក្នុង​សង្កាត់​របស់​កញ្ញា​។

នៅ​រាជធានី​ភ្នំពេញ​លោក ឌឹក ថន ចៅសង្កាត់​ស្ទឹងមានជ័យ​ ១ ​បាន​ថ្លែង​ថា ស្មៀន​សង្កាត់​បាន​យក​ត្រា​រួច​ហើយ​ពី​មុន​ពេល​លោក​ទៅ​ដល់​សង្កាត់​កាលពី​​ថ្ងៃ​សុក្រ ប៉ុន្តែ​លោក​នៅ​តែ​ជួយ​មន្ត្រី​មូលដ្ឋាន​ជាមួយ​ការងារ​មួយ​ចំនួន​ដែល​មិន​ទាន់​បាន​ធ្វើ​រួច​។

លោក​បាន​ថ្លែង​ថា​៖ «​នៅ​ថ្ងៃ​ទី​ ១៧ មន្ត្រី​ខណ្ឌ​មក​ពិនិត្យ​ថា តើ​មាន​កំណត់ត្រា​កំណើត​ចំនួន​ប៉ុន្មាន​ [​ដែល​មិន​ទាន់​ធ្វើ​រួច​] ដូច្នេះ​ខ្ញុំ​បាន​ធ្វើការ​កត់សម្គាល់​សម្រាប់​ពួកគេ​។ អភិបាល​ខណ្ឌ​មិន​អនុញ្ញាត​ឲ្យ​យើង​ចុះ​ហត្ថលេខា​លើ​អ្វី​ទៀត​ទេ​»​។

ជាង​នេះ​ទៀត​លោក ម៉ន ផល្លា អតីត​ប្រធាន​គណៈកម្មាធិការ​ប្រតិបត្តិ​ក្នុង​រាជធានី​ភ្នំពេញ​បាន​ថ្លែង​ថា​មន្ត្រី​គណបក្ស​ប្រឆាំង​កំពុង​ត្រូវ​បាន​បំភិត​បំភ័យ និង​បង្ខំ​ឲ្យ​ចុះ​ចូល​ជាមួយ​គេ​។

លោក​បាន​ថ្លែង​ថា​៖ «​គណបក្ស​ប្រជាជន​កម្ពុជា​បាន​អញ្ជើញ​សមាជិក​ក្រុមប្រឹក្សា​របស់​គណបក្ស​សង្គ្រោះ​ជាតិ​ឲ្យ​ជួប​ប្រជុំ​ជាមួយ​ពួកគេ​ដើម្បី​ចុះ​ចូល​ជាមួយ​គណបក្ស​ប្រជាជន​កម្ពុជា​ដោយ​ប្រើ​លេស​សេចក្តី​សម្រេច​របស់​តុលាការ​កំពូល​រំលាយ​គណបក្ស​​សង្គ្រោះ​ជាតិ​»​។

លោក ផល្លា បាន​ចាកចេញ​ពី​ប្រទេស បន្ទាប់ពី​មាន​ដីកា​កោះ​ពី​តុលាការ​ពាក់ព័ន្ធ​នឹង​ការ​ប្រមូល​ផ្តុំ​រឿង​បោះឆ្នោត​ឃុំ-សង្កាត់​។

អតីត​សមាជិក​គណបក្ស​លោក សម រង្ស៊ី រូប​នេះ​ក៏​បាន​ថ្លែង​ទៅ​កាន់​វិទ្យុ​សំឡេង​សហរដ្ឋ​អាមេរិក​វីអូអេ​ផង​ដែរ​ថា​លោក​ កឹម សុខា នៅ​តែ​ជា​ប្រធាន​គណបក្ស​ហើយ​ថា​ពួកគេ​នឹង​មិន​ទទួល​ស្គាល់ «​ការ​សម្រេច​ដ៏ឃោរឃៅ​របស់​តុលាការ​តិរិច្ឆាន ធ្វើ​តាម​រដ្ឋាភិបាល​តិរិច្ឆាន​របស់​ ហ៊ុន សែន ​ទេ​»​។

លោក​បាន​ថ្លែង​នៅ​ក្នុង​បទសម្ភាស​ថា​៖ «​ខ្ញុំ​សូម​អំពាវនាវ​ដល់​ក្រុមប្រឹក្សា​ឃុំ-សង្កាត់​ដែល​ដែល​ជាប់​ឆ្នោត​មកពី​គណបក្ស​សង្គ្រោះ​ជាតិ​សូម​ឱ្យ​មាន​ជំហរ​រឹងមាំ​។ ប្រជាពលរដ្ឋ និង​កងកម្លាំង​ប្រដាប់​អាវុធ​គ្រប់​ជាន់​ថ្នាក់​ទាំងអស់​ត្រូវ​ទាមទារ​ឱ្យ​លោក​ ហ៊ុន សែន ចុះចេញ​ពី​តំណែង​ឬ​យ៉ាង​ហោច​ណាស់​ផ្លាស់ប្តូរ​នយោបាយ​របស់​គាត់​»​។

លោក សម រង្ស៊ី មិន​បាន​ឆ្លើយតប​ទៅ​នឹង​សំណួរ​ថា តើ​លោក​នឹង​អំពាវនាវ​ឱ្យ​មាន​បាតុកម្ម​តវ៉ា​នៅ​ក្នុង​ប្រទេស​ឬ​ទេ ប៉ុន្តែ​អតីត​អនុប្រធាន​គណបក្ស​សង្គ្រោះ​ជាតិ លោកស្រី​ មូរ សុខហួរ បាន​ថ្លែង​ថា​លោកស្រី​មិន​ទេ​ដោយសារ​តែ​ពួកគេ​មិន​ចង់​ធ្វើ​ឱ្យ​មាន​គ្រោះថ្នាក់​ដល់​មន្ត្រី​ និង​ក្រុម​អ្នក​គាំទ្រ​របស់​ខ្លួន​។

លោកស្រី​ថ្លែង​ថា​៖ «​យើង​មិន​ចង់​ជំរុញ​នរណា​ម្នាក់​ហើយ​បន្ទាប់មក​ពួកគេ​ត្រូវ​ជាប់​ពន្ធនាគារ​នោះ​ទេ​។ នេះ​ហើយ​ជា​មូលហេតុ​ដែល​យើង​កំពុង​ជំរុញ​ពី​ក្រៅ​។ អ្នក​មិន​ចាំបាច់​ធ្វើ​បាតុកម្ម​ដើម្បី​ចង់​បាន​លទ្ធិប្រជាធិបតេយ្យ​ទេ​»​។

ជាថ្មី​ម្តង​ទៀត​លោកស្រី មូរ សុខហួរ បាន​ហៅ​ការ​សម្រេច​របស់​តុលាការ​កំពូល​ថា​ជា​ «​កំហុស​ដ៏ធំ​មួយ​» ​មកពី​លោក​នាយក​រដ្ឋមន្ត្រី​ ហ៊ុន សែន ដោយ​លោកស្រី​បន្ថែម​ថា​ការ​អនុវត្ត​របស់​អាជ្ញាធរ​ដ៏ហួស​ហេតុ​ដើម្បី​ទប់ស្កាត់​មិន​ឱ្យ​មន្ត្រី​គណបក្ស​សង្គ្រោះ​ជាតិ​ធ្វើការ​គឺ​គ្រាន់​តែ​ដើម្បី​ផ្គាប់​ចិត្ត​ចៅហ្វាយ​របស់​ពួកគេ​ប៉ុណ្ណោះ​»​។

ទន្ទឹម​នឹង​នេះ​ដែរ​គណៈកម្មាធិការ​ជាតិ​រៀបចំ​ការ​បោះឆ្នោត​បាន​ស្នើ​ឲ្យ​គណបក្ស​នយោបាយ​ចំនួន​ ៦ ​ដែល​បាន​ចូលរួម​ប្រកួត​ប្រជែង​ក្នុង​ការ​បោះឆ្នោត​ថ្នាក់​ជាតិ​ឆ្នាំ​ ២០១៣ ដាក់​បញ្ជី​ឈ្មោះ​បេក្ខជន​របស់​ពួកគេ ខណៈ​ដែល​ស្ថាប័ន​បោះឆ្នោត​នេះ​នឹង​ចាប់ផ្តើម​ដំណើរការ​បែង​​ចែក​អាសនៈ​សភា​របស់​គណបក្ស​សង្គ្រោះ​ជាតិ​នោះ​។

វិសោធនកម្ម​ថ្មីៗ​នៃ​ច្បាប់​ស្តីពី​ការ​បោះឆ្នោត​ជ្រើសរើស​សមាជិក​សភា​ផ្តល់​ពេល​ឱ្យ គជប មួយ​សប្ដាហ៍​ដើម្បី​បែងចែក​អាសនៈ​របស់​គណបក្ស​នយោបាយ​​ដែល​ត្រូវ​បាន​រំលាយ​លើក​លែង​​តែ​គណបក្ស​កាន់​អំណាច​។

បើ​យោង​តាម​លោក សំ សូរីដា អគ្គលេខាធិការរង​ គជប ​បាន​ឲ្យ​ដឹង​ថា​៖ «​នៅ​ក្នុង​ច្បាប់​ គជប ​ត្រូវ​ផ្តល់​អាសនៈ​នៅក្នុង​រយៈពេល​ ៧ ​ថ្ងៃ​បន្ទាប់ពី​ គជប ​បាន​​ទទួល​លិខិត​ពី​ក្រសួង​មហាផ្ទៃ​។ គជប បាន​ទទួល​លិខិត​កាលពី​ថ្ងៃ​ទី​ ១៧ ខែ​វិច្ឆិកា​»៕ PS /NS

(​រាយការណ៍​បន្ថែម​ដោយ អាណាន់ បាលីកា និង បែន សុខហ៊ាន​)

អត្ថបទគួរចាប់អារម្មណ៍