.jpg)
ពលរដ្ឋដែលត្រូវមន្ត្រីយោធាប្តឹង អំពាវនាវឲ្យមានការជួយអន្តរាគមន៍ កន្លងមក។ រូបថត សហការី
ឧត្តរមានជ័យៈ មន្រ្តីយោធា ដែលប្តឹងពលរដ្ឋទៅតុលាការ រឿងរំលោភយកដីនោះ បានបដិសេធថា លោកមិនបានទន្រ្ទានយកដីព្រៃសហគមន៍ ដែលស្ថិតក្នុងគម្រោងព្រៃកាបូននោះទេ ខណៈដែលអង្គការសង្គមស៊ីវិល កំពុងតែស្រាវជ្រាវលើការចេញប័ណ្ណកម្មសិទ្ធិលើដីសហគមន៍នេះ ឲ្យទៅមន្រ្តីយោធារូបនេះ។
លោកអនុសេនីយ៍ឯកវ៉ាន់ លីម៉េង ជំនួយការផ្នែកហិរញ្ញវត្ថុ នៅសឹករងស្រុកអន្លង់វែង បានបដិសេធ កាលពីម្សិលមិញថា លោកមិនបានរំលោភយកដីពលរដ្ឋ និងដីព្រៃសហគមន៍ឈ្មោះ ក្បាលអូរសូភីគិរីព្រៃស្រោង ស្ថិតនៅក្នុងភូមិត្រពាំងធំ ឃុំលំទង ស្រុកអន្លង់វែង ដូចការចោទប្រកាន់នោះទេ ហើយដីដែលលោកមានប្លង់កម្មសិទ្ធិកាន់កាប់គឺមានតែ ១០ ហិកតាប៉ុណ្ណោះ មិនមែន ៧៥ ហិកតានោះដែរ។
លោកលីម៉េងបានអះអាងថា៖«ខ្ញុំ ក៏ដូចអ្នកផ្សេងទៀតដែរ បានចូលកាប់ឆ្ការដីព្រៃនោះ កាលពីឆ្នាំ ២០០២-២០០៣ គឺមុនពេលដែលមានសហគមន៍ទៅទៀត»។
លោកក៏បានច្រានចោលផងដែរថា លោកមិនបានឃុបឃិតជាមួយនឹងក្រុមនិស្សិតស្ម័គ្រចិត្ត ឬអាជ្ញាធរមូលដ្ឋាន ដើម្បីទទួលបានប្លង់កម្មសិទ្ធិលើដីទាំងនោះដែរ។
នាពេលបច្ចុប្បន្ននេះ ដីដែលលោកលីម៉េងមានប្លង់កាន់កាប់ នៅក្នុងដីសហគមន៍នោះ កំពុងតែត្រូវបានពលរដ្ឋជាង ១០ គ្រួសាររស់នៅ និងអាស្រ័យផល ហើយលោកក៏បានប្តឹងពលរដ្ឋ៤គ្រួសារទៅតុលាការខេត្តកាលពីឆ្នាំ២០១៧ កន្លងមក។
