បន្ទាយមានជ័យៈ លោកឧត្តមសេនីយ៍ ភ្លន់ តារ៉ា មេបញ្ជាការរងយោធភូមិភាគទី៥ និងជាមេបញ្ជាការតំបន់ប្រតិបត្តិការសឹករងខេត្តបន្ទាយមានជ័យ បានឲ្យដឹងនៅថ្ងៃទី២៥ខែមីនានេះថា ពលរដ្ឋក្រីក្រអាចធ្វើសំណើសុំដីតាមរយៈអាជ្ញាធរបាន ប្រសិនបើពួកគេពិតជាគ្មានដីមែន។
ការលើកឡើងនេះបន្ទាប់ពីកម្លាំងចម្រុះខេត្តបន្ទាយមានជ័យចុះរុះរើផ្ទះនិងខ្ទម៨៣ខ្នង កាលពីថ្ងៃទី២៣មីនា នៅលើដីសម្បទានសង្គមកិច្ច ដែលគេហៅថា«ការ៉េ២»នៅស្រុកថ្មពួក ស្រុកស្វាយចេក ស្រុកភ្នំស្រុក ខេត្តបន្ទាយមានជ័យ។
លោកឧត្តមសេនីយ៍ ភ្លន់ តារ៉ា បានឲ្យដឹងថា ការចុះរុះរើនេះ ក្រោយពលរដ្ឋមិនបានរុះរើខ្លួនឯងតាមការណែនាំ ខណៈអ្នកខ្លះស្ម័គ្រចិត្តរុះរើ។
លោកបានបន្តថា៖ «គាត់ព្រមរុះរើ ប៉ុន្តែយើងមានគោលនយោបាយអប់រំគាត់មួយ។ បើគាត់ពិតជាពលរដ្ឋក្រីក្រពិតប្រាកដអត់មានដីពិតប្រាដកមែនសូមឲ្យដាក់សំណើតាមភូមិឃុំស្រុកទៅ។ សមាគមនឹងផ្តល់ជូនដោយសារយើងគិតថា ក្រសួងនិងខេត្តប្រគល់ឲ្យសមាគម(យោធិន)យើងមិនដាក់តែកងកម្លាំងប្រដាប់អាវុធទេ ពលរដ្ឋក្រីក្រក៏យើងឲ្យដែរឲ្យតែគាត់ពិតជាអត់ផ្ទះអត់ដីពិតប្រាកដ។ យើងបានផ្សព្វផ្សាយហើយ ឲ្យគាត់ដាក់ពាក្យតែមិនទាន់មានអ្នកដាក់ពាក្យទេ»។
លោកថា ពលរដ្ឋទាំង៨៣គ្រួសារនេះ បានទទួលទិញដីពីជនល្មើស៣នាក់ដែលបានបញ្ចុះបញ្ជូលឲ្យពួកគាត់ទិញក្នុងតម្លៃ១ម៉ឺនបាតក្នុងក្បាលដី២០ម៉ែត្រនិងបណ្ដោយ៥០០ម៉ែត្រហើយផ្ទះមួយខ្នងត្រូវមេខ្លោងទាំង៣នាក់លក់ឲ្យក្នុងតម្លៃ៦ពាន់បាត ។
កាលពីខែកុម្ភៈ មនុស្ស ៣ នាក់ត្រូវបានសមត្ថកិច្ចចាប់ខ្លួនបញ្ជូនទៅតុលាការពាក់ព័ន្ធនឹងការញុះញង់ឲ្យពលរដ្ឋទៅកាន់កាប់ដីការ៉េ២ឬដីសម្បទានសង្គមកិច្ចសម្រាប់យោធិនមានទំហំ ២២២២ ហិតា។
លោក ភ្លន់ តារា បញ្ជាក់ថា៖ «អ្នកនៅពីក្រោយខ្នងដែលគាំទ្រឈ្មោះ ជំទាវ ឌី ព្រឹម។ ឃើញគាត់ខល (call) មកខ្ញុំដែរ ប៉ុន្តែខ្ញុំអត់ដោះស្រាយ។ គាត់ថា គាត់ជីដូនមួយសម្តេច។ ប៉ុន្តែមិនដឹងមែនមិនមែនបើជួបតាមទូរស័ព្ទយើងម៉េចដឹង។ ខ្ញុំថាបើជីដូនមួយសម្តេចបើសម្តេចបញ្ជាមក យើងលែងហើយ។ គាត់ខលមកគាត់ចង់ឲ្យយើងដោះលែង៣នាក់ហ្នឹងតាំងពីចាប់ដំបូងគាត់ខលយើងមកបញ្ជាយើង ហើយថ្ងៃ១៩ ខែកុម្ភៈ គាត់គំរាមម្តងទៀតតែខ្ញុំអត់ស្តាប់»។
ពាក់ព័ន្ធនឹងដីនេះ លោក ស៊ុំ ចាន់គា មន្ត្រីសិទ្ធិមនុស្សអាដហុកនិយាយថា មានជាប់ពាក់ព័ន្ធនឹងពលរដ្ឋរាប់ពាន់នាក់។ លោកថា ពលរដ្ឋកំពុងប្រមូលឯកសារពាក់ព័ន្ធ។
ពលរដ្ឋម្នាក់ឈ្មោះ ហួន ភី មកពីស្រុកស្វាយចេក និយាយថា ដីដែលលោកអាស្រ័យផលមិនត្រូវបានចុះបំផ្លាញទេ កាលពីថ្ងៃសុក្រ ព្រោះនៅខុសពីទីតាំងដែលមានផ្ទះ៨៣ខ្នង។ លោកថាដីនេះជាដីរបស់លោកដោយសារលោកបានធ្វើចម្ការដំឡូងមីនៅលើដីនេះ តាំងពីឆ្នាំ ២០០១ មកម៉្លេះ។
ទោះយ៉ាងណា លោកថា លោកបានឃើញលិខិតជូនដំណឹងពីសាលាខេត្តកាលពីពេលថ្មីៗនេះថា សូមបងប្អូនរុះរើចេញពីដីការ៉េ២នេះឲ្យបានមុនថ្ងៃទី១៩ ខែកុម្ភៈ។
លោកថា៖ «ខ្ទមពួកខ្ញុំអត់មានគេចុះមករុះរើទេតែសមត្ថកិច្ចគេមកហាមឃាត់មិនឲ្យភ្ជួររាស់បន្តសកម្មភាពតទៅទៀត»។ លោកបន្តថា ពលរដ្ឋមិនមានអ្វីដែលត្រូវតតាំងជាមួយសមត្ថកិច្ចទេ បើសិនជាពួកគេចុះបង្ក្រាប៕