Search form

Login - Register | FOLLOW US ON

Logo of Phnom Penh Post newspaper Phnom Penh Post - មន្ត្រី​សិទ្ធិ​មនុស្ស-​ពលរដ្ឋ​ ១៧ ​​នាក់​ត្រូវ​ឃាត់​ខ្លួន​នៅពេល​តវ៉ា

សកម្មជន​សិទ្ធិ​មនុស្ស​ និង​ពលរដ្ឋ​ដែល​ឃាត់​ខ្លួន​កាលពី​ម្សិលមិញ។
សកម្មជន​សិទ្ធិ​មនុស្ស​ និង​ពលរដ្ឋ​ដែល​ឃាត់​ខ្លួន​កាលពី​ម្សិលមិញ។ រូបថត សហការី

មន្ត្រី​សិទ្ធិ​មនុស្ស-​ពលរដ្ឋ​ ១៧ ​​នាក់​ត្រូវ​ឃាត់​ខ្លួន​នៅពេល​តវ៉ា

កោះកុងៈ មន្ត្រី​អង្គការ​សង្គម​ស៊ីវិល​អ្នក​សារព័ត៌មាន និង​ប្រជាពលរដ្ឋ​ ១៧ ​នាក់​ត្រូវ​បាន​សមត្ថកិច្ច​ខេត្ត​កោះកុង​ឃាត់​ខ្លួន​រយៈពេល​មួយ​ថ្ងៃ​កាលពី​ម្សិលមិញ​ខណៈ​ប្រជាពលរដ្ឋ​ធ្វើការ​ទាមទារ​ឲ្យ​មាន​ការ​ដោះលែង​សកម្មជន​បរិស្ថាន​ ៣ ​រូប​ដែល​ត្រូវ​បាន​អាជ្ញាធរ​ឃាត់​ខ្លួន​នៅក្នុង​ពន្ធនាគារ​ស្រប​ពេល​មាន​ក្រុម​អ្នក​តវ៉ា​មួយ​ក្រុម​ផ្សេង​ទៀត​ធ្វើការ​តវ៉ា​ប្រឆាំង​នឹង​ក្រុម​ពលរដ្ឋ​ឲ្យ​បញ្ឈប់​ធ្វើការ​តវ៉ា​។

មន្ត្រី​សម្រប​សម្រួល​អង្គការ​លីកាដូ​ប្រចាំ​ខេត្ត​កោះកុង លោក អ៊ិន គង់ជិត​ជា​សកម្មជន​សិទ្ធិ​មនុស្ស​ម្នាក់​ក្នុង​ចំណោម ១៧​ នាក់​ដែល​ត្រូវ​បាន​ឃាត់​ខ្លួន​កាលពី​ម៉ោង​ ១០​ព្រឹក​បាន​ថ្លែង​ពី​ស្នងការដ្ឋាន​នគរបាល​ខេត្ត​កោះកុង​បន្ទាប់ពី​មន្ត្រី​បាន​ធ្វើការ​សាកសួរ​ចប់​ថា​ប្រជាពលរដ្ឋ​ដែល​តវ៉ា​នោះ​នៅ​ស្ងៀម​ប៉ុន្តែ​មាន​ក្រុម​ប្រជាពលរដ្ឋ​ផ្សេង​ទៀត​ប្រមាណ​ជា​ ១០០ ​នាក់​បាន​មក​ធ្វើការ​តវ៉ា​ស្រែក​ឲ្យ​ពលរដ្ឋ​ដែល​តវ៉ា​ទាមទារ​ឲ្យ​ដោះលែង​សកម្មជន​ ៣ ​នាក់​ដែល​ឃាត់​ខ្លួន​ថា​បញ្ឈប់​ការ​តវ៉ា​ និង​វិល​ត្រឡប់​ទៅ​ផ្ទះ​វិញ​ដោយសារ​តែ​ការ​តវ៉ា​កន្លងមក​បាន​ធ្វើឲ្យ​ប៉ះពាល់​ដល់​ការ​រកស៊ី​របស់​ពួកគេ​។

លោក​ថា៖ «​តាមពិត​ក្រុម​ទាំងនោះ​គឺ​គាំទ្រ​ដោយ​អាជ្ញាធរ​ដើម្បី​មក​បំបែក​ពលរដ្ឋ​ដែល​តវ៉ា​ហើយ​នេះ​ក៏​ជា​ការ​រំលោភ​យ៉ាង​ធ្ងន់ធ្ងរ​មក​លើ​រូប​ខ្ញុំ​ដែល​ធ្វើការ​ខាង​សិទ្ធិ​មនុស្ស​ដែល​ទៅ​ឃ្លាំ​មើល​ខ្លាច​មាន​ការ​ប្រើ​ហិង្សា​រវាង​ប្រជាពលរដ្ឋ និង​ពលរដ្ឋ​តែ​ប៉ុណ្ណោះ​។ ខ្ញុំ​គិត​ថា​គេ​ចង់​បំបាក់​ស្មារតី​ពួកយើង​តែ​ប៉ុណ្ណោះ​»។

លោក​បាន​ថ្លែង​ថា​មនុស្ស​ចំនួន​ ១៧ ​នាក់​ដែល​ត្រូវ​ឃាត់​ខ្លួន​នោះ​មាន​ប្រជាសហគមន៍​ចំនួន​​ ៧ ​នាក់​មន្ត្រី​សិទ្ធិ​មនុស្ស​ ៦ ​នាក់​ និង​សិស្ស​និស្សិត​ចំនួន​ ៤ ​នាក់​ហើយ​ទាំង​រូប​លោក​ និង​ជន​ដែល​ត្រូវ​ឃាត់​ខ្លួន​ទាំងអស់​នោះ​ត្រូវ​បាន​នាំ​យក​មក​សាកសួរ​នៅក្នុង​ស្នងការដ្ឋាន​នគរបាល​ខេត្ត​កោះកុង​ដោយ​គេ​ផ្តោត​ទៅលើ​អង្គការ​ណា​ជា​អ្នក​ដឹកនាំ​មក​ហើយ​ក្នុង​គោលបំណង​​អ្វី​? ហើយ​ក្រោយ​ពី​សាកសួរ​អស់​រយៈ​ពេញ​មួយ​ថ្ងៃ​បាន​​ឲ្យ​ត្រឡប់​មក​វិញ​ដោយ​សន្យា​ពលរដ្ឋ​ថ្ងៃ​ក្រោយ​ធ្វើ​អ្វី​ត្រូវ​ប្រាប់​អាជ្ញាធរ​ចំណែក​មន្ត្រី​សិទ្ធិ​មនុស្ស​ត្រូវ​ធ្វើការ​កុំ​ឲ្យ​ហួស​ព្រំដែន​របស់​ខ្លួន​។

លោក វ៉ែន វ៉ន តំណាង​ប្រជាពលរដ្ឋ​មកពី​អារ៉ែង​ដែល​ត្រូវ​បាន​​​ឃាត់​ខ្លួន​ដែរ​នោះ​​ថ្លែង​ថា​ពលរដ្ឋ​ដែល​​ធ្វើ​ការ​ទាមទារ​ឲ្យ​ដោះលែង​សកម្មជន​មាតា​ធម្មជាតិ​ ៣ ​នាក់​នោះ​គឺ​ពុំ​ដែល​បង្ក​ឲ្យ​មាន​បញ្ហា​អ្វី​នោះ​ទេ​ប៉ុន្តែ​អាជ្ញាធរ​ទេ​ដែល​ជា​អ្នក​បង្ក​បញ្ហា​គឺ​បង្កើត​ក្រុម​ពលរដ្ឋ​ឲ្យ​ចេញ​មក​តវ៉ា​ប្រឆាំង​ជាមួយ​ពួក​លោក​។

លោក​ថា៖ «​គេ​ចង់​បំបែក​ពួកយើង​កុំ​ឲ្យ​តវ៉ា​តែ​ប៉ុណ្ណោះ​»​។

លោក​ថា​នៅក្នុង​ពេល​ដែល​អាជ្ញាធរ​បង្ក្រាប​ចាប់​ខ្លួន​ពលរដ្ឋ​ដើម្បី​បំបែក​នោះ​ក៏​មាន​កើត​ហិង្សា​ផង​ដែរ​បណ្តាល​ឲ្យ​ស្ត្រី​ម្នាក់​សន្លប់ និង​​ម្នាក់​ទៀត​រងរបួស​ហើយ​អ្នក​របួស​ក៏​ត្រូវ​បាន​ចាប់​ខ្លួន​មក​ស្នងការ​ផង​ដែរ​។ លោក​ថា​៖ «​ពួកយើង​គ្រាន់តែ​សុំ​ឲ្យ​ដោះលែង​សកម្មជន​ ៣ ​នាក់​ប៉ុណ្ណោះ​»។

កញ្ញា អ៊ុត រីឌី ដែល​បាន​រងរបួស​បាន​ថ្លែង​ថា​អាជ្ញាធរ​បាន​ព្យាយាម​សួរ​ថា​តើ​អង្គការ​ណា​ជា​អ្នក​រៀបចំ​ឲ្យ​​មក​ធ្វើការ​តវ៉ា​ប៉ុន្តែ​នាង​បាន​ឆ្លើយ​ថា​មិន​មាន​អ្នក​ណា​រៀបចំ​នោះ​ទេ​គឺ​ឡើង​មក​ដោយ​ខ្លួនឯង​ហើយ​ថ្លៃ​ហូប​ចុក​ក៏​ចេញ​ដោយ​ខ្លួនឯង​ដែរ​។

កញ្ញា​ថា៖ «​គេ​វាយ​ខ្ញុំ​ឲ្យ​របួស​ហើយ​គេ​ចាប់​ខ្ញុំ​មក​​ដាក់​ស្នងការ​ទៀត​វា​អយុត្តិធម៌​ណាស់​គេ​ធ្វើ​អាង​តែ​គេ​មាន​អំណាច»។

កញ្ញា​បាន​ឲ្យ​ដឹង​ទៀត​ថា​ក្រោយពី​ឃាត់​ខ្លួន​អស់​មួយ​ថ្ងៃ​គេ​ឲ្យ​ពលរដ្ឋ​ផ្តិត​មេដៃ​ថា​ថ្ងៃ​ក្រោយ​បើ​ចង់​តវ៉ា​ត្រូវ​ជូន​ដំណឹង​គេ​ជា​មុន​។

សាលាក្រុង​ខេមរភូមិន្ទ​បាន​ហាម​មិន​ឲ្យ​មាន​ការ​ជួបជុំ​តវ៉ា​ដោយ​​ចោទ​ថា​ធ្វើឲ្យ​ប៉ះពាល់​ដល់​​សណ្តាប់ធ្នាប់​សាធារណៈ និង​​ដាក់​កំហិត​ដល់​ក្រុម​ពលរដ្ឋ​ឲ្យ​បញ្ឈប់​រាល់​សកម្មភាព​តវ៉ា​នៅ​ម៉ោង​ ៥ ​ល្ងាច​ថ្ងៃ​ទី​ ២ ខែ​កញ្ញា​នេះ​ដោយ​ព្រមាន​ថា​នឹង​ចាត់​ការ​តាម​វិធានការ​ច្បាប់​។

ទាក់ទិន​ទៅ​នឹង​ការ​ចាប់​ខ្លួន​នោះ​លោក ប៊ុន លើត អភិបាលខេត្ត​កោះកុង​ពុំ​អាច​ទាក់ទង​ដើម្បី​ធ្វើការ​អត្ថាធិប្បាយ​បាន​ទេ​កាលពី​ម្សិលមិញ។

ប៉ុន្តែ​លោក សំឃិត វៀន ស្នងការ​នគរបាល​ខេត្ត​កោះកុង​បាន​ថ្លែង​ថា​ការ​ឃាត់​ខ្លួន​នោះ​គឺ​ដើម្បី​មក​សួរ​នាំ​ជុំវិញ​ការ​តវ៉ា​កន្លងមក​តែ​ប៉ុណ្ណោះ​គឺ​ពុំ​មាន​ការ​ឃាត់​ខ្លួន​អ្វី​នោះ​ទេ​។

លោក​បាន​ថ្លែង​ថា៖ «​យើង​គ្រាន់តែ​សួរនាំ​ប៉ុណ្ណោះ​»។

យោង​តាម​សេចក្តី​ប្រកាស​របស់​សាលា​ខេត្ត​កោះកុង​ចេញ​ផ្សាយ​កាលពី​ថ្ងៃ​ទី​ ១៨ ខែ​សីហា​អះអាង​ថា​ការ​ចាប់​ខ្លួន​របស់​សកម្មជន​ដែល​ជា​សមាជិក​អង្គការ​មាតា​ធម្មជាតិ​បី​នាក់​ដោយ​ចោទ​ពី​បទ​ធ្វើ​សកម្មភាព​បំផុស​បំផុល​ឱ្យ​មាន​ការ​តវ៉ា​ប្រឆាំង​នឹង​ការ​បូម​ខ្សាច់​របស់​ក្រុមហ៊ុន Direct Access ដែល​អាជ្ញាធរ​អះអាង​ថា​ជា​ក្រុមហ៊ុន​ស្រប​ច្បាប់​ទទួល​អាជ្ញាប័ណ្ណ​ពី​ក្រសួង​រ៉ែ និង​ថាមពល​។

ប៉ុន្តែ​សកម្មជន​ដែល​នាំ​គ្នា​តវ៉ា​ប្រឆាំង​នឹង​ក្រុម​បូម​ខ្សាច់​របស់​វៀតណាម​នោះ​អះអាង​ថា​ពួកគេ​តវ៉ា​ដោយសារ​ការ​បូម​ខ្សាច់​នេះ​ធ្វើឲ្យ​ប៉ះពាល់​លំនៅឋាន​ប្រជាជន​ដែល​រស់នៅ​ក្បែរ​ព្រែក​ព្រមទាំង​ធ្វើឲ្យ​ប៉ះពាល់​ជម្រក​មច្ឆជាតិ និង​ការ​នេសាទ​ត្រី​របស់​ប្រជានេសាទ​នៅក្នុង​តំបន់​នោះ​។

លោក ប៊ុន ស៊ីយុន ប្រធាន​មន្ទីរ រ៉ែ និង​ថាមពល​ខេត្ត​បាន​ថ្លែង​ថា​ទាក់ទិន​ទៅ​នឹង​បញ្ហា​ក្រុមហ៊ុន​នោះ​លោក​ពុំ​សូវ​ដឹង​ច្បាស់​នោះ​ទេ​ដោយសារ​នេះ​ជា​ការ​សម្រេច​របស់​ក្រសួង។ លោក​ថា៖ «​ទាល់តែ​សួរ​ក្រសួង​បាន​ដឹង»។

លោក​ ឌិត ទីណា អ្នក​នាំពាក្យ​ក្រសួង​រ៉ែ និង​ថាមពល​បាន​ថ្លែង​ថា​ក្រុមហ៊ុន Direct Access បាន​សុំ​បន្ត​អាជ្ញាប័ណ្ណ​របស់​ខ្លួន​ហើយ​ក្រុមហ៊ុន​បាន​ស្នើ​មុន​ និង​ជិត​ផុត​អាជ្ញាប័ណ្ណ។​ លោក​បាន​ថ្លែង​ថា៖ «​ខ្ញុំ​មិន​ចាំ​ថា​ពេល​ណា​ទេ​តែ​គេ​ស្នើ​សុំ​មុន​ផុត​កំណត់»។

កាលពី​ថ្ងៃ​ម្សិលមិញ​នេះ​ដែរ​ ​អង្គការ​ការពារ​សិទ្ធិ​មនុស្ស​ លីកាដូ សមាគមការពារ​សិទ្ធិ​មនុស្ស​​អាដហុក​ និង​មជ្ឈមណ្ឌល​ច្បាប់​សម្រាប់​សហគមន៍​បាន​ចេញ​សេចក្តី​ថ្លែងកាណ៍​រួម​គ្នា​ដោយ​អំពាវនាវ​ឲ្យ​មាន​​ការ​ដោះលែង​អ្នក​ទាំង​ ១៧ ដែល​បាន​ឃុំ​ខ្លួន​នោះ​ជា​បន្ទាន់​ដោយ​ចាត់​ទុក​ថា​នេះ​គឺជា​វិធីសាស្ត្រ​គួរ​ឲ្យ​ព្រួយបារម្ភ​មួយ​ផ្សេង​ទៀត​ដែល​ត្រូវ​បាន​ប្រើប្រាស់​ដោយ​អាជ្ញាធរ​រដ្ឋ​ក្នុង​ការ​បំភិត​បំភ័យ​ និង​គាបសង្កត់​ទៅលើ​ក្រុម​ប្រជាពលរដ្ឋ​មូលដ្ឋាន​ដែល​សម្តែង​នូវ​ការ​មិន​ពេញ​ចិត្ត​ដោយ​អហិង្សា​របស់​អ្នក​ទាំងនោះ​៕

0

Comments

Please, login or register to post a comment