Search form

Login - Register | FOLLOW US ON

Logo of Phnom Penh Post newspaper Phnom Penh Post - មន្ត្រី​អាដហុក​ ៤ នាក់​ត្រូវ​នាំ​ខ្លួន​មក​ជំនុំជម្រះ​នៅ​សាលា​ឧទ្ធរណ៍

លោកស្រី លឹម មុន្នី ​នៅ​សាលា​ឧទ្ធរណ៍​ពី​ម្សិលមិញ​។
លោកស្រី លឹម មុន្នី ​នៅ​សាលា​ឧទ្ធរណ៍​ពី​ម្សិលមិញ​។ ហេង ជីវ័ន

មន្ត្រី​អាដហុក​ ៤ នាក់​ត្រូវ​នាំ​ខ្លួន​មក​ជំនុំជម្រះ​នៅ​សាលា​ឧទ្ធរណ៍

ភ្នំពេញៈ កាលពី​ម្សិលមិញ​សាលា​ឧទ្ធរណ៍​បាន​បើក​សវនាការ​ចំពោះ​បណ្តឹង​ឧទ្ធរណ៍​របស់​មន្ត្រី​អង្គការ​សិទ្ធិ​មនុស្ស​អាដហុក​ចំនួន​ ៤​រូប​ដែល​ប្តឹង​សុំ​មោឃភាព​នីតិវិធី​របស់​អង្គភាព​ប្រឆាំង​អំពើ​ពុករលួយ​ពាក់ព័ន្ធ​នឹង​ការ​ឃុំ​ខ្លួន​ចាប់​តាំងពី​ចុង​ខែ​មេសា​ហើយ​សំណុំ​រឿង​នេះ​សាលា​ឧទ្ធរណ៍​នឹង​ប្រកាស​សាលដីកា​នៅ​ថ្ងៃ​ទី​ ២ ​ខែ​កញ្ញា​។

មន្ត្រី​សិទ្ធិ​មនុស្ស​ដែល​ជាប់​ពន្ធនាគារ​ទាំង​ ៤ ​រូប​នោះ​រួមមាន​លោក យី សុខសាន្ត លោកស្រី លឹម មុន្នី លោក នី សុខា និង​ លោក ណៃ វ៉ង់ដា ដែល​ត្រូវ​បាន​ឃុំ​ខ្លួន​បណ្តោះ​អាសន្ន​ចាប់​តាំងពី​ដើម​ខែ​ឧសភា​កន្លង​មក​ដោយ​ត្រូវ​បាន​ចោទប្រកាន់​ពី​បទ​សូកប៉ាន់​សាក្សី​ក្នុង​សំណុំ​រឿង​អ្នកនាង ខុម ចាន់តារាទី ហៅ​ ស្រីមុំ ដែល​ត្រូវ​បាន​គេ​អះអាង​ថា​ ជា​ស្រី​កំណាន់​លោក កឹម សុខា ​ប្រធាន​ស្តីទី​គណបក្ស​សង្គ្រោះ​ជាតិ​។

មន្រ្តី​គណៈកម្មាធិការ​ជាតិ​រៀបចំ​ការ​បោះឆ្នោត​ លោក នី ចរិយា ក៏​ត្រូវ​បាន​ចោទប្រកាន់​ពី​បទ​សមគំនិត​ក្នុង​ករណី​ដូច​គ្នា​នេះ​ដែរ​ ដែល​បាន​ប្តឹង​ឧទ្ធរណ៍​កាលពី​សប្តាហ៍​មុន​ទៅ​លើ​ករណី​ដូច​គ្នា​ដើម្បី​សុំ​ឲ្យ​ទម្លាក់​ចោល​ការ​ចោទប្រកាន់​ទៅ​លើ​រូប​លោក​។

ប្រធាន​ចៅក្រម​ជំនុំជម្រះ​លោក​ ងួន រតនា បាន​បញ្ជាក់​ថា​សិទ្ធិ​របស់​លោក​ នី ចរិយា ​មិន​ត្រូវ​បាន​គេ​រំលោភ​នោះ​ទេ​ទោះបី​ជា​លោក ចរិយា ត្រូវ​បាន​សាកសួរ​ដោយ​មន្ត្រី​អង្គភាព​ប្រឆាំង​អំពើ​ពុករលួយ​ក៏​ដោយ​។

មេធាវី​របស់​មន្ត្រី​សិទ្ធិមនុស្ស​ទាំង​បួន​​រូប​គឺ​លោក ហួន ជុនឌី បាន​​និយាយ​ថា​ករណី​នេះ​គួរ​តែ​ត្រូវ​បាន​ទម្លាក់​ចោល​ដោយសារ​តែ​ការ​ជាប់​ឃុំ​របស់​កូន​ក្តី​លោក​គឺ​វា​បាន​រំលោភ​ទៅ​លើ​មាត្រា ៩៦ នៃ​ក្រមនីតិវិធី​ព្រហ្មទណ្ឌ​គឺ​ការ​ឃាត់​ខ្លួន​មាន​ថេរវេលា​ ៤៨ ​ម៉ោង​គឺ​ថិរវេលា​ត្រូវ​គិត​ចាប់ពី​ម៉ោង​ដែល​សាមី​ខ្លួន​មក​ដល់​អង្គភាព​នគរបាល​ ឬ​កងរាជអាវុធហត្ថ​។​

លោក​​ថ្លែង​ថា​៖ «ការ​ឃុំ​ខ្លួន​របស់​ពួកគាត់​មិន​បាន​ចាប់ផ្តើម​គិត​ពី​ [នាទី] ដែល​ពួកគេ​បាន​ដើរ​ចូល​ទៅ​ក្នុង​អង្គភាព​ប្រឆាំង​អំពើ​ពុករលួយ​នោះ​ទេ​គឺ​វា​ជា​ការ​រំលោភ​លើ​មាត្រា ៩៦ នៃ​ក្រមនីតិវិធី​ព្រហ្មទណ្ឌ​»។

ដូច្នេះ​ ដោយ​ផ្អែក​លើ​មាត្រា​ ១១៧ នៃ​ក្រម​ដដែល​នេះ​លោក​បាន​ថ្លែង​ថា​ករណី​របស់​ពួកគាត់​គួរ​តែ​មោឃភាព​នីតិវិធី​ដោយសារ​តែ​វា​មិន​អនុលោម​តាម​ច្បាប់​។

នៅ​ពេល​ចាកចេញ​ពី​តុលាការ​កាលពី​ម្សិលមិញ​លោក​ វ៉ង់ដា បាន​ឱ្យ​ដឹង​ថា​គឺ​អ្នកនាង​ ចាន់តារាទី ដែល​ជា​អ្នក​បាន​ផ្លាស់ប្តូរ​រឿងរ៉ាវ​របស់​​លោក​ប៉ុន្តែ​នៅ​ពេល​នេះ​មន្ត្រី​របស់​អង្គការ​អាដហុក​ត្រូវ​បាន​គេ​ផ្តន្ទាទោស​ទៅ​វិញ។

ដូច​គ្នា​ដែរ​ លោកស្រី មុន្នី ​បាន​ថ្លែង​ថា​លោកស្រី​មិន​មាន​សង្ឃឹម​ថា​តុលាការ​នឹង​មោឃភាព​នីតិវិធី​ឱ្យ​ពួក​អ្នកស្រី​ដែល​ជា​ជនរងគ្រោះ​នោះ​ទេ​៕ NS

0

Comments

Please, login or register to post a comment

ព័ត៌មានពាក់ព័ន្ធ