Search form

Login - Register | FOLLOW US ON

Logo of Phnom Penh Post newspaper Phnom Penh Post - មន្ត្រី​ក្រសួង​ការងារ​នឹង​ទៅ​ពិនិត្យ​ស្ថានភាព​ពលករ​នៅ​កូរ៉េ

មន្ត្រី​ក្រសួង​ការងារ​នឹង​ទៅ​ពិនិត្យ​ស្ថានភាព​ពលករ​នៅ​កូរ៉េ

130109_08
ពលការិនីខ្មែរដែលប៉ុនប៉ងទៅប្រទេសកូរ៉េ តែត្រូវគេបោកប្រាស់កន្លងមក ហេង ជីវ័ន

ភ្នំពេញៈ មន្ត្រី​ក្រសួង​ការងារ​និង​បណ្តុះ​បណ្តាល​វិជ្ជាជីវៈ នឹង​ចេញ​ដំណើរ​ទៅ​កាន់​ប្រទេស​កូរ៉េ​ខាង​ត្បូង​នៅ​ថ្ងៃ​ទី១១​ដល់​ថ្ងៃ​ទី១៨ មេសា​ ក្នុង​គោល​បំណង​ទៅ​សួរ​សុខ​ទុក្ខ ស្វែង​យល់​ពី​កង្វល់​របស់​ពលករ​ខ្មែរ និង​ជម្រាប​ពី​ផែនការ​របស់​រដ្ឋាភិបាល​ក្នុង​ការ​ជម្លៀស​ពួក​គេ​ចេញ​ពី​តំបន់​មាន អាសន្ន​ ខណៈ​កូរ៉េ​ខាង​ជើង​នៅ​តែ​កំញើញ​ប្រកាស​សង្គ្រាម​ជាមួយ​កូរ៉េ​ខាង​ត្បូង ដែល​កំពុង​គាំទ្រ​ដោយ​សហរដ្ឋ​អាមេរិក។

ប៉ុន្តែ​ទោះ​យ៉ាង​ណា មន្ត្រី​កម្ពុជា​ថា​ ផែន​ការ​របស់​រដ្ឋាភិបាល​ក្នុង​ការ​ត្រៀម​បញ្ជូន​ពលករ​ចេញ​ពី​ប្រទេស​កូរ៉េ ខាង​ត្បូង គឺ​ជា​«ការ​ត្រៀម​លក្ខណៈ​ និង​មាន​ផែនការ​ដូច​គ្នា» ​នឹង​ប្រទេស​ដទៃៗ​ដែល​មាន​ពលករ​នៅ​ទីនោះ​ដែរ ​គ្រាន់​តែ​មិន​ចង់​ឲ្យ​បែក​ខ្ចរខ្ចាយ​ខ្លាំង ហើយ​ចង់​ប្រកាស​ប្រាប់​កូរ៉េ​ខាង​ជើង​ថា«គ្មាន​អ្នក​ណា​តក់​ស្លុត» នឹង​ការ​ប្រកាស​សង្គ្រាម​នោះ​ទេ ព្រោះ​សហគមន៍​អន្តរជាតិ​គាំទ្រ​កូរ៉េ​ខាង​ត្បូង។

នេះ​បើ​តាម​លោក ហេង សួរ អគ្គនាយក​និង​ជា​ប្រធាន​អង្គភាព​រដ្ឋបាល​និង​ហិរញ្ញ​វត្ថុ​នៃ​គណៈកម្មាធិការ​បណ្តុះ​បណ្តាល​និង​បញ្ជូន​ពលករ​ទៅ​បរទេស​របស់​ក្រសួង​ការងារ​និង បណ្តុះ​បណ្តាល​វិជ្ជាជីវៈ ប្រាប់​ភ្នំពេញ​ប៉ុស្តិ៍​កាលពី​ព្រឹក​ថ្ងៃទី​៨ ខែ​មេសា។

លោក ​ហេង សួរ​ ឲ្យ​ដឹង​ថា ពេល​ទៅ​ដល់​លោក​នឹង​ទៅ​ជួប​សវនាការ​ជាមួយ​ក្រសួង​ការ​ងារ​នៃ​សាធារណរដ្ឋ​កូរ៉េ ដើម្បី​ចង់​ស្វែង​យល់​ពី​ស្ថានការណ៍​សន្តិ​សុខ​នៅ​ឧបទ្វីប​កូរ៉េ បន្ទាប់​មក​នៅ​ថ្ងៃទី​១៤ ខែ​មេសា មន្ត្រី​ការ​ងារ​កម្ពុជា​គ្រោង​ជួប​ជា​មួយ​ពលករ​ខ្មែរ​ចំនួន​២ពាន់​នាក់​ ដែល​ធ្វើ​ជា​កម្មករ​នៅ​ជុំវិញ​ទីក្រុង​សេអ៊ូល។

លោក ថ្លែង​ថា៖ «ខ្ញុំ​ទៅ​ថ្ងៃ​១១​មេសា ជួប​ក្រសួង​ការងារ​កូរ៉េ​ខាង​ត្បូង ឲ្យ​គាត់​ជម្រាប​ពី​បញ្ហា​សន្តិសុខ រួច​ក៏​គ្រោង​ជួប​ខ្មែរ​យើង​ប្រមាណ​២ពាន់​នាក់។​ យើង​អាច​ចែក​ព័ត៌មាន​ផ្ទាល់​អំពី​លទ្ធភាព​នៃ​ការ​ជម្លៀស​យ៉ាង​ម៉េច»។

លោក បន្ត​ថា៖ «សូម​ជម្រាប​ថា មក​ដល់​ម៉ោង​នេះ គ្មាន​ប្រទេស​ណា​មួយ​ បាន​ហៅ​ពលករ​ឲ្យ​ត្រឡប់​មក​វិញ​ទេ តែ​គេ​គ្រាន់​តែជូន​ដំណឹង​។ ឯ​យើង​ក៏​ត្រៀម​លក្ខណៈ​ដូច​គ្នា»។

លោក​ថា ពលករ​ខ្មែរ​ធ្វើ​ការ​នៅ​ទីនោះ​មាន​ជាង​២ម៉ឺន​នាក់ តែ​អាច​មាន​ពលករ​ចប់​កុង​ត្រា ហើយ​បន្ត​ធ្វើ​ការ​ខុស​ច្បាប់​ដែល​អាច​កើន​ដល់​២ម៉ឺន​៥​ពាន់​នាក់។

លោក ឲ្យ​ដឹង​បន្ត​ថា អ្វី​ដែល​ក្រសួង​ការងារ​ត្រៀម​ គឺ​ជម្លៀស​បង​ប្អូន​៨ពាន់​នាក់ ដែល​នៅ​ជុំ​វិញ​សេអ៊ូល​ឲ្យ​គាត់​ចេញ​ទៅ​ខេត្ត​មុខ​សញ្ញា​ដែល​ជួយ​សង្គ្រោះ​ បាន​ គឺ​ខេត្ត​ប៊ូសាន​ នៅ​ចម្ងាយ​១ម៉ោង​កន្លះ ពី​ប្រទេស​ជប៉ុន​បើ​ជិះ​តាម​កប៉ាល់​ទឹក​។

លោក​និយាយ​ថា៖ «អ្វី​ដែល​យើង​គិត​គឺ យើង​មាន​លទ្ធភាព​ធ្វើ​ Charter Flight (ការហោះ​ហើរ​លក្ខណៈ​ឯកជន​ដោយ​គ្មាន​កម្មវិធី) ពី​ខេត្ត​ប៊ូសាន ទៅ​ខេត្ត​គ្យូស៊ូ របស់​ប្រទេស​ជប៉ុន​ ឬធ្វើ​ដំណើរ​ទៅ​ប្រទេស​ទីបី គឺចិន។ ព្រោះ​ បើ​ធ្វើ​ដំណើរ​ពី​ប៊ូសាន​មក​កម្ពុជា​ត្រូវ​ចំណាយ​ពេល​ហោះ​ហើរ​ជិត​៦​ម៉ោង អ៊ីចឹង​មិន​អាច​មាន​យន្ត​ហោះ​ចល័ត​បាន​ទេ។ ​ពេល​មាន​បញ្ហា​យើង​មិន​អាច​ធ្វើ​ដំណើរ​ឆ្ងាយ​ទេ ត្រូវ​រក​ប្រទេស​ណា​មួយ​ដើម្បី​សំចត​ធ្វើ​ម៉េច​ឲ្យ​ពលរដ្ឋ​មាន​សុវត្ថិភាព​ សិន​។ នេះ​និយាយ​ក្នុង​ករណី​មាន​រឿង​កើត​ឡើង​ទេ។​

លោក​បន្ត​ថា កិច្ចការ​ទាំង​នេះ លោក​បាន​ជម្រាប​ជូន​ថ្នាក់​ដឹក​នាំ​ក្រសួង​ និង​ឧបនាយក​​រដ្ឋ​មន្ត្រី​ ជា​រដ្ឋ​មន្ត្រី​ក្នុង​ក្រសួង​មួយ ដែល​លោក​សុំ​មិន​ប្រាប់​ឈ្មោះ។

ចំណែក​មន្ត្រី​ការ​បរទេស​កម្ពុជា នៅ​តែ​ចាត់​ទុក​ការ​ប្រកាស​ធ្វើ​សង្គ្រាម​របស់​កូរ៉េ​ខាង​ជើង​ ជា​សង្គ្រាម​ពាក្យ​សម្ដី និង​មិន​ព្រម​ជម្លៀស​ពលរដ្ឋ​ខ្លួន​ឡើយ ទោះ​កូរ៉េ​ខាង​ជើង បាន​ប្រកាស​ឲ្យ​ស្ថានទូត​នានា ក្នុង​ទីក្រុង​ព្យុងយ៉ាង​ជម្លៀស​មន្ត្រី​ខ្លួន​ចេញ​មុន​ថ្ងៃទី​១០ ខែ​មេសា​ក៏​ដោយ។ ​មិន​មាន​ដំណឹង​ថា​ ស្ថានទូត​បរទេស​ណាមួយ​ បាន​ចាក​ចេញ​ពី​កូរ៉េ​នៅ​ឡើយ​ទេ។

លោក កុយ គួង អ្នក​នាំ​ពាក្យ​ក្រសួង​ការ​បរទេស​និង​សហប្រតិបត្តិការ​អន្តរជាតិ​ ថ្លែង​កាលពី​ព្រឹក​មិញ​ថា ៖ «រឿង​បញ្ហា​តាន​តឹង​នៅ​ឧប​ទ្វីបកូរ៉េ យើង​អត់​ទាន់​មាន​ចាត់​វិធានការ​អ្វី​ទេ​លើ​ពលករ​នៅ​ទីនោះ​ ដោយ​យើង​យល់​ថា​ នៅ​តែ​ជា​សង្គ្រាម​ពាក្យ​សម្តី​នៅ​ឡើយ​។ ឯមន្ត្រី​ស្ថាន​ទូត​កូរ៉េ​នៅ​ទីនោះ​ ក៏​យើង​គ្មាន​វិធានការ​ជម្លៀស​មក​ដែរ គឺ​ឲ្យ​គាត់​ធ្វើ​ការ​ធម្មតា។ ពលករ និស្សិត ពលរដ្ឋ​យើង​នៅ​កូរ៉េ​ខាង​ត្បូង​ ក៏​នៅ​តែ​បន្ត​ប្រកប​មុខ​របរ​ដដែល»​។

មន្ត្រី​ក្រសួង​ការងារ​ខាង​លើ នៅ​តែ​យល់​ថា ឱកាស​នៃ​ការ​ធ្វើ​សង្គ្រាម​នៅ​ឧបទ្វីប​កូរ៉េ មាន​តិច​បំផុត ដែល​តម្រូវ​ឲ្យ​រដ្ឋាភិបាល ​គឺ​ក្រសួង​ការ​បរទេស​កម្ពុជា នៅ​ស្ងៀម «មិន​ប្រកាសក្ឌុងក្ឌាំង ដូច​ប្រទេស​គេ ដែល​ខ្លាច​មាន​បញ្ហា​ផ្អើល​ឈូឆរ»។

ចំពោះ ទីផ្សារ​ការងារ លោក ​ហេង​ សួរ​ បាន​បញ្ជាក់​ឲ្យ​ដឹង​​ថា​ ប្រទេស​កូរ៉េ​មួយ​នេះ​​បាន​ផ្តល់​ការងារ​ដល់​ពលករ​ខ្មែរ ដែល​ជា​ទីផ្សារ​មាន​ប្រាក់​ខែ​ខ្ពស់​ជាង​គេ​។ «គ្មាន​ប្រទេស​ណា​​ផ្តល់​ប្រាក់​ខែ​ខ្ពស់​ និង​លក្ខខណ្ឌ​ការងារ​ល្អ​ដូច​កូរ៉េ​ទេ បើ​ធៀប​នឹង​ប្រទេស​នៅ​តំបន់​អាស៊ី​អាគ្នេយ៍​»។

លោក មីន រមណី អាយុ​២៩​ឆ្នាំ ពលករ​ខ្មែរ​កំពុង​ធ្វើ​ការ​បេះ​ផ្លែ​ឈើ​និង​បន្លែ​ក្នុង​កសិដ្ឋាន​មួយ​នៅ​ ខេត្ត​ ឈុង​ ចុងណាមដូ ប្រទេស​កូរ៉េ​ខាង​ត្បូង​ ប្រាប់​ភ្នំពេញ​ ប៉ុស្តិ៍​ម្សិលមិញ​ថា លោក​មិន​ទាន់​បាន​ទទួល​ព័ត៌មាន​ពី​មន្ត្រី​ខ្មែរ​ឲ្យ​ពលករ​នៅ​ទីនេះ​ត្រៀម​ បង្ការ​ខ្លួន ឬត្រៀម​ជម្លៀស​ទៅ​កាន់​ទីណា​នៅ​ឡើយ​ទេ។

លោក​និយាយ​ថា ៖ «អត់​ទាន់​មាន​មន្ត្រី​ខ្មែរ​ណា​ចុះ​មក​ពន្យល់​អ្វី​ឡើយ នៅ​កន្លែង​ខ្ញុំ​ដែល​នៅ​ក្បែរ​ព្រំដែន​ប្រទេស​ជប៉ុន​នេះ​ តែ​ខ្ញុំ​ឮថា​ ប្រទេស​ថៃ វៀតណាម គេ​ត្រៀម​ជម្លៀស​ពលរដ្ឋ​គេ​ បើ​មាន​សង្គ្រាម។ តែ​ខ្ញុំ​មិន​ជឿថា​មាន​សង្គ្រាម​អីទេ កូរ៉េ​ខាង​ជើង​ គ្រាន់​តែ​សម្ញែង​សព្វាវុធ​តែ​ប៉ុណ្ណោះ​។ ខ្ញុំ​យល់​ថា មិន​មាន​អ្វី​កើត​ឡើង​ទេ»៕

0

Comments

Please, login or register to post a comment

ព័ត៌មានពាក់ព័ន្ធ