ភ្នំពេញៈ សាលា​ដំបូង​រាជធានី​ភ្នំពេញ​កាលពី​ព្រឹក​ម្សិលមិញ​បាន​កាត់​ទោស​មេឃុំ​ពី​គណបក្ស​ប្រឆាំង​​លោក ស៊ាង ចែត​ ឲ្យ​ជាប់​​ពន្ធនាគារ​​រយៈពេល​កំណត់​ ៥ ឆ្នាំ​ពាក់ព័ន្ធ​បទ​ចោទ​​​សូកប៉ាន់​សាក្សី​គឺ​អ្នកនាង​ ខុម ចាន់តារាទី ហៅ​ ស្រីមុំ ដែល​ត្រូវ​បាន​គេ​អះអាង​ថា​ជា​ស្រី​កំណាន់​របស់​​លោក​ កឹម សុខា ប្រធាន​ស្តីទី​គណបក្ស​សង្គ្រោះ​ជាតិ។ ការ​កាត់​ទោស​នេះ​គឺ​ត្រូវ​បាន​ធ្វើ​ឡើង​​តែ​ ៣ ​ថ្ងៃ​ប៉ុណ្ណោះ​បន្ទាប់ពី​លោក​ ​កឹម សុខា ត្រូវ​បាន​ព្រះមហាក្សត្រ​លើកលែង​ទោស​ខណៈ​​ដែល​​មជ្ឈដ្ឋាន​ជាច្រើន​រំពឹង​​ថា​អ្នក​ជាប់​ឃុំ​ក្នុង​សំណុំ​រឿង​​ដែល​គេ​គិត​ថា​ជា​រឿង​នយោបាយ​អាច​នឹង​ត្រូវ​បាន​​ដោះលែង​ជា​កញ្ចប់​ក្នុង​ពេល​ឆាប់ៗ​ក្រោម​ការ​ចរចា​សម្រប​សម្រួល​ខាង​នយោបាយ។