ភ្នំពេញៈ មេដឹកនាំកម្ពុជា វៀតណាម មីយ៉ាន់ម៉ា ថៃ និងឡាវ បានជួបប្រជុំគ្នាជាមួយនាយករដ្ឋមន្ត្រីចិនលោក Li Keqiang នៅវិមានសន្តិភាពកាលពីម្សិលមិញសម្រាប់កិច្ចប្រជុំកិច្ចសហប្រតិបត្តិការមេគង្គ‑ឡានឆាង លើកទី ២ ដោយបានចេញសេចក្តីប្រកាសមួយដែលគូសបង្ហាញអំពីកិច្ចសហប្រតិបត្តិការដែលដឹកនាំដោយចិននៅក្នុងតំបន់នាពេលអនាគត សម្រាប់ការគ្រប់គ្រងទន្លេមេគង្គ។
លោកនាយករដ្ឋមន្ត្រី ហ៊ុន សែន បានថ្លែងក្នុងអំឡុងពិធីបើកកិច្ចប្រជុំកំពូលនេះថា៖ «យើងអាចឃើញពីសក្តានុពល និងថាមពលនៃទន្លេនេះ ដែលគាំទ្រជីវភាពប្រជាជនរាប់លាននាក់»។
បន្ទាប់ពីកិច្ចប្រជុំបិទទ្វាររយៈពេលមួយថ្ងៃ មេដឹកនាំទាំង ៦ ប្រទេសនេះបានធ្វើសន្និសីទកាសែត ១៩ នាទីដោយប្រកាសថាសេចក្តីប្រកាសរបស់ទីក្រុងភ្នំពេញត្រូវបានចុះហត្ថលេខាហើយផែនការរយៈពេល ៥ ឆ្នាំសម្រាប់កិច្ចសហប្រតិបត្តិការត្រូវបានអនុម័ត។
ខណៈអ្នកកាសែតត្រូវបានផ្តល់ឲ្យនូវសេចក្តីប្រកាសដែលមាន ៦ ទំព័រដែលបង្ហាញអំពីលក្ខខណ្ឌ និងវិស័យទូលំទូលាយនៃកិច្ចសហប្រតិបត្តិការខ្លឹមសារនៃផែនការរយៈពេល ៥ ឆ្នាំពីឆ្នាំ ២០១៨‑២០២២ នៅតែមិនត្រូវបានបង្ហាញជាសាធារណៈ។
នៅក្នុងសន្និសីទកាសែតនេះលោក ហ៊ុន សែន បានសរសើរកិច្ចសហប្រតិបត្តិការមេគង្គ‑ឡានឆាង ដែលដឹកនាំដោយចិនក្នុងនោះកម្ពុជាជាសហប្រធានបណ្តោះអាសន្នរហូតដល់ការប្រគល់តំណែងនេះទៅឡាវពីម្សិលមិញហើយចិនជាសហប្រធានអចិន្រៃ្តយ៍។
លោកថ្លែងថា៖ «អរគុណចិនចំពោះការគាំទ្រជានិច្ចនូវភាពជាសហប្រធានរបស់កម្ពុជា» ពីមុនពេលឲ្យលោក Keqiang និយាយម្តង ប៉ុន្តែសំណួរមិនត្រូវបានអនុញ្ញាតឲ្យសួរទេ។
លោក Keqiang បានលើកឡើងអំពីអត្ថប្រយោជន៍ដែលប្រទេសទន្លេមេគង្គទាំង ៥ នឹងទទួលបានពីចិនដោយលោកលើកឡើងពីការទិញផលិតផលកសិកម្មដូចជាអង្ករ និងផ្លែឈើ និងការសន្យាបន្ថែមទៀតនាពេលអនាគត។ នៅពេលនិយាយអំពីការបំពេញគោលបំណងរបស់កិច្ចសហប្រតិបត្តិការមេគង្គ‑ឡានឆាងចំពោះស្ថិរភាព និងវិបុលភាពលោកថ្លែងថា៖ «ចិនទទួលយកការទទួលខុសត្រូវនេះ»។
លោកថា៖ «ចិនត្រូវការបរិយាកាសស្ថិរភាពនៅប្រទេសជិតខាង» ដោយកត់សម្គាល់ថាបញ្ជីនៃគម្រោង ២០០ ត្រូវបានចែកចាយនៅកិច្ចប្រជុំនេះហើយថាការវិនិយោគ ពាណិជ្ជកម្ម និងទេសចរណ៍រយៈពេល ២ ឆ្នាំរវាងប្រទេសទាំងនេះបានកើនឡើង។
សេចក្តីប្រកាសរបស់ទីក្រុងភ្នំពេញបានសន្យានូវសន្តិភាព ស្ថិរភាព ការផ្សារភ្ជាប់សកម្មភាព ការអភិវឌ្ឍ និងការមិនជ្រៀតជ្រែក។
ចំពោះការគ្រប់គ្រងទន្លេមេគង្គដែលជាសន្តិសុខស្បៀង និងក្តីបារម្ភបរិស្ថានសម្រាប់ប្រទេសខ្សែទឹកខាងក្រោមដូចជាកម្ពុជា សេចក្តីប្រកាសនេះបានធ្វើការសន្យានូវ «កិច្ចសហប្រតិបត្តិការនៅក្នុងវិស័យការពារ និងកាត់បន្ថយគ្រោះមហន្តរាយ ជំនួយមនុស្សធម៌ ការដោះស្រាយផលប៉ះពាល់ពីការប្រែប្រួលអាកាសធាតុ ទឹកនិងសន្តិសុខថាមពលរួមទាំងការដោះដូរព័ត៌មាន»៕ PS