.jpg)
ក្រុមមេធាវីលោក កឹម សុខា ចូលរួមសវនាការក្រៅឃុំ កាលពីខែកញ្ញា ២០១៧ នៅសាលាឧទ្ធរណ៍។ ហេង ជីវ័ន
ភ្នំពេញៈ មេធាវី ឲ្យដឹងថា ចៅក្រមស៊ើបសួរសាលាដំបូងរាជធានីភ្នំពេញ បដិសេធ សំណើសុំឲ្យបំពេញកិច្ចស៊ើបសួរ តំណាងភាគីបរទេស គឺសហរដ្ឋអាមេរិក ក្នុងសំណុំរឿង «ក្បត់ជាតិ» របស់លោកកឹម សុខា ដែលថា ឃុបឃិតជាមួយបរទេស។
លោក ផែង ហេង មេធាវីម្នាក់ក្នុងចំណោមក្រុមមេធាវីការពារក្តីលោក កឹម សុខា បានប្រាប់ភ្នំពេញប៉ុស្តិ៍ នៅថ្ងៃនេះថា លោកបានទទួលលិខិតឆ្លើយតបពី តុលាការភ្នំពេញមកវិញ កាលពីម្សិលមិញ (ថ្ងៃពុធ) ឆ្លើយតបបដិសេធ លើពាក្យស្នើសុំរបស់ក្រុមមេធាវី ស្នើឲ្យមានការកោះអញ្ជើញ «តំណាងរដ្ឋាភិបាលសហរដ្ឋអាមេរិក»។
យោងតាមពាក្យស្នើសុំឲ្យបំពេញកិច្ច របស់ក្រុមមេធាវី ដែលបានដាក់ជូនសាលាដំបូងរាជធានីភ្នំពេញ កាលពីពាក់កណ្តាលខែមករា បានសរសេរ ស្នើឲ្យ លោក គី ឫទ្ធី ចៅក្រមស៊ើបសួរនៃសាលាដំបូងរាជធានីភ្នំពេញ កោះហៅសាកសួរតំណាងរដ្ឋាភិបាលសហរដ្ឋអាមេរិក ដោយលើកឡើងថា ៖ «តំណាងអយ្យការសាលាដំបូងរាជធានីភ្នំពេញ បានធ្វើការចោទប្រកាន់មកលើឯកឧត្តម កឹម សុខា ថាបានធ្វើ សន្និដ្ឋិភាពជាមួយបរទេស ដោយក្នុងនោះ ចៅក្រមស៊ើបសួរ តែងដេញដោលលអំពីអង្គហេតុពាក់ព័ន្ធជាមួយសហរដ្ឋអាមេរិកផងដែរ»។
លោក ផែង ហេង ឲ្យដឹងថា ៖ «ដោយសារបទចោទមាន សន្និដ្ឋិភាព ដែលសំដៅទៅលើជនបរទេស ភ្នាក់ងារ ឬរដ្ឋបរទេស។ ការចោទអយ្យការ ឬចៅក្រមស៊ើសសួរពាក់ព័ន្ធនឹងសហរដ្ឋអាមេរិក ច្រើនជាងគេ ទើបយើងច្បិចយក ការបំពេញកិច្ច ឲ្យកោះហៅរដ្ឋាភិបាលអាមេរិក ឬតំណាងមកសួរ...។ ... នេះជានីតិវិធី ក្នុងនាមជាមេធាវី ដើម្បីស្វែងរកភស្តុតាងដោះបន្ទុក»។
លោកបន្តថា ៖ «ពេលនេះចៅក្រម មិនបានបំពេញកិច្ចត្រង់ចំនុចហ្នឹងទេ គាត់បានសម្រេចច្រានចោល ពាក្យស្នើបំពេញកិច្ច លិខិតមេធាវី កាលពីម្សិលមិញ»។
ទោះយ៉ាងណា លោកនឹងពិភាក្សាជាមួយកូនក្តី លោកកឹម សុខា ដើម្បី ប្តឹងទៅឧទ្ធរណ៍ ដើម្បីសម្រេចលើសំណើមួយនេះ។
គួរបញ្ជាក់ថា លោក កឹម សុខា អតីតប្រធានគណបក្សសង្គ្រោះជាតិ ត្រូវបានចាប់ខ្លួនកាលពីដើមខែកញ្ញា ឆ្នាំ២០១៧ ហើយបក្សមួយនេះ ក៏ត្រូវតុលាការរំលាយនៅខែវិច្ឆិកាផងដែរ៕
