ភ្នំពេញៈ មេធាវីតំណាងឲ្យសហជីពចំនួន ១២០ បានចូលបំភ្លឺនៅសាលាដំបូងរាជធានីភ្នំពេញកាលពីម្សិលមិញពាក់ព័ន្ធនឹងករណីប្ដឹងលោក ជា មុនី អតីតប្រធានសហជីពសេរីកម្មករ និងជាប្អូនលោក ជា វិជ្ជា ដែលត្រូវបានគេបាញ់សម្លាប់ទាក់ទិននឹងរឿងលោក ជា មុនី បានអំពាវនាវឲ្យអាមេរិក និងសហភាពអឺរ៉ុបដាក់ទណ្ឌកម្មសេដ្ឋកិច្ចមកលើរដ្ឋាភិបាលកម្ពុជា។
លោកមេធាវី កេតុ សុវណ្ណឌី និងលោកមេធាវី ដារ៉ា សុបញ្ញា ដែលតំណាងឲ្យក្រុមសហជីពទាំង ១២០ បានថ្លែងថាលោកបានឆ្លើយសំណួរព្រះរាជអាជ្ញា លោក សៀង សុខ ពាក់ព័ន្ធនឹងអង្គហេតុ អង្គច្បាប់ និងបានដាក់ភ័ស្តុតាងបន្ថែមដើម្បីគាំទ្រដល់បណ្ដឹងរបស់លោក។ ទោះយ៉ាងណាលោកថាលោកមិនអាចបង្ហើបប្រាប់ថាភ័ស្តុតាងនោះជាអ្វីបានទេ ព្រោះប៉ះពាល់ដល់វិជ្ជាជីវៈមេធាវីដែលត្រូវរក្សាការសម្ងាត់នៃរឿងក្តី។
បន្ទាប់ពីផ្ដល់បទសម្ភាសជាមួយវិទ្យុអាស៊ីសេរីកាលពីថ្ងៃទី ១៥ ខែធ្នូ ឆ្នាំ ២០១៧ លោក ជា មុនី ត្រូវបានគេចោទថាបានស្នើឲ្យសហភាពអឺរ៉ុប និងសហរដ្ឋអាមេរិកពិចារណាដាក់ទណ្ឌកម្មលើរដ្ឋាភិបាលកម្ពុជា ដើម្បីជាការឆ្លើយតបទៅនឹងការវិវត្តថយក្រោយនៃលទ្ធិប្រជាធិបតេយ្យក្នុងប្រទេសនេះ ដែលគណបក្សប្រឆាំងសំខាន់តែមួយគត់ត្រូវបានតុលាការរំលាយចោល។ ៣ ថ្ងៃក្រោយពេលលោកថ្លែងដូច្នេះគឺនៅថ្ងៃទី ១៨ ខែធ្នូ តំណាងសហជីពចំនួន ១២០ ដែលភាគច្រើនជាសហជីពគាំទ្ររដ្ឋាភិបាលបានដាក់ពាក្យប្តឹងប្រឆាំងរូបលោកដោយទាមទារសំណង ១ លានដុល្លារ និងចោទប្រកាន់ថាអ្វីដែលលោក មុនី បាននិយាយគឺជា «អំពើញុះញង់»។
ថ្លែងក្រោយការចូលបំភ្លឺកាលពីម្សិលមិញលោក មេធាវី កេតុ សុវណ្ណឌី បានបញ្ជាក់ថា៖ «យើងបានបន្ថែមនូវភ័ស្តុតាងតំណាងអយ្យការគាត់សាកសួរលើអង្គហេតុ និងអង្គច្បាប់ និងភ័ស្តុតាង តែខ្ញុំមិនអាចប្រាប់បានទេ។ យើងសំណូមពរមាន ៣ គឺទី ១ សុំឲ្យតុលាការផ្តន្ទាទោសលោក ជា មុនី តាមផ្លូវច្បាប់ ទី ២ រក្សាទុកការទាមទារសំណងជំងឺចិត្ត ១ លានដុល្លារនៅពេលបច្ចុប្បន្ន និងចំពោះមុខ ទី ៣ យើងទាមទារឲ្យលោក ជា មុនី ទទួលខុសត្រូវលើការខូចខាតព្យសនកម្មនាពេលអនាគត។ មានន័យថានៅពេលក្រោយទៀតប្រសិនបើករណីកើតឡើងមានការអន្តរាយ ឬព្យសនកម្មកើតឡើងទំហំប៉ុនណាយើងនឹងទាមទារតាមទំហំដែលកើតឡើងនាពេលអនាគតនោះ»។
លោកមេធាវីបន្តថានីតិវិធីបន្ទាប់ព្រះរាជអាជ្ញានឹងកោះហៅជនសង្ស័យគឺលោក ជា មុនី មកសាកសួរមុនពេលបញ្ជូនសំណុំរឿងទៅចៅក្រមស៊ើប និងមានការបើកការជំនុំជម្រះ។
ស្របពេលជាមួយគ្នានេះព្រះរាជអាជ្ញាលោក សៀង សុខ ក៏បានចេញដីកាកោះហៅលោក ជា មុនី កាលពីថ្ងៃទី ៥ ខែមករាផងដែរដោយតម្រូវឲ្យលោកចូលខ្លួនមកបំភ្លឺនៅថ្ងៃទី ២២ ខែមករាខាងមុខនេះ។
យ៉ាងណាក្ដីចាប់តាំងពីមានការប្តឹងប្ដល់នេះមកលោក ជា មុនី មិនអាចទាក់ទងសុំបំភ្លឺបានទេ។ ប៉ុន្តែពីម្សិលមិញទូរស័ព្ទលោកអាចភ្ជាប់បាន តែមិនមានអ្នកលើកហើយក្រោយមកទូរស័ព្ទនោះត្រូវបានបិទទៅវិញ។
លោក ម៉ាន់ សេងហាក់ អនុប្រធានសហជីពសេរីកម្មករបានថ្លែងថាលោកមិនមានទំនាក់ទំនងជាមួយលោក ជា មុនី ទេ ចាប់តាំងពីលោកបានលាលែងពីសហជីព។ ទោះយ៉ាងណាលោកថាការថ្លែងរបស់លោក ជា មុនី គឺជាសេរីភាពនៃការបញ្ចេញមតិហើយក៏មិនមានអំណាចអ្វីទៅជំរុញឲ្យមានការដាក់ទណ្ឌកម្មលើប្រទេសកម្ពុជាដែរ។
លោក ម៉ាន់ សេងហាក់ បានបញ្ជាក់ថា៖ «តាមខ្ញុំយល់ឃើញអ្នកដែលប្តឹងនោះប្រហែលគាត់ចង់ល្បី ព្រោះគាត់និយាយតាមក្រោយប្រមុខរដ្ឋាភិបាលទេ»។ ចំពោះការដាក់ទណ្ឌកម្មនោះវាជារឿងប្រទេសអ្នកផ្តល់ជំនួយ។ យើងមានអំណាចឯណាទៅឲ្យគេដាក់ទណ្ឌកម្មគឺប្រទេសផ្តល់ជំនួយទេដែលមានសិទ្ធិ។ ការប្តឹងនេះប្រហែលមានការរៀបចំណាមួយតែជាសិទ្ធិសហជីពទាំងនោះដែលគាំទ្ររដ្ឋាភិបាល។
លោកបន្តថា៖ «ប្រមុខរដ្ឋាភិបាលគាត់មិនខ្វល់រឿងគេដាក់ទណ្ឌកម្ម។ បើគាត់មិនខ្វល់អ្នកបញ្ចេញមតិដែលគ្រាន់តែថាតាមគាត់រករឿងគេ វាមិនត្រូវ។ អ្វីដែលគាត់និយាយគ្រាន់តែជាការបញ្ចេញមតិរបស់គាត់ទេ។ ខ្ញុំគិតថាការបញ្ចេញមតិនៅស្រុកខ្មែរហាក់បីដូចជាមានការរឹតបន្តឹងខ្លាំងមែនទែន»៕