ភ្នំពេញៈ លោក ម៉េង សុភារី មេធាវីម្នាក់ក្នុងចំណោមមេធាវីជាច្រើននាក់ដែលការពារក្ដីឲ្យ លោក កឹម សុខា អតីតប្រធានគណបក្សសង្គ្រោះជាតិ ដែលជាប់ចោទពីបទក្បត់ជាតិ នៅថ្ងៃនេះ បានដាក់លិខិតទៅសាលាដំបូងរាជធានីភ្នំពេញរួចរាល់ហើយ ដើម្បីស្នើសុំឲ្យកូនក្ដីបាននៅក្រៅឃុំបណ្ដោះអាសន្ននឹងអាចមានឱកាសទៅព្យាបាលជំងឺនៅប្រទេសសង្ហាបុរី។
លោក សុភារី ថ្លែងថា៖ «យើងបានដាក់លិខិតទៅតុលាការនៅថ្ងៃនេះ ដោយយើងយល់ឃើញថាការឃុំខ្លួនរបស់គាត់គឺជាការឃុំខ្លួនបណ្តោះអាសន្ន… ហើយពេលនេះគាត់មានជំងឺបញ្ហាសុខភាព តុលាការគួរតែធ្វើការពិចារណាឲ្យគាត់ទៅព្យាបាលសុខភាពរបស់គាត់ពីព្រោះប្រសិនបើសុខភាពរបស់គាត់មានបញ្ហាដុនដាបវានឹងធ្វើឲ្យប៉ះដល់ការស៊ើបអង្កេតរបស់តុលាការ។គាត់ធានារថាគាត់នឹងមិនគេចវេសនិងរត់គេចនោះហើយគាត់នឹងចូលខ្លួនតាមការកោះហៅរបស់តុលាការ»។
លោក មេធាវី ថ្លែងថា ដោយសារតែ អាការៈឆ្អឹងកៀបសរសៃរបស់ លោក កឹម សុខា ត្រូវការការវៈកាត់ក៍ដូចជាឆាបឆ្អឹងចេញ នេះបើតាមលោកគ្រូពេទ្យនៅប្រទេសសិង្ហបុរីបានផ្តល់ជាយោបល់ឲ្យធ្វើការវះកាត់និងឆាបឆ្អឹង តែកាលពីមុនដោយសារកាលនោះអាការៈនៃជំងឺមិនទាន់ធ្វើទុក ហើយដោយពេលនេះចាប់ផ្តើមធ្វើទុកដូច្នេះគ្រូពេទ្យមានការព្រួយបារម្ភខ្លាចមានការប៉ះពាល់ដល់សុខភាពរបស់លោក កឹម សុខា។
លោក មេធាវី ថ្លែងបន្តថា៖«ដោយសារគាត់មានការឈឺចាប់ខ្លាំងហើយទាមទារឲ្យមានការពិនិត្យហើយយើងត្រូវការព្យាបាលឲ្យទាន់ពេលវេលា។ ម៉្យាងទៀតមិនមែនតែបញ្ហាគាបសរសៃប៉ុណ្ណោះទេឥឡូវគាត់មានបញ្ហាខ្វះជាតិស្ករហើយសម្ពាធឈាមគឺមិនទៀងទាត់ដូច្នេះយើងត្រូវការពិនិត្យមើលដោយសារនៅមន្ទីរឃុំឃាំងមិនមានគ្រូពេទ្យជំនាញនិងឧបករណ៍គ្រប់គ្រាន់ដើម្បីធ្វើការព្យាបាលនោះទេ»។
លោក លី សុផាណា និងលោក សួស វិទ្យារ៉ាន់ឌី អ្នកនាំពាក្យសាលាដំបូងរាជធានីភ្នំពេញមិនអាចទាក់ទងបានភ្លាមៗនៅថ្ងៃនេះដើម្បីបញ្ជាក់ពីការស្នើរបស់មេធាវី ដើម្បីឲ្យជនជាប់ចោទបានទៅព្យាបាលជំងឺឬយ៉ាងណាទេ។
លោក កឹម សុខា ត្រូវបានសមត្ថកិច្ចចាប់ខ្លួនកាលពីយប់រំលងអធ្រាត្រថ្ងៃទី២ កញ្ញា ឈានចូលថ្ងៃទី៣ ខែកញ្ញា ឆ្នាំ២០១៧ ដោយចោទពីបទក្បត់ជាតិ។ មជ្ឈដ្ឋានជាតិ និងសហគមន៍អន្តរជាតិមួយចំនួនយល់ថា នេះគឺជាការចោទប្រកាន់ដោយគ្មានភ័ស្តុតាងត្រឹមត្រូវហើយថាជារឿងនយោបាយ។
ពេលថ្មីៗកន្លងមកនេះក្រុមប្រឹក្សាជំនុំជម្រះតុលាការកំពូលបានសម្រេចច្រានចោលបណ្ដឹងសារទុក្ខរបស់ក្រុមមេធាវី និងសម្រេចតម្កល់សាលដីការបស់សាលាឧទ្ធរណ៍ដែលបានសម្រេចឃុំខ្លួនលោក កឹម សុខា កាលពីចុងខែកញ្ញាទុកជាបានការ។
លោក កឹម សុខា ត្រូវបានដាក់ឲ្យស្ថិតក្រោមបទចោទ «សន្និដ្ឋិភាពជាមួយបរទេស» តាមមាត្រា ៤៤៣ នៃក្រមព្រហ្មទណ្ឌ ដែលអង្គហេតុប្រព្រឹត្តតាំងពីឆ្នាំ ១៩៩៣ ដល់ថ្ងៃទី ៣ ខែកញ្ញា ឆ្នាំ ២០១៧ ជាថ្ងៃដែលត្រូវបានសមត្ថកិច្ចចាប់ខ្លួន។
ការមិនអនុញ្ញាតឲ្យជនជាប់ចោទ នៅក្រៅឃុំជាអ្វីដែលតុលាការយល់ឃើញថា«ដើម្បីការពារការគេចវេះ និងរក្សាជនជាប់ចោទជូនតុលាការ» ហើយតុលាការកំពូលយល់ឃើញថាសេចក្ដីសម្រេចរបស់សាលាឧទ្ធរណ៍មានភាពត្រឹមត្រូវតាមច្បាប់ ដូច្នេះសម្រេចបដិសេធបណ្ដឹងសារទុក្ខរបស់មេធាវីលោក កឹម សុខា និងតម្កល់សេចក្ដីសម្រេចរបស់សាលាឧទ្ធរណ៍ចុះថ្ងៃ ២៦ កញ្ញា ឆ្នាំ ២០១៧ ថា ទុកជាបានការដដែល»៕