ភ្នំពេញៈ លោកនាយករដ្ឋមន្ត្រី ហ៊ុន សែន បានគូសបញ្ជាក់ជាថ្មីទៀតថា ពិតមែនតែអង្គការចាត់តាំងបដិវត្តន៍ពណ៌របស់គណបក្សប្រឆាំងត្រូវបានរំលាយហើយក្តី ប៉ុន្តែ «ឧបាយកលដ៏ពិសពុលនៃមជ្ឈដ្ឋានអគតិខាងក្រៅ ដែលបញ្ជាពីក្រោយខ្នងរបស់ចលនាបដិវត្តន៍ពណ៌នៅកម្ពុជាមិនទាន់រលត់នៅឡើយទេ» ប៉ុន្តែអតីតមេដឹកនាំគណបក្សប្រឆាំងបានចោទប្រកាន់ថាពួកអ្នកបម្រើផលប្រយោជន៍បរទេស «ឈ្លានពាន» នៅតែធ្វើបាប និងរករឿងខ្មែរគ្នាឯងឥតឈប់ឈរក្នុងគោលបំណងដើម្បីរក្សាអាណានិគមរបស់ប្រទេសវៀតណាមមកលើប្រទេសកម្ពុជា។
លោក ហ៊ុន សែន ដែលកាន់តំណែងជានាយករដ្ឋមន្ត្រីអស់រយៈពេលជាង ៣២ ឆ្នាំមកហើយនោះបានថ្លែងនៅក្នុងពិធីរំឭកខួបលើកទី ៣៩ ឆ្នាំថ្ងៃជ័យជម្នះ៧ មករា ដែលត្រូវបានប្រារព្ធធ្វើឡើងនៅកោះពេជ្រកាលពីម្សិលមិញថា៖ «ជ័យជម្នះ ៧ មករាបានផ្ដល់កំណើតទី ២ ដល់ប្រជាជនកម្ពុជា និងបានផ្តល់ក្ដីសង្ឃឹមចំពោះអនាគតរបស់ប្រទេសជាតិនេះជាសច្ចធម៌ប្រវត្តិសាស្ត្រ ដែលគ្មានកម្លាំងណាអាចមកបំភ្លៃ បំផ្លើស និងបំផ្លាញបានឡើយ»។
លោក ហ៊ុន សែន បានថ្លែងទៅកាន់អ្នកចូលរួមថា ខឿនការពារជាតិរបស់ប្រជាជន និងខឿនសន្តិសុខជាតិត្រូវបានពង្រឹងកាន់តែរឹងមាំធានាដល់កិច្ចការពារបូរណភាពទឹកដីការពារសន្តិភាពស្ថិរភាពនយោបាយ និងភាពសុខដុមនៃសង្គមជាតិ។
ជាមួយគ្នានេះលោក ហ៊ុន សែន បានលើកឡើងថា៖ «ជាពិសេសឧបាយកលបដិវត្តន៍ពណ៌របស់គណបក្សប្រឆាំងដែលឃុបឃឹតជាមួយបរទេសប៉ុនប៉ងផ្ដួលរំលំរាជរដ្ឋាភិបាលស្របច្បាប់ត្រូវបានទប់ស្កាត់ដោយជោគជ័យ តាមរយៈវិធានការច្បាប់ដ៏ម៉ឺងម៉ាត់។ ក្បាលម៉ាស៊ីនអង្គការចាត់តាំងបដិវត្តន៍ពណ៌នៅកម្ពុជាដែលបានបោកប្រាស់ និងក្បត់ឆន្ទៈរបស់ប្រជាជន ត្រូវបានរំលាយ បុគ្គលមួយចំនួនដែលជាប់ពាក់ព័ន្ធក៏ត្រូវបានតុលាការវិនិច្ឆ័យទោសតាមច្បាប់ជាធរមាន»។
ប៉ុន្តែលោក ហ៊ុន សែន ថ្លែងថា៖ «ខ្ញុំសូមគូសបញ្ជាក់ជូនជនរួមជាតិថាពិតមែនតែអង្គការចាត់តាំងបដិវត្តន៍ពណ៌ត្រូវបានរំលាយហើយក្តី ប៉ុន្តែឧបាយកលដ៏ពិសពុលនៃមជ្ឈដ្ឋានអគតិខាងក្រៅដែលបញ្ជាពីក្រោយខ្នងរបស់ចលនាបដិវត្តន៍ពណ៌នៅកម្ពុជាមិនទាន់ផុតរលត់នៅឡើយទេ។ គេបានប្រើវោហារស័ព្ទនានាដ៏ពីរោះអំពីប្រជាធិបតេយ្យ សេរីភាព នីតិរដ្ឋ និងមនុស្សធម៌ ប៉ុន្តែសកម្មភាពពិតរបស់គេគឺបានរាំងខ្ទប់លទ្ធិប្រជាធិបតេយ្យ សេរីភាព និងនីតិរដ្ឋពិតប្រាកដមិនឲ្យរីកចម្រើនដោយជ្រើសយកបុគ្គលមួយចំនួនដែលប្រឆាំងនឹងរាជរដ្ឋាភិបាលលើកទឹកចិត្តដល់អង្គការមិនមែនរដ្ឋាភិបាល និងប្រព័ន្ធព័ត៌មានមួយចំនួនដែលបានបំពានច្បាប់ហើយផ្ទុយទៅវិញគេបោះបង់ប្រជាជនកម្ពុជា និងយកប្រជាជនកម្ពុជាធ្វើជាចំណាប់ខ្មាំងនៃនយោបាយរបស់ខ្លួន»។
លោកនាយករដ្ឋមន្ត្រីថ្លែងទៀតថាកម្ពុជាមានមេរៀនគ្រប់គ្រាន់ហើយដើម្បីធានានូវដំណើរទៅមុខទៀតរបស់ខ្លួនដោយឈរលើមូលដ្ឋានការពារឯករាជ្យ អធិបតេយ្យ និងក្តាប់ជាប់សិទ្ធិសម្រេចលើជោគវាសនារបស់ខ្លួន។
លោកថ្លែងថា៖ «មជ្ឈដ្ឋានបរទេសទាំងនោះដែលធ្វើជាមើលមិនឃើញតថភាពនៅកម្ពុជា កំពុងព្យាយាមបិទបាំងការបរាជ័យរបស់ខ្លួនបន្តរកវិធីដាក់ការគាបសង្កត់មកលើរាជរដ្ឋាភិបាលកម្ពុជាឲ្យធ្វើតាមឆន្ទៈរបស់ខ្លួននៅក្រោមលេសប្រជាធិបតេយ្យ និងសិទ្ធិមនុស្ស និងតាមរយៈការគំរាមកាត់ផ្តាច់ជំនួយ និងវិធានការរឹតបន្តឹងផ្សេងៗដែលជាការជ្រៀតជ្រែកយ៉ាងកំរោលមកលើដែនសមត្ថកិច្ចរបស់រដ្ឋអធិបតេយ្យមួយ។ ក្នុងនាមជារដ្ឋអធិបតេយ្យកម្ពុជាមិនអាចឱនក្បាលទទួលយកការគាបសង្កត់ណាមួយពីខាងក្រៅបានឡើយ ជាពិសេសមិនទុកឲ្យការប៉ុនប៉ងផ្លាស់ប្តូរតាមរយៈបដិវត្តន៍ពណ៌កើតមានបានជាដាច់ខាតដែលនយោបាយបែបនេះបាន និងកំពុងបង្កនូវជម្លោះផ្ទៃក្នុង អស្ថិរភាព អសន្តិសុខ សង្គ្រាម ទុក្ខវេទនា ការរត់ភៀសខ្លួន និងការបាត់បង់ជីវិតប្រជាជនស្លូតត្រង់រាប់សែននាក់យ៉ាងអយុត្តិធម៌បំផុតនៅប្រទេសមួយចំនួន»។
លោក ហ៊ុន សែន ក៏បានច្រានចោលនូវការលើកឡើងនានាដែលថា ប្រជាធិបតេយ្យនៅកម្ពុជាបានធ្លាក់ចុះ ខណៈដែលសហគមន៍អន្តរជាតិជាពិសេស សហរដ្ឋអាមេរិក និងសហភាពអឺរ៉ុបបាននិយាយម្ដងហើយម្ដងទៀតថាលទ្ធិប្រជាធិបតេយ្យនៅប្រទេសកម្ពុជាបានធ្លាក់ចុះយ៉ាងខ្លាំង។
លោក ហ៊ុន សែន បញ្ជាក់ថា៖ «ខ្ញុំក៏សូមបញ្ជាក់យ៉ាងឱឡារិកថា ប្រជាធិបតេយ្យពិតប្រាកដនៅកម្ពុជាមិនដើរថយក្រោយ ឬធ្លាក់ចុះឡើយផ្ទុយទៅវិញកំពុងត្រូវបានថែរក្សា និងពង្រឹងឲ្យកាន់តែរឹងមាំឡើង ដើរស្របជាមួយគោលការណ៍នីតិរដ្ឋនៅក្នុងផលប្រយោជន៍របស់ជាតិ និងប្រជាជនកម្ពុជាគឺមានតែប្រជាធិបតេយ្យក្លែងក្លាយទេដែលត្រូវបានលុបបំបាត់»។
លោក ហ៊ុន សែន ប្ដេជ្ញាបន្ថែមថា៖ «គណបក្សប្រជាជនកម្ពុជានឹងបន្តធ្វើអ្វីៗគ្រប់យ៉ាងដើម្បីសេចក្តីសុខ និងសុភមង្គលរបស់ជាតិ និងប្រជាជន»។
ក្នុងចំណោមអ្នកចូលរួមដែលត្រូវបានគេប៉ាន់ប្រមាណថាមានរហូតដល់ពី ៤ ទៅ ៥ ម៉ឺននាក់នៅទីលានកោះពេជ្រនោះ កញ្ញា វូ ម៉ីហ្គេច អាយុ ១៩ ឆ្នាំជានិស្សិតឆ្នាំទី ១ នៃសកលវិទ្យាល័យភូមិន្ទភ្នំពេញបានថ្លែងថា ទោះបីកញ្ញា មិនបានឆ្លងកាត់របបខ្មែរក្រហមក្ដី ប៉ុន្តែតាមរយៈការនិទានប្រាប់ពីឪពុកម្ដាយ និងការសិក្សាផ្ទាល់ខ្លួនធ្វើឲ្យកញ្ញាយល់ច្បាស់ពីរបស់ខ្មែរក្រហម និងជឿជាក់លើការដឹកនាំរបស់គណបក្សប្រជាជន។ «ខ្ញុំមកចូលរួមអបអរពិធីថ្ងៃនេះ ព្រោះខ្ញុំគិតថាវាជាថ្ងៃដែលសម្ដេចបានជួយរំដោះប្រទេស និងប្រជាជនឲ្យរួចផុតពីរបបប្រល័យពូជសាសន៍។ ថ្ងៃនេះជាថ្ងៃដែលគាត់នាំសន្តិភាពដល់ខ្មែរ។ ប្រទេសខ្មែរមានការអភិវឌ្ឍជឿនលឿន មានភាពរីកចម្រើនដោយសារគណបក្សប្រជាជនកម្ពុជា»។
លោក យឹម មករា អាយុ ៣៧ ឆ្នាំជាបុគ្គលិកនៃរោងចក្រកាត់ដេរមួយក្នុងរាជធានីភ្នំពេញថ្លែងថា៖ «ខ្ញុំចាត់ទុកថ្ងៃ ៧ មករាជាថ្ងៃខួបកំណើតទី ២ របស់ប្រជាពលរដ្ឋយើងទាំងអស់ បន្ទាប់ពីបានរំដោះពីរបបប្រល័យពូជសាសន៍ប៉ុលពត»។
មុនលោក ហ៊ុន សែន ថ្លែងសុន្ទរកថាគេក៏ឃើញមានការសម្តែងរបាំអបអរយ៉ាងកងរំពងរួមទាំងការច្រៀងចម្រៀងគណបក្សជាដើមខណៈក្រោយពេលបញ្ចប់សុន្ទរកថារបស់លោក ហ៊ុន សែន ក៏មានការជូនបាច់ផ្កាពីអង្គទូតនានា ស្ថាប័ន និងគណបក្សនយោបាយផ្សេងៗ។
លោក ហ៊ុន សែន ប្រធានគណបក្សប្រជាជនកម្ពុជា និងលោក ហេង សំរិន ប្រធានរដ្ឋសភា និងជាប្រធានកិត្តិយសគណបក្សបានផ្តល់កិតិ្តយសលែងសត្វព្រាបមុនការបង្ហោះប៉េងប៉ោងដែលមានពាក្យគាំទ្របក្សកាន់អំណាចត្រូវបានបង្ហោះឡើងជាទ្រង់ទ្រាយធំ។
ទោះយ៉ាងណាលោក អ៊ូ ច័ន្ទរ័ត្នអតីតអ្នកតំណាងរាស្ត្រគណបក្សសង្គ្រោះជាតិថ្លែងថា៖ «៧ មករា តាមមតិមហាជនមាន ២ គឺទី ១ គឺគេយល់ថាថ្ងៃ ៧ មករា គឺជាថ្ងៃរំដោះប្រទេសជាតិចេញពីកណ្ដាប់ដៃខ្មែរក្រហមមតិមួយទៀតថាថ្ងៃ ៧ មករាគឺជាថ្ងៃដែលយួនចូលលុកលុយលើទឹកដីប្រទេសកម្ពុជាហើយអង្គការសហប្រជាជាតិក៏មិនបានទទួលស្គាល់រដ្ឋាភិបាលដែលបន្តុបឡើងដោយប្រទេសវៀតណាមនៅឆ្នាំ ១៩៧៩ ផងដែរ»។
លោកថា៖ «អ្នកនយោបាយ អ្នក ដឹកនាំប្រទេសយើងមួយចំនួនអួតពីសមិទ្ធផលខ្លួនដែលបានធ្វើដែលបានទទួលជ័យជម្នះលើខ្មែរគ្នាឯង ប៉ុន្តែអត់ដឹងថានយោបាយវាចេញមកពីណាទេ តើនយោបាយហ្នឹងជាអន្ទាក់បរទេស ឬជានយោបាយដែលប្រព្រឹត្តឡើងដោយអត់ដឹងអី។ អាហ្នឹងយើងត្រូវតែសិក្សាឡើងវិញយើងជជែកគ្នា...»។
លោកថា ការអះអាងរបស់លោក ហ៊ុន សែន គ្រាន់តែជាការឃោសនាដើម្បីយកប្រជាប្រិយភាព បន្ទាប់ពីបក្សរបស់លោកបានទទួលជោគជ័យក្នុងការរំលាយគណបក្សប្រឆាំង។ «អានេះគ្រាន់តែជាការឃោសនាដើម្បីទាញយកការគាំទ្រពីមតិមហាជនរបស់គណបក្សកាន់អំណាច តែការពិតវាមិនអ៊ីចឹងអត់មានភ័ស្តុតាងអីដែលថាគណបក្សសង្គ្រោះជាតិហ្នឹងចង់ទៅផ្តួលរំលំធ្វើបដិវត្តន៍ពណ៌អីវាអត់មាន។ វាគ្រាន់តែជាការឃោសនាដើម្បីទាក់ទាញយកការគាំទ្រ។ ការប្រឹងប្រែងធ្វើ ៧ មករា ឃើញសម្បើមហ្នឹងក៏ដើម្បីទាក់ទាញការគាំទ្រ ដូចជាការឃោសនាមួយអ៊ីចឹង...ហើយធ្វើយ៉ាងម៉េចដើម្បីឲ្យប្រជាពលរដ្ឋមកមើល៧ មករាបំភ្លេចចោលការរំលាយគណបក្សសង្គ្រោះជាតិ»។
អតីតតំណាងរាស្ត្រគណបក្សប្រឆាំងដែលទើបវិលត្រឡប់ចូលប្រទេសវិញចាប់តាំងពីមានការរំលាយគណបក្សសង្គ្រោះជាតិរូបនេះបន្ថែមថា៖ «ខ្ញុំឃើញថាការរំលាយគណបក្សមួយដែលថាជាការពង្រឹងនីតិរដ្ឋ ការពង្រឹងលទ្ធិប្រជាធិបតេយ្យ អាហ្នឹងគឺជារឿងផ្ទុយទៅវិញទេ។ ចង់ពង្រឹងប្រជាធិបតេយ្យគួរតែធ្វើម៉េចឲ្យមានគណបក្សប្រឆាំងហ្នឹងរឹងមាំ។ ទី ២ បើចង់ពង្រឹងនីតិរដ្ឋ គួរតែគោរពរដ្ឋធម្មនុញ្ញ គោរពច្បាប់ធ្វើម៉េចឲ្យមន្ត្រីហ្នឹងអនុវត្តច្បាប់បានល្អ ហើយគោរពតាមរដ្ឋធម្មនុញ្ញដែលមានចែងហើយយើងឃើញប៉ះពាល់ដល់រដ្ឋធម្មនុញ្ញច្រើនកន្លែងណាប៉ះនាំគ្នាធ្វើវិសោធនកម្មៗ អាហ្នឹងជារឿងកាត់ក្បាលតម្រូវមួកហើយ។ វាអត់ត្រូវ»។
លោក សុខ ឥសាន អ្នកនាំពាក្យគណបក្សប្រជាជនបានថ្លែងតាមប្រព័ន្ធតេឡេក្រាមថា៖ «ថ្ងៃ៧ មករា ១៩៧៩ គឺជាថ្ងៃរស់ឡើងវិញរបស់ប្រជាជនកម្ពុជារាប់លាននាក់ផុតពីការកាប់សម្លាប់ដ៏ព្រៃផ្សៃនៃរបបប្រល័យពូជសាសន៍ខ្មែរក្រហមប៉ុលពត។ មានថ្ងៃ ៧ មករា ប្រជាជនកម្ពុជាមានអ្វីៗទាំងអស់ឡើងវិញរួមមានសិទ្ធិសេរីភាពគ្រប់បែបយ៉ាងការស្តារជីវភាពរស់នៅ ការផ្សះផ្សាជាតិក្រោមនយោបាយបង្រួបបង្រួមជាតិ និងការសម្រេចចិត្តដើរតាមលទ្ធិប្រជាធិបតេយ្យសេរីពហុបក្សព្រមទាំងការស្វែងរកបាននូវសន្តិភាពពេញលេញតាមនយោបាយឈ្នះ-ឈ្នះរបស់សម្តេចតេជោ ហ៊ុន សែន...» ។
ដូចពេលមុនៗដែរអតីតមេដឹកនាំគណបក្សប្រឆាំងលោក សម រង្ស៊ី ដែលកំពុងភៀសខ្លួននៅក្រៅប្រទេសបានសរសេរបង្ហោះនៅលើហ្វេសប៊ុករបស់លោកថា ថ្ងៃ ៧ មករា ឆ្នាំ ១៩៧៩ គឺជាឆាកល្ខោនដែលវៀតណាមបានរៀបចំទាំងអស់។
លោក សម រង្ស៊ី បានបញ្ជាក់ថា៖ «គេថាគេមករំដោះយើងពីខ្មែរក្រហម តែបើអត់មានយួនកុម្មុយនីស្ដពីដើមទី ក៏អត់មានខ្មែរក្រហមដែរ។ ឥឡូវនេះគេថាបើគ្មានថ្ងៃ៧មករា ១៩៧៩ ក៏គ្មានអ្វីៗដែលយើងមានសព្វថ្ងៃដែរ។ តែបើគ្មានថ្ងៃ ១៧ មេសា ១៩៧៥ (គឺថ្ងៃដែលខ្មែរក្រហមឡើងកាន់អំណាច) ក៏គ្មានថ្ងៃ ៧ មករា ១៩៧៩ ដែរហើយបើគ្មានពួកយួនកុម្មុយនីស្ដជួយពួកខ្មែរក្រហមនៅដើមទសវត្សរ៍ ឆ្នាំ ១៩៧០ ក៏គ្មានថ្ងៃ ១៧ មេសា ១៩៧៥ ដែរ។ ដូច្នេះមួយផ្នែកធំនៃរឿងរ៉ាវទាំងអស់ក្នុងរយៈពេលជិត ៥០ ឆ្នាំកន្លងមកនេះគឺមានការរៀបចំយ៉ាងសកម្មដោយយួនកុម្មុយនីស្ដ ដើម្បីលេបត្របាក់ទឹកដីយើង និងបំភាន់ភ្នែកប្រជារាស្ត្រខ្មែរ»។
លោក សម រង្ស៊ី បានសរសេរទៀតថា៖ «យើងត្រូវចងចាំជានិច្ចថាយួនបង្កប់បានញុះញង់ឲ្យខ្មែរកាប់សម្លាប់ខ្មែរគ្នាឯងក្រោមរបបខ្មែរក្រហម (១៩៧៥-១៩៧៩)។ មកដល់ពេលនេះទៀត (ឆ្នាំ ២០១៨) ពួកអ្នកបម្រើផលប្រយោជន៍បរទេសឈ្លានពានក៏នៅតែធ្វើបាប និងរករឿងខ្មែរគ្នាឯងឥតឈប់ឈរ (រហូតដល់លួចសម្លាប់ ឬតាមចាប់ដាក់គុកអ្នកស្នេហាជាតិ) ដើម្បីធ្វើឲ្យប្រទេសជាតិយើងបែកបាក់ហើយកាន់តែទន់ខ្សោយក្នុងគោលបំណងរក្សាអាណានិគមនិយមប្រទេសវៀតណាមមកលើប្រទេសកម្ពុជា...»៕