Search form

Login - Register | FOLLOW US ON

Logo of Phnom Penh Post newspaper Phnom Penh Post - ម្ចាស់​ដី​សុំ​ឲ្យ​លោក ហ៊ុន សែន ជួយ​ ខណៈ​តុលាការ​រឹបអូស​ដី​រោងចក្រ

ម្ចាស់​ដី​សុំ​ឲ្យ​លោក ហ៊ុន សែន ជួយ​ ខណៈ​តុលាការ​រឹបអូស​ដី​រោងចក្រ

កណ្តាលៈ ម្ចាស់​ដី​បាន​ស្នើសុំ​ឲ្យ​លោក​នាយក​រដ្ឋមន្ត្រី ហ៊ុន សែន ជួយ​អន្តរាគមន៍​បន្ទាប់ពី​បាន​ដាក់​ពាក្យ​ប្តឹង​តវ៉ា​ករណី​ដែល​តុលាការ​ខេត្ត​កណ្តាល​ចេញ​ដីកា​រឹប​អូសដី​ដែល​ក្រុមហ៊ុន ហ្គ្រេតអននើរ ជួល​ពី​ម្ចាស់​ដី​តែ​ត្រូវ​តុលាការ​រឹបអូស​ដើម្បី​យក​ប្រាក់​មក​សង​កម្មករ​ក្រោយ​ពី​រោងចក្រ​ក្ស័យធន។

យោង​តាម​ដីកា​សម្រេច​ចាប់ផ្តើម​ការ​លក់​ដោយ​បង្ខំ​របស់​សាលា​ដំបូង​ខេត្ត​កណ្តាល​ចុះ​ថ្ងៃ​ទី ១៣ ខែ​មករា ឆ្នាំ ២០១៧ ដោយ​ចៅក្រម ផូង វណ្ណ បាន​ចាប់ផ្តើម​នីតិវិធី​លក់​ដោយ​បង្ខំ​រឹប​អូស​អចលនវត្ថុ​ដី​ជា​កម្មសិទ្ធិ​របស់​កូន​បំណុល​នៃ​ការ​អនុវត្ត​ក្រុមហ៊ុន ហ្គ្រេតអននើរថេកស្តាកហ្វេកធើរីលីមីតធីត ដើម្បី​យក​ប្រាក់​មក​សង​ម្ចាស់​បំណុល​ដែល​ជា​កម្មករ​និយោជិត​នៃ​ក្រុមហ៊ុន Great Honour។

ចំពោះ​ដីកា​សម្រេច​ចាប់ផ្តើម​ការ​លក់​ដោយ​បង្ខំ​ត្រូវ​បាន​ម្ចាស់​ដី​ដែល​មាន​មេធាវី​តំណាង​ការិយាល័យ​មេធាវី​ខ្មែរ​ស្នើ​សុំ​ទៅ​លោក ហ៊ុន សែន ជួយ​អន្តរាគមន៍ និង​ដាក់​ពាក្យ​បណ្តឹង​តវ៉ា​ ព្រោះ​ដី​ដែល​តុលាការ​រឹបអូស​នោះ​មិនមែន​ដី​របស់​រោងចក្រ​ហ្គ្រេតអន​នើរ​នោះ​ទេ ព្រោះ​ក្រុមហ៊ុន​មួយ​នេះ​បាន​ជួល​ដី​គេ​ប៉ុណ្ណោះ​ដើម្បី​បើក​ដំណើរការ​រោងចក្រ តែ​នៅ​ពេល​រោងចក្រ​ក្ស័យធន​បែរ​ជា​តុលាការ​រឹបអូស​ដី​របស់​ម្ចាស់​ដី​ទៅវិញ​ដើម្បី​ទូទាត់​សំណង​ឲ្យ​កម្មករ។

លោក ចាន់ ហឿន មេធាវី​តំណាង​ឲ្យ​ម្ចាស់​ដី​មកពី​ការិយាល័យ​មេធាវី​ខ្មែរ និង​សហការី​បាន​ថ្លែង​ថា​រឿង​មួយ​នេះ​គឺ​អយុត្តិធម៌​សម្រាប់​ម្ចាស់​ដី។ លោក ហឿន បាន​អះអាង​ថា៖ «ដី​ជា​របស់​ក្រុមហ៊ុន ឆាមសាញ ជួល​ឲ្យ​ក្រុមហ៊ុន ហ្គ្រេតអននើរ បើក​រោងចក្រ​តែ​នៅ​ពេល​ក្រុមហ៊ុន​ក្ស័យធន​គ្មាន​ប្រាក់​ឈ្នួល​បើក​ឲ្យ​កម្មករ​បែរ​ជា​តុលាការ​រឹបអូស​ដី​របស់​ម្ចាស់​ដី​ដើម្បី​សង​បំណុល​ឲ្យ​កម្មករ​ទៅ​វិញ​នេះ​ជា​រឿង​អយុត្តិធម៌​សម្រាប់​ម្ចាស់​ដី»។

យោង​តាម​ពាក្យ​បណ្តឹង​តវ៉ា​របស់​ការិយាល័យ​មេធាវី​ខ្មែរ​បាន​រៀបរាប់​ឲ្យ​ដឹង​ថា​ដី​ដែល​ជា​ទីតាំង​របស់​ក្រុមហ៊ុន ហ្គ្រេតអននើរ ដែល​ស្ថិត​នៅ​តាម​បណ្តោយ​ផ្លូវ​ជាតិ​លេខ ២១ ភូមិ ៤ ឃុំ​ស្វាយរលំ ស្រុក​ស្អាង​ខេត្ត​កណ្តាល​គឺជា​កម្មសិទិ្ធ​ស្រប​ច្បាប់​របស់​ក្រុមហ៊ុន​ឆាមសាញ​ដែល​មាន​ម្ចាស់​ឈ្មោះ សុង ជុងក្វាន់។

ក្រុមហ៊ុន ហ្គ្រេតអននើរ​បាន​ជួល​ដី​ពី​ក្រុមហ៊ុន​ឆាមសាញ​ដើម្បី​សាងសង់​រោងចក្រ​វាយនភ័ណ្ឌ​លើ​ទំហំ​ដី​សរុប ៤១០០៣ ម៉ែត្រការ៉េ​ក្នុង​រយៈពេល ១០ ឆ្នាំ​ដោយ​គិត​ចាប់​ពី​ថ្ងៃ​ទី ១ ខែ​មករា ឆ្នាំ ២០១២ ដល់​ថ្ងៃ​ទី ១ ខែ​មករា​ឆ្នាំ ២០២២ ដោយ​ត្រូវ​បង់​ប្រាក់​ឈ្នួល​ប្រចាំ​ឆ្នាំ​ចំនួន ៤១ ០០៣ ដុល្លារ​តាមរយៈ​កិច្ចសន្យា​ជួល​ដី​ហើយ​ចាប់​តាំងពី​ខែ​មិថុនា​ឆ្នាំ ២០១៦ រហូត​ដល់​បច្ចុប្បន្ន​ក្រុមហ៊ុន ហ្គ្រេតអន​នើរ​មិន​បាន​បង់​ប្រាក់​ថ្លៃ​ឈ្នួល​ប្រចាំ​ខែ​ដែល​ខ្លួន​ត្រូវ​បង់​រៀងរាល់​ដើម​ខែ​នោះ​ទេ ដែល​នេះ​គឺជា​ការ​បំពាន​លក្ខខណ្ឌ​នៃ​កិច្ចសន្យា​ជួល​ដី​យ៉ាង​ធ្ងន់ធ្ងរ​ដែល​បាន​ធ្វើឲ្យ​ក្រុមហ៊ុន​ឆាមសាញ​ដែល​ជា​ម្ចាស់​ដី​ស្រប​ច្បាប់​ទទួល​រង​នូវ​ការ​ខូចខាត​យ៉ាង​ធ្ងន់ធ្ងរ​ដែរ។

ដី​ដែល​ជា​ទីតាំង​របស់​ក្រុមហ៊ុន ហ្គ្រេតអន​នើរ​គឺជា​កម្មសិទ្ធិ​ស្រប​ច្បាប់​របស់​ក្រុមហ៊ុន​ឆាមសាញ​ដែល​ជា​នីតិបុគ្គល​ដាច់​ដោយ​ឡែក​ពុំ​មែន​ជា​ទ្រព្យសម្បត្តិ​របស់​ក្រុមហ៊ុន ហ្គ្រេតអន​នើរ និង​ពុំ​មែន​ជា​កម្មវត្ថុ​ដែល​តុលាការ​ត្រូវ​រឹបអូស​ជា​បណ្តោះអាសន្ន​ឡើយ។

ក្រុមហ៊ុន​ឆាមសាញ​បាន​អំពាវនាវ​ដល់​លោក​នាយករដ្ឋមន្រ្តី ហ៊ុន សែន ឲ្យ​ជួយ​អន្តរាគមន៍​ទៅ​តាម​នីតិវិធី​ដើម្បី​ការពារ​សិទ្ធិ​ និង​ផលប្រយោជន៍​ស្រប​ច្បាប់​របស់​វិនិយោគិន​បរទេស។

លោក សូ សារិន អ្នក​នាំពាក្យ​សាលា​ដំបូង​ខេត្ត​កណ្តាល​បាន​ថ្លែង​យ៉ាង​ខ្លី​កាលពី​ម្សិលមិញ​ថា​ករណី​នេះ​ខាង​តុលាការ​បាន​ធ្វើ​ទៅ​តាម​នីតិវិធី​របស់​តុលាការ៕

0

Comments

Please, login or register to post a comment

ព័ត៌មានពាក់ព័ន្ធ