ពោធិ៍សាត់ យុទ្ធភណ្ឌមិនទាន់ផ្ទុះ ប្រភេទ ៦០ មិល្លីម៉ែត្រ ចំនួន ១៤១ គ្រាប់ត្រូវបានមន្ត្រីជំនាញនៃអង្គការហេឡូត្រាស់ (hallo Truth) រុករកឃើញនៅបរិវេណអនុវិទ្យាល័យក្ងាន ក្នុងភូមិឈើទាល ឃុំផ្លូវលួង ស្រុកកណ្ដៀង ខេត្តពោធិ៍សាត់ បន្ទាប់ពីគ្រូបង្រៀនរាយការណ៍ប្រាប់សមត្ថកិច្ច។នេះបើតាមលោកប៊ុតអាននាយផ្នែកយុទ្ធភណ្ឌមិនទាន់ផ្ទុះស្រុកកណ្ដៀង កាលពីថ្ងៃទី ១២ កុម្ភៈនេះ។
លោកបន្តថា ប្រតិបត្តិការនេះ បានធ្វើឡើង ២ ថ្ងៃ គឺនៅថ្ងៃសៅរ៍ និង ថ្ងៃអាទិត្យ (ថ្ងៃទី ១០-១១ ខែ កុម្ភៈ ឆ្នាំនេះ) បន្ទាប់ពី លោកគ្រូបង្រៀនម្នាក់បានយកត្រាក់ទ័រមកភ្ជួរដី ដើម្បីដាំបន្លែក្នុងដីរបស់សាលាក៏ស្រាប់តែប្រទះឃើញគ្រាប់នេះអណ្ដែតឡើងតាមអាចម៍បំណះដីហើយបានរាយការណ៍ប្រាប់សមត្ថកិច្ចជួយអន្តរាគមន៍ហៅមន្ត្រីជំនាញមករុករកបន្ថែម។
លោកបានបញ្ជាក់ថា៖ «ជាលទ្ធផល ក្រុមមន្ត្រីជំនាញនៃអង្គការ Hallo Truth បានរកឃើញចំនួន ១៤១ គ្រាប់ ហើយកាលពីល្ងាចថ្ងៃអាទិត្យ ក្រុមមន្ត្រីជំនាញបានយកទៅកម្ទេចចោលក្នុងដីស្រែមួយកន្លែងនៅទិសខាងលិចនៃអនុវិទ្យាល័យខាងលើចម្ងាយប្រមាណ ១ គីឡូម៉ែត្រអស់ ៨៩ គ្រាប់ហើយសល់ ៥២ គ្រាប់ទៀតគ្រោងកម្ទេចចោលបន្តទៀតនៅរសៀលថ្ងៃចន្ទនេះ»។
គួរបញ្ជាក់ផងដែរថា កាលពីខែធ្នូ ឆ្នាំមុន គ្រាដែលលោកគ្រូអ្នកគ្រូសាលាបឋមសិក្សា ហ៊ុន សែន អន្លង់វែង ក្នុងភូមិថ្នល់កែង ឃុំអន្លង់វែង ស្រុកអន្លង់វែង ខេត្តឧត្តរមានជ័យ កំពុងនាំសិស្សប្រមូលសំរាមក្នុងបរិវេណសាលារៀន ក៏ស្រាប់តែមានករណីផ្ទុះគ្រាប់ប្រភេទ ៦០ មិល្លីម៉ែត្រនេះឡើងចំនួន ១ គ្រាប់ បណ្ដាលឲ្យគ្រូនិងសិស្ស ៤ នាក់រងរបួសធ្ងន់ និង ស្រាល ៕