.jpg)
អតីតទីតាំងការិយាល័យ NDI ដែលរដ្ឋាភិបាលបិទទ្វារ។ ហេង ជីវ័ន
ភ្នំពេញៈ រដ្ឋាភិបាលបានបង្កើតគណៈកម្មាធិការអន្តរក្រសួងថ្មីមួយដើម្បីគ្រប់គ្រងសកម្មភាពអង្គការក្រៅរដ្ឋាភិបាល អន្តរជាតិជាអ្វីដែលសង្គមស៊ីវិល សម្ដែងក្ដីបារម្ភ ខណៈមន្ត្រីក្រសួងមហាផ្ទៃថាខ្លួនមានបំណងឃ្លាំមើលការអនុវត្តរបស់អង្គការទាំងអស់ឲ្យស្របតាមច្បាប់។ នេះបើតាមសៀវភៅរាជកិច្ចក្នុងត្រីមាសទី ៤ ឆ្នាំ ២០១៧ ។
តាមសេចក្ដីសម្រេចចុះហត្ថលេខាដោយលោកនាយករដ្ឋមន្ត្រី ហ៊ុន សែន កាលពីថ្ងៃទី ៥ ខែធ្នូឆ្នាំមុនសរសេរថាគណៈកម្មាធិការនេះមាន ៣៣ រូបដោយមានរដ្ឋលេខាធិការក្រសួងមហាផ្ទៃលោក ប៉ុល លឹម និងរដ្ឋលេខាធិការក្រសួងការបរទេសលោក អ៊ុច បូររិទ្ធ ជាសហប្រធានលោក កើត រិទ្ធ រដ្ឋលេខាធិការក្រសួងយុត្តិធម៌ និងលោក ជូ វិជិត្ត រដ្ឋលេខាធិការក្រសួងសេដ្ឋកិច្ច និងហិរញ្ញវត្ថុជាអនុប្រធានព្រមទាំងមាន ២៩ រូបទៀតមកពីស្ថាប័នផ្សេង។
បើតាមសេចក្ដីសម្រេចនេះគឺគណៈកម្មាធិការមានភារកិច្ចគ្រប់គ្រងដើម្បីធានាការអនុវត្តច្បាប់សមាគម និងអង្គការក្រៅរដ្ឋាភិបាលសម្រាប់ស្ថាប័នបរទេសហើយបានបញ្ជាក់អំពីភារកិច្ចក្រសួងនីមួយៗច្បាស់លាស់។
ក្រសួងសេដ្ឋកិច្ចមានភារកិច្ចពិនិត្យតាមដានកាតព្វកិច្ចបង់ពន្ធរបស់អង្គការមិនមែនរដ្ឋាភិបាលទាំងនោះ ចំណែកឯធនាគារជាតិនៃកម្ពុជាត្រូវបានស្នើឲ្យតាមដានប្រតិបត្តិការហិរញ្ញវត្ថុរបស់ពួកគេផងដែរ។
យ៉ាងណាក្ដីលោក ប៉ុល លឹម បានថ្លែងថា៖ «យើងមិនទាន់បានជួបប្រជុំនៅឡើយទេ។ យើងបានបង្កើតអនុគណៈកម្មាធិការធ្វើការជាមួយក្រសួងការបរទេសដើម្បីពិនិត្យមើលថាតើអង្គការមិនមែនរដ្ឋាភិបាលណាខ្លះបានចុះហត្ថលេខាលើអនុស្សរណៈនៃការយោគយល់គ្នា និងពិនិត្យថា តើមានអង្គការក្រៅរដ្ឋាភិបាលប៉ុន្មាននឹងមានមកពីប្រទេសណាខ្លះ?»។
កាលពីឆ្នាំមុនវិទ្យាស្ថានជាតិប្រជាធិបតេយ្យ (NDI) ដែលឧបត្ថម្ភថវិកាដោយក្រសួងការបរទេសអាមេរិកត្រូវបានបិទទ្វារដោយរងការចោទថាបានគាំទ្រគណបក្សសង្គ្រោះជាតិរៀបចំផែនការផ្ដួលរំលំរដ្ឋាភិបាល។
ជាមួយគ្នានេះអង្គការមិនមែនរដ្ឋាភិបាលក្នុងស្រុកក៏ត្រូវបានជូនដំណឹងពីករណីបង់ពន្ធដារខណៈកាសែត The Cambodia Daily ត្រូវបានបិទទ្វារដោយសារជាប់ពន្ធ ៦,៣ លានដុល្លារអាមេរិក។
នៅពេលសួរថា តើនឹងមានអង្គការក្រៅរដ្ឋាភិបាលបន្ថែមទៀតនឹងត្រូវស៊ើបអង្កេតលោក ប៉ុល លឹម គ្រាន់តែថ្លែងថាគណៈកម្មាធិការនេះនឹងពិនិត្យសកម្មភាពអង្គការក្រៅរដ្ឋាភិបាលបរទេសទាំងអស់ហើយលោកមិនបានធ្វើអត្ថាធិប្បាយលើចំណាត់ការនៃការដាក់ទោសទណ្ឌណាមួយនោះទេ។
លោក សន ជ័យ ប្រធានអង្គការសម្ព័ន្ធគណនេយ្យភាពសង្គមកម្ពុជាបានថ្លែងថាការវិវឌ្ឍនេះជារឿងបារម្ភពីព្រោះវាបានធ្វើឲ្យការបកស្រាយច្បាប់ស្តីពីសមាគម និងអង្គការមិនមែនរដ្ឋាភិបាលធ្លាក់ទៅលើគណៈកម្មាធិការថ្មីមួយនេះ៕ NS
