.jpg)
លោក ណុប វី ប្រធាន CCIM នៅក្នុងពិធីផ្សព្វផ្សាយរបាយការណ៍ស្តីពីសេរីភាពប្រព័ន្ធផ្សព្វផ្សាយនៅថ្ងៃទី ២១ ខែកុម្ភៈ ឆ្នាំ ២០១៨។ ហុង មិនា
ភ្នំពេញៈមជ្ឈមណ្ឌលកម្ពុជា ដើម្បីប្រព័ន្ធផ្សព្វផ្សាយឯករាជ្យហៅកាត់ CCIM បានចេញផ្សាយរបាយការណ៍មួយថា សេរីភាពប្រព័ន្ធផ្សព្វផ្សាយឬសេរីភាពសារព័ត៌មាននៅកម្ពុជា បានធ្លាក់ចុះយ៉ាងខ្លាំង ចាប់តាំងពីឆ្នាំ ២០១៧ ខណៈដែលស្ថានីយ៍វិទ្យុ និងកាសែតឯករាជ្យមួយចំនួន ត្រូវបានបង្ខំឲ្យឈប់ផ្សាយ និងបិទទ្វារ ហើយការគំរាមកំហែងនៅតែបន្តកើតមាន។
របាយការណ៍ចេញផ្សាយថ្ងៃទី ២១ ខែកុម្ភៈ CCIM បានស្ទង់មតិលើអ្នកធ្វើការលើប្រព័ន្ធផ្សព្វផ្សាយនៅកម្ពុជាចំនួន ៧៥ នាក់ ចាប់ពីចុងឆ្នាំ ២០១៧ មក។
ក្នុងរបាយការណ៍នោះ អ្នកសារព័ត៌មាន ៨៣ ភាគរយ លើកឡើងថា សេរីភាពសារព័ត៌មានបានធ្លាក់ចុះ ខណៈ ១១ ភាគរយទៀតថា ប្រព័ន្ធផ្សព្វផ្សាយ នៅកម្ពុជា ដើរតាមផ្លូវត្រូវ។
ក្នុងរបាយការណ៍នោះ ក៏បានរកឃើញថា អ្នកសារព័ត៌មាន ៦៧ ភាគរយ មានអារម្មណ៍ថា ពួកគេគ្មានសេរីភាពពេញលេញក្នុងការរាយការណ៍ដោយសេរីនោះទេ។
លោក ណុប វី នាយកមជ្ឈមណ្ឌលកម្ពុជា ដើម្បីប្រព័ន្ធផ្សព្វផ្សាយឯករាជ្យ ហៅកាត់ថា CCIM បានថ្លែងថា ការបិទស្ថានីយ៍វិទ្យុចំនួន ៣២ ដែលផ្សាយព័ត៌មានបក្សប្រឆាំង ព័ត៌មានដែលផ្តល់មូលនិធិដោយសហរដ្ឋអាមេរិក ឬផ្សាយព័ត៌មានឯករាជ្យ និងការប្រើប្រាស់ការស៊ើបអង្កេត លើការបង់ពន្ធ ហើយបានបិទសារព័ត៌មាននោះដោយរដ្ឋាភិបាល រួមទាំងការគំរាមកំហែង និងចាប់អ្នកកាសែត ពីបទញុះញង់ និងការផ្តល់ជូនឲ្យរដ្ឋបរទេស នូវព័ត៌មានដែលបង្កភាពអន្តរាយដល់សន្តិសុខជាតិជាដើម ជាមូលហេតុ ដែលធ្វើឲ្យមានការវាយតម្លៃ ពីសេរីភាពសារព័ត៌ មានធ្លាក់ចុះបែបនេះ។
លោកបញ្ជាក់ថា៖«មុនឆ្នាំ ២០១៧ សេរីភាពសារព័ត៌មាន នៅកម្ពុជា ត្រូវបានគេចាត់ថ្នាក់ជាប្រទេសមួយ ដែលមានសេរីភាពជាងគេ នៅក្នុងតំបន់អាស៊ីអាគ្នេយ៍ ប៉ុន្ដែមួយរយៈចុងក្រោយនេះធ្លាក់ចុះខ្លាំងទៅវិញ»។
លោក ណុប វី បន្ថែមថា ស្ថាប័នប្រព័ន្ធផ្សព្វផ្សាយ អង្គការសង្គមស៊ីវិល ត្រូវមានការគាំទ្រដែលចាំបាច់ ដល់អ្នកសារព័ត៌មាន ជាពិសេស ផ្តល់ការគាំទ្រផ្នែកសុខភាព សុវត្ថិភាព និងប្រព័ន្ធឌីជីថល ខណៈរដ្ឋាភិបាល គួរបន្ថយសម្ពាធដល់អ្នកកាសែត ពន្លឿនច្បាប់ស្តីពីសិទ្ធិទទួលបានព័ត៌មាន និងគួរតែបង្កើតស្ថាប័នឯករាជ្យ ពីនយោបាយ ក្នុងការផ្តល់អាជ្ញាប័ណ្ណ ដល់ស្ថាប័នព័ត៌មាន៕
