Search form

Login - Register | FOLLOW US ON

Logo of Phnom Penh Post newspaper Phnom Penh Post - រុស្ស៊ី​នឹង​ផ្ដល់​ជំនួយ​ដល់ គ.ជ.ប និង​ជួសជុល​មន្ទីរពេទ្យ

Content image - Phnom Penh Post
លោក​នាយក​រដ្ឋមន្ត្រី ហ៊ុន សែន ចាប់​ដៃ​ជាមួយ​នាយក​រដ្ឋមន្ត្រី​រុស្ស៊ី នៅ​ក្នុង​ប្រទេស​ហ្វីលីពីន។ រូបថត ហ្វេសប៊ុក

រុស្ស៊ី​នឹង​ផ្ដល់​ជំនួយ​ដល់ គ.ជ.ប និង​ជួសជុល​មន្ទីរពេទ្យ

ភ្នំពេញៈ ​ខណៈ​សហរដ្ឋ​អាមេរិក​ និង​សហភាព​អឺរ៉ុប​ហាក់​កំពុង​ស្ថិត​ក្នុង​ភាព​មិន​ស៊ី​ចង្វាក់​គ្នា​ពី​រឿង​នយោបាយ​នៅ​កម្ពុជា​នោះ​ប្រទេស​រុស្ស៊ី​បែរ​ជា​សន្យា​ថា​នឹង​ផ្តល់​ជំនួយ​ដល់​ គជប និង​ត្រៀម​បញ្ជូន​អ្នក​សង្កេតការណ៍​មក​​ពិនិត្យ​ការ​បោះឆ្នោត​នៅ​ឆ្នាំ​ក្រោយ ហើយ​ថែម​ទាំង​ផ្ដល់​ជំនួយ​ជួសជុល​មន្ទីរពេទ្យ​មិត្តភាព​ខ្មែរ-សូវៀត​ផង​ដែរ ជា​អ្វី​​ដែល​អ្នក​វិភាគ​ថា​ជា​រឿង​ចម្លែក ខណៈ​ប្រទេស​នេះ​បាន​ផ្ដល់​ជំនួយ​ដល់​កម្ពុជា​​តិចតួច​បំផុត​។

ការ​បង្ហាញ​ជំហរ​របស់​រុស្ស៊ី​បែប​នេះ​បាន​ធ្វើ​ឡើង​នៅ​ក្នុង​ជំនួប​រវាង​លោក Dmitry Medvedev នាយក​រដ្ឋមន្ត្រី​នៃ​សាធារណរដ្ឋ​សហព័ន្ធរុស្ស៊ី និង​លោក​នាយក​រដ្ឋមន្ត្រី ហ៊ុន សែន កាលពី​ថ្ងៃ​ទី​ ១២ ខែ​វិច្ឆិកា​ក្នុង​ប្រទេស​ហ្វីលីពីន​។

អ្នក​នាំ​ពាក្យ​គណៈកម្មការ​ជាតិ​រៀបចំ​ការ​បោះឆ្នោត​ (​គ.ជ.ប​) លោក ហង្ស ពុទ្ធា បាន​ថ្លែង​កាលពី​ម្សិលមិញ​ថា​រដ្ឋាភិបាល​រុស្ស៊ី​ពិតជា​បាន​អះអាង​ថា​នឹង​ផ្ដល់​ជំនួយ​សម្រាប់​ការ​បោះឆ្នោត​ជាតិ​ និង​ត្រៀម​បញ្ជូន​អ្នក​សង្កេតការណ៍​បោះឆ្នោត​សម្រាប់​ត្រួតពិនិត្យ​ដំណើរការ​នេះ ប៉ុន្ដែ​ភាគី​ទាំង​ពីរ​មិន​ទាន់​បាន​ប្រជុំ​សម្រេច​ថា​នឹង​ផ្ដល់​ជំនួយ​ ឬ​អ្នក​សង្កេតការណ៍​ប៉ុន្មាន​នោះ​ទេ​។

លោក​បញ្ជាក់​ថា​៖ «​កន្លង​មក​រុស្ស៊ី​គ្រាន់​តែ​មាន​ទំនាក់ទំនង​ល្អ​ផ្នែក​ការទូត​ដែល​ឈាន​ដល់​ការ​ចុះ​ MoU ​លើ​គម្រោង​ផ្សេងៗ​។ ចំណែក​ជំនួយ​ដល់ គជប រុស្ស៊ី​មិន​ដែល​បាន​ជួយ​អ្វី​ទេ​ទើប​តែ​បាន​សន្យា​ពេល​នេះ​ប៉ុណ្ណោះ​»​។

តាម​វីដេអូ​បង្ហោះ​លើ​គេហទំព័រ​របស់​​លោក​នាយក​រដ្ឋមន្ត្រី ហ៊ុន សែន បាន​បង្ហាញ​ថា​ប្រទេស​រុស្ស៊ី​បាន​សម្រេច​ផ្តល់​ជំនួយ និង​អ្នក​សង្កេតការណ៍​មក​ចូលរួម​សង្កេតការណ៍​សម្រាប់​ដំណើរការ​បោះឆ្នោត​ជាតិ​អាណត្តិ​ទី​ ៦ ​នៅ​​ឆ្នាំ​ក្រោយ​នេះ​។

ក្នុង​វីដេអូ​នោះ​បន្ត​ថា​នាយក​រដ្ឋមន្ត្រី​រុស្ស៊ី​ក៏​បាន​ចុះ​ហត្ថលេខា​លើ​កិច្ចព្រមព្រៀង​ជួយ​ជួសជុល​មន្ទីរពេទ្យ​រុស្ស៊ី​ផង​ដែរ ដោយ​នឹង​ចាប់​ផ្តើម​ក្នុង​ពេល​ឆាប់ៗ​ខាង​មុខ​នេះ​។

ក្នុង​ជំនួប​នោះ​លោក ហ៊ុន សែន ក៏​បាន​ស្នើ​ឲ្យ​ភាគី​រុស្ស៊ី​ពិចារណា​លុប​បំណុល​ដែល​កម្ពុជា​ជំពាក់​ផង​ដែរ​ហើយ​នាយករដ្ឋមន្ត្រី​រុស្ស៊ី​បាន​ឆ្លើយតប​ថា​នឹង​បង្កើត​ក្រុម​ការងារ​ដើម្បី​សិក្សា​លើ​បញ្ហា​នេះ​នាពេល​ក្រោយ​។

លោក យឿង សុធារ៉ា មន្ត្រី​ច្បាប់​ និង​អង្កេត​នៃ​គណៈកម្មាធិការ​ដើម្បី​ការ​បោះឆ្នោត​ដោយ​សេរី និង​យុត្តិធម៌​នៅ​កម្ពុជា​ហៅ​កាត់​ថា​ខុមហ្វ្រែល​កាលពី​ម្សិលមិញ​បាន​យល់​ឃើញ​ថា​តាំងពី​ឆ្នាំ​ ១៩៩៣ ​មក​រុស្ស៊ី​មិន​ដែល​បាន​ផ្ដល់​ជំនួយ​អ្វី​ធំដុំ​ដល់​កម្ពុជា​ទេ​រួម​ទាំង​វិស័យ​សេដ្ឋកិច្ច​ផង​។

លោក​បន្ត​ថា​វា​គឺជា​រឿង​ចម្លែក​មួយ​​ដែល​យើង​មិន​នឹក​ស្មាន​ដល់​ថា​នឹង​មាន​រឿង​អ្វី​នៅ​ពី​ក្រោយ ប៉ុន្ដែ​លោក​អះអាង​​ថា​ក្នុង​ស្ថានភាព​នេះ​រដ្ឋាភិបាល​កម្ពុជា​ក៏​កំពុង​ត្រូវការ​អន្តរជាតិ​ជួយ​គាំទ្រ​បន្ថែម​ទៀត ខណៈ​កម្ពុជា​ក៏​កំពុង​ប្រេះឆា​ជាមួយ​អាមេរិក​ក៏​ដូចជា​សហគមន៍​អឺរ៉ុប​។

លោក​បញ្ជាក់​ថា​៖ «​ក្នុង​នាម​យើង​ជា​ NGO យើង​ស្វាគមន៍​ពី​គ្រប់​ភាគី ប៉ុន្ដែ​រុស្ស៊ី​ផ្ដល់​ជំនួយ និង​បញ្ជូន​អ្នក​សង្កេតការណ៍​មក​កម្ពុជា​នេះ​គឺជា​រឿង​ចម្លែក​​ព្រោះ​កន្លង​មក​រុស្ស៊ី​មិន​ដែល​រវល់​ជាមួយ​ខ្មែរ​ទេ ហើយ​យើង​ក៏​មិន​ដឹង​ថា​មាន​រឿង​អ្វី​នៅ​ពី​ក្រោយ​ដែរ តែ​ខ្ញុំ​មើល​ទៅ​រដ្ឋាភិបាល​កំពុង​ទាក់ទាញ​បរទេស​​ឲ្យ​ទទួល​ស្គាល់​ការ​បោះឆ្នោត​ខាង​មុខ​»​។

លោក Alexander Korolev អ្នក​ស្រាវជ្រាវ​នៅ​សាកលវិទ្យាល័យ​ជាតិ​សិង្ហបុរី​លីក្វាន់យូ​ផ្នែក​នយោបាយ​សាធារណៈ​បាន​លើក​ឡើង​ថា​ក្នុង​បរិបទ​នេះ អាស៊ាន​មាន​សារៈសំខាន់​ណាស់​ចំពោះ​រុស្ស៊ី​។ ​លោក​ថា​៖ «​ទិសដៅ​ឆ្ពោះ​ទៅ​អាស៊ី​ដែល​រុស្ស៊ី​កំពុង​ព្យាយាម​គឺ​​បង្កើន​ដៃគូ​យុទ្ធសាស្ត្រ​ដ៏ទូលំ​ទូលាយ​មួយ​មិន​ត្រឹម​តែ​កម្ពុជា​ទេ​តែ​វៀតណាម ឥណ្ឌូនេស៊ី​ (​នៅ​ឥណ្ឌូនេស៊ី​ខាង​កើត​) ​ក៏​​រុស្ស៊ី​កំពុង​ទាញ​ចំណាប់​អារម្មណ៍​ពី​អាស៊ាន​ហើយ​រុស្ស៊ី​ពេល​នេះ​មិន​ដូច​មុន​ទេ​»​។

មន្ត្រី​ស្ថានទូត​រុស្ស៊ី​ប្រចាំ​កម្ពុជា​មិន​​អត្ថាធិប្បាយ​ជុំវិញ​បញ្ហា​នេះ​ដោយ​អះអាង​ថា​៖ «​ខ្ញុំ​សូម​មិន​បញ្ចេញ​យោបល់​អ្វី​ទេ ទាក់ទង​នឹង​ករណី​នេះ​»​។

ចំណែក​លោក ងី ម៉េង ប្រធាន​មន្ទីរពេទ្យ​មិត្តភាព​ខ្មែរ-សូវៀត​បាន​ឲ្យ​ដឹង​ពី​ម្សិលមិញ​ថា​លោក​បាន​ទទួល​ព័ត៌មាន​នេះ​ដែរ ប៉ុន្ដែ​ទំហំ​នៃ​ការ​ផ្ដល់​ជំនួយ​នេះ​លោក​មិន​ទាន់​ដឹង​ទេ​៖ «​យើង​គ្រាន់​​ទទួល​ព័ត៌មាន តែ​រុស្ស៊ី​គេ​ផ្ដល់​មក​ប៉ុន្មានៗ​នោះ ខ្ញុំ​អត់​ទាន់​ដឹង​ទេ​»៕

0

Comments

Please, login or register to post a comment

ព័ត៌មានពាក់ព័ន្ធ