Search form

Login - Register | FOLLOW US ON

Logo of Phnom Penh Post newspaper Phnom Penh Post - លោក​ សុន ឆ័យ ស្នើ​ឲ្យ​រដ្ឋាភិបាល​ពិនិត្យ​រឿង​បូម​ខ្សាច់

យុវជន​ចលនា​មាតា​ធម្មជាតិ​កំពុង​បង្ហាញ​ពី​សកម្មភាព​បូម​ខ្សាច់​កន្លងមក​។
យុវជន​ចលនា​មាតា​ធម្មជាតិ​កំពុង​បង្ហាញ​ពី​សកម្មភាព​បូម​ខ្សាច់​កន្លងមក​។ ម៉ៃ វីរៈ

លោក​ សុន ឆ័យ ស្នើ​ឲ្យ​រដ្ឋាភិបាល​ពិនិត្យ​រឿង​បូម​ខ្សាច់

ភ្នំពេញៈ តំណាង​រាស្រ្ត​គណបក្ស​ប្រឆាំង​មណ្ឌល​ភ្នំពេញ​លោក​ សុន ឆ័យ បាន​សសេរ​លិខិត​មួយ​ច្បាប់​ផ្ញើ​ជូន​លោក​នាយករដ្ឋមន្រ្តី​ ហ៊ុន សែន ​ស្នើ​ពិនិត្យ​ និង​មាន​វិធានការ​បញ្ឈប់​សកម្មភាព​បូមខ្សាច់​របស់​ក្រុមហ៊ុន​វៀតណាម​ចំនួន​ពីរ​ដែល​ត្រូវ​បាន​គេ​រាយការណ៍​ថា​មាន​សកម្មភាព​គគ្រឹក​គគ្រេង​ធ្វើឲ្យ​ប៉ះពាល់​បរិស្ថាន​ និង​ការ​រស់នៅ​របស់​ប្រជាពលរដ្ឋ​យ៉ាង​ធ្ងន់ធ្ងរ​។

យោង​តាម​លិខិត​របស់​ សុន ឆ័យ ​ចុះ​ថ្ងៃ​ទី​ ៣០ កក្កដា ដែល​​ភ្នំពេញ​ប៉ុស្ដិ៍​ទទួល​បាន​កាលពី​ម្សិលមិញ​បាន​ឲ្យ​ដឹង​ថា​ក្រុមហ៊ុន​វៀតណាម​ចំនួន​ពីរ​គឺ​ក្រុមហ៊ុន​ International Rainbow និង​ក្រុមហ៊ុន​ Direct Access ដែល​បាន​និង​កំពុង​ធ្វើ​សកម្មភាព​យ៉ាង​គគ្រឹក​គគ្រេង​បូម​ខ្សាច់​នៅ​ព្រែក​អណ្តូង​ទឹក​ស្ថិត​នៅ​ស្រុក​បទុមសាគរ​ខេត្ត​ កោះកុង​ ដោយ​ប្រើប្រាស់​កប៉ាល់​បូម​ខ្សាច់​ចំនួន​ ១៧ ​គ្រឿង​ជាមួយ​សាឡាង​ដឹក​ជញ្ជូន​ខ្សាច់​ចំនួន​ ៤១ ​គ្រឿង​ធ្វើឲ្យ​ប៉ះពាល់​ដល់​បរិស្ថាន​យ៉ាង​ធ្ងន់ធ្ងរ​ជាមួយ​ការ​នាំឲ្យ​បាក់​ច្រាំង​ និង​ធ្វើឲ្យ​ទឹក​ឡើង​ខ្មៅ​កខ្វក់​នៅ​ទី​នោះ។

លោក​ថា៖ «ក្រុមហ៊ុន​ទាំង​ពីរ​បាន​បូម​ខ្សាច់​ខុស​បច្ចេកទេស​ដោយ​បូម​ខ្សាច់​ជ្រៅ​រហូត​ដល់​ ១៦ ​ម៉ែត្រ​ហើយ​ធ្វើការ​បូម​ខ្សាច់​ក្រៅ​តំបន់​អនុញ្ញាត​ដោយ​ខុស​ច្បាប់»។

លោក​ សុន ឆ័យ បាន​ស្នើ​ដល់​លោក​នាយករដ្ឋមន្រ្តី​មេត្តា​ពិនិត្យ​ និង​មាន​វិធានការ​បន្ថែម​ទៀត​ដើម្បី​បញ្ឈប់​ការ​បូម​ខ្សាច់​ដោយ​​អនាធិបតេយ្យ​នៅ​ខេត្ត​កោះកុង​ និង​នៅ​តាម​ដង​ទន្លេ​ដែល​រដ្ឋ​ទទួល​បាន​ចំណូល​តិចតួច​តែ​ធ្វើឲ្យ​ប៉ះពាល់​ដល់​បរិស្ថាន​ និង​ការ​រស់នៅ​របស់​ប្រជាពលរដ្ឋ​ធ្ងន់ធ្ងរ​នោះ​។

កាលពី​ម្សិលមិញ​ផង​ដែរ​ក្រុម​យុវជន​ពី​អង្គការ​មាតា​ធម្មជាតិ​ និង​ប្រជាពលរដ្ឋ​បាន​នាំ​គ្នា​មក​ភ្នំពេញ​ដើម្បី​បង្ហាញ​នូវ​កង្វល់​របស់​ពួកគេ​បន្ថែម​ទៀត​។

លោក​ សាន់ ម៉ាឡា ស្ថាបនិក​អង្គការ​មាតា​ធម្មជាតិ​បាន​ឲ្យ​ដឹង​ក្នុង​សន្និសីទ​សារព័ត៌មាន​កាលពី​ម្សិលមិញ​ថា​លោក​នឹង​ផ្ញើ​លិខិត​មួយ​ច្បាប់​ដាក់​ជូន​ក្រសួង​រ៉ែ​ និង​ថាមពល​ដើម្បី​មាន​វិធានការ​បញ្ឈប់​ការ​បូម​ខ្សាច់​របស់​ក្រុមហ៊ុន​វៀតណាម​ទាំង​ពីរ​នេះ​នៅពេល​ឆាប់ៗ​ខាង​មុខ​ហើយ​ក្រុម​យុវជន​ និង​ប្រជាពលរដ្ឋ​រង​ផល​ប៉ះពាល់​ផ្ទាល់​នឹង​បន្ត​យុទ្ធនាការ​បណ្តេញ​សាឡង់​ដោយ​ខ្លួនឯង​ទៀត​បើ​រដ្ឋាភិបាល​មិន​រក​ដំណោះស្រាយ​ទេ​នោះ។

លោក​ថា​៖ «តាម​ការ​រកឃើញ​របស់​យើង​គឺ​ក្រុមហ៊ុន​បូម​រំលោភ​លើ​អាជ្ញាប័ណ្ណ​ទៀត​នាំ​ឲ្យ​ប៉ះពាល់​ដល់​បរិស្ថាន​ និង​ការ​រស់នៅ​បើ​នៅ​តែ​បន្ត​ហើយ​គ្មាន​ដំណោះស្រាយ​យើង​នឹង​បន្ត​យុទ្ធនាការ​បណ្តេញ​ដោយ​ផ្ទាល់​របស់​យើង​បន្ត​ទៀត»។

លោក​ វ៉ីវ៉ាន់ នីន ជា​ប្រជាពលរដ្ឋ​រស់នៅ​សហគមន៍​ភូមិ​ធ្នង់​ស្រុក​បទុមសាគរ​បាន​ឲ្យ​ដឹង​ថា​អ្នក​ភូមិ​ដែល​សុទ្ធសឹង​តែ​​ជា​អ្នក​ពឹង​លើ​មុខរបរ​នេសាទ​នោះ​បាន​រក​ប្រាក់​ចំណូល​ពី​ការ​នេសាទ​ថមថយ​ចាប់​តាំងពី​ក្រុមហ៊ុន​បូម​ខ្សាច់​ចូល​មក​តំបន់​ព្រែក​អណ្តូង​នេះ​។

លោក​ថា​៖ «​សុទ្ធតែ​អ្នក​រស់នៅ​ពឹង​លើ​របរ​នេសាទ​តែ​ចាប់​តាំងពី​បូម​មក​ទឹក​សុទ្ធ​តែ​ប្រេង​ខ្មៅ​ល្អក់​មាន​ត្រី​សម្បូរ​មក​ពី​ណា​?»។

កន្លង​មក​ មន្ទីរ​រ៉ែ​ និង​ថាមពល​ខេត្ត​ លោក​ ពេជ ស៊ីយ៉ុន ​បាន​​ចុះ​​ពន្យល់​ផ្ទាល់​ដល់​ប្រជាពលរដ្ឋ​ដែល​ឡើង​មក​តវ៉ា​នៅ​សាលា​ស្រុក​បទុមសាគរ​ថា​បច្ចុប្បន្ន​ក្រសួង​កំពុង​បង្កើត​គណៈកម្មការ​ចម្រុះ​ដើម្បី​ពិនិត្យ​មើល​៕

0

Comments

Please, login or register to post a comment