Search form

Login - Register | FOLLOW US ON

Logo of Phnom Penh Post newspaper Phnom Penh Post - លោក​ កឹម សុខា ជឿ​ថា​លោក​ ហ៊ុន សែន ​អាច​ត្រូវ​បង្ខំ​ឲ្យ​ប្រគល់​អំណាច​បើ​ចាញ់​ឆ្នោត

Content image - Phnom Penh Post
លោក កឹម សុខា ប្រធាន​គណបក្ស​សង្គ្រោះ​ជាតិ​ពេល​ផ្ដល់​បទសម្ភាស​ដល់​កាសែត ភ្នំពេញ ប៉ុស្ដិ៍ នៅ​ស្នាក់ការ​គណបក្ស​សង្គ្រោះ​ជាតិ​កាលពី​ថ្ងៃ​សៅរ៍​។ រូបថត PANN RACHANA

លោក​ កឹម សុខា ជឿ​ថា​លោក​ ហ៊ុន សែន ​អាច​ត្រូវ​បង្ខំ​ឲ្យ​ប្រគល់​អំណាច​បើ​ចាញ់​ឆ្នោត

ភ្នំពេញៈ មេដឹកនាំ​គណបក្ស​ប្រឆាំង​លោក កឹម សុខា បាន​ថ្លែង​នៅក្នុង​បទសម្ភាស​ផ្តាច់​មុខ​មួយ​កាលពី​ថ្ងៃ​សៅរ៍​ថា​ លោក​ជឿ​ថា​លោក​នាយក​រដ្ឋមន្ត្រី ហ៊ុន សែន អាច​នឹង​ត្រូវ​បាន​បង្ខំ​ឲ្យ​ប្រគល់​អំណាច ប្រសិន​បើ​គាត់​ចាញ់​ឆ្នោត​នៅ​ក្នុង​ការ​បោះឆ្នោត​ជាតិ​ឆ្នាំ​ ២០១៨ ហើយ​ថា​ការងារ​របស់​គណបក្ស​លោក​ឥឡូវ​នេះ​ត្រូវ​បង្ហាញ​ខ្លួន​ជា​ក្រុម​មួយ​ដែល​ត្រៀម​ខ្លួន​ទៅ​គ្រប់គ្រង​រដ្ឋាភិបាល​។

ថ្លែង​នៅ​ផ្ទះ​របស់​លោក​ក្នុង​ខណ្ឌ​ទួលគោក លោក សុខា បាន​បញ្ជាក់​ថា​លទ្ធផល​នៃ​ការ​បោះឆ្នោត​ឃុំ សង្កាត់ កាល​ពី​ថ្ងៃ​ទី​ ៤ មិថុនា​គឺ​មិន​ទាន់​ល្អ​នៅ​ឡើយ​សម្រាប់​គណបក្ស​ប្រឆាំង​ដូច​ដែល​លោក​បាន​សង្ឃឹម​នោះ​ទេ ហើយ​ថា​លោក​បាន​ចំណាយ​ពេល​ពី​សប្តាហ៍​មុន​ធ្វើ​ដំណើរ​ទៅ​ជនបទ​ដើម្បី​ជំរុញ​ស្មារតី​នេះ​ឡើង​។

លោក សុខា បាន​កំណត់​ ៦០ ​ភាគរយ​នៃ​សំឡេង​ឆ្នោតជាតិ​ថា​ជា​គោលដៅ​របស់​គណបក្ស​សង្គ្រោះ​ជាតិ ប៉ុន្តែ លទ្ធផល​បឋម​បង្ហាញ​ថា​ខ្លួន​ឈ្នះ​តែ​ប្រមាណ ៤៤ ​ភាគរយ​ទល់​នឹង​គណបក្ស​ប្រជាជន​កម្ពុជា​ចំនួន ៥១ ​ភាគរយ​។

លោក កឹម សុខា បាន​ថ្លែង​បន្ត​ថា​៖ «​ភ្លាមៗ​បន្ទាប់ពី​ការ​បោះឆ្នោត គណបក្ស​កាន់​អំណាច​បាន​ប្រកាស​ថា​ខ្លួន​បាន​ឈ្នះ​ និង​អះអាង​ថា​យើង​បាន​ចាញ់ និង​ធ្វើ​ឲ្យ​យើង​ខូចចិត្ត ដូច្នេះ​ទិសដៅ​ធំ​នៃ​ដំណើរ​ទាំង​នេះ​គឺ​ដើម្បី​បង្ហាញ​ប្រជាពលរដ្ឋ​ថា​យើង​មិន​ចាញ់​ទេ​» ហើយ​ពន្យល់​ថា​ការ​ដណ្តើម​សំឡេង​ធំ​មួយ​របស់​គណបក្ស​សង្គ្រោះ​ជាតិ​គឺ​សំខាន់​។

លោក សុខា បន្ត​ថា​៖ «​យើង​ឈ្នះ និង​កំពុង​ឆ្ពោះ​ទៅ​មុខ ប៉ុន្តែ​យើង​ត្រូវ​តែ​បន្ត​ទៅ​មុខ​ទៀត​»​។ «​មាន​មនុស្ស​មួយ​ចំនួន​ដែល​ខិតខំ​ធ្វើការ​ដើម្បី​បោះឆ្នោត​ឲ្យ​មាន​ការ​ផ្លាស់ប្តូរ ប៉ុន្តែ​សម្រាប់​ឥឡូវ​នេះ​យើង​មិន​អាច​សម្រេច​ការ​ផ្លាស់ប្តូរ​បាន ដូច្នេះ​ពួកគេ​អស់​កម្លាំង យើង​មិន​ចង់​ឲ្យ​ពួកគេ​អស់​កម្លាំង​»​។

លោក កឹម សុខា បាន​ថ្លែង​បន្ត​ថា​លោក ហ៊ុន សែន និង​គណបក្ស​ប្រជាជនកម្ពុជា​របស់​លោក​ឥឡូវ​នេះ​កំពុង​រៀបចំ​ឡើងវិញ​សម្រាប់​ការ​បោះឆ្នោត​ជាតិ​ឆ្នាំ ២០១៨ ​។ ដូច្នេះ​គណបក្ស​ប្រឆាំង​ត្រូវ​តែ​ខំប្រឹង​ឲ្យ​ខ្លាំង​ផង​ដែរ ជាពិសេស​ជាមួយ​អតីត​លោក​ប្រធាន សម រង្ស៊ី ដែល​កំពុង​រស់នៅ​និរទេស​នៅ​ប្រទេស​បារាំង​។

លោក សម រង្ស៊ី កាលពី​សប្តាហ៍​មុន​បាន​ថ្លែង​ថា​លោក​នឹង​មិន​ត្រឡប់​មក​ប្រទេស​កម្ពុជា​តាម​សន្យា​ដើម្បី​ប្រឈមមុខ​នឹង​ការ​គំរាម​កំហែង​នៃ​ការ​ចាប់​ខ្លួន​នៅ​ពេល​លោក ហ៊ុន សែន លើកលែង​ការ​ហាមប្រាម​លោក​មិន​ឲ្យ​ចូល​ប្រទេស​នោះ​ទេ​គឺ​ប្រហែល​មួយ​ឆ្នាំ​ បន្ទាប់ពី​លោក កឹម សុខា បាន​ស្នាក់​នៅ​ក្នុង​ប្រទេស​ដើម្បី​តតាំង​នឹង​ការ​គំរាម​កំហែង​នៃ​ការ​ចាប់​ខ្លួន​ពី​លោក​នាយក​រដ្ឋមន្ត្រី ហ៊ុន សែន​។

លោក កឹម សុខា បាន​ថ្លែង​បន្ត​ថា​៖ «​យើង​មាន​គោលដៅ​ដូច​គ្នា​។ យើង​ចង់​ឲ្យ​មាន​ការ​ផ្លាស់ប្តូរ ពីព្រោះ​យើង​បាន​ឃើញ​ថា​ប្រទេស​របស់​យើង​អាច​ប្រឈមមុខ​នឹង​គ្រោះថ្នាក់​ក្រោម​អ្នក​គ្រប់គ្រង​បច្ចុប្បន្ន​ហើយ​លោក​ សម រង្ស៊ី និង​ខ្ញុំ បាន​បូជា​ជាច្រើន​ និង​ប្រឈមមុខ​នឹង​បញ្ហា​ជាច្រើន​»​។

លោក​បន្ត​ថា​៖ «​បុគ្គល​ណា​ក៏ដោយ​អាច​ដឹកនាំ​នៅ​ពេល​គណបក្ស​មាន​គោលការណ៍​ច្បាស់លាស់​ និង​គោលដៅ​... និង​ជា​មេដឹកនាំ យើង​មិន​គួរ​គ្រាន់​តែ​ធ្វើ​ទៅ​តាម​អារម្មណ៍​នោះ​ទេ យើង​ធ្វើ​អ្វី​ជាមួយ​នឹង​យុទ្ធសាស្ត្រ​ និង​គោលការណ៍​នេះ​ជា​អ្វី​ដែល​ខ្ញុំ​បាន​ធ្វើ​»​។

លោក​បន្ត​ថា​៖ «​បើ​ទោះបី​ជា​ព្យាយាម​ដាក់​ខ្ញុំ​នៅ​កន្លែង​ណា​ក៏ដោយ​... ខ្ញុំ​នឹង​ប្រើប្រាស់​គោលការណ៍ ដើម្បី​ព្យាយាម​ដោះស្រាយ​បញ្ហា​។ ចំពោះ​បញ្ហា​ដែល​ខ្ញុំ​ដោះស្រាយ ខ្ញុំ​យក​វិធីសាស្ត្រ​ជា​ក្រុម និង​អ្វី​ក៏ដោយ​ដែល​ខ្ញុំ​ដាក់​ទៅ​កិច្ចប្រជុំ នៅពេល​កិច្ចប្រជុំ​សម្រេច​ខ្ញុំ​នឹង​ចេញ​តាម​នោះ​»​។ «​នេះ​ជា​វិធី​ធ្វើការ​របស់​ខ្ញុំ​»​។

Content image - Phnom Penh Post
លោក​ កឹម សុខា នៅ​ពេល​ទៅ​បោះឆ្នោត​ជ្រើសរើស​ក្រុម​ប្រឹក្សា​ឃុំ សង្កាត់ កាលពី​ថ្ងៃ​ទី ៤ ខែ​មិថុនា​។ ស្រេង ម៉េងស្រ៊ុន

លោក កឹម សុខា ថ្លែង​ថា​សេចក្តី​សម្រេច​មួយ​ក្នុង​ចំណោម​សេចក្តី​សម្រេច​ទាំង​នោះ​គឺ​ឲ្យ​គណបក្ស​សង្គ្រោះ​ជាតិ​បោះបង់​វោហារស័ព្ទ​ប្រឆាំង​វៀតណាម​។ ដូច្នេះ​គូ​ប្រកួត​ប្រជែង​ជាច្រើន​របស់​គណបក្ស​ប្រជាជន​កម្ពុជា ទាំង​លោក កឹម សុខា និង​លោក សម រង្ស៊ី ជា​ញឹកញាប់​បាន​បង្វែរ​វោហារស័ព្ទ​ប្រឆាំង​វៀតណាម​ទៅ​ជា​ការ​អំពាវនាវ​ឲ្យ​មាន​កំហឹង​ទៅ​រក​វៀតណាម​។ ដូច​នៅ​ក្នុង​ការ​បោះឆ្នោត​ជាតិ​ឆ្នាំ​ ២០១៣ លោក សម រង្ស៊ី បាន​ប្រើប្រាស់​យុទ្ធនាការ​នៅ​ខេត្ត​សៀមរាប​អំពាវនាវ​ឲ្យ​ប្រជាពលរដ្ឋ​កម្ពុជា​យក​ប្រាសាទ​អង្គរវត្ត​ត្រឡប់​ពី​ពាណិជ្ជកម្មករ​ជនជាតិ​វៀតណាម​ដែល​មាន​ទំនាក់ទំនង​ជាមួយ​គណបក្ស​ប្រជាជន​កម្ពុជា​។

លោក កឹម សុខា បាន​ទទួល​ស្គាល់​ថា​គណបក្ស​ប្រឆាំង​អំពាវនាវ​ឲ្យ​មាន​ការ​ខឹង​ទៅ​លើ​វៀតណាម​ដើម្បី​ទទួល​បាន​សំឡេង​ឆ្នោត ប៉ុន្តែ​លោក​បាន​សម្រេច​លែង​ឲ្យ​មាន​វោហារស័ព្ទ​បែប​នេះ​ហើយ​ផ្តោត​ទៅ​លើ​បញ្ហា​គោលនយោបាយ​ជាក់លាក់​វិញ​។

លោក​បន្ត​ថា​៖ «​យើង​មិន​អាច​ធ្វើ​វា​លើក​នេះ​។ ប្រសិន​បើ​យើង​ធ្វើ​វា​លើក​នេះ វា​នឹង​បង្កើត​ឲ្យ​មាន​ការ​ខឹង​។ វា​ជា​បញ្ហា​ក្តៅ​មួយ​ហើយ​យើង​បាន​ព្យាយាម​ចៀស​វា​»​។ «​ខ្ញុំ​បាន​ពន្យល់​ទៅ​ថ្នាក់​ដឹកនាំ​គណបក្ស​អំពី​របៀប​ដែល​យើង​អាច​ឈ្នះ​និង​ចាញ់ និង​គ្រោះថ្នាក់​ហើយ​ពួកគេ​បាន​គាំទ្រ​ខ្ញុំ​ដូច្នេះ​នេះ​ជា​គោលការណ៍​របស់​បក្ស​»​។

ក្រុម​អ្នក​សង្កេតការណ៍​ជាច្រើន​នៅ​មាន​ចម្ងល់​ថា តើ​លោក ហ៊ុន សែន ​ដែល​បាន​កាន់​អំណាច​អស់​រយៈពេល​ ៣២ ​ឆ្នាំ​មក​ហើយ​នោះ និង​ធ្លាប់​បាន​ព្រមាន​ម្តង​ហើយ​ម្តង​ទៀត​ថា​សង្គ្រាម​ស៊ីវិល​នឹង​ផ្ទុះ​ឡើង​បើ​សិន​ជា​លោក​បាត់បង់​អំណាច​អាច​នឹង​មិន​ប្រគល់​អំណាច​ទៅ​ឲ្យ​គូប្រជែង​របស់​ខ្លួន​ឬ ប្រសិន​បើ​គណបក្ស​សង្គ្រោះ​ជាតិ​ឈ្នះឆ្នោត​នៅ​ខែ​កក្កដា​ឆ្នាំ​ ២០១៨ ​ខាង​មុខ​នោះ​។

កាលពី​ខែ​មុន​លោក​ ហ៊ុន សែន បាន​ព្រមាន​ថា​លោក​បាន​ត្រៀម​ខ្លួន​រួច​ហើយ ដើម្បី​កម្ចាត់​មនុស្ស​ពី​ ១០០ ​ទៅ​ ២០០ ​នាក់​ដើម្បី​ធានា​ស្ថិរភាព​នៅ​ក្នុង​ប្រទេស​។

លោក កឹម សុខា ​ថ្លែង​ថា​៖ «​សម្រាប់​ការងារ​, ខ្ញុំ​ដឹង​ថា​គាត់​តែងតែ​ព្យាយាម​ទាញ​យក​ប្រយោជន៍​ និង​មិន​ចង់​និយាយ​នៅ​ក្នុង​លក្ខណៈ​ស្មើភាព​គ្នា​ជាមួយ​ដៃគូ​របស់​គាត់​ទេ​។ នេះ​គឺជា​អត្តចរិត​របស់​គាត់​។ គាត់​ចង់​ទាញ​យក​ប្រយោជន៍​ពី​យើង ដូច្នេះ​ហើយ​ខ្ញុំ​មិន​ប្រឈម​មុខ​ជាមួយ​គាត់ ឬ​ធ្វើឱ្យ​គាត់​ខឹង​ទេ​គឺ​ខ្ញុំ​គ្រាន់តែ​ប្រកាន់​លើ​ជំហរ​របស់​ខ្ញុំ​តែ​ប៉ុណ្ណោះ​»​។ «​យើង​បាន​ឃើញ​ថា​គាត់​ធ្វើ​រឿង​ដដែលៗ​ម្តង​ហើយ​ម្តង​ទៀត​ទាំង​នៅ​ក្នុង​របៀប​ដែល​គាត់​និយាយ និង​អត្តចរិត​របស់​គាត់ និង​គោលជំហរ​នយោបាយ​​របស់​គាត់ និង​សារ​របស់​គាត់​។ ប៉ុន្ដែ​លោក​ សុខា បាន​បញ្ជាក់​ថា​លោក​ជឿ​ថា​លោក ហ៊ុន សែន បាន​រៀន​នូវ​មេរៀន​មួយ​កាលពី​ពីរ​បី​ឆ្នាំ​កន្លង​ទៅ​ក្នុង​អំឡុង​ពេល​ដែល​សមាជិក​គណបក្ស​ប្រឆាំង និង​ក្រុម​មន្ត្រី​អង្គការ​សង្គម​ស៊ីវិល​ត្រូវ​បាន​គេ​ប្តឹង​ចាប់​ដាក់​ពន្ធនាគារ វាយដំ និង សម្លាប់​ជាដើម​ហើយ​នៅ​ឆ្នាំ​បន្ទាប់​មក​ទៀត​ឃើញ​ហាក់​មិន​សូវ​មាន​ការ​ឈ្លានពាន​ខ្លាំងក្លា​ប៉ុន្មាន​ទេ​។

ការ​បដិសេធ​ទាំង​ស្រុង​ណា​មួយ​នៃ​ការ​ទទួល​ជ័យជម្នះ​របស់​គណបក្ស​សង្គ្រោះ​ជាតិ​នៅ​ក្នុង​ឆ្នាំ​ ២០១៨ គឺ​មិនមែន​មិន​អាច​ទៅ​រួច​ទេ ប៉ុន្តែ​មនុស្ស​មួយ​ចំនួន​ជឿជាក់​ថា​លោក ហ៊ុន សែន អាច​នឹង​ពឹង​ផ្អែក​លើ​កិច្ចការ​បែប​នោះ​ដែល​អាច​ទទួល​ស្គាល់​ជ័យជម្នះ​របស់​គណបក្ស​ប្រឆាំង​នៅ​ពេល​ដែល​ពួកគេ​ជឿ​ថា​ពួកគេ​រស់នៅ​ដោយ​សន្តិភាព​ជាមួយ​ពួកយើង ជាមួយ​នឹង​ទ្រព្យសម្បត្តិ​ដែល​មាន​ស្រាប់​របស់​ពួកគេ​។

លោក កឹម សុខា មិន​អត្ថាធិប្បាយ​លើ​ការ​រំពឹង​ទុក​អំពី​ការ​រួម​គ្នា​ទេ ប៉ុន្តែ​បាន​ថ្លែង​ថា​គណបក្ស​របស់​លោក​បាន​រៀន​ពី​គណបក្ស​ហ៊្វុនស៊ិនប៉ិច​កាលពី​ទសវត្សរ៍​ឆ្នាំ​ ១៩៩០​។

នៅ​ក្នុង​ករណី​ខ្លះ​លោក​ថ្លែង​ថា​វា​មិន​ច្បាស់ ខណៈ​ដែល​ការ​គ្រប់គ្រង​យោធា និង​ស្ថាប័នរដ្ឋ​នានា​របស់​គណបក្ស​ប្រជាជន​កម្ពុជា​អាច​នឹង​មិន​ជួយ​គណបក្ស​សង្គ្រោះ​ជាតិ​បាន​ច្រើន​នោះ​ទេ​។

លោក កឹម សុខា ថ្លែង​អំពី​ការ​បញ្ចុះបញ្ចូល​គណបក្ស​ប្រជាជន​ក្នុង​ការ​ប្រគល់​អំណាច​ថា​៖ «​វា​មិន​ងាយស្រួល​នោះ​ទេ​»​។ ប្រសិន​បើ​ការ​បោះឆ្នោត​ប្រកៀក​ប្រកិត​គ្នា​នោះ​វា​នឹង​ពិបាក​ហើយ​វា​អាច​នាំ​ឲ្យ​មាន​រឿង​នេះ​រឿង​នោះ​កើតឡើង ប៉ុន្តែ​ខ្ញុំ​ជឿជាក់​ថា​នៅ​ពេល​ដែល​យើង​ឈ្នះ​ច្រើន​ និង​ខ្ពស់​ជាង​នោះ​នឹង​មាន​ការ​ពិភាក្សា​គ្នា​អំពី​ការ​ប្រគល់​អំណាច​។

លោក​ថ្លែង​ថា​៖ «​ស្ថានភាព​បច្ចុប្បន្ន​នេះ​គឺ​មិន​ដូច​កាលពី​ឆ្នាំ​ ១៩៩៣-១៩៩៨ និង​ឆ្នាំ​ ២០០៣ នោះ​ទេ​ហើយ​វា​មិន​ត្រឹម​តែ​ប្រជាពលរដ្ឋ​នោះ​ទេ​តែ​មន្ត្រី​រាជការ និង​កងកម្លាំង​ប្រដាប់​អាវុធ​ដែល​ដឹង​ថា​អ្វី​ជា​ភាព​វិជ្ជមាន និង​អវិជ្ជមាន និង​ដឹង​ថា​អ្នក​ណា​ល្អ​ និង​អ្នក​ណា​អាក្រក់​នោះ​ពួកគេ​មិន​ចង់​ឲ្យ​សង្គម​កម្ពុជា​នៅ​វាយប្រហារ​គ្នា​នោះ​ទេ​»​។ «​ខ្ញុំ​ជឿ​ថា​លោក ហ៊ុន សែន និង​គណបក្ស​ប្រជាជន​ដឹង​ពី​ចំណុច​នេះ​»៕PS/NS

0

Comments

Please, login or register to post a comment

ព័ត៌មានពាក់ព័ន្ធ