Search form

Login - Register | FOLLOW US ON

Logo of Phnom Penh Post newspaper Phnom Penh Post - លោក ធន សារ៉ាយ ស្នើ​ឲ្យ​ ស្រីមុំ ផ្តល់​យុត្តិធម៌​ដល់​អាដហុក

លោក ធន់ សារ៉ាយ (ឆ្វេង) នៅ​ក្នុង​សន្និសីទ​កាសែត​កាលពី​ម្សិលមិញ។
លោក ធន់ សារ៉ាយ (ឆ្វេង) នៅ​ក្នុង​សន្និសីទ​កាសែត​កាលពី​ម្សិលមិញ។ ផា លីណា

លោក ធន សារ៉ាយ ស្នើ​ឲ្យ​ ស្រីមុំ ផ្តល់​យុត្តិធម៌​ដល់​អាដហុក

ភ្នំពេញៈ ប្រធាន​សមាគម​ការពារ​សិទ្ធិ​មនុស្ស​អាដហុក​លោក ធន់ សារ៉ាយ តំណាង​ឱ្យ​មន្រ្តី​របស់​ខ្លួន​ចំនួន ៥ រូប​ដែល​នឹង​ចូល​បំភ្លឺ​នៅ​អង្គភាព​ប្រឆាំង​អំពើ​ពុករលួយ​នៅ​ថ្ងៃ​នេះ និង​ថ្ងៃ​បន្ត​បន្ទាប់​ទៀត​បាន​ស្នើ​ឱ្យ​កញ្ញា ខុម ចាន់តារាទី ហៅ​ ស្រីមុំ ផ្តល់​យុត្តិធម៌​ដល់​សមាគម​វិញ​ដែល​បាន​ជួយ​ផ្តល់​ជំនួយ​ផ្លូវ​ច្បាប់​ដល់​នាង​នៅ​ពេល​ដែល​មាន​អាសន្ន​រត់​មក​ស្នើ​សុំ​ឲ្យ​ជួយ។

ក្នុង​សន្និសីទ​សារព័ត៌មាន​ស្តីពី​ការ​បង្ហាញ​អាណត្តិ​ការងារ​របស់​ អាដហុក ទាក់ទង​នឹង​ករណី​កញ្ញា ខុម ចាន់តារាទី កាលពី​ម្សិលមិញ​នៅ​អង្គការ CHRAC ប្រធាន​សមាគម​សិទ្ធិ​មនុស្ស​អាដហុក លោក ធន់ សារ៉ាយ ថ្លែង​ថា​អ្វី​ដែល​មន្រ្តី​របស់​ខ្លួន​ខិតខំ​ស្វែងរក​យុត្តិធម៌​ជូន ស្រី មុំ នា​ពេល​កន្លង​មក​ធ្វើ​ឡើង​ក្នុង​នាម​ជា​អង្គការ​សិទ្ធិ​មនុស្ស​ប៉ុណ្ណោះ។

លោក​បន្ត​ថា អាដហុក ក៏​មិន​ចង់​បាន​ការ​តបស្នង​សងគុណ​អី​ពី​ ស្រីមុំ​ ដែរ​តែ​ស្នើ​ឱ្យ​នាង​និយាយ​ការ​ពិត និង​បញ្ជាក់​ថា​អាដហុក​មិន​បាន​ណែនាំ​ឱ្យ​និយាយ​កុហក​នោះ​ទេ។

លោក​ថា៖ «យើង​មិន​ចង់​ឱ្យ​គាត់​ដឹងគុណ​ពី​សមាគម​ជួយ​គាត់​ពី​ដំបូង​ទេ​ព្រោះ​ថា​គាត់​ភ័យ​ណាស់​ទាំង​ម្តាយ កូន និង​ពូ​គាត់​មក​សុំ​ឱ្យ​យើង​ជួយ យើង​មិន​សុំ​ថា​ឱ្យ​នាង​មក​អរគុណ ឬ​សុំទោស​អី​ទេ​គ្រាន់​តែ​សុំ​ឱ្យ​នាង​ផ្តល់​យុត្តិធម៌​ឱ្យ​យើង​វិញ​ផង​ថា​យើង​មិន​មែន​បង្គាប់​បញ្ជា​នាង​ឱ្យ​និយាយ​អ្វី​ខុស​ការពិត​ដែល​នាង​ចង់​និយាយ​ទេ»។

លោក​បន្ត​ថា៖ «ដូច្នេះ​កុំ​ឱ្យ​នាង​មក​ដល់​ត្រើយ​ហើយ មក​រក​ការ​ចោទប្រកាន់​មក​អាដហុក​យើង​វិញ​ដែល​យើង​ខិតខំ​ជួយ​នាង​តាំងពី​ដើម​ទី​ខិតខំ​ផ្តល់​នូវ​អ្វី​ដែល​នាង​ចង់​បាន​ផង​ដែរ»។

លោក ធន់ សារ៉ាយ បាន​រៀបរាប់​ដំណើរ​ពី​ដំបូង​មក​ថា៖ «នៅ​ពេល​នាង​មក​រក​ឱ្យ​យើង​ជួយ​ដំបូង​ក្នុង​នាម​យើង​ជា​សិទ្ធិ​មនុស្ស​ត្រូវការ​ជួយ​ឧបត្ថម្ភ​ដល់​នាង​ដោយសារ​នាង​មាន​ការ​ភិតភ័យ​អ៊ីចឹង​ហើយ​នេះ​ជា​ទឡ្ហីករណ៍​ធំ​ដែល​សមាគម​យើង​ខ្ញុំ​ក្នុង​នាម​ជា​អង្គការ​សិទ្ធិ​មនុស្ស​មិន​អាច​ធ្មេច​ភ្នែក​ច្រាន​ឱ្យ​នាង​ចេញ​ពី​សមាគម​យើង​វិញ​ដោយ​ទទេ​អ៊ីចឹង​បាន​ទេ​ព្រោះ​ប៉ះពាល់​ដល់​អង្គការ​សិទ្ធិ​មនុស្ស និង​អាច​ធ្វើ​ឱ្យ​នាង​មិន​សប្បាយ​ចិត្ត​យ៉ាង​ខ្លាំង»។

លោក ធន់ សារ៉ាយ ក៏​មាន​ចម្ងល់​ផង​ដែរ​ថា​ហេតុអ្វី​បាន​ជា​អង្គភាព​ប្រឆាំង​អំពើ​ពុករលួយ​កោះ​អញ្ជើញ​មន្រ្តី​របស់​ខ្លួន​ចូល​បំភ្លឺ?

លោក​ថា៖ «អ៊ីចឹង​ហើយ​បាន​ជា​យើង​នាំ​គ្នា​ឆ្ងល់​ថា ហេតុអី​បាន​ជា​ករណី​នេះ​បែរ​ទៅ​ជា​អង្គភាព​ប្រឆាំង​អំពើ​ពុករលួយ​មក​កោះ​អញ្ជើញ​បុគ្គលិក​យើង​ខ្ញុំ​ទៅ​សាកសួរ​ពី​រឿង​ហ្នឹង? តែ​បើ​តាម​ខ្ញុំ​ដឹង អ.ប.ព គាត់​ធ្វើ​តែ​រឿង​ករណី​ទៅ​លើ​បញ្ហា​អំពើ​ពុករលួយ​លួច​ប្រាក់​ជាតិ​ទេ​ចំណែក​រឿង​នេះ​យើង​អត់​បាន​ប្រព្រឹត្ត​ពុករលួយ​អី​សោះ​ហេតុអ្វី​រឿង​នេះ​ទៅ​ជា​អ៊ីចឹង​ទៅ​វិញ?»។

បើ​តាម​លោក ធន់ សារ៉ាយ នៅ​ពេល​មាន​ករណី​នេះ​កើតឡើង​ក្រុម​គ្រួសារ​ ស្រីមុំ ​ទាំង​មូល​រួម​ទាំង​ ស្រីមុំ ផ្ទាល់​បាន​ស្នើសុំ​អាដហុក​ឱ្យ​ជួយ​បញ្ជូន​ពួកគេ​ទៅ​ក្រៅ​ប្រទេស​តែ​លោក​ថា​ពេល​នោះ​សមាគម​មិន​អាច​ធ្វើ​តាម​គាត់​បាន​ទេ។

លោក​ថា៖ «រឿង​ទៅ​បរទេស​នេះ​គឺ​គ្រួសារ​គាត់​ទាំង​មូល​ម្តាយ ឪពុកមា ខ្លួន​នាង​ផ្ទាល់​ក៏​បាន​ស្នើសុំ​ថា​គាត់​មាន​ការ​ភ័យខ្លាច​ណាស់​ដោយសារ​គាត់​មាន​គេ​តាម​មាន​គេ​ឃ្លាំ​មើល​នាង សុវត្ថិភាព​នាង​ហាក់​ដូចជា​មាន​ការ​ភ័យព្រួយ​អ៊ីចឹង​ហើយ​គាត់​មក​ពិគ្រោះ​យោបល់​ជាមួយ​យើង​ថា​ជួយ​ឱ្យ​គាត់​ទៅ​ក្រៅ​ប្រទេស​បាន​អត់​យើង​ប្រាប់​គាត់​ទៅ​វិញ​ថា​យើង​គ្មាន​លទ្ធភាព​ជួយ​គាត់​ទេ​ព្រោះ​យើង​ជា​អង្គការ​សង្គម​ស៊ីវិល​ក្នុង​ស្រុក​ទេ»។

ក្នុង​សន្និសីទ​នោះ អាដហុក ក៏​បាន​បញ្ចេញ​ពាក្យ​ស្នើសុំ​របស់ ស្រីមុំ ដែល​ស្នើសុំ​ថវិកា​ពី​អាដហុក​ផង​ដែរ។

ក្នុង​លិខិត​របស់​សមាគម​អាដហុក​ស្តីពី​ការ​ស្នើសុំ​ថវិកា​ដែល​មាន​ចុះ​ហត្ថលេខា​ដោយ​កញ្ញា ខុម ចាន់តារាទី ចុះ​ថ្ងៃ​ទី ៧ ខែ​មេសា ឆ្នាំ ២០១៦ បាន​សរសេរ​ថា «សំណើ​សុំ​ការ​ឧបត្ថម្ភ​លើ​ថ្លៃ​ធ្វើ​ដំណើរ ហូបចុក និង​ស្នាក់នៅ​ដើម្បី​ទៅ​ទីស្តីការ​កណ្តាល​សមាគម​អាដហុក​ស្នើសុំ​អន្តរាគមន៍​ និង​ទៅ​បំភ្លឺ​តាម​ការ​កោះ​ហៅ​របស់​ក្រសួង​មហា​ផ្ទៃ​ថ្ងៃ​ទី ១១ ខែ​មីនា និង​ទៅ​បំភ្លឺ​នៅ​តុលាការ​ក្រុង​ភ្នំពេញ​ថ្ងៃ​ទី ៨ ខែ​មេសា ឆ្នាំ ២០១៦»។

លិខិត​បន្ត​ទៀត​ថា៖ «មូលហេតុ​ដោយសារ​នាង​ខ្ញុំ​ និង​ម្តាយ​ជា​ជន​ក្រីក្រ​ទទួល​រងគ្រោះ​ដោយសារ​ការ​រំលោភ​សិទ្ធិ​មនុស្ស​ធ្ងន់ធ្ងរ​ផ្នែក​នយោបាយ​ហើយ​រង​ការ​ចោទប្រកាន់ និង​បរិហារកេរ្តិ៍​ខ្លាំង​ហួស​ហេតុ​មក​លើ​រូប​នាង​ខ្ញុំ​ទាំង​អយុត្តិធម៌»។

អាដហុក​ក៏​បាន​បញ្ចេញ​ខ្ទង់​ចំណាយ​សម្រាប់​ឧបត្ថម្ភ​ដល់​ ស្រីមុំ ផង​ដែរ​ដោយ​បាន​រៀបរាប់​ថា​ថ្លៃ​ឡាន​ទៅ​មក​កំពង់ចាម ភ្នំពេញ​ចំនួន ៥៦ ដុល្លារ​ ថ្លៃ​ម៉ូតូ​ឌុប​ទៅ​មក​ផ្ទះ​ទី​រួម​ខេត្ត ៤០ ដុល្លារ ថ្លៃ​ហូបបាយ៦០ ដុល្លារ ថ្លៃ​ស្នាក់នៅ ២៨ ដុល្លារ និង​ថ្លៃ Tuk Tuk ទៅ​មក​ពី​អាដហុក​ទៅ​ក្រសួង​មហាផ្ទៃ ២០ ដុល្លារ​សរុប​ជា​រួម ២០៤ ដុល្លារ។

លោក ធន់ សារ៉ាយ បញ្ជាក់​ថា​ការ​ឱ្យ​លុយ​នេះ​មិនមែន​ជា​ការ​សូកប៉ាន់​នោះ​ទេ​តែ​ជា​ការ​ជួយ​ជនរងគ្រោះ។ មន្រ្តី​របស់​អាដហុក​នឹង​ចូល​បំភ្លឺ​តាម​ការ​អញ្ជើញ​របស់​អង្គភាព​ប្រឆាំង​អំពើ​ពុករលួយ​នៅ​ថ្ងៃ​នេះ និង​ភ្ជាប់​ភ័ស្តុតាង​ដូចជា វីដេអូ និង​លិខិត​ផ្សេងៗ​ទៀត​ដោយ​អះអាង​ថា៖ «យើង​មិន​ខ្លាច​រារែក​អី​ទេ​ព្រោះ​យើង​អត់​មាន​ធ្វើ​អី​ខុស​ឆ្គង​ចំពោះ​មុខ​ច្បាប់​ទេ»។

មិន​មាន​ប្រភព​ទាក់ទង​សុំ​ការ​បំភ្លឺ​ពី ស្រីមុំ បាន​ទេ​ដោយសារ​តែ​តាំង​ពី​ដើម​ទី​មក​នាង​តែងតែ​ប្រាប់​អ្នក​កាសែត​ថា​នាង​មិន​មាន​ទូរស័ព្ទ​ប្រើ​ទេ។

ប្រធាន​ផ្នែក​ស៊ើប​អង្កេត​នៃ​សមាគម​ការពារ​សិទ្ធិ​មនុស្ស​អាដហុក​លោក នី សុខា ថ្លែង​ថា៖ «អ្វី​ដែល​យើង​បាន​ធ្វើ​ឈរ​លើ​តួនាទី​យើង​ដូចជា​មិន​មាន​ប៉ះពាល់​អី​ធំ​ដុំ​ដល់​កិតិ្តយស​យើង​ទេ​ផ្ទុយ​ទៅ​វិញ​បង្ហាញ​កាន់​តែ​ច្បាស់​ថា អាដហុក ធ្វើ​ការ​មាន​គោលការណ៍​ច្បាស់លាស់»។

លិខិត​ចុះ​ហត្ថលេខា​ដោយ​លោក នួន សុធីមន្ត មន្រ្តី​នគរបាល​យុត្តិធម៌​នៃ​អង្គភាព​ប្រឆាំង​អំពើ​ពុករលួយ​ចុះ​ថ្ងៃ​ទី ២៥ ខែ​មេសា​បាន​កោះ​ហៅ​មន្រ្តី​សមាគម​ការពារ​សិទ្ធិ​មនុស្ស​អាដហុក​ចំនួន ៥ រូប​ និង​បី​រូប​ទៀត​មិន​ទាន់​បង្ហើប​ឈ្មោះ​ឱ្យ​ដឹង​នោះ​ទេ។

មន្រ្តី​ទាំង​នោះ​រួម​មាន​អតីត​មេធាវី ស្រីមុំ លោកស្រី ទ្រី ឈូន លោកស្រី លឹម មុនី មន្រ្តី​អង្កេត​ជាន់​ខ្ពស់​នៃ​សមាគម​លោក នី សុខា ប្រធាន​ផ្នែក​ស៊ើប​អង្កេត​លោក យី សុខសាន្ត អនុប្រធាន​ផ្នែក​ស៊ើបអង្កេត​នៃ​សមាគម និង​លោក ណៃ វ៉ង់ដា អនុប្រធាន​ផ្នែក​ស៊ើប​អង្កេត​ឱ្យ​ទៅ​បង្ហាញ​ខ្លួន​នៅ​អង្គភាព «ដើម្បី​ស្តាប់​ចម្លើយ​ពាក់ព័ន្ធ​នឹង​ការ​ណែនាំ​ឱ្យ​កញ្ញា ខុម ចាន់តារាទី ហៅ ស្រីមុំ ផ្តល់​ចម្លើយ​ដល់​អាជ្ញាធរ​មាន​សមត្ថកិច្ច»។

ចំណែក​មន្រ្តី​សិទ្ធិ​មនុស្ស​ផ្សេង​ទៀត​ដែល ស្រីមុំ បាន​ចោទប្រកាន់​ហើយ​ត្រូវ​អង្គភាព​កោះ​ហៅ​ដែរ​នោះ​រួមមាន​លោកស្រី ធីតា ឃឹះ នាយិកា​អង្គការ​សីលកា លោក សឺន សាលី មន្រ្តី​សិទ្ធិ​មនុស្ស​នៅ UN និង​លោក នី ចរិយា អគ្គលេខាធិការ​រង គជប៕

0

Comments

Please, login or register to post a comment

ព័ត៌មានពាក់ព័ន្ធ