ភ្នំពេញៈ លោកនាយឧត្តមសេនីយ៍ផ្កាយមាស ៤ ប៉ុល សារឿន អគ្គមេបញ្ជាការនៃកងយោធពលខេមរភូមិន្ទបានអះអាងនៅចំពោះមុខមន្ត្រីជាន់ខ្ពស់យោធាជាច្រើននាក់ចូលរួមនៅក្នុងកិច្ចប្រជុំប្រចាំឆ្នាំនៅអគ្គបញ្ជាការដ្ឋាននៃក្រសួងការពារជាតិកាលពីម្សិលមិញថាអ្នកនយោបាយមួយចំនួនក្នុងចំណោម ១១៨ នាក់នៃអតីតគណបក្សសង្គ្រោះជាតិដែលត្រូវបានតុលាការកំពូលហាមឃាត់សិទ្ធិធ្វើនយោបាយនោះកំពុងចិញ្ចឹមចិត្តរៀបចំតំបន់កម្លាំងប្រដាប់អាវុធតាមព្រំដែនកម្ពុជា-ថៃ ដូចក្នុងសម័យសង្គ្រាមស៊ីវិលដើម្បីប្រឆាំងនឹងរាជរដ្ឋាភិបាល។
នៅក្នុងកិច្ចប្រជុំបូកសរុបលទ្ធផលការងារហ្វឹកហ្វឺនរបស់កងយោធពលខេមរភូមិន្ទ និងប្រជុំផ្សព្វផ្សាយផែនការការងារហ្វឹកហ្វឺនឆ្នាំ ២០១៨ នៅអគ្គបញ្ជាការដ្ឋាននៃកងយោធពលខេមរភូមិន្ទនៃក្រសួងការពារជាតិនៅព្រឹកថ្ងៃទី ២ ខែមករា ឆ្នាំ ២០១៨ អគ្គមេបញ្ជាការ លោក ប៉ុល សារឿន បានថ្លែងថា៖ «អ្នកដែលនៅពីក្រោយនៅបន្តព្យាយាមធ្វើបដិវត្តន៍ពណ៌ និងវាអាចមានគ្រោះថ្នាក់ហើយសុំជំរុញឲ្យកងកម្លាំងទាំងអស់យកចិត្តទុកដាក់ក្នុងការជួយទប់ស្កាត់បដិវត្តន៍ពណ៌ដើម្បីថែរក្សាសន្តិភាព និងការអវិឌ្ឍដែលដឹកនាំដោយលោកនាយករដ្ឋមន្ត្រី។ យើងទាំងអស់គ្នាត្រូវតែការពារសន្តិភាពក្នុងនាមជាកងយុទ្ធពលខេមរភូមិន្ទក្រោមការដឹកនាំរបស់សម្តេចតេជោយើងឲ្យបាន»។
លោកថ្លែងបន្តថា៖ «នៅក្នុង ១១៨ នាក់ហ្នឹងនៅមានគំនិតថានឹងរៀបចំតំបន់យោធានៅតាមព្រំដែនដូចសម័យសង្គ្រាមស៊ីវិលនៅតាមព្រំដែនកម្ពុជា-ថៃគណបក្សប្រឆាំងនឹងមិនអាចរស់ឡើងវិញទេ។ នេះគឺជាជោគជ័យនៃការទប់ស្កាត់បដិវត្តន៍ពណ៌ និងមិនអាចប្រកែកបានហើយវាជាការពិត និងសូមចងចាំឲ្យបានច្បាស់ថាបដិវត្តន៍ពណ៌នេះទៅទីណាបំផ្លាញទីនោះ សូមជម្រាបជាពិសេសថានាយទាហានរបស់យើងដែលក្មេងៗធ្វើយ៉ាងណាកុំឲ្យបាត់សន្តិភាព ហើយប្រសិនបើបាត់សន្តិភាពគឺបាត់អ្វីៗទាំងអស់»។
លោកអគ្គមេបញ្ជាការថ្លែងថា៖ «អ្វីដែលជោគជ័យក្នុងប្រវត្តិសាស្ត្រសម្រាប់ប្រទេសយើងនៅក្នុងឆ្នាំ ២០១៧ គឺការងារពាក់ព័ន្ធការបំផ្លិចបំផ្លាញផែនការបដិវត្តន៍ពណ៌នៅកម្ពុជា។ ហើយប្រសិនណាមិនបំផ្លាញផែនការបដិវត្តន៍ពណ៌នេះបានទេនោះបញ្ហាការពារសន្តិភាពដែលជាតម្លៃខ្ពស់បំផុតនោះមិនអាចធ្វើទៅបានទេ»។
លោកស្រី មូរ សុខហួរ អតីតអនុប្រធានគណបក្សសង្គ្រោះជាតិដែលជាអ្នកនយោបាយម្នាក់ក្នុងចំណោមអ្នកដែលត្រូវបានតុលាការកំពូលហាមឃាត់សិទ្ធិនយោបាយនោះដែរបានថ្លែងថាវាជាការឃោសនារបស់គណបក្សប្រជាជនកម្ពុជាហើយកំពុងប្រើប្រាស់កងកម្លាំងប្រដាប់អាវុធដើម្បីផ្ញើសារបំភិតបំភ័យដល់សាធារណជនដើម្បីប្រឆាំងនឹងការតវ៉ាគ្រប់ទម្រង់។
លោកស្រី សុខហួរ ថ្លែងថា៖ «ពួកគេប្រើប្រាស់វាដើម្បីគ្របបាំងការកាប់សម្លាប់របស់រដ្ឋទៅលើកម្មករ ការចាប់សកម្មជន និងគូប្រឆាំងនយោបាយដាក់ពន្ធនាគារ។ វាជាភួយរបស់ពួកគេដើម្បីគ្របបាំងការគាបសង្កត់សេរីភាពទាំងស្រុង។ នោះគឺជាអ្វីដែលប្រទេសកម្ពុជាកំពុងធ្វើដោយគ្មានសកម្មភាពណាមួយពីអន្តរជាតិរួមទាំងទណ្ឌកម្មផងដែរ»។
លោកស្រីថ្លែងបន្តថា៖ «ការឃោសនារបស់គណបក្សប្រជាជនដែលប្រើប្រាស់កម្លាំងយោធា និងនគរបាលដែលពួកគេគួរតែមានលក្ខណៈអព្យាក្រឹតនោះគឺវាជាសារភ័យខ្លាចមួយទៅដល់សាធារណជនទូទៅដើម្បីប្រឆាំងទៅនឹងទម្រង់នៃការប្រឆាំងតវ៉ាណាមួយ»។
លោក សុខ ឥសាន អ្នកនាំពាក្យគណបក្សប្រជាជនកម្ពុជាថ្លែងថាដើម្បីការពារ និងពង្រឹងអំណាចរបស់ខ្លួនរាជរដ្ឋាភិបាលចាំបាច់ត្រូវអនុវត្តកម្មវិធីនយោបាយរបស់គណបក្សប្រជាជនកម្ពុជាដែលជាគណបក្សឈ្នះឆ្នោតប្រែក្លាយឲ្យទៅជាកម្មវិធីនយោបាយរបស់រាជរដ្ឋាភិបាលក្នុងការកសាង និងអភិវឌ្ឈប្រទេសឲ្យបានរីកចម្រើនស្របតាមបំណងប្រាថ្នារបស់ប្រជាជនជាម្ចាស់ឆ្នោតដើម្បីម្ចាស់ឆ្នោតជឿទុកចិត្ត និងបោះឆ្នោតគាំទ្រតទៅទៀត»។
លោក ឥសាន ថ្លែងថា៖ «រាជរដ្ឋាភិបាលកម្ពុជាចាំបាច់ត្រូវចាត់វិធានការគ្រប់បែបយ៉ាងដើម្បីទប់ស្កាត់រាល់អំពើអនាធិបតេយ្យអំពើល្មើសច្បាប់អំពើវិទ្ធង្សនានយោបាយ សេដ្ឋកិច្ច និងរារាំងការរីកចម្រើនរបស់ប្រទេសជាតិបង្កើតជាឧបសគ្គដល់ការអនុវត្តកម្មវិធីនយោបាយរបស់រាជរដ្ឋាភិបាល»។
លោកបន្តថា៖ «បញ្ហាសំខាន់ពាក់ព័ន្ធនឹងបក្សប្រឆាំងដែលបានឃុបឃិតជាមួយបរទេសប៉ុនប៉ងផ្តួលរំលំរាជរដ្ឋាភិបាលកម្ពុជាស្របច្បាប់តាមវិធីប្រើផ្លូវកាត់ រំលោភលើគោលការណ៍លទ្ធិប្រជាធិបតេយ្យដែលហៅថាជាបដិវត្តន៍ពណ៌នោះ។ ដូច្នេះរាជរដ្ឋាភិបាលចាំបាច់ត្រូវតែចាត់វិធានការបង្ក្រាបឲ្យបានទាន់ពេលវេលាមិនអាចបណ្តែតបណ្តោយឲ្យមានឧបាយកលផ្តួលរំលំបានជាដាច់ខាត»។
អ្នកវិភាគនយោបាយលោក មាស នី បានយល់ស្របថាសាររបស់លោក ប៉ុល សារឿន គឺជា «ឧបាយកលនយោបាយ»។
បើទោះបីជាធម្មតាកងទ័ពត្រូវឈរលើអព្យាក្រឹតភាពក្តីក៏លោក នី បានថ្លែងថា៖ «វាមិនមែនជារឿងភ្ញាក់ផ្អើល» នោះទេនៅពេលដែលមេបញ្ជាការរបស់ខ្លួន បានគាំទ្រជាសាធារណៈចំពោះគណបក្សកាន់អំណាចនោះ។
លោក នី ក៏បានចោទសួរអំពីជោគជ័យរបស់រដ្ឋាភិបាលក្នុងការរារាំងបដិវត្តន៍ពណ៌ផងដែរដែលវាមិនដែលបានបង្ហាញសញ្ញាណាមួយដែលអាចធ្វើឱ្យលេចចេញជារូបរាងនោះទេ។
លោក នី ថ្លែងថា៖ «បដិវត្តន៍ពណ៌គឺគ្រាន់តែជាការសង្ស័យរបស់រដ្ឋាភិបាលដែលបានលើកឡើងតែខ្លួនឯងប៉ុណ្ណោះ»។
លោកបានបន្តទៀតថាការចោទប្រកាន់អំពីសង្គ្រាមស៊ីវិលទំនងជាកើតចេញពីការអត្ថាធិប្បាយរបស់លោក សម រង្ស៊ី ដែលជាអតីតមេដឹកនាំគណបក្សប្រឆាំងដែលបានជំរុញឱ្យកងទ័ពកុំស្តាប់តាមបញ្ជារបស់មេបញ្ជាការរបស់ពួកគេប្រសិនបើមានបញ្ជាឱ្យបាញ់ក្រុមអ្នកប្រមូលផ្ដុំតវ៉ា។
លោកថ្លែងថា៖ «ខ្ញុំមិនគិតថាអាចនឹងមានលទ្ធភាពរៀបចំទ័ពព្រៃនោះទេ»៕ NS