Search form

Login - Register | FOLLOW US ON

Logo of Phnom Penh Post newspaper Phnom Penh Post - លោក ប៊ិន ឈិន ក្លាយ​ជា​រដ្ឋមន្ត្រី​ស្ដីទី ​ក្រោយ​លោក សុខ អាន ទទួល​មរណភាព​ព្រោះ​រោគា

Content image - Phnom Penh Post
លោក​នាយក​រដ្ឋមន្ដ្រី ហ៊ុន សែន និង​លោក​ឧបនាយក​រដ្ឋមន្ដ្រី ស ខេង ចូលរួម​បុណ្យ​សព​លោក​ឧបនាយក​រដ្ឋមន្ដ្រី សុខ អាន ពី​ម្សិលមិញ។ ហេង ជីវ័ន

លោក ប៊ិន ឈិន ក្លាយ​ជា​រដ្ឋមន្ត្រី​ស្ដីទី ​ក្រោយ​លោក សុខ អាន ទទួល​មរណភាព​ព្រោះ​រោគា

ភ្នំពេញ: លោក ប៊ិន ឈិន សមាជិក​គណៈអចិន្រៃ្តយ៍​នៃ​គណបក្ស​ប្រជាជន​កម្ពុជា​ត្រូវ​បាន​តែងតាំង​ជា​រដ្ឋមន្ត្រី​ស្ដីទី​ទទួល​បន្ទុក​ទីស្ដីការ​គណៈរដ្ឋមន្ត្រី​ជំនួស​លោក សុខ អាន ដែល​បាន​ទទួល​មរណភាព​ក្រោយ​ពី​បាន​ទទួល​បន្ទុក​មុខ​តំណែង​នេះ​អស់​រយៈពេល​ប្រមាណ​ជា ២៥ ឆ្នាំ​នៅ​ក្នុង​បក្ស​កាន់​រដ្ឋាភិបាល​នាពេល​បច្ចុប្បន្ន​នេះ។

លោក​នាយក​រដ្ឋមន្ត្រី ហ៊ុន សែន ដែល​ជា​ប្រធាន​គណបក្ស​កាន់​រដ្ឋាភិបាល​យូរ​ជាង​គេ​បំផុត​នៅ​ក្នុង​តំបន់​អាស៊ី​បាន​ចុះ​ហត្ថលេខា​កាលពី​ថ្ងៃ​ទី ១៦ ខែ​មីនា ឆ្នាំ ២០១៧ ក្នុង​ការ​សម្រេច​ស្ដីពី​ការ​ប្រគល់​ភារកិច្ច​បន្ថែម​ជូន​លោក ប៊ិន ឈិន ជា​ឧបនាយក​រដ្ឋមន្ត្រី​ទទួល​បន្ទុក​ប្រចាំការ។

លោក​នាយក​រដ្ឋមន្ត្រី ហ៊ុន សែន បាន​សរសេរ​នៅ​ក្នុង​សេចក្ដី​សម្រេច​នេះ​ថា៖ «ត្រូវ​បាន​ប្រគល់​ភារកិច្ច​បន្ថែម​ជូន​ឯកឧត្តម ប៊ិន ឈិន ឧបនាយក​រដ្ឋមន្ត្រី​ទទួល​បន្ទុក​ប្រចាំការ​ជា​រដ្ឋមន្ត្រី​ស្ដីទី​ទទួល​បន្ទុក​ទីស្ដីការ​គណៈរដ្ឋមន្ត្រី ជំនួស​សម្ដេច វិបុលបញ្ញា សុខ អាន ដែល​បាន​ទទួល​មរណភាព»។

លោក​សរសេរ​បន្ត​ថា៖ «ឧបនាយក​រដ្ឋមន្ត្រី ទេស​រដ្ឋមន្ត្រី រដ្ឋមន្ត្រី​គ្រប់​ក្រសួង ប្រធាន​គ្រប់​ស្ថាប័ន និង​ឯកឧត្តម ប៊ិន ឈិន ត្រូវ​អនុវត្ត​តាម​សេចក្ដី​សម្រេច​នេះ​ចាប់ពី​ថ្ងៃ​ចុះ​ហត្ថលេខា​តទៅ»។

យោង​តាម​គេហទំព័រ CEN លោក ប៊ិន ឈិន គឺជា​ឥស្សរជន​មួយ​រូប​របស់​គណបក្ស​ប្រជាជន​កម្ពុជា​ជា​តំណាងរាស្ត្រ មណ្ឌល​ព្រៃវែង ពី​ឆ្នាំ ១៩៩៨ ដល់​ឆ្នាំ ២០១៣ និង​ជា​អតីត​ប្រធាន​ក្រុម​ប្រឹក្សា​ធម្មនុញ្ញ​ពីរ​អាណត្តិ​ពី​ឆ្នាំ ២០០១-២០០៧។ លោក​កើត​នៅ​ថ្ងៃ​ទី ១៧ ខែ​សីហា ឆ្នាំ ១៩៤៩ នៅ​ឃុំ​ជើង​ទឹក ស្រុក​កំពង់លាវ ខេត្ត​ព្រៃវែង។

គួរ​រំឭក​ផង​ដែរ​ថា​សេចក្ដី​សម្រេច​នេះ​បាន​ធ្វើ​ឡើង​ប៉ុន្មាន​ម៉ោង​ក្រោយ​ពី​សព លោក សុខ អាន អតីត​ឧបនាយក​រដ្ឋមន្ត្រី និង​រដ្ឋមន្ត្រី​ទទួល​បន្ទុក​ទីស្ដីការ​គណៈរដ្ឋមន្ត្រី​បាន​ដឹក​តាម​យន្តហោះ​ពី​ទីក្រុង​ប៉េកាំង​នៃ​ប្រទេស​ចិន​មក​ដល់​កម្ពុជា​វិញ​កាលពី​វេលា​ទៀប​ភ្លឺ​ម្សិលមិញ​នៅ​ព្រលាន​យន្តហោះ​អន្តរជាតិ​ភ្នំពេញ ​ហើយ​បាន​ដង្ហែ​ដោយ​ក្បួន​ឡាន និង​ម៉ូតូ​កិត្តិយស​ភ្លាមៗ​ក្រោយ​ពី​បាន​ធ្វើ​ពិធី​សាសនា​ចប់​នៅ​ពេល​យន្តហោះ​ឆ្ពោះ​ទៅ​កាន់​កន្លែង​ប្រារព្ធ​ពិធី​បុណ្យ​ស្ថិត​នៅ​គេហដ្ឋាន​របស់​លោក​ក្នុង​រាជធានី​ភ្នំពេញ។

Content image - Phnom Penh Post
លោក ប៊ិន ឈិន បាន​ទទួល​ភារកិច្ច​ជា​រដ្ឋមន្ត្រី​ស្ដីទី​ទទួល​បន្ទុក​ទីស្ដីការ​គណៈរដ្ឋមន្ដ្រី។ ភ្នំពេញ ប៉ុស្ដិ៍

លោក​នាយក​រដ្ឋមន្ត្រី ហ៊ុន សែន បាន​សរសេរ​សារ​រំលែក​ទុក្ខ​នៅ​ក្នុង​ហ្វេសប៊ុក​របស់​លោក​ថា៖«ខ្ញុំ និង​ភរិយា​ព្រម​ទាំង​ក្រុម​គ្រួសារ​សូម​ចូលរួម​រំលែក​ទុក្ខ​យ៉ាង​ក្រៀមក្រំ​បំផុត​ចំពោះ​សម្តេច​វិបុលបញ្ញា សុខ អាន ឧបនាយក​រដ្ឋមន្រ្តី និង​ជា​រដ្ឋមន្រ្តី​ទទួល​បន្ទុក​ទីស្តីការ​គណៈរដ្ឋមន្រ្តី​ដែល​បាន​ទទួល​មរណភាព​នៅ​វេលា​​ម៉ោង ១៨:៣២ នាទី​នា​ថ្ងៃ​ទី ១៥ ខែ​មីនា ឆ្នាំ ២០១៧ នេះ​នៅ​មន្ទីរពេទ្យ ទីក្រុង​ប៉េកាំង ប្រទេស​ចិន ក្នុង​ជន្មាយុ ៦៦ ឆ្នាំ ដោយ​រោគាពាធ។ សម្តេច​វិបុលបញ្ញា សុខ អាន បាន​ចូលរួម​តស៊ូ​លះបង់​បម្រើ​ប្រទេស​ជាតិ​អស់​រយៈពេល​ជាច្រើន​ឆ្នាំ​មក​ហើយ​ដែល​បាន​ធ្វើឲ្យ​កម្ពុជា​មាន​ការ​រីកចម្រើន​មក​ទល់​សព្វ​ថ្ងៃ។ នេះ​គឺជា​ការ​បាត់បង់​ធនធាន​មនុស្ស​ដ៏សំខាន់​បំផុត​ម្នាក់​របស់​កម្ពុជា​ដែល​យើង​ទាំងអស់​គ្នា​ចងចាំ​ជានិច្ច»។

យោង​តាម​កម្មវិធី​បុណ្យ​សព​បាន​ឲ្យ​ដឹង​ថា​សព លោក សុខ អាន ត្រូវ​បាន​តម្កល់​នៅ​ភូមិគ្រឹះ​លោក​ពី​ថ្ងៃ​ទី ១៦ ដល់​ថ្ងៃ​ទី ១៩ ខែ​មីនា​ដើម្បី​រៀបចំ​ពីធី​តាម​ប្រពៃណី និង​ជំនឿ​សាសនា​ហើយ​ការ​រំកិល​សព​ចេញ​ពី​ភូមិគ្រឹះ​ទៅ​កាន់​ទីឈាបនដ្ឋាន​មុខ​វត្ត​បទុមវតី​នៅ​ព្រឹក​ថ្ងៃ​ទី ១៩ មីនា។

លោក អ៊ុច គឹមអ៊ន អតីត​អគ្គរាជទូត​កម្ពុជា​នៅ​ទីក្រុង​ប៉ារីស ប្រទេស​បារាំង​ដែល​បាន​ចូលរួម​រំលែក​ទុក្ខ​កាលពី​ម្សិលមិញ​ថ្លែង​ថា៖ «ហូ! សោកស្តាយ​ហួស​និយាយ​ស្តី​ព្រោះ​បាត់បង់​សហការី​ប្រកប​ដោយ​បញ្ញា​ឈ្លាសវៃ ព្រោះ​ខ្ញុំ​ចូលរួម​តាំង​ពី​ការ​ចរចា​សន្ធិសញ្ញា​ទីក្រុង​ប៉ារីស ហើយ​ចុង​ក្រោយ​រឿង​បញ្ហា​ព្រះវិហារ​ដែល​បាន​ចុះ​បេតិកភណ្ឌ​ពិភពលោក​បាន​ជោគជ័យ​ក៏​ដោយសារ​ស្នាដៃ​ឯកឧត្តម​ សុខ អាន នេះ​ដែរ។ យើង​សោកស្តាយ​ណាស់»។

ខណៈ លោក អ៊ឹម ឈុនលឹម ប្រធាន​ក្រុមប្រឹក្សា​ធម្មនុញ្ញ​ដែល​បាន​ចូលរួម​ក្នុង​ពិធីបុណ្យ​សព​នេះ​ដែរ​បាន​ថ្លែង​ថា៖ «បាត់​វីរជន​សំខាន់​ម្នាក់​ដែល​បាន​រួម​ចំណែក​ការងារ​រដ្ឋាភិបាល​មួយ​ជីវិត។ យើង​បាន​ធ្វើការ​ជាមួយ​គ្នា​តាំង​ពី​ជំនាន់​លំបាក​រហូត​មក​បច្ចុប្បន្ន។ គាត់​ធ្វើការ​អស់​ពី​កម្លាំង​កាយ​ចិត្ត។ លោក​មាន​ចំណេះ​វិជ្ជា និង​មាន​ទេពកោសល្យ​ទាំង​ការទូត ទាំង​ការងារ​សេដ្ឋកិច្ច​សង្គម និង វប្បធម៌​គឺ​លោក​បាន​ស៊ីជម្រៅ»។

នេត្រ ភក្ត្រា មន្ត្រី​នាំ​ពាក្យ​នៃ​អង្គ​ជំនុំជម្រះ​វិសាមញ្ញ​ក្នុង​តុលាការ​កម្ពុជា និង​ជា​ជំនួយការ​អម​ក្រសួង​បរិស្ថាន​បាន​សរសេរ​ប្រវត្តិ​សង្ខេប​របស់​លោក សុខ អាន ដែល​ភ្នំពេញ​ប៉ុស្តិ៍​សង្ខេប​ចេញ​ពី​ខ្លឹមសារ​ដើម​ដូច​មាន​ខាង​ក្រោមៈ

Content image - Phnom Penh Post
មេដឹកនាំ​កំពូល​ចូលរួម​បុណ្យ​សព លោក សុខ អាន។ ហេង ជីវ័ន

-លោក សុខ អាន បាន​ចូលរួម​ក្នុង​ដំណើរ​ចរចា​ស្វែងរក​សន្តិភាព​ជូន​កម្ពុជា​ដែល​ដឹកនាំ​ដោយ​សម្តេច​អគ្គមហាសេនាបតី​តេជោ ហ៊ុន សែន រហូត​ឈាន​ដល់​ចុះ​កិច្ចព្រមព្រៀង សន្តិភាព​ទីក្រុង​ប៉ារីស​នៅ​ថ្ងៃ​ទី ២៣ ខែ​តុលា ឆ្នាំ ១៩៩១ ដែល​នាំ​មក​នូវ​ការ​បង្រួបបង្រួម​ជាតិ​ក្នុង​ចំណោម​ភាគី​កម្ពុជា​មាន​ជម្លោះ និង​ឈាន​ដល់​ការ​រំលាយ​អង្គការ​ចាត់​តាំង​នយោបាយ និង​យោធា​ខ្មែរ​ក្រហម​ទាំង​ស្រុង​ក្រោម​ការ​អនុវត្ត​នយោបាយ​ឈ្នះ-ឈ្នះ នាំ​យក​នូវ​សន្តិភាព​ពេញលេញ បង្រួបបង្រួម​ជាតិ ឯកភាព​ជាតិ និង​បូរណភាព​ដែនដី។

-បាន​ចូលរួម​យ៉ាង​សកម្ម​នៅ​ក្នុង​ការ​ស្តារ និង​កសាង​ជាតិ​ឡើង​វិញ​ចាប់​តាំងពី​កម្ពុជា​បាន​ចាក​ផុត​ពី​របប​ប្រល័យ​ពូជសាសន៍​ខ្មែរ​ក្រហម ប៉ុល ពត រហូត​ដល់​កម្ពុជា​មាន​ការ​អភិវឌ្ឍ​លើ​គ្រប់​វិស័យ​មក​ទល់​សព្វ​ថ្ងៃ​នេះ។

-ជា​ប្រធាន​ក្រុម​ការងារ​របស់​រាជរដ្ឋាភិបាល​កម្ពុជា​សម្រាប់​ការ​ចរចា​បង្កើត​អង្គ​ជំនុំជម្រះ​វិសាមញ្ញ​ក្នុង​តុលាការ​កម្ពុជា​ដើម្បី​ជំនុំជម្រះ​ក្តី​លើ​ឧក្រិដ្ឋកម្ម​ដែល​បាន​ប្រព្រឹត្ត​ឡើង​នៅ​ក្នុង​របប​ខ្មែរ​ក្រហម​ពី​ថ្ងៃ​ទី ១៧ ខែ​មេសា ឆ្នាំ ១៩៧៥ ដល់​ថ្ងៃ​ទី ៦ ខែ​មករា ឆ្នាំ ១៩៧៩។

-ក្នុង​ដំណើរការ​នេះ​លោក សុខ អាន បាន​ដើរតួនាទី​យ៉ាង​សំខាន់​ក្នុង​ការ​បង្កើត​សាលាក្តី​ខ្មែរក្រហម​រហូត​ដល់​តុលាការ​នេះ​សម្រេច​បាន​លទ្ធផល​ជាច្រើន​ក្នុង​ការ​នាំ​យក​នូវ​យុត្តិធម៌​ជូន​ជន​រងគ្រោះ​ដែល​បាន​ស្លាប់​បាត់បង់​ជីវិត​នៅ​ក្នុង​របប​ខ្មែរក្រហម​ដ៏ឃោរឃៅ​បំផុត។

-បាន​ដឹកនាំ​ការ​ចរចា​លើ​ជម្លោះ​ព្រំដែន កម្ពុជា-ថៃ និង​រឿង​ក្ដី​ប្រាសាទ ព្រះវិហារ​ខ្មែរ​ហើយ​បាន​ឈ្នះ​ក្ដី​នៅ​តុលាការ​យុត្តិធម៌​អន្ដរជាតិ​ជាពិសេស​ការ​គ្រប់គ្រង​តំបន់​ប្រាសាទ​ព្រះវិហារ​បាន​ក្លាយ​ទៅ​ជា​បេតិកភណ្ឌ​ពិភពលោក និង​ត្រូវ​ពិភពលោក​យក​ចិត្ត​ទុក​ដាក់​ក្នុង​ការ​អភិរក្ស​ និង​អភិវឌ្ឍ​បាន​ការពារ​បូរណភាព​ទឹកដី​សម្បត្តិ​វប្បធម៌​ជាតិ​ខ្មែរ និង​បាន​ដាក់​ប្រាសាទ​អង្គរវត្ត​ជា​សម្បត្តិ​បេតិកភណ្ឌ​វប្បធម៌​ពិភពលោក។

-បាន​បង្កើត​ឱ្យ​មាន​អាជ្ញាធរ​ជាតិ​អប្សរា​ដើម្បី​អភិរក្ស និង​អភិវឌ្ឍ​តំបន់​អង្គរ​ទាំង​មូល និង​ទាក់ទាញ​ភ្ញៀវ​ទេសចរ​ជាតិ និង​អន្តរជាតិ​ដែល​ជា​ប្រភព​ចំណូល។

-បាន​តតាំង​ក្ដី​ជាមួយ​នឹង​ក្រុមហ៊ុន​ដ៏ល្បី​របស់​សហរដ្ឋ​អាមេរិក​ពាក់ព័ន្ធ​នឹង​រឿង​ក្តី​ក្បាល​អ្នក​តា​របស់​ខ្មែរ​រហូត​បាន​ឈ្នះ​ក្ដី និង​បាន​ប្រគល់​ជូន​កម្ពុជា​វិញ​នូវ​ក្បាល​អ្នកតា​មួយ​ចំនួន។

-បាន​បង្កើត​ឱ្យ​មាន​នូវ​សាលា​ភូមិន្ទ​រដ្ឋបាល​រាជបណ្ឌិត្យ​សភា​កម្ពុជា និង​រាជបណ្ឌិត្យ​សភា​វិជ្ជាជីវៈ​តុលាការ​អាជ្ញាធរ​ប្រេង​កាត​ជាដើម។

លោក ភក្ត្រា បាន​និយាយ​ថា៖ «ទោះបី​ជា​សម្តេច​បាន​ចាក​ឆ្ងាយ​ពី​ប្រជាជាតិ​ខ្មែរ​យ៉ាង​ណា​ក៏ដោយ ប៉ុន្តែ​កេរ្តិ៍​ឈ្មោះ​ដ៏ល្អ និង​មាន​ឈ្មោះ​ថា​ជា​វីរបុរស​ជាតិ​ខ្មែរ​សម័យ​ទំនើប​នៅ​តែ​ដក់​ជាប់​នៅក្នុង​ក្រអៅ​បេះដូង​របស់​ប្រជាជន​កម្ពុជា​ជានិច្ច»៕

0

Comments

Please, login or register to post a comment