ភ្នំពេញៈ ប្រធានវិទ្យុសម្បុកឃ្មុំសំឡេងប្រជាពលរដ្ឋ លោក ម៉ម សូណង់ដូ នៅថ្ងៃទី ៩ មករា នេះបានលើកយកមូលហេតុនៃការមិនបានចូលបំភ្លឺតាមដីកាកោះជាលើកទី ៣ របស់ចៅក្រមសាលាដំបូងរាជធានីភ្នំពេញថាមកពីបញ្ហាពាក់ព័ន្ធនឹងសុខភាព។
នៅក្នុងលិខិតមួយផ្ញើជូនលោក គី ឫទ្ធី ចៅក្រមស៊ើបសួរសាលាដំបូងលោកសូណង់ដូ បានបញ្ជាក់ថាគ្រូទើបបានបញ្ជាក់ថាការពិនិត្យសុខភាពរបស់លោកនៅប្រទេសបារាំងនឹងត្រូវបញ្ចប់នៅថ្ងៃ២កុម្ភៈឆ្នាំ២០១៨។
សូមបញ្ជាក់ថាលោកម៉មសូណង់ដូត្រូវបានសាលាដំបូងចេញដីកាកោះអញ្ជើញក្នុងនាមជាសាក្សី ៣ លើករួចមកហើយទាក់ទងនឹងសំណុំរឿងសន្និដ្ឋិភាពជាមួយបរទេសប្រព្រឹត្តដោយលោកកឹមសុខា អតីតប្រធានគណបក្សសង្គ្រោះជាតិ។
បើតាមដីកាកោះចុងក្រោយលោកត្រូវបានកំណត់ឲ្យចូលបំភ្លឺនៅថ្ងៃ ១១ មករាឆ្នាំ ២០១៨ វេលាម៉ោង៨ព្រឹក។
លោក ម៉ម សូណង់ដូ មិនអាចសុំការបញ្ជាក់បន្ថែមបានទេកាលពីព្រឹកមិញ។ ប៉ុន្តែភ្លាមៗ បន្ទាប់ពី លោកទទួលដំណឹងពីការចេញដីកាអញ្ជើញកាលពី ២២ ធ្នូ ឆ្នាំ ២០១៧ លោកម៉មសូណង់ដូ ធ្លាប់បានអះអាងថាមិនបានជាប់ពាក់ព័ន្ធនឹងករណីលោកកឹមសុខាទេដោយលោកថែមទាំងបដិសេធថាមិនចូលបំភ្លឺទៀតផង។
ប៉ុន្ដែអ្នកនាំពាក្យក្រសួងយុត្តិធម៌ក៏ធ្លាប់បានព្រមានដែរថាលោកសូណង់ដូអាចប្រឈមមុខនឹងបទចោទចំពោះករណីមិនចូលបំភ្លឺប្រសិនបើមិនមានមូលហេតុសមហេតុផល។
យ៉ាងណាក្ដីនៅក្នុងលិខិតផ្ញើជូនចៅក្រម ក្រៅពីការសុំអភ័យទោសចំពោះការមិនបានចូលតាមការកំណត់លោកសូណង់ដូក៏បានបញ្ជាក់ជូនចៅក្រមដែរថា លោកនឹងជម្រាបម្ដងទៀតនៅពេលខាងមុខជាថ្ងៃដែលលោកវិលមកកម្ពុជា៕