Search form

Login - Register | FOLLOW US ON

Logo of Phnom Penh Post newspaper Phnom Penh Post - លោក​ សម រង្ស៊ី ​ប្រកាស​បើក​សមាគម​ ពេល​អត់​សិទ្ធិ​ធ្វើ​នយោបាយ

Content image - Phnom Penh Post
លោក សម រង្ស៊ី ពេល​ត្រឡប់​ពី​ការ​និរទេស​កន្លង​មក​។ ផា លីណា

លោក​ សម រង្ស៊ី ​ប្រកាស​បើក​សមាគម​ ពេល​អត់​សិទ្ធិ​ធ្វើ​នយោបាយ

ភ្នំពេញៈ បន្ទាប់ពី​ច្បាប់​ស្ដីពី​គណបក្ស​បាន​បិទ​ច្រក​មិន​ឲ្យ​​ចូល​ប្រឡូក​ក្នុង​រឿង​នយោបាយ​​នោះ​អតីត​មេដឹកនាំ​គណបក្ស​ប្រឆាំង​លោក​ សម រង្ស៊ី ដែល​កំពុង​មាន​ទោស​ជាច្រើន​ជាប់​ខ្លួន​​បាន​ប្រកាស​បង្កើត​សមាគម​ថ្មី​មួយ​ដើម្បី​លើក​តម្កើង​លទ្ធិប្រជាធិបតេយ្យ​នៅ​កម្ពុជា ខណៈ​មន្ត្រី​ក្រសួង​មហាផ្ទៃ​ថា​រឿង​នេះ​​មិន​ពាក់ព័ន្ធ​រឿង​នយោបាយ តែ​ជាប់​ករណី​ព្រហ្មទណ្ឌ​។

ការ​ប្រកាស​របស់​លោក សមរង្ស៊ី ​នេះ​បាន​កើតឡើង​តែ​ប៉ុន្មាន​ថ្ងៃ​ប៉ុណ្ណោះ​បន្ទាប់ពី​លោក​បាន​ផ្តល់​បទសម្ភាស​មួយ​សំដៅ​ដល់​លទ្ធភាព​នៃ​ការ​តវ៉ា​នៅ​ក្នុង​ប្រទេស​កម្ពុជា​។

ក្នុង​បទសម្ភាស​មួយ​ជាមួយ​ទូរទស្សន៍​បារាំង France 24 កាលពី​ថ្ងៃ​សៅរ៍​លោក​ សម រង្ស៊ី​បាន​ថ្លែង​អំពី​ករណី​ចាប់​ខ្លួន​លោក​ ​កឹម សុខា ដោយ​ហៅ​អ្វី​ដែល​កើតឡើង​នៅ​កម្ពុជា​ក្នុង​រយៈពេល​ប៉ុន្មាន​ថ្ងៃ​ចុងក្រោយ​នេះ​ថា​ជា​រដ្ឋប្រហារ​មួយ​។

លោក​ថា ​មិនមែន​ជា​រដ្ឋប្រហារ​យោធា​ទេ​...​ប៉ុន្តែ​ជា​រដ្ឋប្រហារ​រដ្ឋធម្មនុញ្ញ​។

ជាមួយ​គ្នា​នេះ​លោក​ សម រង្ស៊ី ​ក៏​បាន​អំពាវនាវ​ឲ្យ​សហគមន៍​អន្តរជាតិ​មក​ជួយ​កម្ពុជា​ផង​ដែរ ហើយ​លោក​បាន​អះអាង​ថា​៖ «​ភាគ​ច្រើន​បំផុត​នៃ​ប្រជាជន​កម្ពុជា ឥឡូវ​នេះ​គឺ​ប្រឆាំង​នឹង​លោក ហ៊ុន សែន​»​។

ចំពោះ​ប្រធាន​បទ​នៃ​ការ​ធ្វើ​បាតុកម្ម​វិញ​លោក​ សម រង្ស៊ី ​បាន​ថ្លែង​ថា​៖ «​អ្វីៗ​ក៏​អាច​កើតឡើង​បាន​ដែរ​»​។

អតីត​អ្នក​នយោបាយ​និរទេស​ខ្លួន​រូប​នេះ​បាន​បញ្ជាក់​ថា​៖ «​ហ៊ុន​ ​​សែន បាន​ទៅ​ហួស​ឆ្ងាយ​ពេក​ហើយ គាត់​មិន​បាន​ទុក​ឱកាស​ណា​មួយ​ដូចជា​ឱកាស​ប្រជាធិបតេយ្យ​ និង​ឱកាស​សន្តិភាព​សម្រាប់​ប្រជាជន​ដើម្បី​បង្ហាញ​ពី​ទស្សនៈ​របស់​ពួកគេ​ និង​នាំ​មក​នូវ​ការ​ផ្លាស់ប្តូរ​​នោះ​ទេ​»​។

នៅ​ពេល​សួរ ថា​តើ​គាត់​កំពុង​គាំទ្រ​ដល់​ការ​តវ៉ា​ឬ​យ៉ាង​ណា​? លោក​ សម រង្ស៊ី ​បាន​ប្រាប់​ឲ្យ​ប្រជាជន​កម្ពុជា​ឲ្យ​អត់ធ្មត់ ហើយ​រង់ចាំ​ការ​ឆ្លើយតប​ពី​អន្តរជាតិ​ជា​មុន​សិន​។

អនុប្រធាន​គណបក្ស​សង្គ្រោះជាតិ​លោកស្រី​ មូរ សុខហួរ ​បាន​ថ្លែង​យ៉ាង​ម៉ឺងម៉ាត់​ថា​គណបក្ស​ប្រឆាំង​នឹង​រៀបចំ​បាតុកម្ម​តវ៉ា ប៉ុន្តែ​កាលពី​ម្សិលមិញ​ហាក់​ប្រកាន់​ជំហរ​ទន់ភ្លន់​ជាង​មុន​ដោយ​បាន​ថ្លែង​ថា​៖ «​នៅ​ពេល​នេះ​» ​នឹង​គ្មាន​បាតុកម្ម​ណា​មួយ​ទេ​។

លោក​ សម រង្ស៊ី បាន​បន្ថែម​តាម​អ៊ីមែល​កាលពី​ម្សិលមិញ​ថា​៖ «​ខ្ញុំ​ទុក​ឱ្យ​ប្រជាជន​ជា​អ្នក​សម្រេច​»​។

ទន្ទឹម​នឹង​នេះ​លោក​ សម រង្ស៊ី ​បាន​ប្រកាស​ពី​ចេតនា​របស់​លោក​​ក្នុង​ការ​បង្កើត​ «​សមាគម​ដើម្បី​លើក​តម្កើង​លទ្ធិ​ប្រជាធិបតេយ្យ​នៅ​កម្ពុជា​» ​ដែល​មាន​មូលដ្ឋាន​នៅ​ប្រទេស​បារាំង​។

លោក​ សម រង្ស៊ី ​បាន​សរសេរ​ក្នុង​សេចក្តី​ប្រកាស​តាម​ហ្វេសប៊ុក​របស់​លោក​កាលពី​ម្សិលមិញ​ថា​៖ «​ខ្ញុំ​យល់​ឃើញ​ថា​កាតព្វកិច្ច​របស់​ខ្ញុំ​នៅ​ពេល​នេះ​គឺ​យក​សេរីភាព និង​ឯករាជភាព​ដែល​ខ្ញុំ​ទើប​តែ​ទទួល​បាន​មក​ប្រើប្រាស់​ដើម្បី​បង្រួបបង្រួម​ជនជាតិ​ខ្មែរ​ទាំងអស់​ក្នុង​បំណង​សម្រេច​ឯកភាព​ជាតិ​ដោយ​មាន​លទ្ធិប្រជាធិបតេយ្យ​ជា​មូលដ្ឋាន​»​។

លោក​ សម រង្ស៊ី បាន​បន្ត​ថា​សមាគម​នេះ​នឹង​មិន​ប្រកាន់​បក្ខពួក​ទេ ហើយ​បាន​លើក​ទឹក​ចិត្ត​ឱ្យ​ជនជាតិ​ខ្មែរ​គ្រប់​រូប​ក្លាយ​ជា​សមាជិក​ថែម​ទៀត​ផង​។

សេចក្តី​ប្រកាស​នោះ​ក៏​បាន​បន្ត​​ថា​៖ «​បងប្អូន​ជន​រួមជាតិ​ម្នាក់ៗ​ដែល​នឹង​មក​ចូលរួម​ក្នុង «​សមាគម​ដើម្បី​លើក​តម្កើង​លទ្ធិប្រជាធិបតេយ្យ​នៅ​កម្ពុជា​» ​អាច​នៅ​ជា​សមាជិក​គណបក្ស​របស់​ខ្លួន​រៀងៗ​ខ្លួន​ដូច​សព្វ​ថ្ងៃ​ពីព្រោះ​សមាគម​យើង​មិន​គាំទ្រ​គណបក្ស​នយោបាយ​ណា​មួយ​ទេ​ហើយ​ក៏​មិន​ប្រឆាំង​គណបក្ស​នយោបាយ​ណា​មួយ​ដែរ​»​។

លោក​ ខៀវ សុភ័គ ​អ្នក​នាំ​ពាក្យ​ក្រសួង​មហាផ្ទៃ​បាន​ថ្លែង​ថា​បញ្ហា​នេះ​មិន​ជាប់​ទាក់ទង​នឹង​នយោបាយ​របស់​លោក​ សម​ រង្ស៊ី ​នោះ​ទេ ប៉ុន្តែ​វា​ជា​ទោស​ព្រហ្មទណ្ឌ​របស់​គាត់​។

លោក​ សុភ័គ បាន​ថ្លែង​អំពី​លទ្ធភាព​សមាគម​របស់​លោក​ សម រង្ស៊ី ​អាច​នឹង​ធ្វើ​ការងារ​ណា​មួយ​នៅ​កម្ពុជា ប៉ុន្តែ​លោក​បាន​បញ្ជាក់​ថា​៖ «​គាត់​ត្រូវ​ជាប់​ពន្ធនាគារ​ជា​មុន​សិន​...​កម្ពុជា​យើង​មិន​ទទួល​យក​លោក​ សម រង្ស៊ី ទៀត​ទេ​»​។

នៅ​ពេល​សួរ​ថា​តើ​ស្ថាប័ន​​ ឬ​បុគ្គល​ណា​ផ្សេង​ទៀត​នៅ​កម្ពុជា​អាច​ធ្វើ​ជា​ដៃគូ​ជាមួយ​សមាគម​របស់​លោក​ សម រង្ស៊ី ​បាន​ឬ​ទេ​? លោក​​ សុភ័គ ​ថ្លែង​ថា​៖ « សូម​ឱ្យ​ពួកគេ​ធ្វើ​ចុះ​ហើយ​យើង​នឹង​ឃើញ​»​។

តំណាង​មកពី​មជ្ឈមណ្ឌល​សិទ្ធិ​មនុស្ស​កម្ពុជា​ និង​អង្គការ​លីកាដូ​ទាំង​ពីរ​កាលពី​ថ្ងៃ​ម្សិលមិញ​បាន​បដិសេធ​មិន​ឆ្លើយតប​ថា តើ​ពួកគេ​អាច​នឹង​ពិចារណា​អំពី​ទំនាក់​ទំនង​ជាមួយ​ក្រុម​ថ្មី​របស់​លោក​ សម រង្ស៊ី ​ឬ​យ៉ាង​ណា​នោះ​ទេ​៕ NS

0

Comments

Please, login or register to post a comment

ព័ត៌មានពាក់ព័ន្ធ