Search form

Login - Register | FOLLOW US ON

Logo of Phnom Penh Post newspaper Phnom Penh Post - លោក សុខ អាន មរណភាព​នៅ​មន្ទីរពេទ្យ ក្រុង​ប៉េកាំង រដ្ឋាភិបាល​ចំណាយ​ប្រមាណ $៧៥ ម៉ឺន​សម្រាប់​បុណ្យ​សព

Content image - Phnom Penh Post
លោក សុខ អាន បាន​ទទួល​មរណភាព​កាលពី​យប់​ថ្ងៃ​ពុធ​ម្សិលមិញ​។ ​ ហេង ជីវ័ន

លោក សុខ អាន មរណភាព​នៅ​មន្ទីរពេទ្យ ក្រុង​ប៉េកាំង រដ្ឋាភិបាល​ចំណាយ​ប្រមាណ $៧៥ ម៉ឺន​សម្រាប់​បុណ្យ​សព

ភ្នំពេញ: លោក សុខ អាន សមាជិក​រដ្ឋសភា ឧបនាយក​រដ្ឋមន្ត្រី និង​ជា​រដ្ឋមន្ត្រី​ទទួល​បន្ទុក​ទីស្ដីការ​គណៈរដ្ឋមន្ត្រី​បាន​ទទួល​មរណភាព​កាលពី​ម្សិលមិញ​នៅ​មន្ទីរពេទ្យ​ទីក្រុង​ប៉េកាំង​នៃ​ប្រទេស​ចិន​ដោយ​រោគាពាធ​ក្នុង​ជន្មាយុ ៦៦ ឆ្នាំ។ យោង​តាម​សេចក្ដី​ជូន​ដំណឹង​របស់​រាជរដ្ឋាភិបាល​កម្ពុជា​ចេញ​ផ្សាយ​កាលពី​ថ្ងៃ​ទី ១៥ ខែ​មីនា ឆ្នាំ ២០១៧។

សេចក្ដី​ជូន​ដំណឹង​នេះ​បាន​ថ្លែង​ថា៖ «រាជរដ្ឋាភិបាល​នៃ​ព្រះរាជាណាចក្រ​កម្ពុជា​មាន​សេចក្ដី​សោកស្ដាយ​សូម​ជូន​ដំណឹង​ដល់​មន្ត្រី​រាជការ កងកម្លាំង​ប្រដាប់​អាវុធ​គ្រប់​ប្រភេទ និង​សាធារណជន​ឲ្យ​បាន​ជ្រាប​ថា​សម្ដេច​វិបុល​បញ្ញា សុខ អាន សមាជិក​រដ្ឋសភា ឧបនាយក​រដ្ឋមន្ត្រី និង​ជា​រដ្ឋមន្ត្រី​ទទួល​បន្ទុក​ទីស្ដីការ​គណៈរដ្ឋមន្ត្រី​បាន​ទទួល​មរណភាព​វេលា​ម៉ោង ១៨:៣២ នាទី​នៅ​មន្ទីរពេទ្យ​ទីក្រុង​ប៉េកាំង សាធារណរដ្ឋ​ប្រជាមានិត​ចិន»។

Content image - Phnom Penh Post
លោក​ឧបនាយក​រដ្ឋមន្ត្រី សុខ អាន នៅ​ក្នុង​ពិធី​បុណ្យ​សមុទ្រ​កាលពី​ឆ្នាំ ២០១៥។ ហេង ជីវ័ន

យោង​លិខិត​ដដែល​ដែល​ដក​ស្រង់​ប្រសាសន៍​លោក​នាយក​រដ្ឋមន្ត្រី ហ៊ុន សែន ដោយ​បាន​បង្គាប់​ទៅ​កាន់​ទីស្ដីការ​គណៈរដ្ឋមន្ត្រី​ឲ្យ​ស្នើ​បុរេ​ប្រទាន​នូវ​ថវិកា​ចំនួន ៣ ពាន់​លាន​រៀល​គឺ​ប្រមាណ ៧៥ ម៉ឺន​ដុល្លារ​ដើម្បី​រៀបចំ​ពិធី​បុណ្យ​សព​លោក សុខ អាន។ នេះ​បើ​យោង​តាម​លិខិត​ដែល​ចុះ​ហត្ថលេខា​កាលពី​ម្សិលមិញ​ដោយ​រដ្ឋមន្ត្រី​ស្តីទី លោក ប៊ុន អ៊ុយ ដែល​បាន​ចាត់​ទុក​ជា​ការ​ប្រញាប់។

លោក សុខ អាន ទើប​តែ​បាន​ទទួល​គោរមងារ​ថ្មី​ជា «សម្តេច​វិបុល​បញ្ញា» ពី​ព្រះមហាក្សត្រ​កាលពី​ថ្ងៃ​ទី ១៣ មីនា​នៅ​ពេល​ដែល​មាន​ព័ត៌មាន​ចចាម​អារ៉ាម​ជាច្រើន​ជុំវិញ​បញ្ហា​សុខភាព​ចុះ​ទ្រុឌទ្រោម​រហូត​ដល់​ទទួល​មរណភាព​ជាដើម​នៅ​ក្នុង​សប្តាហ៍​នេះ ប៉ុន្តែ​មន្ត្រី​បាន​ធ្វើការ​បដិសេធ។

Content image - Phnom Penh Post
លោក សុខ អាន,លោក ទៀ បាញ់ និង លោក យឹម ឆៃលី ដែល​លោក​ទាំង​ ៣ រូប​ជា​ឧបនាយក​រដ្ឋមន្ត្រី។ ផា លីណា

លោក សុខ ឥសាន អ្នក​នាំពាក្យ​គណបក្ស​ប្រជាជន​កម្ពុជា​ថ្លែង​ថា៖ «នេះ​ជា​ការ​បាត់បង់​នូវ​មន្ត្រី​ជាន់​ខ្ពស់​ដែល​មាន​សមត្ថភាព​ដែល​ចូលរួម​ចំណែក​ដ៏ធំធេង​ក្នុង​ការ​កសាង និង​អភិវឌ្ឍ​ប្រទេស​ជាតិ។ លោក​មាន​ស្នាដៃ​ដ៏​លេចធ្លោ​ក្នុង​ការ​តស៊ូ​ជាមួយ​ភាគី​ថៃ​ក្នុង​ការ​ដាក់​ប្រាសាទ​ព្រះវិហារ​ឲ្យ​ដាក់​បញ្ចូល​ក្នុង​បេតិកភណ្ឌ​ពិភពលោក ធ្វើ​ឲ្យ​កិត្យានុភាព​កម្ពុជា​លេចធ្លោ​លើ​ឆាក​អន្តរជាតិ។ នេះ​ជា​ព្រឹត្តិការណ៍​ប្រវត្តិសាស្ត្រ​ដ៏ធំធេង​សម្រាប់​ប្រជាជន​កម្ពុជា»។

កាលពី​ម្សិលមិញ​នេះ​ដែរ​មន្ត្រី​គណបក្ស​ប្រជាជន​កម្ពុជា និង​មន្ត្រី​រដ្ឋាភិបាល​នានា​បាន​ទៅ​ដល់​គេហដ្ឋាន​របស់​លោក សុខ អាន មុន​ដំណឹង​នៃ​មរណភាព​បាន​ប្រកាស​ជា​សាធារណៈ។

លោក នាយករដ្ឋមន្ត្រី ហ៊ុន សែន បាន​ចាត់ចែង​បង្កើត​នូវ​គណៈកម្មការ​ដើម្បី​រៀបចំ​ពិធី​បុណ្យ​សព​លោក សុខ អាន ដែល​គណៈកម្មការ​មួយ​នេះ​ដឹកនាំ​ដោយ​លោក ប៊ិន ឈិន ឧបនាយក​រដ្ឋមន្ត្រី​ប្រចាំការ​ជា​ប្រធាន។

Content image - Phnom Penh Post
រូបថត​លោក​ឧបនាយក​រដ្ឋមន្ត្រី សុខ អាន នៅ​ក្នុង​ពិធីការ​ថ្នាក់​ជាតិ​កន្លង​មក។ រូបថត ហ្វេសប៊ុក

យោង​តាម​ជីវប្រវត្តិ​សង្ខេប​របស់​លោក សុខ អាន ដែល​បាន​ផ្សាយ​នៅ​ក្នុង Fresh News កាលពី​ម្សិលមិញ​បាន​ឲ្យ​ដឹង​ថា​លោក សុខ អាន កើត នៅ​ថ្ងៃ​ទី ១៦ ខែ​មេសា ឆ្នាំ ១៩៥០ នៅ​ឃុំ​ព្រះបាទ​ជាន់​ជុំ ស្រុក​គិរីវង់ ខេត្ត​តាកែវ លោក​បាន​រៀបការ​ជាមួយ​លោកស្រី ថេង អាយអាន្នី មាន​កូន​ចំនួន ៥ នាក់​រួម​មាន នាងសុខ សូម៉ា កូនស្រី មុខរបរ​នៅ​ផ្ទះ និង​កូនប្រុស ៤ នាក់​គឺ សុខ ពុទ្ធិវុធ ប្រធាន​សហព័ន្ធ​ស្រូវ​អង្ករ​កម្ពុជា សុខ សូកាន ជា​សមាជិក​រដ្ឋសភា​មណ្ឌល​តាកែវ សុខ សូកេន អនុប្រធាន​នាយកដ្ឋាន​គណៈកម្មាធិការ​វិនិយោគ​នៃ​ក្រុម​ប្រឹក្សា​អភិវឌ្ឍន៍​កម្ពុជា និង សុខ សង្វារ អគ្គនាយក​រង​អាជ្ញាធរ​អប្សរា។

លោក សុខ អាន មាន​ប្រវត្តិ​ការសិក្សា​ដែល​ជា​បណ្ឌិត​កិត្តិយស​ផ្នែក​រដ្ឋបាល​សាធារណៈ នយោបាយ​ការទូត អប់រំ​គោល​នយោបាយ​សាធារណៈ វិទ្យាសាស្ត្រ​នយោបាយ រដ្ឋបាល​សាធារណៈ វិទ្យាសាស្ត្រ នីតិសាស្ត្រ​ហើយ​ជា​សមាជិក​ពេញ​សិទ្ធិ​នៃ​រាជបណ្ឌិត្យ​សភា​កម្ពុជា និង​ទទួល​បាន​គោរមងារ បណ្ឌិត​សភា​ចារ្យ។

យោង​តាម​ព្រះរាជ​ក្រឹត្យ​ចុះ​ថ្ងៃ​ចន្ទ​ទី ១៣ មីនា​ឆ្នាំ ២០១៧ នេះ​ព្រះមហាក្សត្រ​នៃ​ព្រះរាជាណាចក្រ​កម្ពុជា សម្ដេច ព្រះនរោត្តម សីហមុនី បាន​សម្រេច​តែងតាំង​លោក សុខ អាន រដ្ឋ​ដោយ​មាន​គោរមងារ​ថ្មី​ជា «សម្ដេច​វិបុលបញ្ញា សុខ អាន» នោះ​បាន​ឲ្យ​ដឹង​ថា​លោក សុខ អាន បាន​ចូល​បម្រើ​ជាតិ​មាតុភូមិ​តាមរយៈ​រដ្ឋាភិបាល​ដឹកនាំ​ដោយ​គណបក្ស​ប្រជាជន​អស់​រយៈពេល​ជាច្រើន​ឆ្នាំ​មក​ហើយ។

លោក សុខ អាន បាន​ចូលរួម​ដឹកនាំ​ប្រទេស​កម្ពុជា​តាំង​ពី​ឆ្នាំ ១៩៧៩ មក​ម្ល៉េះ​ដោយ​បាន​នាំ​មក​នូវ​សន្តិភាព​ជាតិ​ ឯកភាព​ជាតិ​ សេដ្ឋកិច្ច​ជាតិ ការ​អភិវឌ្ឍ​លើ​គ្រប់​វិស័យ និង​ការពារ​នូវ​ឯករាជ្យ​ជាតិ និង​បូរណភាព​ទឹកដី​កម្ពុជា៕

Content image - Phnom Penh Post
សកម្មភាព​ថ្លែង​សុន្ទរកថា​របស់​លោក​ឧបនាយក​រដ្ឋមន្ត្រី សុខ អាន កន្លង​មក។ រូបថត ហ្វេសប៊ុក

0

Comments

Please, login or register to post a comment