Search form

Login - Register | FOLLOW US ON

Logo of Phnom Penh Post newspaper Phnom Penh Post - លោក ស ខេង ថា អាឡិច ចូល​ក្នុង​បញ្ជី​ខ្មៅ​ដោយ​សារ​មិន​ស្តាប់​រដ្ឋាភិបាល

លោក អាឡិច ដែល​បាន​បណ្តេញ​ចេញ​ពីកម្ពុជា​ផ្តល់​បទ​សម្ភាស​កន្លង​មក។
លោក អាឡិច ដែល​បាន​បណ្តេញ​ចេញ​ពីកម្ពុជា​ផ្តល់​បទ​សម្ភាស​កន្លង​មក។ ហេង ជីវ័ន

លោក ស ខេង ថា អាឡិច ចូល​ក្នុង​បញ្ជី​ខ្មៅ​ដោយ​សារ​មិន​ស្តាប់​រដ្ឋាភិបាល

ភ្នំពេញៈ ឧប​នាយក​រដ្ឋ​មន្ត្រី​កម្ពុជា លោក ស ខេង កាល​ពី​ម្សិល​មិញ បាន​ពន្យល់​ក្បោះ​ក្បាយ​ពី​ហេតុផល​រដ្ឋាភិបាល​ក្នុង​ការ​សម្រេច​បណ្តេញ​លោក​អាឡិច ចេញ​ពី​កម្ពុជា​កាល​ពីថ្ងៃ​ចន្ទ និង​ថា ពេល​នេះ សកម្មជន​ការពារ​បរិស្ថាន​នៅ​តំបន់​អារ៉ែង​ម្នាក់​នេះ បាន​ជាប់​ឈ្មោះ​ក្នុង «បញ្ជី​ខ្មៅ» ដែល​មាន​ន័យ​ថា មិន​អាច​ចូល​មក​កម្ពុជា​វិញ​បាន​ទេ។

ប្រសាសន៍​របស់​លោក ស ខេង រដ្ឋ​មន្ត្រី​ក្រសួង​មហា​ផ្ទៃ ផង​នោះ បាន​និយាយ​នៅ​ក្នុង​សិក្ខាសាលា​ស្តី​ពី​ការ​កេង​ប្រវ័ញ្ច​ផ្លូវ​ភេទ​លើ​កុមារ នា​សណ្ឋាគារ​សុខា​ភ្នំពេញ កាលពី​ម្សិល​មិញ បាន​រៀបរាប់​ឡើង​វិញ​ពី​ជំហរ​របស់​អាជ្ញាធរ​កម្ពុជា ក្នុង​ការ​ចាត់​វិធានការ​បណ្តេញ​លោក អាឡិច ហ្សង់ដ្រូ ហ្គង់សាឡេស ដេវិតសិន ជាតិ​អេស្ប៉ាញ ដែល​ការពារ​បរិស្ថាន​នៅ​កម្ពុជា គឺ​មិន​ធ្វើ​ឡើង​ភ្លាមៗ​តាម​ការ​ស្នើ​សុំ​របស់​អាជ្ញាធរ ខេត្ត​កោះកុង នោះ​ទេ តែ​បាន «យោគ​យល់» ដោយ​ទុក​ពេល​ឲ្យ​ទិដ្ឋាការ​គាត់​អស់ និង​បាន​ពន្យល់​គាត់​ទៅ​នៅ​ប្រទេស​ផ្សេង​មួយ​រយៈ ដើម្បី​បាន​វិល​មក​ធ្វើ​ការ​នៅ​កម្ពុជា​វិញ។

លោក​ឧប​នាយក​រដ្ឋ​មន្ត្រី បាន​ថ្លែង​ថា៖ «យើង​រង់ចាំ រហូត​ដល់​យើង​មិន​ធ្វើ​អ្វី គួប​ផ្សំ​ដែល​លោក អាឡិច ធ្វើ​សំបុត្រ​សារភាព​កំហុស​របស់​គាត់។ យើង​បាន​យោគ​យល់​ពី​បញ្ហា​នេះ។ ពេល​ទិដ្ឋាការ​អស់​សុពលភាព យើង​មាន​បំណង​ល្អ​ទេ យើង​សុំ​ឲ្យ​គាត់​ចេញ ទោះ​បី​មួយ​ម៉ោង ពីរ​ម៉ោង មួយ​អាទិត្យ ពីរ​អាទិត្យ ដើរ​លេង​នៅ​ថៃ ឬ​វៀតណាម ឬ​ប្រទេស​ណា​ទៀត​ដែល​គាត់​មាន​បំណង​ទៅ រួច​ចូល​មក​វិញ គាត់​វ៉ៃ​វិសា​ចូល»។

លោក​បន្ត​ថា លោក​បាន​ជម្រាប​ទៅ​ស្ថានទូត​អេស្ប៉ាញ ប្រចាំ​ប្រទេស​ថៃ ដើម្បី​ឲ្យ​ពន្យល់​លោក អាឡិច ហើយ​ទូត ក៏​បាន​ធ្វើ​តាម ប៉ុន្តែ​សកម្មជន​រូប​នេះ មិន​បាន​ព្រម​តាម​ឡើយ។ បន្ទាប់​មក​ក្រសួង ក៏​បាន​បញ្ជាក់​ជា​លាយ​លក្ខណ៍​អក្សរ ឲ្យ​គាត់​ដឹង​ថា ទិដ្ឋាការ​ផុត​កំណត់។
នៅ​ពេល​គាត់​មិន​ព្រម​ចេញ តាម​ការ​ប្រកាស​របស់​ក្រសួង ហើយ​នាយក​រដ្ឋ​មន្ត្រី ក៏​បាន​ប្រកាស​យ៉ាង​ដូច្នេះ​ដែរ ទើប​ចុង​ក្រោយ​ក្រសួង ក៏​អនុវត្ត​ការ​បណ្តេញ​ចេញ​ដោយ​គ្មាន​ជម្រើស​ផ្សេង។

លោក ស ខេង បន្ត​ថា៖ «តែ​គាត់​ថា មិន​ជឿ ព្រោះ​គ្មាន​លាយ​លក្ខណ៍​អក្សរ​ដែល​ថា​ឲ្យ​គាត់​ចូល។ គាត់​មិន​ស្តាប់ តាម​អ្វី​ដែល​យើង​ប្រាប់​គាត់ ក្នុង​ស្មារតី ហៅ​ថា សម្រប​សម្រួល​ដោះ​ស្រាយ​បញ្ហា​កុំ​ឲ្យ​មាន​បញ្ហា​អីទេ។ ទី​បំផុត យើង​ខ្ញុំ​អត់​មាន​ជម្រើស​ទេ ត្រូវ​ធ្វើ​ប្រកាស​មួយ​បណ្តេញ​គាត់​ចេញ​ពី​កម្ពុជា។... បើ​ពេល​មុន (គាត់​ធ្វើ​តាម​យើង) គាត់​មិន​ស្ថិត​ក្នុង​បញ្ជី​ខ្មៅ គាត់​ចូល​មក​ថ្មើរ​ម៉ាន​ក៏​បាន​ដែរ»។

លោក​បាន​ថ្លែង​ឲ្យ​ដឹង​បន្ត​ទៀត​ថា៖ «ទី​បំផុត វិធានការ​នេះ រឹង​បន្តិច តែ​តាម​ច្បាប់​អន្តោ​ប្រវេសន៍ វា​អត់​ខុស​ទេ ហើយ​មិន​មែន​ក្នុង​ន័យ​ប្រឆាំង​នឹង​គាត់​ធ្វើ​សកម្មភាព​ការ​ពារ​បរិស្ថាន​ទេ។ បើ​សិន​ណា​ប្រឆាំង​សកម្មភាព​គាត់ គឺ​ត្រូវ​បណ្តេញ​គាត់​តាំង​ពី​មុន​ឯ​ណោះ»។

លោក ស ខេង ក៏​បាន​បន្ថែម​ថា លោក អាឡិច រឹត​តែ​បាន​បង្ក​បញ្ហា​នៅ​ពេល​ចាប់​បញ្ជូន​ខ្លួន ដោយ​ធ្វើ​ការ​លាក់​នូវ​ប៉ាស្ព័រ​របស់​គាត់ ដោយ​ម្តង​ថា នៅ​មិត្តភក្តិ និង​ម្តង​ទៀត​ថា នៅ​អង្គការ​សហ​ប្រជាជាតិ​ផ្នែក​សិទ្ធិ​មនុស្ស រហូត​ដល់​មន្ត្រី​កម្ពុជា បាន​ព្យាយាម​ពន្យល់​អង្គការ​នោះ​ថា ការ​ទុក​លិខិត​ឆ្លង​ដែន​នរណា​ម្នាក់ គឺជា​ការ​ដក​ហូត​ទិដ្ឋាការ​គេ នោះ​ជា «ការ​ប៉ះពាល់​សិទ្ធិ» របស់​បុគ្គល។

លោក​ថា៖ «យើង​បាន​ពន្យល់​បញ្ហា​នេះ ទៅ​គាត់ ហើយ​គាត់​ក៏​មាន​ការ​យល់​ឃើញ​បញ្ហា​នេះ ក៏​យក​ប៉ាស្ព័រ​មក​បង្វិល​ឲ្យ»។

លោក អាឡិច បាន​ការពារ​បរិស្ថាន​នៅ​តំបន់​ជាយ​អារ៉ែង នៃ ខេត្ត​កោះកុង មិន​ឲ្យ​មាន​ការ​ប៉ះ​ពាល់​នូវ​ព្រៃ ដែល​ជា​ព្រៃ​ចុង​ក្រោយ​របស់​កម្ពុជា ដោយ​សារ​ក្រុមហ៊ុន​ចិន បាន​ព្យាយាម​មក​សិក្សា​ពី​ផល​ប៉ះពាល់ ក្នុង​ការ​ធ្វើ​ទំនប់​វារី​អគ្គិសនី​នៅ​ទីនោះ។

ប៉ុន្តែ ជា​ថ្មី​ម្តង​ទៀត កាល​ពី​ថ្ងៃ​អង្គារ ទី២៤ កុម្ភៈ លោក​នាយក​រដ្ឋ​មន្ត្រី ហ៊ុន សែន បាន​ប្រកាស​ថា រាជ​រដ្ឋាភិបាល​អាណត្តិ ទី៥ របស់​លោក នឹង​មិន​ធ្វើ​ការ​អភិវឌ្ឍ​តំបន់​អារ៉ែង​នេះ​ឡើយ។

លោក អាឡិច ដែល​បាន​ចាក​ចេញ​ពី​ប្រទេស​កម្ពុជា កាល​ពី​យប់​ថ្ងៃ​ចន្ទ ទី២៣ តាម​ជើង​យន្ត​ហោះ​ទៅ ប្រទេស​ថៃ ប៉ុន្តែ​លោក​បាន​ប្រាប់ ភ្នំពេញ ប៉ុស្តិ៍ ឲ្យ​ដឹង​ថា លោក​នឹង​ព្យាយាម​ចូល​មក​ប្រទេស​កម្ពុជា​វិញ ក្នុង​ពេល​ណា​មួយ៕

0

Comments

Please, login or register to post a comment

ព័ត៌មានពាក់ព័ន្ធ