Search form

Login - Register | FOLLOW US ON

Logo of Phnom Penh Post newspaper Phnom Penh Post - លោក ហ៊ុន សែន៖ សង្គ្រាម​កូរ៉េ​មិន​កើតឡើង​ទេ​ហើយ​ក៏​មិន​ជម្លៀស​ពលករ​ដែរ

Content image - Phnom Penh Post
លោកនាយករដ្ឋមន្ត្រីថ្លែងក្នុងកម្មវិធី​នៅ​កោះពេជ្រ កាល​ពី​ថ្ងៃ​ពុធ អំពី​បញ្ហាពលករ​​ខ្មែរនៅ​កូរ៉េ។ រូបថត ហ្វេសប៊ុក

លោក ហ៊ុន សែន៖ សង្គ្រាម​កូរ៉េ​មិន​កើតឡើង​ទេ​ហើយ​ក៏​មិន​ជម្លៀស​ពលករ​ដែរ

ភ្នំពេញ: លោក ហ៊ុន សែន នាយក​រដ្ឋមន្ត្រី​នៃ​ព្រះរាជាណាចក្រ​កម្ពុជា​កាលពី​ម្សិលមិញ​បាន​អំពាវនាវ​ដល់​ភាគី​ពាក់ព័ន្ធ​ក្នុង​ភាព​តានតឹង​នៅ​ក្នុង​ការ​គំរាម​កំហែង​ខាង​សព្វាវុធ​ទំនើប​នៅ​ក្នុង​ឧបទ្វីប​កូរ៉េ​ឲ្យ​អត់ធ្មត់ និង​ស្វែងរក​វិធីសាស្ត្រ​ដោយ​សន្តិវិធី​ដើម្បី​ចៀសវាង​ការ​ប្រើ​កម្លាំង ហើយ​ក៏​បាន​ធានា​អះអាង​ផង​ដែរ​ដល់​ពលករ ពលការិនី និង​មាតាបិតា​អាណាព្យាបាល​កុំ​ឲ្យ​មាន​ការ​ព្រួយបារម្ភ​អំពី​ការ​កើត​សង្គ្រាម។

ការ​អំពាវនាវ​នេះ​បាន​ធ្វើ​ឡើង​នៅ​ក្នុង​ពិធី​ប្រគល់​សញ្ញាបត្រ​នៅ​វិទ្យាស្ថាន​ជាតិ​អប់រំ។ លោក ហ៊ុន សែន ថ្លែង​ថា៖ «ជាថ្មី​ម្ដង​ទៀត​អំពាវនាវ​ពលករ ពលការិនី​ដែល​កំពុង​ធ្វើការ​នៅ​កូរ៉េ និង​មាតាបិតា អាណាព្យាបាល ក្រុម​គ្រួសារ​របស់​ពលករ ពលការិនី​ដែល​រស់នៅ​កូរ៉េ​សុំ​កុំ​ព្រួយ​បារម្ភ រាជរដ្ឋាភិបាល​តាមដាន​ជាប់​តាមរយៈ​ស្ថានទូត​របស់​ខ្លួន និង​តំណាង​របស់​ខ្លួន​នៅ​ទី​នោះ»។ «សង្គ្រាម​នៅ​កូរ៉េ​មិន​កើត​ទេ​ជឿ​ខ្ញុំ​ទៅ គំរាម​គ្នា​ប៉ុន្មាន​ថ្ងៃ​នេះ»។

លោក​បាន​អះអាង​ថា​វា​គ្មាន​ហេតុផល​ណា​មួយ​ដែល​ត្រូវ​ការ​ជម្លៀស​ពលករ​ខ្មែរ​នោះ​ទេ ទី​មួយ​សង្គ្រាម​វា​អត់​កើត ទី​ពីរ​ក្នុង​ដំណើរ​ការ​ជម្លៀស​ប្រៀបធៀប​នឹង​ការ​ស្នាក់នៅ ការ​ស្នាក់​នៅ​ទី​នោះ​គឺ​សុវត្ថិភាព​ជាង​ប្រជាជន​កូរ៉េ​គេ​រស់​របៀប​ម៉េច​នៅ​ជាមួយ​គេ​ទី​នោះ​ទៅ​ក្រោម​ការ​គ្រប់គ្រង​របស់​រដ្ឋបាល​កូរ៉េ ហើយ​ក៏​មិនមែន​ជា​បញ្ហា​ងាយ​ទេ​រឿង​ជម្លៀស​មនុស្ស​ជាង ៤ ម៉ឺន​នាក់។

ដោយ​ការ​ជម្លៀស​មាន​ការ​ខូចខាត​ធ្ងន់​ណាស់ ៤ ម៉ឺន​កន្លែង​ការងារ​ត្រូវ​បាត់​ទាំងអស់​ហើយ​ក៏​មិន​ចាំបាច់​និយាយ​ថា​សុំ​យក​ពលករ​ខ្មែរ​ទៅ​ធ្វើការ​នៅ​កូរ៉េ​ទៀត​ទេ។

លោក​ថ្លែង​ថា​កម្ពុជា​ក៏​ជា​សមាជិក​អង្គការ​សហប្រជាជាតិ​ដែល​មាន​ការ​ទទួល​ខុសត្រូវ​ហើយ​កម្ពុជា​នៅ​តែ​បន្ត​អំពាវនាវ​ឲ្យ​មាន​ការ​អត់ធ្មត់ សង្ឃឹម​ថា​នឹង​ស្វះស្វែង​រក​នូវ​វិធីសាស្ត្រ​ដើម្បី​សុវត្ថិភាព​នៅ​ឧបទ្វីប​កូរ៉េ តាមរយៈ​នៃ​ការ​បើក​ការ​ចរចា ៦ ភាគី​ឡើង​វិញ ឬ​វិធីសាស្ត្រ​ណា​មួយ​ជា​មធ្យោបាយ​សន្តិវិធី៕

0

Comments

Please, login or register to post a comment