ភ្នំពេញៈ លោក ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជាកាលពីម្សិលមិញបានលើកឡើងសាជាថ្មីម្ដងទៀតនូវបេសកកម្មរបស់អង្គការសហប្រជាជាតិដែលហៅកាត់ថា អ៊ុនតាក់ ដែលជាអ្នកផ្ដួចផ្ដើមឲ្យមានការបោះឆ្នោតនៅកម្ពុជាដំបូងបំផុតនៅឆ្នាំ ១៩៩៣ ដោយមិនបានធ្វើឲ្យជោគជ័យលើនយោបាយបង្រួបបង្រួមជាតិនៅកម្ពុជានោះទេ បើទោះបីជាបានចំណាយលុយរាប់ពាន់លានដុល្លារក៏ដោយ។
ក្នុងពិធីសម្ពោធដាក់ឲ្យប្រើប្រាស់អគារព្យាបាលថ្មីនៅមន្ទីរពេទ្យមិត្តភាព ខ្មែរ-សូវៀត ក្នុងរាជធានីភ្នំពេញពីម្សិលមិញ លោក ហ៊ុន សែន ថ្លែងថា៖ «អ៊ុនតាក់បានចាយលុយអស់ ២ ពាន់លានដុល្លារ សហរដ្ឋអាមេរិកដើម្បីអនុវត្តនូវកិច្ចព្រមព្រៀងប៉ារីស ប៉ុន្តែអ្វីដែលកិច្ចព្រមព្រៀងប៉ារីសចង់បានហើយដែលអ៊ុនតាក់មិនអាចសម្រេចបានគឺពេលដែលអ៊ុនតាក់ដកត្រឡប់ទៅវិញបានបន្សល់ទុកឲ្យកម្ពុជានៅជាប្រទេសមួយដែលមានតំបន់ត្រួតត្រា ២ និងមានរដ្ឋាភិបាល ២ នៅឡើយទេ»។
លោកបន្ថែមថា៖ «អ៊ុនតាក់មិនមែនសម្រេចជោគជ័យ ១០០ ភាគរយសម្រាប់សន្តិភាពកម្ពុជាទេ។ អ៊ុនតាក់ គ្មានលទ្ធភាពចូលទៅក្នុងតំបន់ខ្មែរក្រហមទេ សូម្បីតែទាហាន កូនទាហានខ្មែរក្រហម ២ នាក់នៅប៉ៃលិន រារាំងដំណើរប្រធានអ៊ុនតាក់ អនុប្រធានអ៊ុនតាក់ និងមេបញ្ជាការយោធារបស់អ៊ុនតាក់»។
ទោះយ៉ាងណាលោកបានអះអាងពី «នយោបាយឈ្នះ» របស់គណបក្សប្រជាជនកម្ពុជាទៅវិញទេដែលជាអ្នករកសន្តិភាពពិតដោយឆ្ពោះទៅធ្វើសមាហរណកម្មពួកខ្មែរក្រហម។ នៅពេលដែលនយោបាយឈ្នះៗចាប់ផ្តើមផ្ទុះឡើងដែលចាប់ផ្ដើមពីតំបន់ឱរ៉ាល់នៅដើមឆ្នាំ ១៩៩៦ និងបន្តទៅនៅក្នុងអំឡុងខែមេសាឆ្នាំ ១៩៩៦ តាំងពីម៉ាឡៃ ប៉ៃលិន កំរៀង ភ្នំព្រឹក សំឡូត និងតំបន់ដទៃទៀតដូចជាតាកែន កោះស្លាជាដើម...ដើមឆ្នាំ ១៩៩៨ ក៏បានឈានឆ្ពោះទៅធ្វើសមាហរណកម្មនៅតំបន់អន្លង់វែងដែលជាតំបន់ចុងក្រោយនៃខ្មែរក្រហម។
លោក មាស នី អ្នកវិភាគនយោបាយមកពីសង្គមស៊ីវិលបានថ្លែងថា៖ «សម្រាប់ខ្ញុំវិញយើងមិនគួរវាយតម្លៃទៅលើអ៊ុនតាក់ហ្នឹងទាបពេក ទោះបីយ៉ាងម៉េចក៏អ៊ុនតាក់បានបង្រួបបង្រួមខ្មែរឲ្យមករកផ្លូវមួយគឺរួបរួមគ្នាដើម្បីទទួលយកនូវសន្តិភាពមួយពេលនោះ។ ព្រោះក្នុងពេលហ្នឹងប្រទេសយើងក្រផង ហើយយើងច្បាំងគ្នាជាបន្តបន្ទាប់ទៀតគឺមាន ៤ បក្ស ហើយ ៤ បក្សហ្នឹងគឺអត់ត្រូវគ្នាទាំង ៤»។
លោក ឡៅ ម៉ុងហៃ ថ្លែងថាអង្គការសហប្រជាជាតិដែលរៀបចំការបោះឆ្នោតបានបង្ហាញថារបបរបស់លោក ហ៊ុន សែន នៅសម័យនោះមិនត្រូវបានគាំទ្រដោយប្រជាជនកម្ពុជាឡើយ។
លោកថ្លែងថា៖ «ការកត់សម្គាល់របស់លោក ហ៊ុន សែន គឺជាការ «មាក់ងាយ» ដល់អ្នកដែលបានធ្វើកិច្ចព្រមព្រៀងសន្តិភាពទីក្រុងប៉ារីស»។
លោក Phil Robertson អនុប្រធានអង្គការឃ្លាំមើលសិទ្ធិមនុស្សប្រចាំអាស៊ីបានថ្លែងថាលោកនាយករដ្ឋមន្ត្រីកំពុងបង្វែរចេញពីការបង្ក្រាបរបស់គាត់ទៅលើលទ្ធិប្រជាធិបតេយ្យសេរីពហុបក្សដែលធានានៅក្នុងកិច្ចព្រមព្រៀងសន្តិភាពទីក្រុងប៉ារីសពីព្រោះការហាមប្រាមរបស់គាត់ទៅលើគណបក្សសង្គ្រោះជាតិ និងការបង្ក្រាបទៅលើសង្គមស៊ីវិលគឺជាការរំលោភជាក់ស្តែងទៅលើលក្ខខណ្ឌនៅក្នុងកិច្ចព្រមព្រៀងនោះដែលកម្ពុជាត្រូវតែគោរពសិទ្ធិមនុស្ស និងប្រជាធិបតេយ្យសេរីពហុបក្ស។
លោក Robertson ថ្លែងថារដ្ឋាភិបាលរបស់លោកនាយករដ្ឋមន្ត្រី ហ៊ុន សែន ខ្លួនឯងបានរួមចំណែកទៅនឹងការធ្វើឲ្យបរាជ័យជាច្រើននៃការបរាជ័យរបស់អ៊ុនតាក់តាមរយៈការមិនទទួលយកអនុសាសន៍ឲ្យមានការផ្លាស់ប្ដូរចំពោះរចនាសម្ព័ន្ធនយោបាយ៕PS
រាយការណ៍បន្ថែមដោយ Leonie Kijewski