Search form

Login - Register | FOLLOW US ON

Logo of Phnom Penh Post newspaper Phnom Penh Post - លោក ហ៊ុន សែន ថា​គ្មាន​អភិវឌ្ឍ​ស្ទឹង​ជាយ​អារ៉ែង

លោក អ៊ិត ប្រាង ពន្យល់​អំពី​គម្រោង​វិនិយោគ​វារី​អគ្គិសនី​ជាយ​អារ៉ែង។
លោក អ៊ិត ប្រាង ពន្យល់​អំពី​គម្រោង​វិនិយោគ​វារី​អគ្គិសនី​ជាយ​អារ៉ែង។ ហេង ជីវ័ន

លោក ហ៊ុន សែន ថា​គ្មាន​អភិវឌ្ឍ​ស្ទឹង​ជាយ​អារ៉ែង

ភ្នំពេញៈ លោក​នាយក​រដ្ឋ​មន្ត្រី ហ៊ុន សែន បាន​បញ្ជាក់​ថា គម្រោង​វិនិយោគ​វារី​អគ្គិសនី​ស្ទឹង​ជាយ​អារ៉ែង ដែល​កំពុង​មាន​ភាព​ចម្រូង​ចម្រាស​នោះ​នឹង​មិន​ត្រូវ​អនុវត្ត​ទេ​នៅ​ក្នុង​រដ្ឋាភិបាល​អាណត្តិ ទី៥ នេះ បើ​ទោះ​បី​ជា​ក្រសួង​រ៉ែ​និង​ថាមពល នៅ​តែ​ប្រកាន់​ជំហរ​បន្ត​អភិវឌ្ឍ​ដោយ​គ្រោង​នឹង​បញ្ចប់​នៅ​ក្នុង ឆ្នាំ​២០២០ ក៏​ដោយ។ នេះ​បើ​តាម​ការ​អះអាង​របស់​លោក សម រង្ស៊ី ថ្លែង​ប្រាប់​អ្នក​សារ​ព័ត៌មាន​ក្រោយ​ពី​បញ្ចប់​កិច្ច​ប្រជុំ​ក្នុង​សភា។

លោក សម រង្ស៊ី ប្រធាន​គណបក្ស​សង្គ្រោះ​ជាតិ បាន​ថ្លែង​ប្រាប់​អ្នក​សារ​ព័ត៌មាន​ថា ទាក់​ទង​គម្រោង​វារី​អគ្គិសនី​នៅ​អារ៉ែង បង​ប្អូន​កុំ​ផ្អើល កុំ​បារម្ភ ហួស​ហេតុ អត់​ទាន់​មាន​សេចក្តី​សម្រេច​ទេ។

លោក​ថ្លែង​ថា៖ «សម្តេច ហ៊ុន សែន បាន​បញ្ជាក់​ប្រាប់​ខ្ញុំ​ថា អត់​ទាន់​មាន​សេចក្តី​សម្រេច​អី​ទេ ហើយ​សម្តេច​បាន​លើក​ឡើង​ថា ប្រហែល​ជា​អាណត្តិ​នេះ​អត់​ធ្វើ​ទេ អាច​លើក​ទៅ​សម័យ​ក្រោយ ខ្មែរ​អ្នក​ជំនាន់​ក្រោយ​សម្រេច​ទៅ។ កុំ​ឲ្យ​បង​ប្អូន​បារម្ភ។ ខ្ញុំ​ឮ​សូរ​ព័ត៌មាន​ហ្នឹង​ក៏​សប្បាយ​ចិត្ត​ដែរ»។

ចំណែក ឯ​លោក យឹម សុវណ្ណ អ្នក​តំណាង​រាស្ត្រ​គណបក្ស​សង្គ្រោះ​ជាតិ ក៏​បាន​លើក​ឡើង​ក្នុង​អង្គ​ប្រជុំ​រដ្ឋសភា​ផង​ដែរ ទាក់ទង​ទៅ​នឹង​គម្រោង​សាង​សង់​ទំនប់​វារី​អគ្គិសនី​ស្ទឹង​ជាយ​អារ៉ែង បាន​សិក្សា​ផល​ប៉ះពាល់​បរិស្ថាន​សង្គម សហគមន៍ មនុស្ស ប៉ុន្តែ​សួរ​ថា តើ​ក្រុម​ហ៊ុន​ដែល​ចុះ​សិក្សា​នោះ​ជា​ក្រុម​ហ៊ុន​ឯករាជ្យ​បម្រើ​ឲ្យ​មនុស្ស​ជាតិ​ពិត​ប្រាកដ​ឬ​មួយ​ក៏​ក្រុម​ហ៊ុន​មួយ​ចូល​ដោយ​ក្រុម​ហ៊ុន​ដែល​កាន់​កាប់​គម្រោង​វារី​អគ្គិសនី​នោះ? លោក​ថ្លែង​ថា៖ «ខ្ញុំ​កត់​សម្គាល់​ឃើញ​ថា របាយ​ការណ៍​នោះ​មិន​ទាន់​សុក្រឹត​ទេ ខ្ញុំ​សូម​ឲ្យ​រដ្ឋាភិបាល​ប្រយ័ត្ន​ប្រយែង​ក្នុង​ការ​អនុវត្ត​គម្រោង​មួយ​នេះ ហើយ​សូម​ឲ្យ​សិក្សា​គម្រោង​នេះ​ឡើង​វិញ»។

ថ្លែង​ផ្ទុយ​ពី​ប្រសាសន៍​របស់​លោក សម រង្ស៊ី លោក សាយ សំអាល់ រដ្ឋ​មន្ត្រី​ក្រសួង​បរិស្ថាន បាន​បញ្ជាក់​នៅ​ក្នុង​សភា​ថា គម្រោង​នោះ​មិន​អាច​ផ្អាក​ទេ តែ​ពេល​នេះ​រាជ​រដ្ឋាភិបាល កំពុង​តែ​សិក្សា​យ៉ាង​ល្អិត​ល្អន់ ដោយ​មាន​ការ​វាយ​តម្លៃ​យ៉ាង​ហ្មត់ចត់ ធ្វើ​ការ​ជាមួយ​ដៃគូ​អភិវឌ្ឍន៍ និង​សង្គម​ស៊ីវិល។ លោក​បាន​ថ្លែង​ថា៖ «ក្រសួង​បរិស្ថាន ត្រូវ​វាយ​តម្លៃ​ប្រមូល​ព័ត៌មាន និង​ពិគ្រោះ​យោបល់​គ្រប់​ជ្រុង​ជ្រោយ ដោយ​មិន​លាក់​លៀម​អ្វី​ទេ»។

កាល​ពី​ថ្ងៃ ទី៣០ ខែ​កញ្ញា លោក អ៊ិត ប្រាង រដ្ឋ​លេខាធិការ​ក្រសួង​រ៉ែ និង​ថាមពល​ថ្លែង​នៅ​ក្នុង​សន្និសីទ​សារ​ព័ត៌មាន ដោយ​បាន​បញ្ជាក់​ថា គម្រោង​វារី​អគ្គិសនី​ស្ទឹង​ជាយ​អារ៉ែង ក្នុង ខេត្ត​កោះកុង នឹង​មិន​ធ្វើ​ឲ្យ​ប៉ះ​ពាល់​ព្រៃ​ឈើ រាប់​ម៉ឺន​ហិកតា ដូច​ការ​ចោទ​ប្រកាន់​របស់​ក្រុម​អង្គការ​សង្គម​ស៊ីវិល​មួយ​ចំនួន​នោះ​ទេ ពីព្រោះ​គម្រោង​នោះ​ស្ថិត​ក្នុង​ដំណាក់​កាល​សិក្សា​នៅ​ឡើយ ហើយ​ក្រសួង​នេះ​នៅ​តែ​រក្សា​ជំហរ​បន្ត​គម្រោង​អភិវឌ្ឍន៍​ទំបន់​វារី​អគ្គិសនី​នេះ ដោយ​គ្រោង​នឹង​បញ្ចប់​នៅ​ក្នុង ឆ្នាំ​២០២០។

លោក អ៊ិត ប្រាង ពុំ​អាច​ទាក់ទង​ដើម្បី​ធ្វើ​ការ​អត្ថាធិប្បាយ​បាន​ទេ។ ប៉ុន្តែ​លោក​ថ្លែង​នៅ​ក្នុង​សន្និសីទ​សារ​ព័ត៌មាន​កាល​ពី​ថ្ងៃ ទី៣០ ខែ​កញ្ញា ថា គម្រោង​វារី​អគ្គិសនី​ស្ទឹង​ជាយ​អារ៉ែង គ្រោង​វិនិយោគ​លើ​ទឹក​ប្រាក់​ប្រមាណ ៤០០ លាន​ដុល្លារ​អាមេរិក​នឹង​ផ្តល់​ផល​ជាច្រើន​ដូច​ជា ថាមពល​អគ្គិសនី​ប្រមាណ​ជិត ៦០០ លាន​គីឡូវ៉ាត់​ម៉ោង​ជា​រៀង​រាល់​ឆ្នាំ ចំណូល​ពន្ធ ការ​បង្កើត​តំបន់​អេកូ​ទេសចរណ៍ និង​ការ​ចែក​ចាយ​អគ្គិសនី​ក្នុង​តម្លៃ​ថោក​ជាដើម។ គម្រោង​អភិវឌ្ឍន៍​ដែល​បាន​សិក្សា​តាំង​ពី ឆ្នាំ​២០០៦ មក​នៅ ខែ​វិច្ឆិកា និង ខែ​ធ្នូ ឆ្នាំ​២០១៣ រក​ឃើញ​ថា គម្រោង​នេះ មាន​ការ​ប៉ះពាល់​ដល់​ប្រជា​ពលរដ្ឋ ចំនួន ១ ៣១៨ នាក់ ត្រូវ​ជា ៣៤៩ គ្រួសារ នៅ​ក្នុង ៣ ឃុំ ស្មើ​នឹង ៧ ភូមិ ដែល​មាន​ចំនួន​ខ្នង​ផ្ទះ​សរុប ៣៣១។ ទន្ទឹម​នឹង​នោះ ក៏​មាន​ប៉ះពាល់​សាលា​រៀន ចំនួន ៦ វត្ត​អារាម ចំនួន ៣ ស្រះ​ទឹក​សហគមន៍ ៦ សាលា​ឃុំ ២ ជង្រុក​ស្រូវ​សរុប ៦៥ ទ្រុង​មាន់ និង​ក្រោល​សត្វ​ពាហនៈ ២០៥ ហាង​ឬ​តូប​លក់​ទំនិញ ១៥ និង​សំណង់​ផ្សេងៗ​ទៀត ដូច​ជា របង ផ្នូរ​ខ្មោច អណ្តូង​ទឹក​ជាដើម។ល។

លោក Alex Gonzalez-Davidson ស្ថាបនិក​អង្គការ​ចលនា​មាតា​ធម្មជាតិ បាន​ថ្លែង​ថា ប្រសិន​បើ​លោក​នាយក​រដ្ឋ​មន្ត្រី​ផ្អាក​ការ​សាងសង់​នៅ​ក្នុង​អាណត្តិ​នេះ​មែន​នោះ​គឺ​ត្រូវ​តែ​ចេញ​ជា​សេចក្តី​ប្រកាស ពីព្រោះ​យើង​ឆ្ងល់​ថា តើ​បក្ស​ប្រឆាំង​សព្វ​ថ្ងៃ​ជា​អ្នក​នាំ​ពាក្យ​ឲ្យ​លោក​នាយក​រដ្ឋ​មន្ត្រី​ឬ​យ៉ាង​ម៉េច? ហើយ​រដ្ឋាភិបាល​ត្រូវ​តែ​បញ្ឈប់​ការ​សិក្សា​ស្រាវជ្រាវ គឺ​ត្រូវ​ផ្អាក​សកម្មភាព​ទាំង​អស់។

លោក​បាន​ថ្លែង​ថា៖ «យើង​នៅ​តែ​គិត​ថា វា​នៅ​តែ​មាន​អាថ៌កំបាំង​ជាមួយ​ក្រសួង​រ៉ែ​និង​លោក​នាយក​រដ្ឋ​មន្ត្រី វា​មាន​អ្វី​មួយ​នៅ​ពី​ក្រោយ ពីព្រោះ​ក្រសួង​រ៉ែ​បាន​បញ្ជាក់​ថា គម្រោង​វារី​អគ្គិសនី​នេះ​នឹង​បញ្ចប់​នៅ ឆ្នាំ​២០២០ តែ​លោក​នាយក​រដ្ឋ​មន្ត្រី​ថា អត់​មាន​ការ​សាង​សង់»៕

0

Comments

Please, login or register to post a comment

ព័ត៌មានពាក់ព័ន្ធ