ភ្នំពេញៈ ខណៈដែលឆ្នាំថ្មីកាន់តែខិតជិតចូលមកដល់លោកនាយករដ្ឋមន្ត្រី ហ៊ុន សែន បានប្រកាសផ្តល់កាដូឆ្នាំថ្មី សម្រាប់មន្ត្រីរាជការដែលមានជាង ២ សែននាក់ព្រមទាំងអះអាងថា កម្ពុជាឈរលំដាប់ទី ៥ ក្នុងតំបន់អាស៊ាន ដែលមាន ១០ ប្រទេសដែលមន្ត្រីរាជការមានប្រាក់ខែខ្ពស់រាប់ចាប់ពីមន្ត្រីថ្នាក់ទាបជាងគេឡើងទៅ។
នៅចំពោះមុខគរុសិស្ស និងនិស្សិតជាង ១៦០០ នាក់ក្នុងពិធីចែកសញ្ញាបត្រនៅវិទ្យាស្ថានជាតិអប់រំកាលពីម្សិលមិញលោក ហ៊ុន សែន បានថ្លែងថា នៅខែមេសាខាងមុខនេះពោលគឺអំឡុងចូលឆ្នាំខ្មែរ មន្ត្រីរាជការស៊ីវិល និងកងកម្លាំងប្រដាប់អាវុធនឹងត្រូវដំឡើងប្រាក់បៀវត្សរ៍ បូកបន្ថែមប្រាក់ឧបត្ថម្ភបុណ្យចូលឆ្នាំ ៥ ម៉ឺនរៀលថែមទៀត។ លោកថ្លែងថាចាប់ពីថ្ងៃទី ២៣ ខែមីនាទៅ មន្ត្រីរាជការអាចបើកប្រាក់ខែបានហើយ។
លោកបញ្ជាក់ថា៖ «ដល់ទៅខែឧសភាយើងត្រូវចាប់ផ្ដើមបើកបៀវត្សរ៍ឲ្យមន្ត្រីរាជការ និងកងកម្លាំងប្រដាប់អាវុធរបស់យើងនៅអាទិត្យទី ៣ វិញព្រោះដោយសារអីដោយសារអាលុយដែលដំឡើងប្រាក់ខែ អាលុយឧបត្ថម្ភស្អីៗនេះ ត្រូវចាយអស់អាពេលចូលឆ្នាំនេះ អ៊ីចឹងទេ ត្រូវបង្ខំ ដើម្បីបើកនូវអាទិត្យទី ៣ អ៊ីចឹងថ្ងៃ ១៥ អី ចាប់ពីថ្ងៃ ១៥ ទៅគេហៅថា អាទិត្យទី ៣ ហើយ...អ៊ីចឹងលុយវាត្រូវចេញធំណាស់...»។
លោកក៏បានអះអាងថានៅក្នុងតំបន់អាស៊ានដែលមាន ១០ ប្រទេស កម្ពុជាជាប្រទេសទី ៥ ដែលមន្ត្រីរាជការមានប្រាក់បៀវត្សរ៍ខ្ពស់ តែលោកមិនបានបញ្ជាក់ថា តើនៅលំដាប់លើប្រទេសណានោះទេ។ លោកក៏ណែនាំឲ្យពង្រឹងការប្រមូលពន្ធផងដែរ។ «...អានេះជាការប្រឹងប្រែង ហើយនេះក៏បានមកពីការកំណែទម្រង់ហិរញ្ញវត្ថុសាធារណៈ ហើយផ្នែកណាត្រូវចាយ ផ្នែកណាមិនត្រូវចាយ គ្រប់គ្រងឲ្យច្បាស់ ចំណូលត្រូវបង្កើន ដោយយើងមិនចាំបាច់ទៅប្រកាសដំឡើងពន្ធទេ យកឲ្យអស់នូវពន្ធ ត្រូវយក»។
លោកក៏ប្រកាសឲ្យប្រជាជនការពារសន្តិភាពដោយធៀបទៅនឹងទ្រឹស្ដីរបស់ប្រធានាធិបតីអាមេរិកលោក ដូណាល់ត្រាំ ដែលប្រើពាក្យថា «America First» ឬ «ពលរដ្ឋអាមេរិកាំងជាអាទិភាព» ជាដើម។ «ដើម្បីបានសន្តិភាព វាមានតម្លៃណាស់ ឥឡូវដូចជា ដូណាល់ ត្រាំ គាត់ថា America First យើងដាក់ Peace First បានសេចក្ដីថាអាទិភាពធំជាងគេគឺសន្តិភាព បើអត់មានសន្តិភាព គឺអត់មានធ្វើអីកើតទេ...រឿងនេះរឿងធំ»។
សម្រាប់ឆ្នាំ ២០១៨ នេះប្រាក់បៀវត្សរ៍មន្ត្រីរាជការស៊ីវិល រដ្ឋបាលថ្នាក់ទាបបំផុតនឹងត្រូវកើនដល់ ១ ០១៤ ៤៥០ រៀលចាប់ពីខែមេសាចាប់ពីខែមេសាតទៅ រីឯគ្រូបង្រៀន កម្រិតទាបបំផុតនឹងត្រូវកើនឡើងដល់ ១ ១១៤ ៤៥០ រៀល។ គ្រូពេទ្យ កម្រិតទាបបំផុតនឹងត្រូវកើនឡើងដល់ ១ ១១៤ ៤៥០ រៀល នគរបាលជាតិថ្នាក់ទាបបំផុតនឹងត្រូវកើនដល់ ១ ០៩៨ ៩២៨ រៀល និងប្រាក់បៀវត្សរ៍យោធាថ្នាក់ទាបបំផុតនឹងត្រូវកើនដល់ ១ ០៣៥ ០២៨ រៀល ចាប់ពីខែមេសានេះផងដែរ។ នេះបើយោងតាមទិន្នន័យរបស់ក្រសួងមុខងារសាធារណៈ។
អតីតតំណាងរាស្ត្រគណបក្សសង្គ្រោះជាតិ លោក ម៉ៅ មុន្នីវណ្ណ បានស្វាគមន៍ចំពោះចំណាត់ការរបស់លោកនាយករដ្ឋមន្ត្រី ប៉ុន្តែលោកយល់ថា «អាហ្នឹងជានយោបាយទាក់ទាញមួយ តែមន្ត្រីរាជការ គាត់ចេះគិតគូរពិចារណាហើយ ព្រោះពួកគាត់មានចំណេះដឹងខ្ពង់ខ្ពស់ណាស់ គាត់យល់ហើយ»។ ទោះយ៉ាងណាលោកថា ការដំឡើងប្រាក់បៀវត្សរ៍កម្រិតសព្វថ្ងៃនៅមិនទាន់គ្រប់គ្រាន់នៅឡើយទេ សម្រាប់មន្ត្រីរាជការស៊ីវិល ដោយសារតែនៅពេលដែលមានការដំឡើងប្រាក់ខែ ទំនិញលើទីផ្សារក៏បានហក់ឡើងថ្លៃដូចគ្នាដែរ។
លោក ព្រាប កុល នាយកប្រតិបត្តិនៃអង្គការតម្លាភាពកម្ពុជា ថ្លែងតាមរយៈសារអេឡិចត្រូនិកថា ការផ្តល់ប្រាក់ឧបត្ថម្ភដល់មន្ត្រីរាជការស៊ីវិល អំឡុងឱកាសពិសេសណាមួយជាការពិតគឺជាអំពើល្អមួយ។ «វានឹងកាន់តែប្រសើរ ប្រសិនបើវាត្រូវបានគេដាក់បញ្ចូល ហើយនឹងត្រូវបានគេមើលឃើញថា ជាគោលនយោបាយផ្លូវការរបស់រដ្ឋាភិបាល»។
លោកបន្ថែមថា៖ «គោលនយោបាយ “សន្តិភាពជាអាទិភាព” គឺជារឿងល្អ និងធានាថា សន្តិភាពត្រូវបានធានា។ ខ្ញុំគិតថាវាជាការសំខាន់ដែលរដ្ឋាភិបាល និងបក្សកាន់អំណាចធានាពីយុត្តិធម៌សង្គម ការគោរពសិទ្ធិមនុស្សប្រជាធិបតេយ្យពិតប្រាកដ និងការបោះឆ្នោតមួយដែលមានភាពសេរី និងយុត្តិធម៌ដោយគ្មានសន្តិភាពណាមួយទំនងត្រូវបានរំខាន»។
លោក សន ជ័យ ជាប្រធានអង្គការសម្ព័ន្ធគណនេយ្យភាពសង្គមកម្ពុជាជំរុញឲ្យរដ្ឋាភិបាលបង្កើតឲ្យមានប្រាក់ខែទី ១៣ ដល់មន្ត្រីរាជការស៊ីវិល។
លោកបានថ្លែងថា៖ «គោលការណ៍នេះអាចជួយដល់ការចំណាយទាន់ពេលដែរ សម្រាប់ការបង់ថ្លៃទឹក ថ្លៃភ្លើងដល់មន្ត្រីរាជការដែរ ព្រោះភាគច្រើនភ្លើងត្រូវបង់នៅថ្ងៃ ២៣ នៃខែ។ ក្រៅពីនោះមន្ត្រីរាជការគួរមានប្រាក់ខែទី ១៣»៕