Search form

Login - Register | FOLLOW US ON

Logo of Phnom Penh Post newspaper Phnom Penh Post - លោក​ ហ៊ុន សែន ​ថា CPP ​នឹង​ឈ្នះ​អាសនៈ​ ៧១ ​នៅ​ឆ្នាំ​ ២០១៨ ​ខណៈ CNRP ក៏​រំពឹង​ឈ្នះ​ដែរ

Content image - Phnom Penh Post
លោក​នាយក​រដ្ឋមន្ត្រី ហ៊ុន សែន ​និង​លោកស្រី ប៊ុន រ៉ានី ពេល​ទៅ​បោះឆ្នោត​នៅ​ក្រុង​តាខ្មៅ​។ ហេង ជីវ័ន

លោក​ ហ៊ុន សែន ​ថា CPP ​នឹង​ឈ្នះ​អាសនៈ​ ៧១ ​នៅ​ឆ្នាំ​ ២០១៨ ​ខណៈ CNRP ក៏​រំពឹង​ឈ្នះ​ដែរ

ភ្នំពេញៈ ​គណបក្ស​កាន់​អំណាច និង​គណបក្ស​ប្រឆាំង​បាន​អួត​ពី​ជ័យជម្នះ​រៀងៗ​ខ្លួន​ចំពោះ​លទ្ធផល​នៃ​ការ​បោះឆ្នោត​ជ្រើសរើស​ក្រុម​ប្រឹក្សា​ឃុំ សង្កាត់​កាលពី​ថ្ងៃ​អាទិត្យ​ហើយ​ក៏​បាន​រំពឹង​យ៉ាង​មុតមាំ​រៀងៗ​ខ្លួន​ផង​ដែរ​ថា​ខ្លួន​នឹង​ឈ្នះឆ្នោត​នៅ​ក្នុង​ការ​បោះឆ្នោត​ថ្នាក់​ជាតិ​នៅ​ឆ្នាំ​ ២០១៨ ខាង​មុខ​។

ប្រធាន​គណបក្ស​ប្រជាជន​កម្ពុជា​លោក ហ៊ុន សែន បាន​អួត​ថា​បក្ស​លោក​កើន​សំឡេង​គាំទ្រ បើ​ទោះបី​ជា​គណបក្ស​កាន់​អំណាច​ដ៏យូរ​មួយ​នេះ​បាន​បាត់បង់​ឃុំ សង្កាត់​ប្រមាណ​ជា​ជិត ៥០០ ទៅ​លើ​គណបក្ស​សង្គ្រោះ​ជាតិ​ក៏ដោយ​។

ចំណែកឯ​គណបក្ស​សង្គ្រោះ​ជាតិ​វិញ​ក៏​បាន​អួត​ដែរ​ថា​ខ្លួន​បាន​ឈ្នះ​ឃុំ សង្កាត់​ជិត ៥០០ ឃុំ សង្កាត់​នៅ​ក្នុង​ចំណោម​ឃុំ សង្កាត់​សរុប​ ១៦៤៦ ទូទាំង​ប្រទេស​ដែល​ខ្លួន​បាន​ឈ្នះ​ពី​គណបក្ស​ប្រជាជន​បើ​ធៀប​នឹង​ការ​បោះឆ្នោត​ឃុំ សង្កាត់ ក្នុង​ឆ្នាំ​ ២០១២ ដែល​គណបក្ស​ប្រឆាំង​ឈ្នះ​ឃុំ សង្កាត់​តែ​ ៤០ ​ប៉ុណ្ណោះ​នៅ​ទូទាំង​ប្រទេស​។

ផ្អែក​ទៅ​លើ​លិខិត​មួយ​ចុះ​ថ្ងៃ​ទី​ ៧ មិថុនា​ដែល​ចុះហត្ថលេខា​ដោយ​លោក ហ៊ុន សែន ប្រធាន​គណបក្ស​ប្រជាជន​ដែល​ភ្នំពេញ​ប៉ុស្តិ៍​ទទួល​បាន​កាលពី​ម្សិលមិញ​លោក​នាយក​រដ្ឋមន្ត្រី​បាន​អះអាង​ថា​នៅ​ក្នុង​ក្របខ័ណ្ឌ​ទូទាំង​ប្រទេស គណបក្ស​ប្រជាជន​ទទួល​បាន​ជ័យជម្នះ​ធំ​ជាមួយ​នឹង​សំឡេង​គាំទ្រ​ទូទាំង​ប្រទេស​គឺ​បាន​កើនឡើង​សំឡេង​គាំទ្រ​ពី ៣.២៣៥៩៦៩ ​ក្នុង​ការ​បោះឆ្នោត​ឆ្នាំ​ ២០១៣ ដល់​ជាង ៣.៥០០.០០០ ​សំឡេង​មាន​ន័យ​ថា​កើនឡើង​ប្រហែល ៣០០.០០០ ​សំឡេង​ដែល​មិន​មាន​គណបក្ស​ណា​នៅ​ក្នុង​ការ​បោះឆ្នោត​ឆ្នាំ​ ២០១៧ កើនឡើង​ច្រើន​ដូច​គណបក្ស​ប្រជាជន​ទេ​។

លិខិត​លោក ហ៊ុន សែន បាន​ឲ្យ​ដឹង​ថា​៖ «​ក្នុង​ន័យ​នេះ​មាន​ន័យ​ថា​ប្រសិន​បើ​យក​លទ្ធផល​ឆ្នាំ​ ២០១៧ ចែក​ជា​អាសនៈ​នៅ​ក្នុង​រដ្ឋសភា គណបក្ស​ប្រជាជន​នឹង​ទទួល​បាន ៧១ អាសនៈ​ដែល​តួលេខ​នេះ​កើន​ចំនួន​ ៣ ​អាសនៈ​បន្ថែម​ទៀត​លើ​អាសនៈ​ ៦៨ ​ដែល​គណបក្ស​ប្រជាជន​បាន​ទទួល​នៅក្នុង​ការ​បោះឆ្នោត​ឆ្នាំ​ ២០១៣»​។

លិខិត​បន្ត​ថា​៖ «​លទ្ធផល​នេះ​បង្ហាញ​យ៉ាង​ច្បាស់​អំពី​សម្ទុះ​កំណើន​នៃ​ការ​គាំទ្រ​គណបក្ស​ប្រជាជន​កម្ពុជា​ដែល​ជា​ការ​បង្ហាញ​ភាព​រឹងមាំ​មួយ​អំពី​ជ័យជម្នះ​របស់​គណបក្ស​ប្រជាជន​សម្រាប់​ការ​បោះឆ្នោត​ឆ្នាំ​ ២០១៨ ​ខាង​មុខ​»​។

ជាមួយ​នឹង​ការ​រំពឹង​ទុក​នេះ​លោក ហ៊ុន សែន បាន​ជំរុញ​ឲ្យ​ក្រុម​ការងារ​របស់​ខ្លួន​ចុះ​ទៅ​ថ្នាក់​មូលដ្ឋាន​សកម្ម​ជាង​មុន​នៅ​គ្រប់​ទីកន្លែង​ដើម្បី​ដោះស្រាយ​ភាព​លំបាក​ដល់​ប្រជាពលរដ្ឋ​នៅ​ថ្នាក់​មូលដ្ឋាន​ជាពិសេស​ពង្រឹង​គុណភាព​គ្រួសារ​បក្ស​នៅ​តាម​ភូមិ ឃុំ តាមរយៈ​ការ​ចុះ​ជា​ញឹកញាប់​ដើម្បី​ធានា​ថា​សមាជិក​បក្ស​ម្នាក់​គឺជា​សំឡេង​គាំទ្រ​មួយ​សម្រាប់​គណបក្ស​ប្រជាជន​។

លិខិត​នេះ​បន្ត​ថា​៖ «​ជំរុញ​ពង្រឹង​សមាជិក​បក្ស​បន្ថែម​ទៀត​ជាពិសេស​ក្នុង​ចំណោម​យុវជន​ដើម្បី​បង្កើន​សម្ទុះ​នៃ​ការ​គាំទ្រ​របស់​គណបក្ស​ប្រជាជន​កម្ពុជា​ដើម្បី​ឆ្ពោះ​ទៅ​រក​ជ័យជម្នះ​កាន់តែ​ធំ​ជាង​នេះ​សម្រាប់​ការ​បោះឆ្នោត​ឆ្នាំ​ ២០១៨»​។

ចំណែក​លោក សម រង្ស៊ី ក៏​បាន​សម្តែង​ការ​រំពឹង​ទុក​យ៉ាង​ខ្លាំង​ផង​ដែរ​អំពី​ជ័យជម្នះ​របស់​គណបក្ស​ប្រឆាំង​នៅ​ក្នុង​ការ​បោះឆ្នោត​ជាតិ​នា​ឆ្នាំ​ក្រោយ​ដោយ​ថ្លែង​ថា​លទ្ធផល​នៃ​ការ​បោះឆ្នោត​ឃុំ សង្កាត់ កាលពី​ថ្ងៃ​អាទិត្យ​គឺ​ល្អ​ណាស់​សម្រាប់​គណបក្ស​សង្គ្រោះ​ជាតិ​ហើយ​ថា​លទ្ធផល​នេះ​គណបក្ស​ជឿ​ថា​នឹង​មាន​ការ​ផ្លាស់ប្តូរ​យ៉ាង​ពិត​ប្រាកដ​នៅ​ក្នុង​ការ​បោះឆ្នោត​ជាតិ​ឆ្នាំ​ ២០១៨ ទៅ​តាម​ការ​ចង់​បាន​របស់​ប្រជាពលរដ្ឋ​ភាគច្រើន​បំផុត​។

នៅ​លើ​ហ្វេសប៊ុក​របស់​លោក​កាលពី​ម្សិលមិញ​លោក សម រង្ស៊ី ដែល​កំពុង​រស់នៅ​និរទេស​នៅ​បរទេស​បាន​ថ្លែង​ថា​សម្ទុះ​នៃ​កំណើន​ពី ៤០ ឃុំ សង្កាត់ ដល់ ៤៨០ ឃុំ សង្កាត់​ដែល​គណបក្ស​សង្គ្រោះ​ជាតិ​បាន​ឈ្នះ​ពី​គណបក្ស​ប្រជាជន​គឺជា​សម្ទុះ​ដ៏​អស្ចារ្យ​ដែល​មិន​អាច​បដិសេធ​បាន​។

លោក សម រង្ស៊ី បាន​គណនា​ថា ​នៅ​ពេល​ចំនួន​ឃុំ សង្កាត់ ដែល​គ្រប់គ្រង​ដោយ​គណបក្ស​សង្គ្រោះ​ជាតិ​បាន​កើនឡើង​ ១១០០% ចំនួន​ឃុំ សង្កាត់​ដែល​គ្រប់គ្រង​ដោយ​គណបក្ស​ប្រជាជន​បាន​ធ្លាក់​ចុះ ២៧%​។

ជាង​នេះ​ទៀត​លោក​ សម រង្ស៊ី ក៏​បាន​ប្រៀបធៀប​ចំនួន​ក្រុម​ប្រឹក្សា​ឃុំ សង្កាត់ របស់​គណបក្ស​សង្គ្រោះ​ជាតិ​ក្នុង​ឆ្នាំ ២០១៧ គណបក្ស​សង្គ្រោះ​ជាតិ​ឈ្នះ​បាន​ ៥០០០ អាសនៈ​នៃ​ក្រុម​ប្រឹក្សា​ឃុំ សង្កាត់​ធៀប​នឹង​ឆ្នាំ​ ២០១២ ដែល​គណបក្ស​ប្រឆាំង​បាន​ឈ្នះ​តែ ១៩៥៥ អាសនៈ (​គណបក្ស​សមរង្ស៊ី និង​គណបក្ស​សិទ្ធិ​មនុស្ស​)​។

លោក សម រង្ស៊ី បន្ត​ថា​ គណបក្ស​សង្គ្រោះ​ជាតិ​បាន​កើនឡើង ៧០ ​ភាគរយ​ហើយ​តាម​ការ​គណនា​នេះ​គណបក្ស​ប្រជាជន​កម្ពុជា​នៅ​សល់ ៦៥០០ អាសនៈ​នៃ​ក្រុម​ប្រឹក្សា​ឃុំ សង្កាត់​នៅ​ក្នុង​ឆ្នាំ​ ២០១៧ បើ​ធៀប​នឹង​ឆ្នាំ​ ២០១២ គណបក្ស​ប្រជាជន​មាន​ក្រុម​ប្រឹក្សា​ឃុំ​សង្កាត់​ចំនួន ៨២៩២ ហើយ​តួលេខ​នេះ​លោក សម រង្ស៊ី គណនា​ថា​គណបក្ស​ប្រជាជន​បាន​ធ្លាក់​ចុះ​ចំនួន ២១%​។

អតីត​មេបក្ស​ប្រឆាំង​រូប​នេះ​អះអាង​ថា​៖ «​ផ្អែក​តាម​ចំនួន​ក្រុម​ប្រឹក្សា​ឃុំ សង្កាត់ ដែល​ [​គណបក្ស​សង្គ្រោះ​ជាតិ​] ​ទទួល​បាន​ក្នុង​ឆ្នាំ​ ២០១៧ យើង​អាច​ព្យាករ​ថា​ចំនួន​សមាជិក​ព្រឹទ្ធសភា​ដែល​ [​គណបក្ស​សង្គ្រោះ​ជាតិ​] នឹង​ទទួល​បាន​នៅក្នុង​ការ​បោះឆ្នោត​ជ្រើសរើស​សមាជិក​ព្រឹទ្ធសភា​នៅ​ខែ​មករា​ឆ្នាំ ២០១៨ ពី​ ១១ ​អាសនៈ​ដល់​ ២៥ ​អាសនៈ​។ នោះ​វា​មាន​ន័យ​ថា [​គណបក្ស​ប្រជាជន​] ​នឹង​បាត់បង់​តំណែង​សមាជិក​ព្រឹទ្ធសភា​ប្រហែល ១៤ នាក់​»​។

លើស​ពី​នេះ​គណបក្ស​សង្គ្រោះ​ជាតិ​ក៏​នឹង​កើនឡើង​ចំនួន​ក្រុម​ប្រឹក្សា​ស្រុក និង​ខេត្ត​ក្រុង​ផង​ដែរ​។ លោក សម រង្ស៊ី ថ្លែង​ថា​គណបក្ស​សង្គ្រោះ​ជាតិ​បាន​ឈ្នះ​ឆ្នោត​នៅ​រាជធានី​ភ្នំពេញ​ខេត្ត​កំពង់ចាម ក្រុង​កំពង់ចាម ខេត្ត​សៀមរាប ក្រុង​សៀមរាប ក្រុង​ប៉ោយប៉ែត​ក្នុង​ខេត្ត​បន្ទាយមានជ័យ សង្កាត់​អូរស្មាច់ ក្នុង​ខេត្ត​ឧត្តរមានជ័យ និង​ក្រុង​បាវិត​ក្នុង​ខេត្ត​ស្វាយរៀង​ដែល​សុទ្ធតែ​ជា​មជ្ឈមណ្ឌល​សេដ្ឋកិច្ច​យ៉ាង​សំខាន់​។

បើ​តាម​លោក សម រង្ស៊ី នៅ​ក្នុង​ការ​បោះឆ្នោត​ឃុំ សង្កាត់​ឆ្នាំ ២០១៧ គណបក្ស​សង្គ្រោះ​ជាតិ​ប្រមូល​បាន​សំឡេង​គាំទ្រ​ចំនួន​ ៣.១០០.០០០ កើនឡើង ៧២% បើ​ធៀប​នឹង​ការ​បោះឆ្នោត​ឃុំ សង្កាត់​ឆ្នាំ​ ២០១២ ដែល​មាន​សំឡេង​ឆ្នោត​គាំទ្រ​គឺ ១.៨០៤.០០០​។ ប៉ុន្តែ​សំឡេង​ឆ្នោត​ដែល​ប្រមូល​បាន​ដោយ​គណបក្ស​ប្រជាជន​កម្ពុជា​នៅ​ក្នុង​ការ​បោះឆ្នោត​ឃុំ​សង្កាត់​ឆ្នាំ ២០១៧ គឺ ៣.៣០០.០០០ ថយ​ចុះ ៨% បើ​ធៀប​នឹង​ការ​បោះឆ្នោត​ឃុំ​សង្កាត់​ឆ្នាំ ២០១២ គណបក្ស​ប្រជាជន​ប្រមូល​បាន ៣.៦៣១.០០០ សំឡេង​។

លោក សម រង្ស៊ី បាន​បន្ត​ថា​៖ «​តួលេខ​នេះ​គឺ​សំខាន់​បំផុត​នៅ​ក្នុង​ការ​វាស់ស្ទង់​ប្រជាប្រិយភាព​នៃ​គណបក្ស​នីមួយៗ​ដើម្បី​ព្យាករ​លទ្ធផល​នៃ​ការ​បោះឆ្នោត​ជាតិ​ឆ្នាំ​ ២០១៨»​។

អ្នក​នាំ​ពាក្យ​គណបក្ស​ប្រជាជន​លោក សុខ ឥសាន បាន​ទទួល​ស្គាល់​ថា​គណបក្ស​សង្គ្រោះ​ជាតិ​នឹង​ទទួល​បាន​សំឡេង​គាំទ្រ​ដែល​ជំរុញ​សមាជិក​ព្រឹទ្ធសភា​របស់​គណបក្ស​សង្គ្រោះ​ជាតិ​ពី​ ១១ ​ដល់​ជាង ២០ អាសនៈ ប៉ុន្តែ​បាន​អះអាង​ថា​បើ​ទោះបី​ជា​គណបក្ស​សង្គ្រោះ​ជាតិ​កើនឡើង​ចំនួន​សមាជិក​ព្រឹទ្ធសភា​ក៏ដោយ ប៉ុន្តែ​ពួកគេ​មិន​អាច​គ្រប់គ្រង និង​សម្រេច​អ្វី​ដូច​ពួកគេ​ចង់​នោះ​ទេ​ហើយ​ក៏​មិន​អាច​ឈ្នះ​នៅ​ក្នុង​ការ​បោះឆ្នោត​ឆ្នាំ​ក្រោយ​ផង​ដែរ​ពីព្រោះ​គណបក្ស​ប្រជាជន​នៅ​តែ​ឈ្នះ​ជាង​ ៣០ ​នៃ​សមាជិក​ព្រឹទ្ធសភា ៦១ ​។

លោក ឥសាន បាន​បន្ត​ថា​៖ «​គាត់​កើន​ទៅ​មុខ​។ [​គណបក្ស​សង្គ្រោះ​ជាតិ​] ​កើន ប៉ុន្តែ​គាត់​នៅ​តែ​ចាញ់​។ បើ​គ្រាន់​តែ​គិត យើង​ឃើញ​ថា​គាត់​ពិតជា​ទទួល​បាន​ [​សមាជិក​ព្រឹទ្ធសភា​] ​ជាង ២០ [​ប៉ុន្តែ​] ​មិន​អាច​ទៅ​រួច​ទេ​»​។

ប៉ុន្តែ​នាយក​ប្រតិបត្តិ​នៃ​គណៈកម្មាធិការ​អព្យាក្រឹត និង​យុត្តិធម៌​ដើម្បី​ការ​បោះឆ្នោត​ដោយ​សេរី និង​ត្រឹមត្រូវ​នៅ​កម្ពុជា​ហៅ​និកហ្វិច​លោក សំ គន្ធាមី ​ថ្លែង​ថា​សម្ទុះ​នៃ​កំណើន​សំឡេង​គាំទ្រ និង​ការ​កើនឡើង​នៃ​ចំនួន​សមាជិក​ព្រឹទ្ធសភា​អាច​ជា​សញ្ញា​សម្រាប់​គណបក្ស​សង្គ្រោះ​ជាតិ​ឈ្នះ​នៅ​ក្នុង​ការ​បោះឆ្នោត​ជាតិ​ឆ្នាំ ២០១៨ ​ដោយសារ​ផ្អែក​លើ​លទ្ធផល​បណ្តោះអាសន្ន​ដែល​ប្រមូល​បាន​ដែល​មិន​ទាន់​បាន​ចប់​សព្វ​គ្រប់​គណបក្ស​ប្រជាជន​បាន​កើន ៤៨% នៃ​សំឡេង​គាំទ្រ ខណៈ​គណបក្ស​សង្គ្រោះ​ជាតិ​បាន​កើន ៤៥% ​នៃ​សំឡេង​គាំទ្រ ដូច្នេះ​ប្រសិន​បើ​ចំនួន​អ្នក​បោះឆ្នោត​កើនឡើង​គណបក្ស​សង្គ្រោះ​ជាតិ​អាច​ឈ្នះ​។

លោក សម គន្ធាមី បាន​ថ្លែង​ថា​៖ «​ប្រសិន​បើ​កម្មវិធី​នយោបាយ​ [​របស់​គណបក្ស​សង្គ្រោះ​ជាតិ​] ​ត្រូវ​បាន​រៀបចំ​ល្អ [​គណបក្ស​សង្គ្រោះ​ជាតិ​] ​អាច​ [​ឈ្នះ​] ​ដែរ​។ ស្វែងរក​លទ្ធភាព​សម្រាប់​ [​ពលករ​ចំណាកស្រុក​] ​ដើម្បី​ឲ្យ​អាច​ចុះ​ឈ្មោះ​បោះឆ្នោត​ និង​អាច​មក​បោះឆ្នោត​ [​គណបក្ស​សង្គ្រោះ​ជាតិ​] នឹង​កើនឡើង​បន្ថែម​ទៀត​»៕ PS

0

Comments

Please, login or register to post a comment