Search form

Login - Register | FOLLOW US ON

Logo of Phnom Penh Post newspaper Phnom Penh Post - លោក​ ហ៊ុន សែន ​បដិសេធ​បញ្ជា​សម្ងាត់​ក្នុង​ហ្វេសប៊ុក សម រង្ស៊ី

Content image - Phnom Penh Post
លោកនាយករដ្ឋមន្ត្រី ហ៊ុន សែន ថ្លែង​ក្នុង​កម្មវិធី​មួយ​នៅ​រាជធានី​ភ្នំពេញ កាល​ពី​ថ្ងៃ​សៅរ៍។ រូបថត ហ្វេសប៊ុក

លោក​ ហ៊ុន សែន ​បដិសេធ​បញ្ជា​សម្ងាត់​ក្នុង​ហ្វេសប៊ុក សម រង្ស៊ី

ភ្នំពេញ: លោកនាយក​រដ្ឋមន្ត្រី ហ៊ុន សែន ប្រធាន​គណបក្ស​ប្រជាជន​កម្ពុជា​ដែល​ជា​គណបក្ស​កាន់​អំណាច​កំពុង​រៀបចំ​បញ្ជា​កម្លាំង​ប្រដាប់​អាវុធ​ឲ្យ​ចាប់​ខ្លួន​អតីត​ប្រធាន​គណបក្ស​ប្រឆាំង​លោក សម រង្ស៊ី ភ្លាមៗ​ប្រសិន​បើ​យន្តហោះ​ណា​ដឹក​មេដឹកនាំ​គណបក្ស​ប្រឆាំង​នេះ​ចុះ​ចត​នៅក្នុង​ព្រលាន​យន្តហោះ​យោធា​ ឬ​ទីតាំង​ណា​មួយ​ដែល​មិនមែន​សម្រាប់​អ្នក​ដំណើរ​។

នៅក្នុង​បទសម្ភាស​ផ្តាច់​មុខ​ ជាមួយ​សារព័ត៌មាន Fresh News ដែល​ជា​សារព័ត៌មាន​គាំទ្រ​រដ្ឋាភិបាល​ កាលពី​ល្ងាច​ថ្ងៃ​សៅរ៍​ លោក ហ៊ុន សែន បាន​ច្រានចោល​បញ្ជា​សម្ងាត់​ដែល​បង្ហោះ​នៅលើ​ហ្វេសប៊ុក​របស់ ​លោក សម រង្ស៊ី កាលពី​ថ្ងៃ​សៅរ៍​ផងដែរ​ ដោយ​លើក​ឡើង​ថា​បញ្ជា​សម្ងាត់​នេះ​ដែល​សរសេរ​ ដោយ​លោក ហ៊ុន សែន នៅ​ថ្ងៃ​ទី​ ១៤ ខែ​មិថុនា​បញ្ជា​ឲ្យ​មេបញ្ជាការ​កម្លាំង​ប្រដាប់​អាវុធ​អនុវត្ត​ទៅ​លើ​លោក សម រង្ស៊ី​។

ឆ្លើយតប​ជាមួយ​បញ្ជា​សម្ងាត់​នេះ​ដែល​មិនមែន​ជា​របស់​លោក លោក​នាយករដ្ឋមន្ត្រី​ក៏​បាន​ហៅ​លោក សម រង្ស៊ី ថា​ជា​មនុស្ស​ឆ្កួតៗ​ផង​ដែរ ដែល​ចោទ​ប្រកាន់​គ្មាន​ការពិត​ដែល​ជា​ការ​មួលបង្កាច់ និង​លាប​ពណ៌ ប៉ុន្តែ​លោក​នាយករដ្ឋមន្ត្រី​បាន​បញ្ជាក់​ជាថ្មី​ថា​ លោក​នឹង​អនុវត្ត​យុទ្ធសាស្ត្រ​ ដើម្បី​ចាប់​ខ្លួន​ លោក សម រង្ស៊ី នៅ​ពេល​គាត់​ត្រឡប់​មក​ប្រទេស​កម្ពុជា​វិញ​។

លោក​នាយក​រដ្ឋមន្ត្រី​បាន​ប្រាប់​សារព័ត៌មាន Fresh News ថា​៖ «​ រង្ស៊ី ជា​មនុស្ស​ល្ងង់​ណាស់​ដែល​ថា​សារ​បទបញ្ជា​កម្លាំង​យោធា ​ដែល​ទទួល​បាន​នោះ​ថា​ជា​របស់​ខ្ញុំ​, កន្លែង​ណា​ដែល​ថា​ជា​របស់​ខ្ញុំ​មាន​ត្រា និង​ហត្ថលេខា​អត់ ពិត​ជា​ល្ងីល្ងើ​មែន​...​ ប៉ុន្តែ​ខ្ញុំ​សូម​សរសើរ​អ្នក​សរសេរ​បទបញ្ជា​ទ័ព​នេះ​ព្រោះ​ការ​បញ្ជា​ទ័ព​ក៏​ខ្ញុំ​ប្រើ​វិធី​បែប​នេះ​ដែរ​»​។

លោក ហ៊ុន សែន បាន​ព្រមាន​ថា​៖ «​អ្នក​សរសេរ​នេះ​ដូចជា​យល់​ចិត្ត​របស់​ខ្ញុំ​មែន​, ការ​បញ្ជា​ទ័ព​គឺ​ត្រូវ​តែ​អ៊ីចឹង​ហើយ​, បើ​អ្នក​ក្លាហាន​ឯង​មិន​ហ៊ាន​ចូល​ស្រុក កុំ​សន្យា​, ខ្ញុំ​បញ្ជាក់​ហើយ​ស្តាប់​ឲ្យ​ច្បាស់ បើ​ចូល​ត្រូវ​តែ​ចាប់​វ៉ៃខ្នោះ​ដល់​ក្នុង​យន្តហោះ​ហើយ​បញ្ជូន​ទៅ​គុក​តែ​ម្តង​កុំ​ព្រហើន​មែន​អាល្ងង់​»​។

លោក​នាយករដ្ឋមន្ត្រី ហ៊ុន សែន បាន​បន្ថែម​ថា រង្ស៊ី ចូលចិត្ត​ប្រើប្រាស់​ភាសា​មួលបង្កាច់ លាប​ពណ៌ គេ​បែប​នេះ​បាន​ចេះ​តែ​ជាប់គុក បង្កើត​រឿង​មិន​ពិត​ថា​ជា​រឿង​ពិត​រាល់​កំហុស​របស់​ រង្ស៊ី គឺ​កើតឡើង​ពី​ទង្វើ​របស់​ខ្លួនឯង​, សារ​បទបញ្ជា​អ្នក​ណា​ក៏​សរសេរ​បាន​មក​ចោទ​ថា​ជា​របស់​នាយក​រដ្ឋមន្ត្រី សំណាង​ដែរ​ខ្ញុំ​មិន​ប្តឹងប្ដល់​ទេ​ព្រោះ​ រង្ស៊ី ​ជា​មនុស្ស​ដែល​មាន​ទោស​ស្រាប់​ទៅ​ហើយ​។

លោក ហ៊ុន សែន ថ្លែង​បន្ត​ថា​៖ «​ខ្ញុំ​បញ្ជាក់​ឲ្យ​ច្បាស់​ឡើង​វិញ​ថា​ខ្ញុំ​នឹង​អនុវត្ត​យុទ្ធវិធី​នេះ​នៅ​ពេល​ រង្ស៊ី ចូល​ស្រុក​ហើយ​សូម​អរគុណ​ទណ្ឌិត​ រង្ស៊ី ដែល​បាន​បង្ហាញ​វិធីសាស្ត្រ​ចាប់​ខ្លួន​លោក​ឲ្យ​ដឹង​បែប​នេះ​»​។

កាលពី​ថ្ងៃ​សៅរ៍​លោក សម រង្ស៊ី ដែល​កំពុង​រស់នៅ​និរទេស​នៅ​បរទេស​បាន​បង្ហោះ​សារ​សម្ងាត់​លេចធ្លាយ​មួយ​នៃ​ការ​បញ្ជា​យោធា​ដោយ​លើក​ឡើង​ថា​ការ​បញ្ជា​សម្ងាត់​នេះ​ត្រូវ​បាន​សរសេរ​ដោយ​លោក​នាយក​រដ្ឋមន្ត្រី ហ៊ុន សែន បញ្ជា​ឲ្យ​មេបញ្ជាការ​កងកម្លាំង​ប្រដាប់​អាវុធ​ចាប់​ខ្លួន​លោក សម រង្ស៊ី នៅ​ពេល​លោក​ត្រឡប់​មក​ប្រទេស​វិញ​ដើម្បី​ប្រកួត​ប្រជែង​តំណែង​នាយក​រដ្ឋមន្ត្រី​ជាមួយ​លោក​នាយក​រដ្ឋមន្ត្រី ហ៊ុន សែន នៅ​ក្នុង​ការ​បោះឆ្នោត​ជាតិ​ឆ្នាំ​ក្រោយ​។

លោក រង្ស៊ី បាន​សរសេរ​ថា​៖ «​បទបញ្ជា​នេះ​បង្ហាញ​ឲ្យ​ឃើញ​ថា ហ៊ុន សែន រៀបចំ​បង្ក​សង្គ្រាម និង​សម្លាប់​ប្រជាពលរដ្ឋ​ពេល សម រង្ស៊ី វិល​ត្រឡប់​មក​ប្រទេស​កម្ពុជា​វិញ​។ នេះ​ក៏​ជា​លេស​មួយ​ទៀត​ដើម្បី​រំលាយ​គណបក្ស​សង្គ្រោះ​ជាតិ​។ ​សម រង្ស៊ី នៅ​តែ​ជា​អ្នក​មាន​ទោស​ដែល​កម្លាំង​អនុវត្ត​ច្បាប់​ត្រូវ​តែ​អនុវត្ត​តាម​សាលដីកា​តុលាការ​ចាប់​វា​ញាត់​គុក​ឲ្យ​ខាង​តែ​បាន​ទោះ​ដោយ​តម្លៃ​ណា​ក៏ដោយ​មិន​អាច​ឲ្យ​អា​មួយ​នេះ​រួច​ខ្លួន​បាន​ឡើយ​។ ការ​ចាប់​ សម រង្ស៊ី ត្រូវ​ធ្វើ​នៅ​លើ​យន្តហោះ​តែ​ម្តង​ដោយ​ឲ្យ​យន្តហោះ​ទៅ​ចត​...»៕ PS

0

Comments

Please, login or register to post a comment

ព័ត៌មានពាក់ព័ន្ធ