Search form

Login - Register | FOLLOW US ON

Logo of Phnom Penh Post newspaper Phnom Penh Post - លោក​ ហ៊ុន សែន ​ប្រកាស​ទទួល​យក​ខ្មែរ​ពី​អាមេរិក​​ តែ​សូម​ឲ្យ​ជួយ​ចិញ្ចឹម

Content image - Phnom Penh Post
លោក​នាយក​រដ្ឋមន្ត្រី ហ៊ុន សែន ក្នុង​ពិធី​ពី​ម្សិលមិញ​។ រូបថត ហ្វេសប៊ុក

លោក​ ហ៊ុន សែន ​ប្រកាស​ទទួល​យក​ខ្មែរ​ពី​អាមេរិក​​ តែ​សូម​ឲ្យ​ជួយ​ចិញ្ចឹម

ភ្នំពេញៈ ឆ្លើយតប​ទៅ​នឹង​សហរដ្ឋអាមេរិក​ដែល​ចង់​បញ្ជូន​ជន​ភៀសខ្លួន​កម្ពុជា​ត្រឡប់​មក​ប្រទេស​កំណើត​វិញ​លោក​នាយក​រដ្ឋមន្ត្រី​ ហ៊ុន សែន បាន​ប្រកាស​ទទួល​យក​ទាំងអស់​នូវ​ជនជាតិ​ខ្មែរ​ដែល​ទៅ​រស់នៅ​អាមេរិក​ឲ្យ​មក​រួមរស់​នៅ​ស្រុក​កំណើត​វិញ តែ​លោក​បាន​ស្នើ​ឲ្យ​អាមេរិក​ធានា​ការ​ចំណាយ​លើ​ការ​បញ្ជូន​មក និង​ធានា​ការ​ផ្តល់​ប្រាក់ខែ​ចិញ្ចឹម​ពួកគេ​។

នៅ​ក្នុង​ឱកាស​ជួប​សំណេះ​សំណាល​ជាមួយ​កម្មករ​ជាង​ ១៥៧០០ នាក់​មកពី​រោងចក្រ​នានា​ក្នុង​តំបន់​អូរដឹម ខណ្ឌ​ពោធិ៍សែនជ័យ​ពី​ម្សិលមិញ​លោក ហ៊ុន សែន បាន​ប្រកាស​ថា​រាជរដ្ឋាភិបាល​នឹង​ទទួល​យក​ជន​ភៀសខ្លួន​ដែល​នឹង​ត្រូវ​រដ្ឋាភិបាល​អាមេរិក​បណ្តេញ​ចេញ​។

លោក​ ហ៊ុន សែន បាន​លើក​ឡើង​ថា​ អាមេរិក​កំពុង​ពិចារណា​បញ្ជូន​ពលរដ្ឋ​ខ្មែរ​ដែល​ទៅ​រស់នៅ​អាមេរិក​ក្រោយ​ឆ្នាំ​ ១៩៩៤ ឲ្យ​ត្រឡប់​មក​កម្ពុជា​វិញ​ហើយ​ថា​លោក​នឹង​ចាំ​ទទួល​យក​ពលរដ្ឋ​ខ្មែរ​ទាំងអស់​នោះ​។

លោក​បន្ថែម​ថា​ រដ្ឋាភិបាល​ត្រូវ​ការពារ​នូវ​ពលករ​ចំណាកស្រុក ប៉ុន្តែ​ជាមួយ​គ្នា​នេះ​រដ្ឋាភិបាល​បញ្ជូន​ពលករ​ទៅ​ធ្វើការ​នៅ​ក្រៅ​ប្រទេស និង​បញ្ជូន​និស្សិត​ទៅ​ក្រៅ​ប្រទេស​កាន់តែ​ច្រើន​ទៅៗ​។ ​

លោក​ ហ៊ុន សែន ថ្លែង​ថា​៖ «​យើង​មាន​រឿង​ដែល​ត្រូវ​អកុសល ប៉ុន្តែ​យើង​ត្រូវ​តែ​ទទួល​ក្នុង​ឋានៈ​ជា​ជនជាតិ​កម្ពុជា​របស់​យើង​ពី​សហរដ្ឋ​អាមេរិក​ចំនួន​ជាង ៦០០ នាក់​ហើយ​ដែល​បាន​បញ្ជូន​ត្រឡប់​មក​កាន់​កម្ពុជា​វិញ​»​។

លោក​បន្ថែម​ថា ​រដ្ឋាភិបាល​មាន​កិច្ចព្រមព្រៀង​ជាមួយ​សហរដ្ឋអាមេរិក​ដែល​កិច្ចព្រមព្រៀង​នេះ​បន្ត​អនុវត្ត​ហើយ​។ លោក​បញ្ជាក់​ទៀត​ថា​រដ្ឋាភិបាល​បាន​គិតគូរ​អំពី​បញ្ហា​ទាក់ទង​ជាមួយ​នឹង​មនុស្សធម៌​ទាក់ទង​ជាមួយ​នឹង​សិទ្ធិ​មនុស្ស ប៉ុន្តែ​ក៏​មិន​ទាន់​មាន​ការ​កែប្រែ​ណា​មួយ​ពី​ការ​មិន​ព្រម​អនុវត្ត​នូវ​កិច្ចព្រមព្រៀង​នោះ​ទេ​។

លោក​ឲ្យ​ដឹង​ថា​៖ «​យើង​បាន​ធ្វើ​សម្ភាសន៍​ជាមួយ​បងប្អូន​ភៀស​ខ្លួន​បងប្អូន​មួយ​ចំនួន​ដែល​ជាប់ទោស​នៅ​អាមេរិក​ហើយ​ត្រូវ​អាមេរិក​បញ្ជូន​ចេញ​មក​។ យើង​បាន​ធ្វើ​សម្ភាសន៍​មួយ​ចំនួន ឯ​មួយ​ចំនួន​មាន​ជំងឺ​យើង​បាន​ស្នើឲ្យ​រដ្ឋាភិបាល​របស់​អាមេរិក​ជួយ​ព្យាបាល​ឲ្យ​ជា​សិន​ចាំ​វិល​ត្រឡប់​មក​កម្ពុជា ប៉ុន្តែ​ឥឡូវ​នេះ ​ខាង​ភាគី​អាមេរិក​ក៏​បាន​ស្នើសុំ​ឲ្យ​យើង​ទទួល​យក​ជន​ភៀសខ្លួន​ជាតិ​កម្ពុជា​ដែល​បាន​ទៅ​រស់នៅ​អាមេរិក​នៅ​ក្រោយ​ឆ្នាំ​ ១៩៩៤ ថែម​ទៀត​»​។

ដោយ​និយាយ​សំដៅ​លើ​ជនជាតិ​កម្ពុជា​ដែល​បាន​ភៀសខ្លួន​ទៅ​អាមេរិក ឬ​ក៏​ស្នាក់នៅ​អាមេរិក​ក្នុង​ទសវត្សរ៍ ១៩៧០ ឬ​ទសវត្សរ៍ ១៩៨០ ​ដែល​រត់​ភៀសខ្លួន​ទៅ​អាមេរិក​នៅ​ពេល​ដែល​ជាប់​ទោស​ហើយ​នោះ​លោក​ ហ៊ុន សែន និយាយ​ថា​ពួកគេ​ត្រូវ​បាន​បញ្ជូន​ត្រឡប់​មក​កម្ពុជា​វិញ ប៉ុន្តែ​ក៏​មាន​ជនជាតិ​កម្ពុជា​បាន​ទៅ​រស់នៅ​អាមេរិក​នៅ​ក្រោយ​ឆ្នាំ​ ១៩៩៤ ​។ ឥឡូវ​អាមេរិក​ចង់​បញ្ជូន​អ្នក​ទាំង​នេះ​ត្រឡប់​មក​វិញ​។

លោក​បន្ត​ថា​៖ «​សូម​ផ្ដាំ​ទៅ​បងប្អូន​ដែល​រស់នៅ​អាមេរិក បងប្អូន​ដែល​មិន​ទាន់​ទៅ​នៅ​អាមេរិក​សូម​កុំ​ប្រថុយ​ប្រថាន​ជាមួយ​នឹង​ដំណើរ​ដ៏​គ្រោះថ្នាក់​ដែល​ទៅ​រស់នៅ​សហរដ្ឋអាមេរិក​។ ក្រសួង​មហាផ្ទៃ និង​ក្រសួង​ការបរទេស​កម្ពុជា​អាច​នឹង​ចាប់​ធ្វើការ​ចរចា​ជាមួយ​សហរដ្ឋ​អាមេរិក ប៉ុន្តែ​ការ​ចរចា​នោះ​អាមេរិក​ក៏​ត្រូវ​តែ​យល់​ដឹង​អំពី​ការ​លំបាក​របស់​កម្ពុជា​ដែរ​។ នៅ​ត្រង់​ថា ​កម្ពុជា​ គ្មាន​សំបុត្រ​យន្តហោះ​ឲ្យ​ជិះ​ទេ បើ​ចង់​បញ្ជូន​មក​គឺ​កម្ពុជា​អាច​ទទួល​នៅ​នឹង​ពោធិ៍​ចិនតុង ប៉ុន្តែ​ អាមេរិក​ក៏​ត្រូវ​ធានា​ថា ​ពលរដ្ឋ​កម្ពុជា​ដែល​ត្រូវ​បញ្ជូន​ត្រឡប់​មក​វិញ​ត្រូវ​ឲ្យ​គេ​មាន​ប្រាក់​ទទួលទាន​ប្រាក់​ចិញ្ចឹម​អី​ប៉ុន្មាន​ខែ ឬ​មួយ​ឆ្នាំ ស្អី​ឲ្យ​វា​មាន​អ៊ីចឹង​ផង​»​។

ជាង​នេះ​ទៀត​លោក​ ហ៊ុន សែន បាន​អះអាង​ថា​កម្ពុជា​នឹង​ពិភាក្សា​ជាមួយ​អាមេរិក​ដោយ​ធានា​មិន​ឲ្យ​មាន​ការ​បញ្ជូន​ប្រជាជន​ទាំង​នោះ​ទៅ​ដាក់​នៅ​លើ​តំបន់​កោះ​នេះ​កោះ​នោះ​ដូច​ដែល​ប្រជាពលរដ្ឋ​មួយ​ចំនួន​នៃ​ប្រទេស​ដទៃ​ដែល​មិន​ស្រប​ច្បាប់​។

ជាមួយ​គ្នា​នេះ ​លោក​ ហ៊ុន សែន ក៏​បាន​ថ្លែង​ថា​ប្រជាពលរដ្ឋ​ខ្មែរ​មួយ​ចំនួន​ទៅ​រស់នៅ​តាម​ទូក​ទៅ​ប្រទេស​អូស្ត្រាលី ហើយ​ក៏​ត្រូវ​គេ​ចាប់​បញ្ជូន​ត្រឡប់​មក​វិញ ឬ​ក៏​ត្រូវ​គេ​ឲ្យ​ទៅ ប៉ុន្តែ​ឥឡូវ​នេះ​អូស្ត្រាលី​មាន​កិច្ចព្រមព្រៀង​ជាមួយ​កម្ពុជា​ឲ្យ​កម្ពុជា​ជួយ​ទទួល​យក​ជន​ភៀសខ្លួន​នៅ​ប៉ាពួញូវហ្គីណេ ហើយ​ឥឡូវ​រដ្ឋាភិបាល​អូស្ត្រាលី​កំពុង​ខិតខំ​បិទ​ជំរំ​នៅ​ ប៉ាពួញូវហ្គីណេ​។

ក្រៅពី​នេះ​លោក​ ហ៊ុន សែន ក៏​បាន​រំឭក​ពី​កិច្ចព្រមព្រៀម​កម្ពុជា ​ជាមួយ​អូស្ត្រាលី​ ក្នុង​ការ​ទទួល​យក​ជនភៀសខ្លួន​ពី​កោះ Nauru ដោយ​លោក​ថា​លោក​បាន​សួរ​នាយក​រដ្ឋមន្ត្រី​អូស្ត្រាលី​លោក Turnbul ពេល​បាយ​ជាមួយ​គ្នា​ពី​បញ្ហា​នេះ​ហើយ​ត្រូវ​បាន​គាត់​ឆ្លើយតប​ថា​មិន​មាន​ជន​ភៀស​ខ្លួន​ណា​ចង់​មក​កម្ពុជា​ទៀត​ទេ​។

លោក​ កែវ សារិន អ្នក​នាំពាក្យ​អគ្គនាយកដ្ឋាន​អន្តោប្រវេសន៍​នៃ​ក្រសួង​មហាផ្ទៃ​ថ្លែង​ថា​មន្ត្រី​បាន​និង​កំពុង​ធ្វើ​កិច្ចការ​នេះ​ ប៉ុន្តែ​លោក​ថា​មិន​ដឹង​មាន​ពលរដ្ឋ​កម្ពុជា​ចំនួន​ប៉ុន្មាន​នឹង​ត្រូវ​បញ្ជូន​មក​នា​ពេល​ខាង​មុខ​នេះ​ទេ​។ ប៉ុន្តែ​លោក​ សុខ ផល អគ្គនាយក​នៃ​អគ្គនាយកដ្ឋាន​អន្តោប្រវេសន៍​ឲ្យ​ដឹង​ថា​ពលរដ្ឋ​កម្ពុជា​ប្រហែល ៧២ នាក់​នឹង​ត្រូវ​អាមេរិក​បញ្ជូន​មក​កម្ពុជា​នាពេល​ខាង​មុខ​។

លោក Bill Herod ស្ថាបនិក​មជ្ឈមណ្ឌល Returnee Integration Support Center ជា​អង្គការ​មិនមែន​រដ្ឋាភិបាល​ជួយ​ពលរដ្ឋ​ខ្មែរ​ដែល​ត្រូវ​បាន​និរទេស​ឱ្យ​សម្រប​ខ្លួន​ទៅ​នឹង​ការ​រស់នៅ​ក្នុង​ប្រទេស​មួយ​ដែល​ពួកគេ​ជាច្រើន​មិន​ធ្លាប់​រស់នៅ​ថ្លែង​ថា​ក្រុម​ដ៏ធំ​នៃ​ជន​ត្រូវ​បណ្តេញ​ចេញ​នឹង​មក​ដល់​ប្រទេស​កម្ពុជា​នា​ចុង​ខែ​ធ្នូ និង​មក​ជា​បន្តបន្ទាប់​ទៀត​។

លោក​ថ្លែង​ថា​៖ «​នេះ​នឹង​ក្លាយ​ជា​ក្រុម​ដ៏ធំ​បំផុត​ក្នុង​ចំណោម​ក្រុម​ដែល​យើង​ធ្លាប់​ទទួល​»​។

លោក Bill យល់​ថា​បញ្ហា​នៃ​ការ​ដាក់​ទណ្ឌកម្ម​ទិដ្ឋាការ​លើ​មន្ត្រី​កម្ពុជា​អាច​ជា​មូលហេតុ​នៃ​ការ​បន្ទន់​ជំហរ​របស់​រដ្ឋាភិបាល​កម្ពុជា​។ ប៉ុន្តែ​ទោះ​ជា​យ៉ាង​ណា​លោក​បាន​ហៅ​ការ​សម្រេច​និរទេស​ពលរដ្ឋ​កម្ពុជា​ថា​ជា​រឿង​ «​គួរ​ឱ្យ​ភ័យខ្លាច​»​។

លោក​បាន​សម្ដែង​ការ​ខក​ចិត្ត​ថា​៖ «​វា​ជា​ការ​ដ៏គួរ​ឱ្យ​ភ័យខ្លាច​ហើយ​យើង​ទាំងអស់​គ្នា​ស្អប់​វា​ហើយ​វា​មិនមែន​ជា​មធ្យោបាយ​ល្អ​នោះ​ទេ ប៉ុន្តែ​វា​កើតឡើង​នៅ​ទី​នោះ​។ ទាំង​នេះ​គឺជា​ពលរដ្ឋ​កម្ពុជា​មិនមែន​ជា​ពលរដ្ឋ​អាមេរិក​ទេ​។ វា​ពិតជា​ត្រូវ​បាន​បង្កើត​ឡើង​ក្រោម​រដ្ឋបាល​របស់​លោក Trump ជា​មនុស្ស​ម្នាក់​ដែល​រំពឹង​ដូច្នេះ ប៉ុន្តែ​ខ្ញុំ​ពិតជា​មាន​ការ​ខក​ចិត្ត​ខ្លាំង​ណាស់​ក្នុង​ការ​ឃើញ​ចំនួន​ច្រើន​ដូចនេះ​»​។

លោក David Josar អ្នក​​នាំពាក្យ​ស្ថានទូត​អាមេរិក​ប្រចាំ​កម្ពុជា​បាន​បដិសេធ​ធ្វើ​អត្ថាធិប្បាយ​ណា​មួយ​ចំពោះ​ការ​អត្ថាធិប្បាយ​របស់​លោក​ ហ៊ុន សែន កាលពី​ថ្ងៃ​ម្សិលមិញ​៕

0

Comments

Please, login or register to post a comment

ព័ត៌មានពាក់ព័ន្ធ