Search form

Login - Register | FOLLOW US ON

Logo of Phnom Penh Post newspaper Phnom Penh Post - លោក​ ហ៊ុន សែន អំពាវនាវ​ឲ្យ​មន្ត្រី​ដែល​មាន​តួនាទី​របស់​គណបក្ស​សង្គ្រោះ​ជាតិ​ចុះ​ចូល​បើ​ចង់​រក្សា​តំណែង

Content image - Phnom Penh Post
សមាជិក​ព្រឹទ្ធសភា​ចូលរួម​ប្រជុំដើម្បី​ ពិនិត្រ និង​ អនុម័ត ​សេចក្តី​ស្នើ​ច្បាប់​ស្តីពី​វិសោធនកម្ម​ច្បាប់​ស្តីពី​ការ​បោះឆ្នោត​ជ្រើសតាំង​តំណាងរាស្ត្រកាល​ពី ថ្ងៃសុក្រ​សប្ដាហ៍មុន។​ រូបថត កែវ រតនា

លោក​ ហ៊ុន សែន អំពាវនាវ​ឲ្យ​មន្ត្រី​ដែល​មាន​តួនាទី​របស់​គណបក្ស​សង្គ្រោះ​ជាតិ​ចុះ​ចូល​បើ​ចង់​រក្សា​តំណែង

ភ្នំពេញ: លោក​នាយក​រដ្ឋមន្ត្រី ហ៊ុន សែន កាលពី​ម្សិលមិញ​បាន​ប្រកាស​ធានា​ពី​ការ​រក្សា​ទុក​កៅអី​មន្ត្រី​ក្រុមប្រឹក្សា​ឃុំ-សង្កាត់​របស់​គណបក្ស​​សង្គ្រោះ​ជាតិ​ទាំងអស់​ជាង​ ៥ ​ពាន់​អាសនៈ​ប្រសិន​បើ​ពួកគេ​លាលែង​រួច​ទៅ​ចុះ​ចូល​ជាមួយ​គណបក្ស​ប្រជាជន​កម្ពុជា​ដោយ​លោក​បាន​អះអាង​ថា​គណបក្ស​នេះ​នឹង​ត្រូវ​រំលាយ​យ៉ាង​ពិតប្រាកដ​មុន​ពេល​សវនាការ​ក្ដី​លោក កឹម សុខា ដែល​ត្រូវ​បាន​ចោទ​ពី​អំពើ​ក្បត់ជាតិ ខណៈ​មន្ត្រី​ឃុំ-សង្កាត់​ខ្លះ​ថា​ពួកគេ​នឹង​មិន​ក្បត់​ឆន្ទៈ​របស់​ម្ចាស់​ឆ្នោត​ដាច់​ខាត​បើ​ទោះបី​ជា​ត្រូវ​បាត់បង់​មុខ​តំណែង​ក្ដី​។

ភ្លាមៗ​បន្ទាប់ពី​ការ​អំពាវនាវ​របស់​លោក ហ៊ុន សែន ក៏​មាន​មន្ត្រី​ជាន់​ខ្ពស់​របស់​គណបក្ស​សង្គ្រោះ​ជាតិ​ប្រកាស​ចុះ​ចូល រួច​បរិហារ​ប្រធាន​បក្ស​របស់​ខ្លួន​ថា​ជា​ជន​ក្បត់​ជាតិ​ផង​ដែរ​។

ការ​អំពាវនាវ​របស់​លោក​នាយក​រដ្ឋមន្ត្រី​នេះ​បាន​ថ្លែង​ក្នុង​ពិធី​ជួប​សំណេះ​សំណាល​ជាមួយ​តំណាង​កម្មករ និយោជិត​ជាង​​ ៤ ​ពាន់​នាក់​នៅ​សាលមហោស្រព​កោះពេជ្រ​ក្នុង​រាជធានី​ភ្នំពេញ​កាលពី​ម្សិលមិញ​ដោយ​អនុញ្ញាត​ឲ្យ​មន្ត្រី​មូលដ្ឋាន​របស់​គណបក្ស​សង្គ្រោះជាតិ​ទាំងអស់​ឲ្យ​ចុះ​ចូល​ជាមួយ​គណបក្ស​ប្រជាជន​កម្ពុជា​ដែល​ជា​ថ្នូរ​នឹង​ការ​សន្យា​រក្សា​តួនាទី​របស់​ពួកគេ បន្ទាប់ពី​បក្ស​ប្រឆាំង​ត្រូវ​បាន​រំលាយ​។

លោក​ ហ៊ុន សែន បាន​ថ្លែង​ថា​មិន​ចង់​ធ្វើឲ្យ​ប៉ះពាល់​ដល់​មន្ត្រី​បក្ស​ប្រឆាំង​ដែល​មិន​ដឹង​អី​ពីព្រោះ​តែ​ទង្វើ​របស់​មេដឹកនាំ​​របស់​ពួកគេ​នោះ​ទេ ដោយ​បាន​ភ្ជាប់​អតីត​មេដឹកនាំ​បក្ស​ដែល​លោក​មិន​បញ្ចេញ​ឈ្មោះ តែ​ហាក់​សំដៅ​លោក សម រង្សី​ថា​បាន​អំពាវនាវ​ឲ្យ​កងកម្លាំង​ប្រដាប់​អាវុធ​ឲ្យ​បែ​កាណុង​ផ្តូល​​រំលំ​របប​របស់​លោក​។

លោក​នាយក​រដ្ឋមន្ដ្រី​ថ្លែង​ថា​៖ «​ឥឡូវ​ខ្ញុំ​សូម​ផ្តាំ​មេឃុំ-ចៅសង្កាត់​របស់​គណបក្ស​សង្គ្រោះ​ជាតិ ឬ​ជំទប់ ឬ​សមាជិក​របស់​សង្គ្រោះ​ជាតិ បើ​អ្នក​ចង់​រក្សា​តំណែង​ជា​ចៅសង្កាត់​ជា​មេឃុំ​តទៅ​ទៀត​អ្នក​ប្តូរ​ជីវភាព​មក​ចូល​គណបក្ស​ប្រជាជន​កម្ពុជា​បន្ត​ទៅ​។ គណបក្ស​របស់​អ្នក​រលាយ​ហើយ អ្នក​មិន​អាច​នៅ​ធ្វើ​មេឃុំ ចៅសង្កាត់ ឬ​ជំទប់ ឬ​សមាជិក​ក្រុម​ប្រឹក្សា​បាន​ទៀត​ទេ ក៏​ប៉ុន្តែ​នៅ​ពេល​បក្ស​រលាយ​អ្នក​ចង់​ទៅ​តាម​បក្ស​ក៏​ទៅ ប៉ុន្តែ​បើ​អ្នក​ចង់​នៅ​ធ្វើ​មេឃុំ អ្នក​​ប្រកាស​ចាកចេញ​ពី​គណបក្ស​ដែល​គេ​រំលាយ​ហើយ ទោះបី​មិន​ប្រកាស​ក៏​វា​អស់​ដែរ គ្រាន់​តែ​ប្រាប់​ថា​ខ្ញុំ​សុំ​ចូល​គណបក្ស​ប្រជាជន​។ អ៊ីចឹង​ទេ​យើង​រៀបចំ​បញ្ជី​ឈ្មោះ​ឡើង​វិញ​ដាក់​ក្នុង​កូតា​ជាប់​ជា​ចៅសង្កាត់​ ឬ​មេឃុំ​នៅ​ហ្នឹង​តែ​ម្តង​។ វា​មិន​ស្រួល​»​។

លោក​បាន​ចោទ​ជា​សំណួរ​ទៅ​កាន់​អតីត​សមាជិក​ជាន់​ខ្ពស់​គណបក្ស​ហ៊្វុនស៊ិនប៉ិច​ដែល​តែងតែ​រិះគន់​ការ​ដឹកនាំ​របស់​លោក​ថា​៖ «​ឥឡូវ​សង្គ្រោះ​បក្ស ឬ​សង្គ្រោះ​ខ្លួនឯង គិត​មើល​ទៅ​? មេ​ខ្លួនឯង​ធ្វើ​អំពើ​ក្បត់ ហើយ​កុំ​ថា​ខ្ញុំ​ទិញដូរ អត់​ទេ​។ លឺ ឡាយ ស្រេង កុំ​ភាន់ច្រឡំ​។ អត់​ទេ​ណា​»​។

ដោយ​មាន​ជំនឿ​ចិត្ត​ថា​ ៩៩ ​ភាគរយ​គណបក្ស​សង្គ្រោះ​ជាតិ​នឹង​ត្រូវ​រំលាយ​មុន​ការ​វិនិច្ឆ័យ​ទោស​លោក កឹម សុខា ប្រធាន​គណបក្ស​សង្គ្រោះ​ជាតិ​ដោយ​លោក ហ៊ុន សែន បាន​ថ្លែង​សង្កត់​ធ្ងន់​ថា​កុំ​យក​សហគមន៍​អន្តរជាតិ​មក​ដាក់​សម្ពាធ​គឺ​មិន​អាច​ទៅ​រួច​ឡើយ ហើយ​ហៅ​ការ​ធានា​ផ្តល់​មុខ​នាទី​របស់​លោក​ទៅ​នឹង នយោបាយ «​ឈ្នះ​ឈ្នះ​» ដែល​លោក​ធ្លាប់​បាន​ធ្វើ​ជាមួយ​អតីត​ពួក​ឧទ្ទាម​ខ្មែរ​ក្រហម​។ «​ខ្ញុំ​គ្រាន់​តែ​ផ្តល់​ឱកាស​បើក​ទ្វារ​សម្រាប់​បងប្អូន ព្រោះ​បងប្អូន​មួយ​ចំនួន​អស់​លុយ​ច្រើន​ណាស់​ទម្រាំ​បាន​ធ្វើ​ចៅសង្កាត់​បាន​ធ្វើ​មេឃុំ បង់លុយ​អស់​ច្រើន​ណាស់​ហើយ​សមាជិក​គណបក្ស​ប្រជាជន​ដែល​បាន​ជាប់​ត្រឹម​តែ​ជា​ជំទប់ កុំ​អាក់អន់​ចិត្ត​ជាមួយ​ចៅសង្កាត់ ឬ​មេឃុំ​ដែល​មកពី​សង្គ្រោះ​ជាតិ​ព្រោះ​គាត់​បាន​ដូរ​ជីវភាព​មក​នៅ​ជាមួយ​យើង​ហើយ​នឹង​នយោបាយ​ឈ្នះ​ឈ្នះ​នោះ​។ តែ​មិន​អាច​ឲ្យ​ពួក​ក្បត់​ឈ្នះ​បាន​ទេ អង្គការ​ចាត់តាំង​ត្រូវ​រលាយ​ហើយ​។ ជម្រក​សុវត្ថិភាព​គឺ​បន្ត​ស្នាក់​នៅ​ធ្វើ​មេឃុំ ធ្វើ​ចៅសង្កាត់​តាមរយៈ​ចូល​មក​គណបក្ស​ប្រជាជន​។ គណបក្ស​ប្រជាជន​ធានា​អះអាង​ថា​ឲ្យ​អ្នក​បន្ត​ធ្វើ​ជា​ចៅសង្កាត់ មេឃុំ ឬ​ជំទប់ ឬ​សមាជិក​ក្រុមប្រឹក្សា​ឃុំ​សង្កាត់​បន្ត​ទៅ​ទៀត​»​។

ថ្លែង​ដោយ​វាយប្រហារ​ទៅ​កាន់​ប្រទេស​មហាអំណាច​ដែល​លោក​ចោទ​ថា​នៅ​ពី​ក្រោយ​បក្ស​ប្រឆាំង​នោះ​លោក ហ៊ុន សែន ថា​៖ «​មេខ្លោង​ចៅហ្វាយ​របស់​គេ​​​បោក​យក​នៅ​ច្រើន​កន្លែង​ហើយ តែ​មិន​អាច​ឈ្នះ ហ៊ុន សែន បាន​តែ​ប៉ុណ្ណឹង​ទេ​។ ខួរក្បាល​របស់​ខ្ញុំ​មិនមែន​ទុក​ទប់ទល់​រឿង​កំប៉ិក​កំប៉ុក​របស់​បក្ស​នយោបាយ​ក្នុង​ស្រុក​នោះ​ទេ​។ ខួរក្បាល​របស់​ខ្ញុំ​ទុក​ទប់ទល់​ជាមួយ​បរទេស​ដែល​ជា​មហាអំណាច​ជា​ចៅហ្វាយ​ទៅ​វិញ​ទេ​»​។

កញ្ញា ស៊ិន ចាន់ពៅរ៉ូហ្ស៊េត ចៅសង្កាត់​អូរចា​របស់​គណបក្ស​សង្គ្រោះ​ជាតិ​ក្នុង​ក្រុង​បាត់ដំបង ខេត្ត​បាត់ដំបង​បាន​ថ្លែង​ថា​កញ្ញា​នឹង​មិន​ចុះចូល​ជាមួយ​គណបក្ស​កាន់​អំណាច​ដាច់ខាត​បើ​ទោះបី​ជា​សង្គ្រោះ​ជាតិ​ត្រូវ​រំលាយ ហើយ​ហៅ​ការ​អត្ថាធិប្បាយ​របស់​លោក ហ៊ុន សែន ថា ជា​វោហារស័ព្ទ​របស់​អ្នក​នយោបាយ​ដើម្បី​ទាក់ទាញ​ទឹកចិត្ត​មន្ត្រី​មូលដ្ឋាន​។ «​សម្រាប់​ខ្ញុំ​បុគ្គល​ឯកជន​ខ្ញុំ​ដែល​ជាប់​ឆ្នោត​តាមរយៈ​គណបក្ស​សង្គ្រោះ​ជាតិ​ហើយ​ពលរដ្ឋ​ជាង​ ៥ ​ពាន់​នាក់​បាន​បោះឆ្នោត​ឲ្យ​គណបក្ស​សង្គ្រោះ​ជាតិ​នា​ពេល​កន្លង​មក​ហ្នឹង​គឺ​ទោះបី​គណបក្ស​ត្រូវ​គេ​រំលាយ ទោះបី​មាន​ការ​អំពាវនាវ​របស់​អ្នក​នយោបាយ​ក៏ដោយ សម្រាប់​ខ្ញុំ​គឺ​ដាច់ខាត​មិន​រួញរា​មិន​ចុះ​ញ៉ម ឬ​ក្បត់​ឆន្ទៈ​ពលរដ្ឋ​ដែល​ជា​ម្ចាស់​ឆ្នោត​ដែល​បោះឆ្នោត​ឲ្យ​គណបក្ស​សង្គ្រោះ​ជាតិ​ទេ​។ កាល​ណា​យើង​ក្បត់​ប្រជាពលរដ្ឋ យើង​ទៅ​ចុះ​ចូល​ដើម្បី​យើង​ចង់​បាន​រក្សា​តួនាទី មិន​ខុស​អី​ពី​យើង​ក្បត់​ឆន្ទៈ​ប្រជាពលរដ្ឋ​នោះ​ដែរ​»​។

កញ្ញា ថ្លែង​ថា​​ នាង​សុខចិត្ត​បាត់បង់​ប្រាក់​ខែ​ដែល​នាង​ទទួល​បាន​ចំនួន​ ៨៨ ​ម៉ឺន​រៀល​ក្នុង​ ១ ​ខែ​ដោយ​មិន​ចុះ​ញ៉ម​ជាមួយ​មន្ត្រី​បក្ស​កាន់​អំណាច​ជា​អ្វី​ដែល​នាង​ហៅថា​ «​គ្មាន​ន័យ​» និង​ក្បត់​ឆន្ទៈ​ពលរដ្ឋ​ម្ចាស់​ឆ្នោត​។ «​តំណែង​ដែល​យើង​បាន​មក​គឺ​ពលរដ្ឋ បើ​បាត់​ទៅ​វិញ​ដោយ​ពលរដ្ឋ​ឈប់​បោះ​ឲ្យ ហើយ​ចៃដន្យ​ត្រូវ​បាន​គេ​រំលាយ​បក្ស​។ អ៊ីចឹង​វា​ជា​ធម្មតា​សម្រាប់​ការ​វិវត្ត​នយោបាយ​ស្រុក​ខ្មែរ អ៊ីចឹង​ពលរដ្ឋ​ម្ចាស់​ឆ្នោត​ទេ​ដែល​ជា​អ្នក​សម្រេច​វាសនា​ហ្នឹង​បាន​...​អ៊ីចឹង​សម្រាប់​ខ្ញុំ​ដែល​ស៊ី​ប្រាក់ខែ​រដ្ឋ ហើយ​លុយ​រដ្ឋ​ដែល​បើក​ឲ្យ​ពួក​ខ្ញុំ​ជា​លុយ​របស់​រាស្ត្រ​កាលណា​លុយ​របស់​រាស្ត្រ​ត្រូវ​តែ​ស្មោះត្រង់​ចំពោះ​រាស្ត្រ​ដែល​បាន​បោះឆ្នោត​ឲ្យ​នាពេល​កន្លង​មក​។ បើ​ខ្ញុំ​បាន​ប្រាក់​ខែ​ដែល​មិន​ស្មោះត្រង់​នឹង​រាស្ត្រ តើ​វា​មាន​ន័យ​អ្វី​សម្រាប់​យើង​ដែល​ជា​អ្នក​បម្រើ​រាស្ត្រ​នៅ​ក្នុង​មូលដ្ឋាន​ដែល​បាន​បោះឆ្នោត​ឲ្យ​យើង​កន្លង​មក​ហ្នឹង​»​។

ខណៈ​លោក ណុប សុខេង មេឃុំដូង ស្រុក​បាទី ខេត្ត​តាកែវ​មកពី​គណបក្ស​សង្គ្រោះ​ជាតិ​ថ្លែង​ថា​លោក​នៅ​មិន​ទាន់​បាន​សម្រេច​ចិត្ត​នៅ​ឡើយ​ទេ​ជុំវិញ​សេណារីយោ​ដ៏​គ្រោះថ្នាក់ តែ​ទោះ​ជា​យ៉ាង​ណា​គោលដៅ​​របស់​លោក​គឺ​បម្រើ​រាស្ត្រ​។

លោក​ថ្លែង​ថា​៖ «​ខ្ញុំ​អត់​ទាន់​គិត​ដល់​ចំណុច​ហ្នឹង​ដែរ ជំហរ​របស់​ខ្ញុំ​នៅ​តែ​ដដែល​គឺ​បម្រើ​រាស្ត្រ​។ យើង​អត់​ទាន់​ទៅ​វិនិច្ឆ័យ​អី​មុន​ចំពោះ​កិច្ចការ​អស់​ហ្នឹង​ដល់​ថ្នាក់​ហ្នឹង​ទេ​។ យើង​គិត​តែ​ការងារ​យើង​ពី​មុន​មក​ម៉េច​ធ្វើ​តាម​ដំណើរ​បម្រើ​ប្រជារាស្ត្រ​តាម​ហ្នឹង​»​។

ទោះ​ជា​យ៉ាង​ណា​លោក​នឹង​ឃ្លាំ​មើល​បន្ថែម​នៅ​ជុំវិញ​ស្ថានការណ៍​វិវត្ត​ណា​មួយ​នាពេល​ខាង​មុខ​។

លោក សុខ ឥសាន អ្នក​នាំពាក្យ​គណបក្ស​ប្រជាជន​កម្ពុជា​ថ្លែង​ថា​លោក មិន​ដឹង​ថា​នឹង​មាន​មន្ត្រី​មូលដ្ឋាន​គណបក្ស​សង្គ្រោះ​ជាតិ​ប៉ុន្មាន​នោះ​ទេ​នឹង​ចូលរួម​ជាមួយ​គណបក្ស​របស់​លោក​ព្រោះ​លោក​ ហ៊ុន សែន ​ទើប​តែ​អំពាវនាវ​កាលពី​ម្សិលមិញ​។ «​អាហ្នឹង​ចាំមើល​ទាំងអស់​គ្នា​ថា​តើ​ក្រោយ​ពេល​​សម្ដេច​មាន​ប្រសាសន៍​មក ហើយ​យើង​មិន​ទាន់​ដឹង​ទេ​ព្រោះ​សម្តេច​និយាយ​ពី​រឿង​ត្រូវ​រំលាយ​។ យើង​និយាយ​មុន​រំលាយ​ម៉េច​កើត​»​។

លោក​បាន​បដិសេធ​ធ្វើ​អធិប្បាយ​នៅ​ពេល​ត្រូវ​បាន​សួរ​ពី​មូលហេតុ​ដែល​គណបក្ស​កាន់​អំណាច​ទទួល​យក​មន្ត្រី​បក្សប្រឆាំង ខណៈ​ដែល​ខ្លួន​ចោទ​ថា ​មេដឹកនាំ​របស់​ពួកគេ​ថា​ជា​ «​ជន​ក្បត់ជាតិ​» ​ដោយ​លើក​ឡើង​ថា ​ប្រសាសន៍​របស់​លោក ហ៊ុន សែន គឺ​គ្រប់គ្រាន់​។

យ៉ាង​ណា​បន្ទាប់ពី​ការ​អំពាវនាវ​របស់​លោក ហ៊ុន សែន កាលពី​ម្សិលមិញ​មាន​តំណាងរាស្ត្រ​ម្នាក់​របស់​គណបក្ស​សង្គ្រោះ​ជាតិ​មណ្ឌល​ព្រៃវែង​គឺ​លោក ឡុង ប៊ុន្នី បាន​សរសេរ​លិខិត​ទៅ​លោក ហ៊ុន សែន ប្រធាន​គណបក្ស​ប្រជាជន​សុំ​ចុះចូល​ជា​សមាជិក​។ លិខិត​លោក ប៊ុន្នី អះអាង​ថា​​ «​បន្ទាប់ពី​បាន​ដឹង​ថា​លោក កឹម សុខា ជា​ជន​ក្បត់​ជាតិ​» ​លោក​បាន​សុំ​លោក​ ហ៊ុន សែន ឲ្យ​រូប​លោក​បាន​ចូល​ជា​សមាជិក​គណបក្ស​ប្រជាជន​។

ក្នុង​ថ្ងៃ​ដដែល​ក្នុង​បទសម្ភាស​ជាមួយ​គេហទំព័រ​ព័ត៌មាន Fre-sh News ដែល​ស្និទ្ធ​នឹង​រដ្ឋាភិបាល​លោក ហ៊ុន សែន ថា​លោក​ «​ស្វាគមន៍​ទាំងអស់​ចំពោះ​ការ​ចុះ​ចូល​ជាមួយ​គណបក្ស​ប្រជាជន​កម្ពុជា និង​សូម​អំពាវនាវ​បន្ត​ទៀត ប្រសិន​បើ​តំណាងរាស្ត្រ មេឃុំ ចៅសង្កាត់ ឬ​សមាជិក​គណបក្ស​សង្គ្រោះ​ជាតិ ដែល​មាន​បំណង​ចុះ​ចូល​គឺ​គណបក្ស​ប្រជាជន​ស្វាគមន៍​ទាំងអស់​»​។

ប៉ុន្តែ​លោក សួន សូរីដា តំណាងរាស្ត្រ​ម្នាក់​ទៀត​របស់​គណបក្ស​សង្គ្រោះ​ជាតិ​បាន​សរសេរ​នៅ​លើ​ទំព័រ​ហ្វេសប៊ុក​របស់​លោក​កាលពី​ម្សិលមិញ​ហាក់​ជំទាស់​នឹង​ការ​អធិប្បាយ​របស់​លោក​ ហ៊ុន សែន ​ថា​ «​តំណាងរាស្ត្រ​បាន​មកពី​ប្រជារាស្ត្រ​បោះឆ្នោត​ជ្រើស​តាំង​មិនមែន​បាន​មក​ដោយសារ​សម្តេច​តេជោ​ប្រទាន​នោះ​ទេ​»៕

0

Comments

Please, login or register to post a comment

ព័ត៌មានពាក់ព័ន្ធ