.jpg)
លោក លឺ ឡាយស្រេង ដែលត្រូវតុលាការកាត់ក្តីឲ្យសងជំងឺចិត្តលោកនាយករដ្ឋមន្ត្រី ហ៊ុន សែន ៥០០ លានរៀល។ រូបថត RFA
ភ្នំពេញៈ លោក លឺ ឡាយស្រេង ត្រូវតុលាការសម្រេចផ្តន្ទាទោសពីបទបរិហារកេរ្តិ៍លោកនាយករដ្ឋមន្ត្រី ហ៊ុន សែន និងតម្រូវឲ្យសងជំងឺចិត្តលោក ហ៊ុន សែន រហូតដល់ ៥០០ លានរៀល ព្រមទាំងបង់ពិន័យ ៨ លានរៀល ចូលថវិការដ្ឋ។
លោកចៅក្រម អ៊ី ឋាវរៈ នៃសាលាដំបូងរាជធានីភ្នំពេញ បានបើកសវនាការកាត់ទោសកំបាំងមុខជនជាប់ចោទតែប្រមាណកន្លះម៉ោង នៅព្រឹកថ្ងៃទី ២៥ ខែមករា និងប្រកាសសាលក្រមតែម្តង នៅចំពោះមុខមេធាវី គី តិច តំណាងឲ្យលោកនាយករដ្ឋមន្ត្រី និងអវត្តមានភាគីចុងចោទគឺលោក លឺ ឡាយស្រេង ដែលកំពុងភៀសខ្លួននៅក្រៅប្រទេស។
លោកចៅក្រម បានថ្លែងថា៖ «តាងនាមប្រជារាស្ត្រខ្មែរ តុលាការសម្រេច ទី១ ពិន័យជនជាប់ចោទ លឺ ឡាយស្រេង អាយុ ៧៧ ឆ្នាំចំនួន ៨ លានរៀល ចូលថវិការដ្ឋ ទី២ បង្គាប់ឲ្យជនជាប់ចោទបង់សំណងជំងឺចិត្ត ទៅដើមបណ្ដឹងសម្តេចអគ្គមហាសេនាបតីតេជោ ហ៊ុន សែន ចំនួន ៥០០ លានរៀល»។
លោកចៅក្រម ក៏សម្រេចឲ្យផ្សព្វផ្សាយសាលក្រមនេះជាសាធារណៈ ស្របតាមមាត្រា ៣១០ តាមការស្នើសុំរបស់លោកមេធាវី គី តិច និងបើកផ្លូវប្តឹងឧទ្ធរណ៍តាមច្បាប់កំណត់។
រឿងក្តីក្តាំនេះ បានកើតចេញពីការសន្ទនាឯកជនតាមទូរស័ព្ទរវាងលោក លឺ ឡាយស្រង និងលោកស្រី គី លំអង ដែលជាអតីតមន្ត្រីជាន់ខ្ពស់គណបក្ស ហ៊្វុនស៊ិនប៉ិច ដូចគ្នា ដែលបានធ្វើឡើងកាលពីថ្ងៃទី ២១ ខែតុលា ឆ្នាំ ២០១៧ នៅវេលាម៉ោង ៧ និង ១៥ នាទីព្រឹក។ ប៉ុន្តែ អាខោនហ្វេសប៊ុក ដែលដាក់ឈ្មោះថា សីហា បានយកការសន្ទនាឯកជនដែលត្រូវគេលួចថតនោះ មកបង្ហោះ លើអាខោនរបស់ខ្លួន នៅវេលាម៉ោង ១១ និង ១៣ នាទីព្រឹក គឺក្រោយតែ ៤ ម៉ោងប៉ុណ្ណោះ។
នៅក្នុងការសន្ទនានោះ លោក លឺ ឡាយស្រេង បានអះអាងថា ព្រះអង្គម្ចាស់នរោត្តម រណឫទ្ធិ បានទទួលថវិកា ១ លានដុល្លារ ពីលោក ហ៊ុន សែន និងយកលុយ ២ ម៉ឺនដុល្លារពីសមាជិកបក្សដែលចង់បានតំណែងតំណាងរាស្ត្រ ដោយលោកថ្លែងថា៖ «ឱ! ពួកអាអត់ខ្មាសហ្នឹង ឥឡូវកំពុងពាក់អាវក្វាស៊េ កំពុងចែក ថ្ងៃមុនចែកកៅអី។ យី! គិតទៅអាមនុស្សរកលុយបានស្រួល...ហ៊ុន សែន ឲ្យជិត ១ លានចុះម្នាក់ ២ ម៉ឺនបានជិត ១ លានបាត់ទៀតហើយ។ ហ្អេ អស្ចារ្យ! ចេះតែទៅហើយមុខអាមួយនេះអាសម្តេចចោលម្សៀតមួយនេះយ៉ាប់មែនទែនហ្មង។ ខ្ញុំថា អាហែ្អង ខ្ញុំទ្រាំមិនបាន ថោកទាបពេក»។
ក្រោយពេលការសន្ទនានេះត្រូវបានគេលួចថត ហើយយកមកផ្សព្វផ្សាយ អ្នកច្បាប់ តំណាងឲ្យលោកនាយករដ្ឋមន្ត្រី ហ៊ុន សែននិងព្រះអង្គម្ចាស់ នរោត្តម រណឫទ្ធិ បានដាក់ពាក្យប្តឹងលោក លឺ ឡាយស្រេង ពីបទបរិហារកេរ្តិ៍ ខណៈដែលក្រសួងយុត្តិធម៌ ក៏បានដាក់ប្តឹងផងដែរ ដោយចោទថា លោក លឺ ឡាយស្រេងបានប្រមាថ ព្រះចេស្តាព្រះមហាក្សត្រ។
ថ្លែងនៅក្នុងសវនាការ លោក គី តិច ទទួលស្គាល់ថា សំឡេងសន្ទនានោះ ជាការសន្ទនាឯកជន ប៉ុន្តែលោកថ្លែងថា វាធ្វើឲ្យប៉ះពាល់ដល់កិត្តិយសលោកនាយករដ្ឋមន្ត្រី។
លោកនិយាយថា៖ «វាជាសំឡេងសន្ទនាឯកជន ប៉ុន្តែនៅពេលផ្សព្វផ្សាយជាសាធារណៈ វាធ្វើឲ្យប៉ះពាល់ យ៉ាងធ្ងន់ធ្ងរ ដល់កិត្តិយសសម្តេចនាយករដ្ឋមន្ត្រី ប៉ះពាល់ព្រះមហាក្សត្រ»។
លោក គី តិច បានសន្និដ្ឋានថា៖ «យើងស្តាប់ទៅវាជាការនិយាយលេងសើច ចំអកឡកឡឺយ ធ្វើឲ្យប៉ះពាល់ដល់ព្រះមហាក្សត្រ ដែលច្បាប់បានហាមឃាត់ប៉ះពាល់ថ្នាក់ដឹកនាំជាន់ខ្ពស់ គឺសម្តេចនាយករដ្ឋមន្ត្រី។ បុគ្គលនេះ បានរត់គេចទៅក្រៅប្រទេស មិនចូលបំភ្លឺ មិនដាក់ភ័ស្តុតាង និងមិនមានមេធាវីការពារដែលនេះបញ្ជាក់ថា គាត់មិនទទួលខុសត្រូវចំពោះអំពើរបស់ខ្លួន»។
លោក គី តិច ថ្លែងថា បើសិនជាមិនផ្តន្ទាទោសលើអំពើនេះទេ អាចធ្វើឲ្យសាធារណជនជឿថា លោកនាយករដ្ឋមន្ត្រី ពិតជាបានប្រគល់ប្រាក់ ១ លានដុល្លារ ដើម្បីសូកប៉ាន់គណបក្សហ៊្វុនស៊ិនប៉ិច រហូតដល់ ១ លានដុល្លារមែន។
លោក លឺ ឡាយស្រេង ដែលកំពុងស្ថិតនៅសហរដ្ឋអាមេរិក មិនអាចទាក់ទងសុំការបំភ្លឺបានទេ៕
