ភ្នំពេញៈ ករណីវិវាទដីធ្លីដ៏រ៉ាំរ៉ៃរវាងពលរដ្ឋ ៣៧៥ គ្រួសារ ជាមួយក្រុមហ៊ុន Koh Kong Plantation Co.,Ltd និង ក្រុមហ៊ុន Koh Kong Sugar Industry Co.,Ltd នៅស្រុកស្រែ អំបិល និង ស្រុកបទុមសាគរ ខេត្តកោះកុង នៅព្រឹកថ្ងៃនេះ ត្រូវបានដោះស្រាយបញ្ចប់ក្រោយពីមានភាគីពាក់ព័ន្ធទាំងអស់ព្រមព្រៀង ទទួលយកដំណោះស្រាយ ដោយក្រុមហ៊ុនព្រមកាត់ដីជាង ៨០០ ហិកតាជូនពលរដ្ឋ។
ក្នុងនោះមាកការចូលរួមពីលោក ជា សុផារ៉ា រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ លោក សាយ សំអាល់ រដ្ឋមន្ត្រីក្រសួងបរិស្ថាន លោក វេង សាខុន រដ្ឋមន្ត្រីក្រសួងកសិកកម្ម រុក្ខាប្រមាញ់ និងនេសាទ លោក ប៉ាន សូរស័ក្ដិ រដ្ឋមន្ត្រីក្រសួងពាណិជ្ជកម្ម លោកស្រី មិថុនា ភូថង អភិបាលខេត្តកោះកុង លោក George Edgar ឯកអគ្គរដ្ឋទូតសហភាពអឺរ៉ុបប្រចាំកម្ពុជា លោកឧកញ៉ា លី យ៉ុងផាត់ តំណាងក្រុមហ៊ុនវិនិយោគដំណាំអំពៅ តំណាងអង្គការសង្គមស៊ីវិល និងប្រជាពលរដ្ឋពាក់ព័ន្ធប្រមាណជិត ៣០០ នាក់។
តាមសេចក្ដីប្រកាសព័ត៌មានរួមរបស់ក្រសួងរៀបចំដែនដី នគរូបនីយកម្ម និងសំណង់ភ្លាមៗនៅព្រឹកនេះ បានបង្ហាញថា ជាលទ្ធផលក្រុមហ៊ុន និងប្រជាពលរដ្ឋបានព្រមព្រៀងគ្នាបញ្ចប់ករណីវិវាទនេះ ជាស្ថាពរ ដោយក្រុងប្រជាពលរដ្ឋ ១៧៥ គ្រួសារ យល់ព្រមទទួលយកដំណោះស្រាយជាដីទំហំ ៣ ហិកតា និងថវិកាចំនួន ២៥០០ ដុល្លារអាមេរិក ក្នុងមួយគ្រួសារ ប៉ុន្ដែមិនដោះស្រាយចំពោះប្រជាពលរដ្ឋដែលបានដោះស្រាយហើយនោះទេ ហើយប្រជាពលរដ្ឋចំនួន ២០០ គ្រួសារផ្សេងទៀត ក៏យលព្រមទទួលយកដំណោះស្រាយជាដីទំហំ ១,៥ ហិកតា ក្នុងមួយគ្រួសារ។
ដោយឡែក ភាគីក្រុមហ៊ុនយល់ព្រមឲ្យរដ្ឋកាត់ដីទំហំ ៨២៨ ហិកតា ស្ថិតនៅក្នុងឃុំជីខលើ ស្រុកស្រែអំបិល ខេត្តកោះកុង ចេញពីដីសម្បទានសេដ្ឋកិច្ចដែលបានទទួលសិទ្ធិវិនិយោគពីរដ្ឋាភិបាល ដើម្បីរដ្ឋធ្វើប្រទានកម្មជាកម្មសិទ្ធិជូនប្រជាពលរដ្ឋខាងលើ និងផ្ដល់ថវិកាតាមចំនួនខាងលើជូនក្រុមប្រជាពលរដ្ឋក្នុងចំណោម ១៧៥ គ្រួសារតាមសំណូមពរ។
លោក ជា សុផារ៉ា រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់បានលើកឡើងថា លោកព្យាយាមសម្របសម្រួលដោះស្រាយករណីវិវាទនេះ ឲ្យចង់ត្រឹមថ្ងៃនេះ ដើម្បីឲ្យប្រជាពលរដ្ឋមានសិទ្ធិកាន់កាប់ដីធ្លីរបស់ពួកគាត់ស្របច្បាប់ឡើងវិញ។
ទន្ទឹមនឹងការដោះស្រាយនេះ លោកបានសង្កត់ធ្ងន់លើចំនួនប្រជាពលរដ្ឋដែលមានវិវាទដីធ្លីពិតប្រាកដ។
លោកបញ្ជាក់ថា ៖ «ខ្ញុំសុំចំនួនប្រជាពលរដ្ឋដែលមានវិវាទដីធ្លីជាមួយក្រុមហ៊ុនពិតប្រាកដ ព្រោះខ្ញុំមិនចង់ដោះស្រាយឲ្យចំនួន ១៧៥ គ្រួសាររួចរាល់ហើយ ស្រាប់តែមួយខែក្រោយមកមានពលរដ្ឋ ១០០ គ្រួសារទៀតមកតវ៉ាលើដីដែលបានដោះស្រាយហើយនេះ។ អ៊ីចឹង ខ្ញុំមិនចង់ឲ្យមានស្ថានភាពបែបនេះ ខ្ញុំសុំឲ្យពលរដ្ឋក្នុងវិវាទនេះ ចុះកិច្ចសន្យាទទួលដី និងបញ្ឈប់សកម្មភាពតវ៉ាចាប់ពីពេលនេះតទៅ»។
អ្នកស្រី ផាវ ញ៉ើង តំណាងប្រជាពលចំនួន ១៧៥ គ្រួសារមកពីឃុំជីខលើ ស្រុកស្រែអំបិលបានលើកឡើងថា អ្នកស្រីសាទរចំពោះចំណាត់ការបស់ក្រសួង និងមន្ត្រីពាក់ព័ន្ធទាំងអស់ ដោយអ្នកស្រីបានសំណូមពរទៅរដ្ឋាភិបាលជួយសាងសង់ហេដ្ឋារចនាសម្ព័ន្ធ និងផ្ដល់សេវាសាធារណៈសម្រាប់ប្រជាពលរដ្ឋទាំងនេះ។
អ្នកស្រីបន្តថា ទីតាំងដីដែលរដ្ឋាភិបាលសម្រេចប្រគល់ឲ្យពលរដ្ឋនេះ មានចំណាយប្រមាណជិត ២០ គីឡូម៉ែត្រពីទីតាំងដីភូមិចាស់របស់ពួកគាត់ និងជាតំបន់ដាច់ស្រយាលគ្មានសេវាសាធារណៈ ឬហេដ្ឋារចនាសម្ព័ន្ធរបស់រដ្ឋ ព្រោះប្រជាពលរដ្ឋខ្លះមិនមានមធ្យោបាយធ្វើដំណើរ ឬដឹកជញ្ជូននោះទេ។
អ្នកស្រីបញ្ជាក់ថា ៖ «រដ្ឋាភិបាលផ្ដល់ដីឲ្យពលរដ្ឋនៅកន្លែងដាច់ស្រយាល ដែលឆ្ងាយពីភូមិពលរដ្ឋធ្លាប់រស់នៅ ព្រមទាំងគ្មានសេវាសាធារណៈ។ ដូច្នេះ ពលរដ្ឋព្រមទទួលយកសំណងនេះ ប៉ុន្ដែសុំជួយផ្ដល់សេវាសាធារណៈឲ្យពលរដ្ឋទាំងនេះផង» ៕