Search form

Login - Register | FOLLOW US ON

Logo of Phnom Penh Post newspaper Phnom Penh Post - សកម្មជន​ដី​ធ្លី​ ៣ ​នាក់​ត្រូវ​កាត់​ឲ្យ​ជាប់​គុក​ម្នាក់​ ៥ ឆ្នាំ

សកម្មជន​ដីធ្លី​ម្នាក់​ក្នុង​ចំណោម​ ៣ ​នាក់​ដែល​ត្រូវ​សាលា​ដំបូង​ខេត្ត​ស្វាយរៀង​កាត់​ឲ្យ​ជាប់​ពន្ធនាគារ​ ៥ ​ឆ្នាំ​។
សកម្មជន​ដីធ្លី​ម្នាក់​ក្នុង​ចំណោម​ ៣ ​នាក់​ដែល​ត្រូវ​សាលា​ដំបូង​ខេត្ត​ស្វាយរៀង​កាត់​ឲ្យ​ជាប់​ពន្ធនាគារ​ ៥ ​ឆ្នាំ​។ រូបថត សហការី

សកម្មជន​ដី​ធ្លី​ ៣ ​នាក់​ត្រូវ​កាត់​ឲ្យ​ជាប់​គុក​ម្នាក់​ ៥ ឆ្នាំ

ភ្នំពេញៈ សាលា​ដំបូង​ខេត្ត​ស្វាយរៀង​បាន​​សម្រេច​​​ផ្តន្ទាទោស​សកម្មជន​ដីធ្លី​ ៣​ នាក់​ឲ្យ​ជាប់​ពន្ធនាគារ​ក្នុង​ម្នាក់ៗ ៥​ ឆ្នាំ​ក្រោម​ការ​ចោទប្រកាន់​​ពី​បទ​កាប់​​រាន​ដី​ព្រៃ​តាម​បណ្តឹង​របស់​រដ្ឋបាល​ព្រៃឈើ​ដែល​ប្តឹង​តាំងពី​ឆ្នាំ​ ២០១២​ ខណៈ​ដែល​​ប្រជាពលរដ្ឋ​នៅ​ក្នុង​ជម្លោះ​នេះ​បាន​អះអាង​ថា​អាជ្ញាធរ​ពាក់ព័ន្ធ​បាន​ឃុប​ឃិត​គ្នា​រំលោភ​យក​ដី​របស់​ពួកគាត់​ទៅ​លក់​ឲ្យ​ឈ្មួញ​។

សកម្មជន​ដីធ្លី​ទាំង ៣​ នាក់​មាន​ឈ្មោះ សួន ហុងលី អាយុ​ ៤២ ឆ្នាំ​ សួន​ ហោ​ អាយុ​ ៣៩ ​ឆ្នាំ​ជា​សកម្មជន​ដីធ្លី​ និង​ឈ្មោះ សួន សីហា អាយុ​ ៣១ ឆ្នាំ​ជា​ប្រធាន​សហគមន៍​អណ្តូង​ត្របែក​ស្ថិត​នៅក្នុង​ឃុំ​អណ្តូង​ត្របែក​ ស្រុក​រមាសហែក ខេត្ត​ស្វាយរៀង។

លោកស្រី សម​ សុគន្ធា​ មេធាវី​ការពារ​ក្តី​ឲ្យ​អ្នកភូមិ​បាន​ឲ្យ​ដឹង​ថា​លោក ហម ម៉េងសែ ចៅក្រម​សាលា​ដំបូង​ខេត្ត​ស្វាយរៀង​បាន​ប្រកាស​សាលក្រម​កំបាំង​មុខ​នៃ​សំណុំ​រឿង​ដីធ្លី​នេះ​កាលពី​ថ្ងៃ​ទី ២៣ ខែ​កញ្ញា ប៉ុន្តែ​កូន​ក្តី​របស់​លោកស្រី​ទើប​តែ​ដឹង​ពី​ការ​សម្រេច​នេះ​កាលពី​ម្សិលមិញ​។ តុលាការ​ចោទ​កូន​ក្តី​លោកស្រី​ពី​បទ​កាប់​រាន​ដី​ព្រៃ​តាម​មាត្រា ៩៧​ នៃ​ច្បាប់​ព្រៃឈើ។​

លោកស្រី​ថា​៖ «កូន​ក្តី​ខ្ញុំ​មិន​សុខ​ចិត្ត​ទៅ​នឹង​សាលក្រម​នោះ​ទេ​ដោយ​កំពុង​រៀបចំ​ប្តឹង​ទៅ​ឧទ្ធរណ៍»។

លោក សួន សីហា ប្រធាន​សហគមន៍​ដីធ្លី​នៅ​ឃុំ​អណ្ដូង​ត្របែក​បាន​ថ្លែង​ថា​ដី​នោះ​​ជា​របស់​ប្រជាពលរដ្ឋ​ចំនួន ៨៦ គ្រួសារ​ដែល​ធ្លាប់​កាន់កាប់​អាស្រ័យ​ផល​តាំងពី​ឆ្នាំ ១៩៧៩ មក។ លុះ​នៅ​ឆ្នាំ​ ២០០៨ រដ្ឋបាល​ព្រៃឈើ​បាន​ចូល​ទៅ​ដាំ​កូន​អាកាស្យា​នៅលើ​ដី​ទំហំ​ជាង ៧១ ហិកតា​ដោយ​សំអាង​ថា​ដី​នោះ​ជា​ដី​របស់​រដ្ឋ។ ក្រោយ​មក​ប្រជាពលរដ្ឋ​មាន​គម្រោង​ប្ដឹង​ទាមទារ​យក​ដី​នោះ​វិញ​បន្ទាប់ពី​ដឹង​ថា​អាជ្ញាធរ​ឃុបឃិត​គ្នា​លក់​ដី​​នោះ​ទៅ​ឲ្យ​​អ្នក​មាន​លុយ និង​អ្នក​មាន​អំណាច​ហើយ​ទើប​រដ្ឋបាល​ព្រៃឈើ​ប្តឹង​តំណាង​ពលរដ្ឋ​ ៣​ នាក់​ដើម្បី​គំរាម​កំហែង និង​បំបាក់​ស្មារតី។

លោក​ថា​៖ «រឿង​ដីធ្លី​នេះ​មាន​ជម្លោះ​យូរ​ហើយ​ ហើយ​អ្នក​ភូមិ​ធ្លាប់​ឡើង​ទៅ​​តវ៉ា​ជា​ច្រើន​ដង​នៅ​ភ្នំពេញ​ឲ្យ​​ថ្នាក់​លើ​ជួយ​អន្តរាគមន៍​​ដោះស្រាយ​នេះ​ជា​រឿង​អយុត្តិធម៌​ណាស់​សម្រាប់​អ្នក​ភូមិ​»។

លោក​ថា​៖ «​នេះ​ជា​រឿង​មួយ​ដែល​គេ​​ចង់​បំភ្លៃ​ចង់​ឲ្យ​ខ្ញុំ​ជា​សកម្មជន​ដីធ្លី​ហ្នឹង​មាន​ទោស​ហើយ​ណា​មួយ​គេ​គំរាម​កំហែង​ឲ្យ​ខ្ញុំ​បាក់​ទឹកចិត្ត​ក្នុង​ការ​តស៊ូ​ដែល​ហ៊ាន​តវ៉ា​ប្រឆាំង​ជាមួយ​ក្រុម​គេ​»​។

ប្រធាន​រដ្ឋបាល​ព្រៃឈើ​ស្រុក​រមាសហែក​លោក នេត គក ដែល​ជាដើម​បណ្តឹង​មិន​អាច​សុំ​ការ​អត្ថាធិប្បាយ​បាន​ទេ​។

លោក នុត បូពិណ្ណរ័ត្ន មន្ត្រី​សម្រប​សម្រួល​អង្គការ​សិទ្ធិ​មនុស្ស​លីកាដូ​ប្រចាំ​ខេត្ត​ស្វាយរៀង​បាន​ថ្លែង​ថា​ការ​កាត់​ទោស​នេះ​ហាក់បី​ដូចជា​ធ្ងន់ធ្ងរ​ណាស់​ខណៈ​ដែល​សកម្មជន​ដីធ្លី​ទាំង​នេះ​គ្រាន់តែ​ធ្វើ​ការ​តវ៉ា​ការពារ​ដីធ្លី​ដើម្បី​ធ្វើការ​ដាំដុះ​ផ្គត់ផ្គង់​ជីវភាព​រស់នៅ​របស់​ពួកគាត់។

បើ​តាម​តំណាង​ប្រជាពលរដ្ឋ​ប្រជាសហគមន៍​អណ្តូង​ត្របែក​ចំនួន ១៣៨ គ្រួសារ​កំពុង​រងគ្រោះ​ដោយសារ​បញ្ហា​វិវាទ​ដីធ្លី​នេះ​តាំងពី​ឆ្នាំ ២០០៩ មក​ដោយសារ​មន្ត្រី​រដ្ឋបាល​ព្រៃឈើ​បាន​ដឹកនាំ​កម្លាំង​សមត្ថកិច្ច​ធ្វើការ​បណ្តេញ​ពួកគាត់​ចេញ​ពី​ដី​ដែល​ពួកគាត់​ធ្លាប់​រស់នៅ និង​អាស្រ័យ​ផល​ចាប់​តាំងពី​ឆ្នាំ ១៩៧៩ មក​ដើម្បី​យក​ដី​នេះ​លក់​ឲ្យ​ឈ្មួញ។

កាលពី​សប្តាហ៍​មុន​ប្រជាពលរដ្ឋ​ទាំងនេះ​បាន​ឡើង​មក​ដាក់​ញត្តិ​នៅ​រដ្ឋសភា​ដើម្បី​សុំ​កិច្ច​អន្តរាគមន៍​ពី​ស្ថាប័ន​ជាតិ​កំពូល​មួយ​នេះ​ឲ្យ​ចុះ​ទៅ​ស៊ើប​អង្កេត​ផ្ទាល់ និង​ជំរុញ​ទៅ​អាជ្ញាធរ​មូលដ្ឋាន​ឲ្យ​ធ្វើការ​បែងចែក​ដី​ទំហំ ៣៥៩ ហិកតា​នេះ​ទៅ​ឲ្យ​ពួកគាត់​រស់នៅ និង​អាស្រ័យ​ផល​ដូច​ដើម​វិ​ញ៕

0

Comments

Please, login or register to post a comment

ព័ត៌មានពាក់ព័ន្ធ