Search form

Login - Register | FOLLOW US ON

Logo of Phnom Penh Post newspaper Phnom Penh Post - សកម្មជន​តវ៉ា​ទាមទារ​ឲ្យ​ដោះលែង​អ្នក​ការពារ​ធម្មជាតិ

សកម្មជន​តវ៉ា​ទាមទារ​ឲ្យ​ដោះលែង​អ្នក​ការពារ​ធម្មជាតិ​នៅ​ក្រុង​ខេមរភូមិន្ទ​ពី​ម្សិលមិញ។
សកម្មជន​តវ៉ា​ទាមទារ​ឲ្យ​ដោះលែង​អ្នក​ការពារ​ធម្មជាតិ​នៅ​ក្រុង​ខេមរភូមិន្ទ​ពី​ម្សិលមិញ។ រូបថត ហ្វេសប៊ុក​

សកម្មជន​តវ៉ា​ទាមទារ​ឲ្យ​ដោះលែង​អ្នក​ការពារ​ធម្មជាតិ

កោះកុងៈ សកម្មជន​ដីធ្លី​នៅ​រាជធានី​ភ្នំពេញ និង​​បណ្តាញ​យុវជន​កម្ពុជា​ប្រមាណ ៥០ នាក់​កាលពី​ម្សិលមិញ​បាន​ទៅ​ចូលរួម​តវ៉ា​ជាមួយ​​ប្រជាសហគមន៍​ខេត្ត​កោះកុង​ដើម្បី​​ទាមទារ​ឲ្យ​មាន​​ការ​​ដោះលែង​យុវជន​ចលនា​មាតា​ធម្មជាតិ​ ៣ នាក់​ដែល​កំពុង​ត្រូវ​​បាន​ឃុំ​ខ្លួន​នៅ​ពន្ធនាគារ​ដោយសារ​តែ​​ពួកគេ​បាន​ធ្វើការ​តវ៉ា​ប្រឆាំង​នឹង​សាឡង់​បូមខ្សាច់​ជាង ៥០ គ្រឿង​របស់​ក្រុមហ៊ុន​វៀតណាម​។

សកម្មជន​ដីធ្លី​តំបន់​បឹងកក់ កញ្ញា សុង ស្រីលាភ បាន​ឲ្យ​ដឹង​ថា​ការ​​ទៅ​​ចូលរួម​​ការ​តវ៉ា​តាមរយៈ​ការ​រៃអង្គាស​ប្រាក់​គ្នា​នេះ​គឺ​ក្នុង​នាម​ជា​អ្នក​ដែល​ធ្លាប់​រងគ្រោះ​ដោយសារ​ការ​រំលោភ​សិទ្ធិ​ដូច​គ្នា​ហើយ​ពួកនាង​ចង់​ចូលរួម​លើក​ទឹកចិត្ត​ដល់​​ក្រុម​យុវជន​មាតា​ធម្មជាតិ​ដែល​កំពុង​​ជាប់​ឃុំ។

កញ្ញា​ថា៖ «យើង​ចង់​បញ្ជាក់​ថា​ពួកគាត់​អត់​ឯកា​ទេ។ អ្វី​ដែល​​គាត់​លះបង់​អាយុ​ជីវិត​លះបង់​​ពេល​វេលា​ គឺ​គាត់​ធ្វើការ​ដើម្បី​ការពារ​សម្បត្តិ​ធម្មជាតិ​ប្រទេស​ខ្លួនឯង​ប៉ុន្តែ​គាត់​ត្រូវ​បាន​ជួប​ភាព​អយុត្តិធម៌​ដោយសារ​ឈ្មួញ​មាន​អំណាច​ដែល​មាន​លុយ​គ្រប់គ្រង​ទៅលើ​តុលាការ​ស្រុក​ខ្មែរ​ឃុបឃិត​គ្នា​ជា​ប្រព័ន្ធ​បាន​ចាប់​ពួកគាត់​ ៣ នាក់​ដាក់​គុក។ អ៊ីចឹង​យើង​មើល​ឃើញ​ថា​រឿង​នេះ​គឺ​អយុត្តិធម៌​មិន​ខុស​ពី​ពួកខ្ញុំ​ដែល​រងគ្រោះ​ដីធ្លី​គ្រប់​តំបន់​នៅ​រាជធានី​ភ្នំពេញ​ទេ»។

ប្រជាសហគមន៍​ និង​យុវជន​​ទាំងនោះ​បាន​នាំ​គ្នា​កាន់​បដា និង​ដើរ​ដង្ហែ​ក្បួន​នៅ​តាម​ដងផ្លូវ​នានា​ក្នុង​ក្រុង​ខេមរភូមិន្ទ និង​​មាន​បំណង​ទៅកាន់​ផ្ទះ​អភិបាល​ខេត្ត​កោះកុង​ដើម្បី​ស្វែងរក​កិច្ចអន្តរាគមន៍​ករណី​នេះ​ប៉ុន្តែ​ត្រូវ​បាន​​សមត្ថកិច្ច​ដាក់​របាំង​​រារាំង​នៅ​ក្បែរ​គល់​ស្ពាន​ខេត្ត​កោះកុង​។

អ្នកស្រី ផា សុភា នៅ​ស្រុក​ថ្មបាំង​ខេត្ត​កោះកុង​បាន​និយាយ​ថា៖ «​ពួកយើង​ត្រូវ​តែ​​ទៅ​ជួប​លោក​អភិបាល​ខេត្ត​ដើម្បី​ឲ្យ​សកម្មជន​ទាំង​ ៣ មាន​ការ​ដោះលែង​ព្រោះ​ទុក្ខលំបាក​របស់​ប្រជាជន​ក៏ដូចជា​ទុក្ខ​របស់​អភិបាល​ខេត្ត​ដែរ»។

យុវជន​អង្គការ​មាតា​ធម្មជាតិ​ទាំង​ ៣ ​នាក់​ឈ្មោះ សាន់ ម៉ាឡា ទ្រី សុវិគា និង​ ស៊ឹម សំណាង ត្រូវ​បាន​អាជ្ញាធរ​ចាប់​​ខ្លួន​បញ្ជូន​​ទៅ​តុលាការ​កាលពី​ថ្ងៃ​ទី​ ១៧ ខែ​សីហា​តាម​បណ្តឹង​របស់​អាជ្ញាធរ​ឃុំ និង​ក្រុមហ៊ុន​បូមខ្សាច់ Direct Access ក្រោម​បទ​ចោទ «គំរាម​កំហែង​ថា​នឹង​ធ្វើឲ្យ​ខូចខាត​ដែល​ភ្ជាប់​នឹង​បញ្ជា​អ្វី​មួយ» ក្រោយ​ពី​ពួកគេ​បាន​ធ្វើការ​តវ៉ា​យ៉ាង​សកម្ម​ប្រឆាំង​នឹង​​​ការ​​បូមខ្សាច់​​របស់​ក្រុមហ៊ុន​វៀតណាម​នៅ​ឃុំ​អណ្តូងទឹក ស្រុក​​បទុមសាគរ ខណៈ​ដែល​អាជ្ញាធរ និង​​មន្ត្រី​ក្រសួង​​បរិស្ថាន​បាន​បញ្ជាក់​ថា​ក្រុមហ៊ុន​ទាំង​នោះ​បាន​ធ្វើ​អាជីវកម្ម​ក្នុង​​តំបន់​ដែល​កំណត់​ដោយ​ក្រសួង។

អភិបាល​ខេត្ត​កោះកុង លោក ប៊ុន លើត ថ្លែង​ថា ​ការ​សម្រេច​ដោះលែង​ ឬ​ឃុំ​ខ្លួន​យុវជន​ទាំង​ ៣ នាក់​នេះ​អាស្រ័យ​​លើ​​​តុលាការ​ខណៈ​ដែល​សំណុំ​រឿង​នេះ​កំពុង​ស្ថិត​នៅក្នុង​នីតិវិធី​តុលាការ​។ «​ខ្ញុំ​អត់​មាន​សិទ្ធិ​អំណាច​អី​​ទៅ​ឲ្យ​តុលាការ​ដោះលែង​ពួកគេ​ទេ»។

មន្ត្រី​បច្ចេកទេស​ជាន់ខ្ពស់​ឃ្លាំ​មើល​សិទ្ធិ​មនុស្ស​នៃ​អង្គការ​លីកាដូ​លោក អំ សំអាត បាន​ថ្លែង​ថា​ក្រុម​មេធាវី​ដែល​ការពារ​ក្តី​ឲ្យ​យុវជន​ទាំង​ ៣ ​នាក់​នេះ​បាន​ដាក់​ពាក្យ​សុំ​នៅ​ក្រៅ​ឃុំ​ទៅ​តុលាការ​ហើយ​កាលពី​ថ្ងៃ​ពុធ​សប្តាហ៍​មុន។ «ការ​ស្នើសុំ​នៅ​ក្រៅ​ឃុំ​នេះ​គឺ​ដោយសារ​ហេតុផល​សុខភាព​ហើយ​ពួកគេ​មាន​អាស័យដ្ឋាន​ច្បាស់លាស់ និង​​ធានា​ចូល​ខ្លួន​គ្រប់​ដំណាក់កាល​នៃ​នីតិវិធី​»។

ប៉ុន្តែ​ចៅក្រម​ស៊ើបសួរ​កញ្ញា ឈុន ដាវី កាលពី​ម្សិលមិញ​បាន​លើក​ឡើង​ថា​ការ​មិន​ព្រម​ឲ្យ​ជន​ត្រូវ​ចោទ​នៅ​ក្រៅ​ឃុំ​បណ្តោះអាសន្ន​ដោយសារ​ការ​ស៊ើបសួរ​មិន​ទាន់​ចប់ និង​ដើម្បី​ធានា​រក្សា​ជន​ត្រូវ​ចោទ​ទុក​ជូន​តុលាការ​ចាត់ការ​តាម​នីតិវិធី និង​ដើម្បី​បញ្ចប់​បទល្មើស ឬ​បង្ការ​បទល្មើស​កុំ​ឲ្យ​កើត​មាន​ជាថ្មី​៕

0

Comments

Please, login or register to post a comment