.jpg)
លោក សំ ចំរើន មេធាវីការពារក្តីជនជាប់ចោទទាំងពីររូប ថ្លែងប្រាប់អ្នកសារព័ត៌មាន ក្រោយចេញពីសវនាការតុលាការ ព្រឹកមិញ។ ហេង ជីវ័ន
ភ្នំពេញ: តុលាការកំពូល បានបដិសេធសំណើសុំនៅក្រៅឃុំ របស់សកម្មជនបរិស្ថានខេត្ត កោះកុង ២ រូប កាលពីព្រឹកមិញនេះ។
ចៅក្រម សឹង បញ្ញាវុឌ្ឍ បានបើកសវនាការកាត់ក្តីសំណើសុំឲ្យអ្នកទាំងពីរនៅក្រៅឃុំ នាព្រឹកថ្ងៃទី ៩ ខែកុម្ភ:នេះ មុខមេធាវីជនជាប់ចោទទាំងពីររូប លោក សំ ចំរើន ប៉ុន្តែអវត្តមានកូនក្តី ដែលកំពុងជាប់ពន្ធនាគារនៅខេត្ត កោះកុង។
លោក សំ ចំរើន យល់ថា ការសម្រេចមិនដោះលែងកូនក្តីលោក ជារឿង «អយុត្តិធម៌»។
ពួកគេជាសកម្មជនអតីតអង្គការមាតាធម្មជាតិ ឈ្មោះ ហ៊ុន វណ្ណៈ អាយុ ៣៥ ឆ្នាំ និង ឌឹម គុណឌី អាយុ ២១ ឆ្នាំ ត្រូវបានតុលាការធ្វើការចោទប្រកាន់ពីបទ «ប៉ះពាល់ដល់សិទ្ធិខាងរូបភាពនៃបុគ្គល និងបទញុះញង់ឲ្យប្រព្រឹត្តបទឧក្រិដ្ឋជាអាទិ៍» និង ត្រូវឃុំខ្លួននៅពន្ធនាគារខេត្ត កោះកុងចាប់តាំងពីខែកញ្ញា ឆ្នាំ ២០១៧ មក។
នៅថ្ងៃចាប់ខ្លួន សកម្មជនទាំង ២ បានថតរូបកប៉ាល់ដឹកខ្សាច់ ពីទូករបស់ពួកគេនៅសមុទ្រ ដែលមានចម្ងាយរហូតដល់មួយគីឡូម៉ែត្រពីកប៉ាល់ទាំងនោះដែលស្ថិតនៅក្នុងតំបន់សេដ្ឋកិច្ចពិសេសរបស់សមាជិកព្រឹទ្ធសភារបស់គណបក្សប្រជាជនកម្ពុជា គឺលោក លី យ៉ុងផាត់ ក្នុងស្រុកព្រែកខ្សាច់ ក្នុងស្រុក គិរីសាគរ។
កាលពីថ្ងៃ ២៦ ខែមករាកន្លងទៅនេះ អ្នកទាំងពីរ ត្រូវបានសាលាដំបូងខេត្ត កោះកុង ប្រកាសសាលក្រម ដោយផ្តន្ទាទោស ពួកគេ ១ ឆ្នាំ និងត្រូវពិន័យជាប្រាក់ម្នាក់ ១ លានរៀល តែឲ្យអនុវត្តទោសតែ ៥ ខែប៉ុណ្ណោះ។
សូមបញ្ជាក់ថា លោក ឌឹម គុនឌី និងលោក ហ៊ុន វណ្ណៈ ត្រូវបានអង្គការលើកលែងទោសអន្តរជាតិ (Amnesty International) ទទួលស្គាល់ថា ជាអ្នកទោសមនសិការ៕
