Search form

Login - Register | FOLLOW US ON

Logo of Phnom Penh Post newspaper Phnom Penh Post - សកម្មជន​សេ្នហា​បរិស្ថាន​ ចេញ​មុខ​ការពារ​លោក​អាឡិច​ពី​ការ​បណ្ដេញ​ចេញ​ពីកម្ពុជា​

លោក​ អាឡិច ហ្គូហ្សាឡេ​ ដេវិដសុន
លោក​ អាឡិច ហ្គូហ្សាឡេ​ ដេវិដសុន ជាស្ថាបនិក​អង្គការ​មាតា​ធម្មជាតិ ជន​ជាតិ​អេស្ប៉ាញមួយ​រូប​ ប្រឈមមុខនឹងការ​បណ្ដេញចេញ ពីប្រទេសកម្ពុជា។ ផា លីណា

សកម្មជន​សេ្នហា​បរិស្ថាន​ ចេញ​មុខ​ការពារ​លោក​អាឡិច​ពី​ការ​បណ្ដេញ​ចេញ​ពីកម្ពុជា​

ភ្នំពេញៈ អង្គការ​សង្គម​ស៊ីវិល ​ពលរដ្ឋ ​យុវជន និង​ព្រះសង្ឃ ​ប្រមាណ​៥០នាក់ ​បាន​នាំគ្នា​មក​ដាក់ញត្តិនៅ​មន្ទីររដ្ឋ​សភា ស្នើ​សុំ​ឲ្យ​ធ្វើ​អន្តរាគមន៍​ដល់​សកម្ម​ជន​បរទេស​ម្នាក់​ដែល​ប្ដូរ​ផ្ដាច់​ការពារ​តំបន់ជាយ​អារ៉ែង ក្នុង​ខេត្ត​កោះកុង​ ឲ្យ​បាន​បន្ត​ទិដ្ឋាការ​ស្នាក់​នៅ​កម្ពុជា​បន្ត​ទៀត។

«យើង​ត្រូវតែ​ជួយគាត់ ការពារគាត់មិន​ឲ្យ​មានការ​បណ្តេញចេញ ព្រោះ​គាត់មិន​មែន​ជា​អ្នក​លួច​ជាតិ​ លួច​ព្រៃ​ឈើ​ខ្មែរ​លក់​ឡើយ។ មាន​ឈ្មួញកាប់​ព្រៃឈើ​ខ្មែរជា​ច្រើននាក់ ម៉េច​មិន​ចាប់?»។ នេះ​បើ​តាម​​ប្រ​សាសន៍​របស់​សកម្ម​ជន​ម្នាក់​ អាយុ​៧២​ឆ្នាំក្នុង​ចំណោម​ពលរដ្ឋ​រស់នៅ​រាជធានី​មួយ​ចំនួន​ដែល​ចូលរួម​តវ៉ា​ កាល​ពីព្រឹក​មិញ ។​

លោក​ អាឡិច ហ្គូហ្សាឡេ​ ដេវិដសុន ត្រូវ​​បាន​គេ​ដឹង​ថា​ ជាជន​ជាតិ​អេស្ប៉ាញមួយ​រូប​ ចេះ​និយាយ​ភាសាខ្មែរ​ច្បាស់​ និង​យល់​ដឹង​ពី​វប្បធម៌ខ្មែរ​ផង​ដែរ​នោះ​ នឹង​ត្រូវ​ ​ផុត​កំណត់​ ទិដ្ឋាការ​នៅ​ថ្ងៃសុក្រ​ទី​២០ កុម្ភៈនេះ។​ ​លោក​ឧបនាយករដ្ឋមន្ត្រី ស ខេង និង​ជា​រដ្ឋ​មន្ត្រី​ក្រសួង​មហាផ្ទៃ បាន​សម្រេច​មិន​បន្ត​ឲ្យ​ជន​បទេស​ជាតិ​អេស្ប៉ាញ​រូបនេះ កាល​ពីសប្តាហ៍​មុន​ ដោយសារ​លើក​ហេតុ​ផល​ថា ​លោក អាឡិច ដែល​ជាស្ថាបនិក​អង្គការ​មាតា​ធម្មជាតិ បាន​បំពាន​លក្ខន្តិកៈ​អង្គការ ដែល​តម្កល់​នៅ​ក្រសួង​មហាផ្ទៃ ដោយ​ធ្វើការ​រារាំង​សកម្មភាព​អាជ្ញាធរ​នៅ​ខេត្តកោះកុង ដែល​ចុះ​បំពេញ​ការងារ​របស់គេ។

លោក​អាឡិច នឹង​មក​ផ្ដល់​បទ​សម្ភាស​ដោយ​ផ្ទាល់​ជាមួយ​កាសែត​ភ្នំពេញ​ប៉ុស្តិ៍ នៅ​ម៉ោង​ ៤​រសៀល ថ្ងៃនេះ​ ដែល​លោក​នឹង​បញ្ជាក់​លម្អិត​អំពី​ស្ថាន​ភាព​ចុង​ក្រោយ​ទាក់​ទិន​នឹង​ការ​មិន​បន្ត​ទិដ្ឋាការ​ និង​ស្នាក់​នៅ​កម្ពុជា​ធ្វើ​សកម្មភាព​ការ​ពារ​តំបន់​អារ៉ែង។

កាល​ពីម្សិលមិញ ក្រុម អង្គការ​សង្គម​ស៊ីវិលចំនួន​៨៣​អង្គការ ក៏​បាន​ចេញ​សេចក្តី​ថ្លែងការណ៍​រួម​សោកស្តាយ​ចំពោះការ​សម្រេច​មិន​បន្ត​ទិដ្ឋាការដល់​លោក​ អាឡិច ដែល​និយាយ​ភាសា​ខ្មែរ​បាន​ច្បាស់​។ អង្គការ​ទាំងនោះ​ យល់​ថា ៖ «លោក​ អាឡិច​ បាន​ឈរ​ជួរ​មុខ​ក្នុង​យុទ្ធនាការ​មួយ​នៃ​អង្កការ​មិនមែន​រដ្ឋាភិបាល​ក្នុង​ស្រុកឈ្មោះ អង្គការ​មាតា​ធម្មជាតិ​ ដើម្បី​បញ្ឈប់​គម្រោង​សាងសង់​ទំន​ប់​វារី​អគ្គិសនី​ដ៏ចម្រូង​ចម្រាស់​នៅ​តំបន់​អារ៉ែង ខេត្ត​កោះកុង»។

ការ​ដាក់ញត្តិ​កាលពី​ម្សិលមិញ​របស់​ក្រុមគាំទ្រ​លោក​អាឡិច ត្រូវ​បាន​ក្រុម​តំណាង​រាស្ត្រ​៣រូប​របស់គណបក្ស​សង្គ្រោះជាតិ ចេញ​មក​ទទួល​ដែល​ដឹកនាំ​ដោយ​លោក ហូរ វ៉ាន់​ ប៉ុន្តែ​មិន​មាន​តំណាង​រាស្ត្រ​នៃ​គណបក្ស​ប្រជាជន​ចេញ​មកជួប​ក្រុម​អ្នក​ដាក់​ញត្តិនេះ​ឡើយ៕​

0

Comments

Please, login or register to post a comment