Search form

Login - Register | FOLLOW US ON

Logo of Phnom Penh Post newspaper Phnom Penh Post - សកម្មជន​ស្នើ​ឲ្យ FFI ឈប់​ចាប់​ក្រពើ​នៅ អារ៉ែង

សកម្មជន​ស្នើ​ឲ្យ FFI ឈប់​ចាប់​ក្រពើ​នៅ អារ៉ែង

20140408_05
សកម្មជនប្រាប់អ្នកកាសែតនៅមុខអង្គការ FFI ពីម្សិលមិញ

ភ្នំពេញៈ សកម្មជន​បរិស្ថាន​នៃ​តំបន់ ស្ទឹង​អារ៉ែង ខេត្ត​កោះកុង ជាង ១០​នាក់ បាន​នាំ​គ្នា​តវ៉ា​នៅ​អង្គការ សត្វ​ព្រៃ និង​រុក្ខជាតិ​អន្តរជាតិ កាល​ពី​រសៀល​ម្សិលមិញ​ដើម្បី​ទាមទារ​ឲ្យ​អង្គការ​នេះ​បញ្ឈប់​សកម្មភាព​ចាប់​យក​កូន​ក្រពើ​កម្រ និង​ឲ្យ​អង្គការ​នេះ ស្នើ​ទៅ​រដ្ឋាភិបាល​ឲ្យ​បញ្ឈប់​ការ​សង់​ទំនប់​នៅ​តំបន់​នេះ។

សកម្មជន​បរិស្ថាន​ទាំង​ជាង ១០​នាក់ ដែល​ជា​បណ្តាញ​ព្រះសង្ឃ យុវជន និង​អង្គការ មាតា​ធម្មជាតិ បាន​ថ្លែង​នៅ​ទីស្នាក់ការ​អង្គការ សត្វ​ព្រៃ និង​រុក្ខជាតិ​អន្តរជាតិ (FFI) ថា សហគមន៍​ជនជាតិ​ភាគ​តិច​បាន​ផ្ញើ​ញតិ្ត​ទៅ​អង្គការ​នេះ ចំនួន​ពីរ​ដង​មក​ហើយ​តាំង​ពី ឆ្នាំ​២០១៣ មក ប៉ុន្តែ​គ្មាន​ការ​ឆ្លើយ​តប​ទើប​លើក​គ្នា​ទៅ​ដល់​ទីស្នាក់ការ​តែ​ម្តង។

លោក Alex Gonzales Davidson ជា​ស្ថាបនិក​អង្គការ មាតា​ធម្មជាតិ​កម្ពុជា បាន​ចោទ​ប្រកាន់​ថា កន្លង​មក​អង្គការ FFI បាន​ធ្វើ​សកម្មភាព​ដោយ​លាក់​លៀម​ទាក់ទង​នឹង​សត្វ​ក្រពើ​ភ្នំ ហើយ​បាន​ចាប់​សត្វ​ក្រពើ​ភ្នំ​ពី​តំបន់ ស្ទឹង​អារ៉ែង យក​ទៅ​លែង​នៅ ស្ទឹង​អាតៃ ក្នុង ខេត្ត​ពោធិ៍សាត់ ទៅ​វិញ។ លោក Alex ចាត់​ទុក​សកម្មភាព​ចាប់​សត្វ​ក្រពើ​ចេញ​ពី ស្ទឹង​អារ៉ែង ដូច​ជា​ការ​បើក​ផ្លូវ​ឲ្យ​ក្រុមហ៊ុន ចិន Sinohydro ចូល​ទៅ​ធ្វើ​ទំនប់​វារី​អគ្គិសនី​នៅ​ទី​នោះ​ដែរ។

លោក Alex បាន​បញ្ជាក់​ថា៖ «ក្រុមហ៊ុន​ខ្លាច​ប៉ះពាល់​សត្វ​ក្រពើ ដែល​ការពារ​ដោយ​ច្បាប់​ជាតិ និង​អន្តរជាតិ​ណាស់។ អ៊ីចឹង បើ​យក​ក្រពើ​ចេញ​ពី អារ៉ែង វា​ដូចជា​ការ​បើក​ឱកាស​ឲ្យ​ក្រុមហ៊ុន Sinahydro ធ្វើ​ទំនប់​វារី​អគ្គិសនី​នៅ អារ៉ែង ទៅ​ហើយ»។ FFI បាន​ធ្វើ​សកម្មភាព​ចាប់​ក្រពើ​នៅ អារ៉ែង ប្រហែល​បី​ឆ្នាំ​មក​ហើយ។

សកម្មជន​បរិស្ថាន​រូប​នេះ​ក៏​បាន​ទាមទារ​ឲ្យ FFI ចេញ​សេចក្តី​ថ្លែង​ការណ៍​ទៅ​រដ្ឋាភិបាល​និង សាធារណជន​ដោយ​ប្រកាស​ប្រាប់​ថា វារី​អគ្គិសនី​នៅ អារ៉ែង នាំ​ឲ្យ​ផុត​ពូជ​សត្វ​ក្រពើ​ហើយ​សកម្មភាព​សង្គ្រោះ​ក្រពើ [ចេញ​ពី អារ៉ែង] គឺ​មិន​អាច​ទៅ​រួច​នោះ​ទេ។ លោក Alex បាន​គំរាម​ថា នឹង​លើក​គ្នា​រាប់​រយ​នាក់​មក​តវ៉ា​បន្ត​ទៀត និង​ប្តឹង​ទៅ​ម្ចាស់​ជំនួយ បើ​អង្គការ FFI មិន​ឆ្លើយ​តប​ទេ​នោះ។

មន្រ្តី​អង្គការ FFI បាន​សន្យា​ឆ្លើយ​តប​នៅ​ថ្ងៃ​ព្រហស្បតិ៍​សប្តាហ៍​នេះ ខណៈ​ដែល​នាយក​អង្គការ​នេះ​មិន​នៅ។ ទោះ​យ៉ាង​ណា​មន្រ្តី​រូប​នេះ​អះអាង​ថា អង្គការ​បាន​ដឹង​ពី​ផល​ប៉ះពាល់​ដល់​បរិស្ថាន​ពី​គម្រោង​ទំនប់​វារី​អគ្គិសនី ចិន នោះ​ហើយ​ក៏​កំពុង​ធ្វើ​របាយ​ការណ៍​ផ្ញើ​ទៅ​ក្រសួង បរិស្ថាន ដែរ។

លោក​ថ្លែង​ថា៖ «យើង​មិន​អាច​អារ​កាត់​ថា វារី​អគ្គិសនី មិន​អាច​ធ្វើ​បាន​នោះ​ទេ។ សូម​ទៅ​តវ៉ា​ជាមួយ​នឹង​រដ្ឋាភិបាល​បាន​ត្រូវ»៕

0

Comments

Please, login or register to post a comment

ព័ត៌មានពាក់ព័ន្ធ