Search form

Login - Register | FOLLOW US ON

Logo of Phnom Penh Post newspaper Phnom Penh Post - សង្គមស៊ីវិល​ស្នើឲ្យ​រដ្ឋាភិបាល​​ផ្អាក​ការ​ធ្វើ​ច្បាប់​គ្រប់គ្រង​អង្គការ

ក្រុម​មន្ត្រី​អង្គការ​សង្គម​ស៊ីវិល ​មេដឹកនាំ​សហជីព​ និង​កម្មករ​នៅក្នុង​ទិវា​ពលកម្ម​អន្តរជាតិ​។
ក្រុម​មន្ត្រី​អង្គការ​សង្គម​ស៊ីវិល ​មេដឹកនាំ​សហជីព​ និង​កម្មករ​នៅក្នុង​ទិវា​ពលកម្ម​អន្តរជាតិ​។ ស្រេង ម៉េងស្រ៊ុន

សង្គមស៊ីវិល​ស្នើឲ្យ​រដ្ឋាភិបាល​​ផ្អាក​ការ​ធ្វើ​ច្បាប់​គ្រប់គ្រង​អង្គការ

ភ្នំពេញៈ អង្គការ​សង្គមស៊ីវិល​​ជាតិ និង​អន្តរជាតិ​ចំនួន ២៧២ បាន​ស្នើឲ្យ​រដ្ឋាភិបាល​កម្ពុជា ផ្អាក​ដំណើរការ​អនុម័ត​សេចក្តី​ព្រាង​​ច្បាប់​ស្តីពី​សមាគម និង​អង្គការ​មិនមែន​រដ្ឋាភិបាល ដោយ​បញ្ចេញ​សេចក្តីព្រាង​នោះ ជា​សាធារណៈ និង​បើក​ទូលាយ​ឲ្យ​មាន​ការពិគ្រោះ​យោបល់​ជាមួយ​ភាគី​ពាក់ព័ន្ធ ដើម្បី​ធានា​ប្រសិទ្ធភាព​នៃ​ច្បាប់ និង​ឯករាជភាព​ការងារ។

ការស្នើ​នេះ​ធ្វើ​ឡើង​​ស្រប​ពេល​​ដែល​សេចក្តី​ព្រាង​ច្បាប់​នេះ នឹង​ត្រូវ​បញ្ជូន​ទៅ​ទីស្តីការ​គណៈរដ្ឋមន្ត្រី​ នៅ​ក្នុង​ខែ​ឧសភា ​ឆ្នាំ​ ២០១៥ ​នេះ ​ហើយ​នឹង​​ត្រូវ​ដាក់​ជូន​រដ្ឋសភា​ធ្វើការ​អនុម័ត​នា​ពេល​ឆាប់ៗ​ខាង​មុខ​។

តាម​សេចក្តី​ថ្លែងការណ៍​រួម​របស់​អង្គការ​សង្គម​ស៊ីវិល បាន​ឲ្យ​ដឹង​ថា ក្នុង​ឆ្នាំ​ ២០១០ ​រដ្ឋាភិបាល​បាន​ផ្តល់​នូវ​ឱកាស​ដល់​អង្គការ​សង្គមស៊ីវិល ចូលរួម​ពិគ្រោះយោបល់ និង​ដាក់​បញ្ចូល​យោបល់​របស់​ខ្លួន​ ទៅក្នុង​សេចក្តី​ព្រាង​ច្បាប់​ស្តីពី​សមាគម និង​អង្គការ​មិនមែន​រដ្ឋាភិបាល​ ដែល​លោក​នាយករដ្ឋមន្ត្រី​ ហ៊ុន សែន​ ធ្លាប់​បាន​ប្រកាស​ជា​សាធារណៈ ថា​នឹង​ពន្យារពេល​ការអនុម័ត​កាលពី​ចុង​ឆ្នាំ​ ២០១១ ​។ យ៉ាងនេះ​ក្តី​ ថ្មីៗ​នេះ ​លោក​នាយករដ្ឋមន្ត្រី​ បាន​រំឭក​ពី​តម្រូវការ​ឲ្យ​មាន​ការអនុម័ត​លើ​សេចក្តី​ព្រាង​ច្បាប់​នេះ​ជាបន្ទាន់​ និង​ដោយ​មិន​មាន​ការពិគ្រោះ​យោបល់​ជា​សាធារណៈ​ឡើយ។

ក្នុង​សន្និសីទ​សារព័ត៌​មាន​កាលពី​ម្សិលមិញ​នាយកប្រតិបត្តិ​វេទិកា​នៃ​អង្គការ​មិនមែន​រដ្ឋាភិបាល​ស្តីពី​កម្ពុជា ​លោក តឹក វណ្ណារ៉ា បាន​ថ្លែង​ថា សំណើ​របស់​សង្គម​ស៊ីវិល គឺ​ដើម្បី​ជំរុញ​​ឲ្យ​រដ្ឋាភិបាល​ លើក​កម្ពស់​ភាព​ជា​ដៃគូ និង​ការទទួល​ខុសត្រូវ​រវាង​រាជរដ្ឋាភិបាល​ និង​អង្គការ​សង្គមស៊ីវិល ព្រមទាំង​ភាគី​ពាក់ព័ន្ធ​។

លោក​ថា៖ «យើង​ស្នើសុំ​ការប្តេជ្ញា​ចិត្ត​របស់​រដ្ឋាភិបាល​ឆ្ពោះ​ទៅ​រក​វប្បធម៌​នៃ​ការសន្ទនា ការការពារ​​សិទ្ធិមនុស្ស​ លទ្ធិប្រជាធិបតេយ្យ ​និង​អភិវឌ្ឍន៍​សេដ្ឋកិច្ចសង្គម​របស់​កម្ពុជា ហើយ​ការស្នើ​នេះ ​ស្រប​ទៅ​នឹង​សេចក្តី​សន្និដ្ឋាន​​ចុងក្រោយ​​របស់​គណៈកម្មាធិការ​​សិទ្ធិមនុស្ស​របស់​ UN ​ស្តីពី​ការពិនិត្យ​លើ​របាយការណ៍​តាម​កាលកំណត់​លើក​ទី​ ២ របស់​កម្ពុជា ដែល​ស្នើឲ្យ​កម្ពុជា រៀបចំ​ដំណើរការ​ធ្វើ​ច្បាប់​ដោយ​​តម្លាភាព និង​មាន​ការពិគ្រោះ​យោបល់​ជា​សាធារណៈ»។

អគ្គលេខាធិការ​នៃ​គណៈកម្មាធិការ​ប្រព្រឹត្តិកម្ម​នៃ​សមាគម​ការពារ​សិទ្ធិមនុស្ស​កម្ពុជា លោក សួន ប៊ុនសក្តិ​ បាន​ថ្លែង​ដែរ​ថា៖ «ការទាមទារ​ឲ្យបង្ហាញ​សេចក្តី​ព្រាង​ច្បាប់​​នេះ​ គឺ​ដើម្បី​ឲ្យ​សង្គមស៊ីវិល ក៏​ដូចជា​ប្រជាពលរដ្ឋ​ អាច​បញ្ចេញ​មតិយោបល់ ស្រប​តាម​សិទ្ធិ​ និង​កាតព្វកិច្ច​មូលដ្ឋាន​របស់​ខ្លួន ​ហើយ​ដើម្បី​ឲ្យ​ច្បាប់​នោះ​ចេញ​មក​ល្អ​ប្រពៃ​គោរព​នូវ​​សិទ្ធិមនុស្ស និង​នីត្យានុកូលភាព​នៃ​ច្បាប់​»។

បើ​តាម​លោក អំ សំអាត អ្នកគ្រប់គ្រង​បច្ចេកទេស​ស៊ើបអង្កេត​នៃ​អង្គការ​លីកាដូ ​បច្ចុប្បន្នភាព​នៃ​សេចក្តី​ព្រាង​ច្បាប់​ស្តីពី​សមាគម និង​អង្គការ​មិនមែន​រដ្ឋាភិបាល​ដែល​មិន​ត្រូវ​បាន​បង្ហាញ​ជា​សាធារណៈ​នេះ ​បាន​នាំឲ្យ​សង្គម​ស៊ីវិល ​មាន​ក្តីព្រួយបារម្ភ​ទៅលើ​សេចក្តី​ព្រាង​ច្បាប់​លើក​ទី​ ៤​ ក្នុង​ឆ្នាំ ២០១១ ​ដែល​មាន​មាត្រា​មួយ​ចំនួន​ បង្ក​នូវ​ការគំរាមកំហែង​លើ​សេរីភាព និង​ឯករាជភាព​របស់​សង្គមស៊ីវិល​។

លោក​ថា៖ «សេចក្តី​ព្រាង​ច្បាប់​នេះ បាន​ដាក់​លក្ខខណ្ឌ​ក្នុង​ការបង្កើត​នូវ​សង្គមស៊ីវិល ដែល​តម្រូវ​ឲ្យ​បង្កើត​ និង​អនុវត្ត​តាម​នីតិវិធី​សម្រាប់​ការរាយការណ៍​ប្រចាំ​ឆ្នាំ​នូវ​សកម្មភាព​របស់​ខ្លួន និង​ថវិកា បើ​អ៊ីចឹង គឺ​សង្គម​ស៊ីវិល​នឹង​បាត់បង់​ឯករាជភាព​ជា​មិន​ខាន»។

តាមរយៈ​សេចក្តី​ព្រាង​ច្បាប់​មុនៗ ​ដែល​ត្រូវ​បាន​បង្ហាញ​ជា​សាធារណៈ ​មាន​ ៣៤ ​មាត្រា និង​ ៩ ​ជំពូក ​គឺ​តម្រូវ​ឲ្យ​សមាគម និង​អង្គការ​មិនមែន​រដ្ឋាភិបាល ត្រូវ​បង្ហាញ​ព័ត៌មាន​លម្អិត​ទៅកាន់​ក្រសួង​មហាផ្ទៃ ​ក្នុង​នោះ​ក៏​មាន​ប្រភព​ធនធាន ​និង​ទ្រព្យសម្បត្តិ​ផង​ដែរ។

លោក ផៃ ស៊ីផាន រដ្ឋលេខាធិការ និង​ជា​អ្នកនាំពាក្យ​ទីស្តីការ​គណៈរដ្ឋមន្ត្រី បាន​ឲ្យ​ដឹង​ថា រហូត​មក​ទល់​ម្សិលមិញ​នេះ ទីស្តីការ​គណៈរដ្ឋមន្ត្រី នៅ​មិន​ទាន់​ទទួល​បាន​សេចក្តី​ព្រាង​ច្បាប់​នោះ​នៅឡើយ​ទេ ពោល​គឺ​ស្ថិត​នៅក្នុង​ដៃ​របស់​ក្រុម​ការងារ​តាក់តែង​នៅ​ឡើយ។

លោក​ថា សេចក្តី​ព្រាង​ច្បាប់​នេះ ដំបូង​ឡើយ​គឺ​ត្រូវ​បាន​ព្រមព្រៀង និង​​ផ្តួចផ្តើម​ពី​សង្គមស៊ីវិល​ជាស្រេច​ប៉ុន្តែ​ពាក់ព័ន្ធ​នឹង​ការ​ស្នើសុំ​បង្ហាញ​សេចក្តី​ព្រាង​ច្បាប់​​ចុងក្រោយ​វិញ​ លោក​ យល់​ថា៖ «សង្គមស៊ីវិល អត់​ទាន់​មាន​នីត្យានុកូលភាព ឬ​សិទ្ធិ​អំណាច​ណា បង្ខំ​ឲ្យ​រដ្ឋាភិបាល​ ធ្វើ​តាម​ខ្លួន​នោះ​ទេ​ព្រោះ​នេះ​ជា​ដែន​សមត្ថកិច្ច​របស់​រដ្ឋាភិបាល ព្រោះ​អ្វី​ទាំងអស់​ជា​ផលប្រយោជន៍​របស់​រដ្ឋាភិបាល រដ្ឋាភិបាល​ជា​អ្នក​ផ្តល់​សេវា...សង្គមស៊ីវិល អាច​ជា​ក្រុម​មួយ​ដែល​បម្រើ​ប្រយោជន៍​បរទេស ទទួល​លុយ​ពី​បរទេស បើ​មក​សំឡុត​រដ្ឋាភិបាល គឺ​ខុស​ហើយ»។

យ៉ាងណា​ក៏ដោយ​ ក្នុង​នាម​តំណាង​អង្គការ​សង្គមស៊ីវិល លោក ​សំអាត​ បាន​គូសបញ្ជាក់​ថា ​ក្នុង​ករណី​ដែល​ច្បាប់​នោះ ដំណើរការ​អនុម័ត​អង្គការ​សង្គម​ស៊ីវិល នៅតែ​ប្រកាន់​ជំហរ​ដដែល ដោយ​នឹង​ប្រមូល​ផ្តុំ​គ្នា​តស៊ូ​មតិ​ដោយ​សន្តិវិធី ដើម្បី​ឲ្យ​រដ្ឋាភិបាល​ពិចារណា​ធ្វើ​វិសោធនកម្ម​នូវ​មាត្រា​មួយ​ចំនួន​នៃ​ច្បាប់​​នោះ ដើម្បី​ធានា​ដំណើរការ​ការងារ​របស់​អង្គការ​សង្គមស៊ីវិល​ឲ្យ​មាន​ប្រសិទ្ធភាព។

តាម​របាយការណ៍​ក្រសួង​មហាផ្ទៃ ចេញ​ផ្សាយ​នៅ​ដើម​ឆ្នាំ​ ២០១៥ ​នេះ បាន​ឲ្យ​ដឹង​ថា សមាគម ​អង្គការ​មិនមែន​រដ្ឋាភិបាល ដែល​បាន​ចុះបញ្ជី​នៅ​ក្រសួង មាន​ចំនួន​សរុប ៤៣៧៨ (សមាគម ១៧០៦ និង​អង្គការ​មិនមែន​រដ្ឋាភិបាល ២៦៧២)។ ក្នុង​ឆ្នាំ​ ២០១៤ ក្រសួង​មហាផ្ទៃ បាន​ចុះបញ្ជី​សមាគម​អង្គការ​មិនមែន​រដ្ឋាភិបាល ចំនួន ៥៣៩ (សមាគម ១៧៧ និង​អង្គការ​មិនមែន​រដ្ឋាភិបាល ៣៦២)៕

0

Comments

Please, login or register to post a comment

ព័ត៌មានពាក់ព័ន្ធ