Search form

Login - Register | FOLLOW US ON

Logo of Phnom Penh Post newspaper Phnom Penh Post - សត្វ​ព្រៃ​ជាប់​អន្ទាក់ ​ត្រូវ​បាន​សង្គ្រោះ

Content image - Phnom Penh Post
កូន​សត្វ​ព្រៃ​ដែល​ខ្លះ​ថា​ទន្សោង​ខ្លះ​ថា​ខ្ទីង​ក្រោយ​សង្គ្រោះ។ រូបថត FA

សត្វ​ព្រៃ​ជាប់​អន្ទាក់ ​ត្រូវ​បាន​សង្គ្រោះ

បាត់ដំបងៈ កូន​សត្វព្រៃ​ដែល​ទំនង​​ជា​ទន្សោង​អាយុ​ប្រមាណ​ ១ ឆ្នាំ​មួយ​ក្បាល​ត្រូវ​បាន​អ្នក​ភូមិ​ប្រទះ​ឃើញ​ជាប់​អន្ទាក់​ហើយ​រាយការណ៍​ប្រាប់​សមត្ថកិច្ច​ឲ្យ​ជួយ​សង្គ្រោះ​យក​ទៅ​សួន​សត្វ​ភ្នំ​តាម៉ៅ​កាលពី​ម្សិលមិញ។

ការ​ប្រទះ​ឃើញ​នេះ​ក្នុង​ពេល​កូន​សត្វ​នោះ​កំពុង​ជាប់​អន្ទាក់​នៅ​ជើងភ្នំ​ក្នុង​ភូមិ​បាសាក់ ឃុំ​បាសាក់ ស្រុក​រុក្ខគិរី ខេត្ត​បាត់ដំបង​កាលពី​ថ្ងៃ​សៅរ៍​ចុង​សប្តាហ៍​មុន​ហើយ​បាន​ប្រាប់​សមត្ថកិច្ច​ឲ្យ​ជួយ​សង្គ្រោះ​ពី​អន្ទាក់​ព្រាន។ នេះ​បើ​តាម​លោក​ ពេជ្រ ម៉ាឡៃ អភិបាល​ស្រុក​រុក្ខគិរី​កាលពី​ម្សិលមិញ។

លោក​ ម៉ាឡៃ បាន​បញ្ជាក់​ថា៖ «សត្វ​ហ្នឹង​វា​ជាប់​អន្ទាក់​ក្នុង​ព្រៃ​រក្សា​ទុក​ហើយ​ពលរដ្ឋ​ឃើញ​ក៏​រាយការណ៍​ប្រាប់​សមត្ថកិច្ច​ឲ្យ​ជួយ។ នេះ​យើង​ដឹង​ទាន់​ទេ កុំ​អី​អស់​សាច់​បាត់​ទៅ​ហើយ។ តែ​ពេល​នោះ​អត់​ឃើញ​ម្ចាស់​អន្ទាក់​ទេ​»។

លោក​បន្ត​ថា​ ព្រៃ​រក្សា​ទុក​នោះ​ក៏​ជា​ជម្រក​សម្រាប់​សត្វ​ក្ងោក ប្រើស និង​ឈ្លូស​ផង​ដែរ​។

លោក​ថា​ ទោះ​ជា​អាជ្ញាធរ​បាន​អប់រំ​យ៉ាង​ណា​ក៏ដោយ​ក៏​មាន​ពលរដ្ឋ​មួយ​ចំនួន​តូច​នៅ​តែ​ឆ្លៀត​លួច​ដាក់​អន្ទាក់​ចាប់​សត្វ​ព្រៃ​ដដែល។ តែ​លោក​ថា​នោះ​គឺ​មិនមែន​ជា​មុខរបរ​ពួកគាត់​នោះ​ទេ។

លោក​ យូ បញ្ញវ័ន្ត មន្ត្រី​សង្កាត់​រដ្ឋបាល​ព្រៃឈើ​ព្រៃស្វាយ​បាន​ឲ្យ​ដឹង​ថា​សត្វ​នោះ​ជាប់​អន្ទាក់​ព្រាន​នៅ​ជើង​ក្រោយ​ខាង​ឆ្វេង​ហើយ​វា​មិន​មាន​របួស​អី​ធ្ងន់​ទេ​គឺ​គ្រាន់តែ​រលាត់​ត្រង់​ត្រូវ​អន្ទាក់​បន្តិចបន្តួច​ប៉ុណ្ណោះ។

លោក​បន្ត​ថា​ សត្វ​នោះ​ត្រូវ​បាន​រក្សា​ទុក​នៅ​ឃុំ​បាសាក់​មួយ​យប់​ហើយ​ត្រូវ​បាន​បញ្ជូន​ទៅ​សង្គ្រោះ​នៅ​សួន​សត្វ​ភ្នំ​តាម៉ៅ​កាលពី​ថ្ងៃ​អាទិត្យ​ម្សិលមិញ។

លោក​ថា​ លោក​មិន​ដឹង​ថា​វា​ជាប់​ប៉ុន្មាន​ថ្ងៃ​ហើយ​នោះ​ទេ​តែ​សង្គ្រោះ​វា​មិន​ទាន់​ទេ​វា​ក៏​អាច​ងាប់​ដោយសារ​អត់​ទឹក​នោះ​ដែរ។

លោក​ ញឹក រតនពេជ្រ ប្រធាន​ឧទ្យាន​សួន​សត្វ និង​មជ្ឈមណ្ឌល​សង្គ្រោះ​ភ្នំ​តាម៉ៅ​បាន​ថ្លែង​ថា​កូន​សត្វ​​នោះ​អាច​ជា​ខ្ទីង​ច្រើន​ជាង​ហើយ​វា​មាន​អាយុ​ប្រមាណ​ជា​ ១ ឆ្នាំ។

លោក​ថា​ ជើង​​ជាប់​អន្ទាក់​នោះ​ហើម និង​វា​រាករូស​ផង​ដែរ ដែល​ទំនង​មក​ពី​ក្តៅ ឬ​មក​ពី​ខ្លាច​មនុស្ស។ លោក​បាន​​បញ្ជាក់​ថា​ពេទ្យ​សត្វ​បាន​ព្យាបាល​ឲ្យ​កូន​សត្វ​នោះ​ហើយ៕

0

Comments

Please, login or register to post a comment

ព័ត៌មានពាក់ព័ន្ធ