Search form

Login - Register | FOLLOW US ON

Logo of Phnom Penh Post newspaper Phnom Penh Post - សត្វព្រៃ​នៅ​ ភ្នំ​តាម៉ៅ ​ខ្លះ​អាច​ផ្ទេរ​ទៅ​ចម្ការ​គ្រញូង​ក្នុង​ ខេត្ត​សៀមរាប

Content image - Phnom Penh Post
ក្រុម​បង្ក្រាប​បទល្មើស​សត្វព្រៃ​ចល័ត​ក្នុង​ពេល​ចុះ​ប្រតិបត្ដិការ​នា​ពេល​កន្លង​មក។ រូបថត (Wildlife Alliance)

សត្វព្រៃ​នៅ​ ភ្នំ​តាម៉ៅ ​ខ្លះ​អាច​ផ្ទេរ​ទៅ​ចម្ការ​គ្រញូង​ក្នុង​ ខេត្ត​សៀមរាប

សៀមរាបៈ សត្វ​ព្រៃ​នៅ​សួន​សត្វ​ភ្នំ​តាម៉ៅ​មួយ​ចំនួន​អាច​នឹង​ត្រូវ​ផ្ទេរ​ទៅ​ចម្ការ​គ្រញូង​មួយ​ក្នុង​ខេត្ត​សៀមរាប​ជា​កន្លែង​ដែល​ត្រូវ​​បង្កើត​​ជា​តំបន់​ទេសចរណ៍​ធម្មជាតិ ប៉ុន្តែ​គម្រោង​នេះ​កំពុង​ជួប​ប្រទះ​បញ្ហា​ថវិកា​នៅ​ឡើយ។

អគ្គនាយកដ្ឋាន​រដ្ឋបាល​ព្រៃឈើ​ និង​អង្គការ​សម្ព័ន្ធ​មិត្ត​សត្វព្រៃ​ (Wildlife Alliance) បាន​ពិភាក្សា​គ្នា​កាលពី​សប្តាហ៍​មុន​ដោយ​ផ្តោត​សំខាន់​លើ​គម្រោង​បង្កើត​តំបន់​អេកូ​ទេសចរណ៍​នៅ​ចម្ការ​ឈើ​គ្រញូង​ឃុនរាម​ក្នុង​ស្រុក​បន្ទាយស្រី ខេត្ត​សៀមរាប។

យោង​​តាម​រដ្ឋបាល​ព្រៃឈើ​ឲ្យ​ដឹង​ថា​គម្រោង​នេះ​នឹង​មាន​ផ្ទេរ​សត្វ​ព្រៃ​មួយ​ចំនួន​ពី​សួន​សត្វ​ភ្នំ​តាម៉ៅ​ក្នុង​ខេត្ត​តាកែវ​ផង​ដែរ​រួមមាន​សត្វ​ឈ្លូស ប្រើស និង​ទោច​ជាដើម​ដើម្បី​ទាក់ទាញ​ភ្ញៀវទេសចរ​។

លោក ម៉ុង ប៊ុនលីម នាយ​ផ្នែក​រដ្ឋបាល​ព្រៃឈើ​បន្ទាយស្រី​បាន​ឲ្យ​ដឹង​ថា​អគ្គនាយកដ្ឋាន​រដ្ឋបាល​ព្រៃឈើ​បាន​និង​កំពុង​សហការ​ជាមួយ​អង្គការ​អភិរក្ស​សត្វ​ព្រៃ​ដើម្បី​ប្រែ​ក្លាយ​តំបន់​ចម្ការ​​ឈើ​គ្រញូង​ទំហំ ១៨៨៨ ​ហិកតា​ឲ្យ​ទៅ​ជា​តំបន់​អេកូ​ទេសចរណ៍​ធម្មជាតិ​។

លោក​ថា​ ចាប់​ពី​ខែ​កញ្ញា ២០១៥ ​មក​ភ្ញៀវទេសចរ​បាន​ដាំ​ដើម​គ្រញូង​បាន​ជាង​ ៧០០ ​ដើម​ហើយ​។ ក្រៅ​ពី​នោះ​ក៏​មាន​សត្វ​ព្រៃ​មួយ​ចំនួន​ដូច​ជា ប្រើស ទន្សោង ឈ្លូស ជ្រូកព្រៃ ក្ងោក កេងកង មាន់តូ ស្វា និង​សត្វ​ស្លាប​ផ្សេងៗ​ទៀត​ផង​ដែរ ប៉ុន្តែ​បច្ចុប្បន្ន​សត្វ​ទាំង​នោះ​កំពុង​រស់នៅ​ពាសពេញ​ព្រៃ។ ហេតុ​នេះ​លោក​មាន​គម្រោង​បង្កើត​ជា​ទ្រុង​ដើម្បី​ខណ្ខ​ចែក​សត្វ​ទាំង​នោះ​ឲ្យ​នៅ​តាម​កន្លែង​ដែល​ពួកគេ​កំពុង​រស់នៅ​តាម​លក្ខណៈ​ធម្មជាតិ​ឲ្យ​ភ្ញៀវទេសចរ​ជាតិ​ និង​អន្តរជាតិ​ចូល​ទស្សនា​។

លោក​ ប៊ុនលីម បញ្ជាក់​ថា៖ «កន្លែង​នេះ​ជា​ព្រៃឈើ​ធម្មជាតិ​មាន​ដើមឈើ​ធំ។ យើង​ចង់​យក​សត្វ​ទោច​មួយ​គ្រួសារ ប្រើស​សាំង​ ២ ​ក្បាល ​ឈ្លូស​ខ្លះ​គឺ​សត្វ​ណា​ដែល​សម្បូរ​នៅ​ភ្នំ​តាម៉ៅ​ដើម្បី​​បំបែក​មក​ទី​នេះ​ខ្លះ...»។

លោក​ ម៉ុង ប៊ុនលីម បាន​បន្ត​ថា​គម្រោង​នេះ​ត្រូវ​ការ​ថវិកា​​យ៉ាង​ហោច​ក៏​ជាង​ ១០ ​ម៉ឺន​ដុល្លារ​ដែរ សម្រាប់​ចំណាយ​លើ​ការ​ជីក​ប្រឡាយ​ព័ទ្ធ​ជុំវិញ​ចម្ងាយ​ ១៣ ​គីឡូម៉ែត្រ​ដើម្បី​បង្ការ​ការ​បំផ្លាញ​ព្រៃ និង​សត្វ​ព្រម​ទាំង​ការ​ធ្វើ​ទ្រុង​តាម​ត្រពាំង​អូរ​ជា​លក្ខណៈ​ធម្មជាតិ​ និង​​ផ្គត់ផ្គង់​ចរន្ត​អគ្គិសនី​ជាដើម។ ទោះ​យ៉ាង​ណា​លោក​ថា​ថវិកា​នៅ​​មិន​ទាន់​មាន​ទេ​ហើយ​កន្លង​មក​មាន​សប្បុរសជន​ខ្លះ​​ជួយ​បាន​តិចតួច​។

លោក​ ប៊ុនលីម បាន​ត្អូញត្អែរ​ថា៖ «គម្រោង​ហ្នឹង​អស់​លុយ​ច្រើន​ណាស់។ ខាង​ខ្ញុំ​នេះ​ខ្វះ​លទ្ធភាព​អត់​ទាន់​មាន​ក្រុមហ៊ុន​ឯកជន​ណា​ជួយ​ទេ។ ​គម្រោង​ហ្នឹង​យើង​គិត​យូរ​ដែរ​ហើយ​តែ​ចេះ​តែ​ពន្យារ​ពី​មួយ​ថ្ងៃ​ទៅ​មួយ​ថ្ងៃ​ដោយសារ​ខ្វះ​ថវិកា​»។

លោក​ Nick Mark នាយក​សង្គ្រោះ​ និង​ថែរក្សា​សត្វ​ព្រៃ​នៃ​អង្គការ​ WA ដែល​បាន​ពិភាក្សា​លើ​គម្រោង​នេះ​មិន​អាច​ទាក់ទង​សុំ​អត្ថាធិប្បាយ​បាន​ទេ​កាលពី​ម្សិលមិញ។ តែ​​លោក​បាន​ថ្លែង​ក្នុង​កិច្ចពិភាក្សា​ថា លោក​រីករាយ​នឹង​សហការ​ពី​កិច្ចការ​នេះ​ហើយ​គ្រោង​ចុះ​សិក្សា​ដល់​ទីកន្លែង​ដើម្បី​ចាប់ផ្តើម​គម្រោង​។

លោក​ ញឹក រតនពេជ្រ នាយក​ឧទ្យាន​សួន​សត្វ និង​មជ្ឈមណ្ឌល​សង្គ្រោះ​ភ្នំ​តាម៉ៅ​បាន​ថ្លែង​ថា​នោះ​ជា​គម្រោង​ល្អ​មួយ​ដែល​លែង​សត្វ​ឲ្យ​នៅ​ក្នុង​ជម្រក​ធម្មជាតិ​ហើយ​គម្រោង​ដូច​គ្នា​នេះ​ក៏​ធ្លាប់​បាន​ជោគជ័យ​នៅ​តំបន់​អង្គរ​ផង​ដែរ។ លោក​ថា​នៅ​សួន​សត្វ​លោក​មាន​សត្វ​ជាង ១៣០០ ក្បាល​ក្នុង​នោះ​សត្វ​ទោច​មាន​ពី​ ៥០ ទៅ​ ៦០ គូ។

លោក​ថា៖ «នៅ​នេះ​ជា​កន្លែង​សង្គ្រោះ​ដែល​មាន​សត្វ​ច្រើន​ និង​​មិន​​ចង្អៀត​ទេ។ តែ​យើង​ក៏​ចង់​យក​ទៅ​លែង​នៅ​ទី​នោះ​ព្រោះ​វា​ល្អ​មាន​លក្ខណៈ​សមស្រប​ឲ្យ​កើត​កូន​កើត​ចៅ»។ លោក​បន្ថែម​ថា​មុន​នឹង​លែង​សត្វ​គឺ​ត្រូវ​ដាក់​ឲ្យ​ស៊ាំ​នឹង​ធម្មជាតិ​សិន​ក្នុង​នោះ​​ក៏​មាន​ទាំង​ការ​ពិនិត្យ​សុខភាព​ផង​ដែរ។

ទាក់ទង​នឹង​រឿង​នេះ​អង្គការ​សម្ព័ន្ធមិត្ត​សត្វព្រៃ​បាន​ចាត់​ទុក​ឆ្នាំ​ ២០១៦ ​ថា​ជា​ឆ្នាំ​ដែល​មមាញឹក​ខ្លាំង​របស់​ក្រុម​បង្ក្រាប​បទល្មើស​សត្វព្រៃ​ចល័ត (WRRT)។ អង្គការ​​នេះ​បាន​ឲ្យ​ដឹង​ថា​នៅ​ឆ្នាំ​​កន្លង​មក​ក្រុម​បង្ក្រាប​ចល័ត​នេះ​បាន​ទទួល​ទូរស័ព្ទ​មក​​លេខ​ Hotline ​របស់​ខ្លួន​​ ១៤០០ ​លើក​ដែល​រាយការណ៍​ពី​បទល្មើស​សត្វ​ព្រៃ​ហើយ​បាន​បើក​ប្រតិបត្តិការ​បាន​ជោគជ័យ​ ៤០០ ​លើក​ក្នុង​នោះ​សង្គ្រោះ​បាន​​សត្វព្រៃ​ ៣២០០ ​ក្បាល និង​ឃាត់​ខ្លួន​ឈ្មួញ​ ៦៦ ​នាក់។ ក្រៅ​ពី​នោះ​មន្ត្រី​ឧទ្យាន​អនុរក្ស​នៅ​ជួរ​ភ្នំ​ក្រវាញ​ភាគ​ខាង​ត្បូង​ក៏​បាន​​ដោះ​អន្ទាក់​សត្វ​បាន​ជាង ១៣៥០០ ​ផង​ដែរ។

កាលពី​ឆ្នាំ​ ២០១៥​ អន្ទាក់​សត្វ​ខុស​ច្បាប់​​ ២៨២២០ ​ក៏​ត្រូវ​បាន​ដោះ​ពី​ក្នុង​ព្រៃ និង​បាន​បំផ្លាញ​ចោល​ផង​ដែរ។ ក្រុម​បង្ក្រាប​បទល្មើស​សត្វព្រៃ​ចល័ត​គឺជា​កម្លាំង​ចម្រុះ​ដែល​រួមមាន​រដ្ឋបាល​ព្រៃឈើ និង​អាវុធហត្ថ​ជាដើម​ដែល​គាំទ្រ​ថវិកា និង​បច្ចេកទេស​ពី​​អង្គការ​សម្ព័ន្ធមិត្ត​សត្វ​នេះ។ ក្រៅពី​សង្គ្រោះ​សត្វ​ព្រៃ​ក្រុម​នេះ​ក៏​បាន​កំពុង​ធ្វើ​សកម្មភាព​យ៉ាង​សកម្ម​នៅក្នុង​ការ​ទប់ស្កាត់ និង​បង្ក្រាប​បទល្មើស​ព្រៃឈើ​ផង​ដែរ​៕

0

Comments

Please, login or register to post a comment