Search form

Login - Register | FOLLOW US ON

Logo of Phnom Penh Post newspaper Phnom Penh Post - សព​លោក សុខ អាន ត្រូវ​បាន​បូជា ​ឯ CPP ចេញ​ថវិកា

Content image - Phnom Penh Post
ក្បួន​ដង្ហែ​សព​លោក​ សុខ អាន ដើម្បី​បូជា​នៅ​មុខ​វត្តបទុម​កាលពី​ព្រឹក​ថ្ងៃ​អាទិត្យ​ម្សិលមិញ​។ ហេង ជីវ័ន

សព​លោក សុខ អាន ត្រូវ​បាន​បូជា ​ឯ CPP ចេញ​ថវិកា

ភ្នំពេញៈ នៅ​ក្នុង​មឈូស​ពណ៌​មាស​​ដែល​ចែងចាំង​នៅ​ពេល​ត្រូវ​ពន្លឺ​ព្រះអាទិត្យ​នា​ពេល​ព្រឹក​ថ្ងៃ​អាទិត្យ​ម្សិលមិញ​សព​របស់​​ឧបនាយក​រដ្ឋមន្រ្តី​ សុខ អាន ​​ត្រូវ​បាន​ហែ​ពី​គេហដ្ឋាន​មក​បូជា​នៅ​មុខ​វត្តបទុម​​រាជធានី​ភ្នំពេញ​ដោយ​ធ្វើ​ដំណើរ​តាម​ផ្លូវ​មាន​ភាព​ស្រឡះ​គ្មាន​អ្នក​ធ្វើ​ចរាចរណ៍​ដូច​សព្វ​មួយ​ដង​​ដែល​​ជា​ផ្លូវ​អាទិភាព​សម្រាប់​មាន​ក្បួន​ធំៗ​ម្ដងៗ​។

ពិធី​ហែ និង​បូជា​សព​លោក​ សុខ អាន ត្រូវ​បាន​ធ្វើ​ឡើង​​យ៉ាង​​អធិកអធម​​សម្រាប់​មនុស្ស​មួយ​រូប​ដែល​សំខាន់​របស់​លោក​ ហ៊ុន សែន ក្នុង​ចំណោម​អ្នក​សំខាន់​ដទៃ​ទៀត​​​ ខណៈ​​ការ​ចំណាយ​​​ក្នុង​ពិធី​បុណ្យ​សព​ចំនួន​ ៧៥០ ០០០ ​ដុល្លារ​ដែល​មុន​ដំបូង​ស្នើ​យក​ថវិកា​ជាតិ​តែ​ក្រោយ​មក​ត្រូវ​បង្វែរ​មក​ថា​​គណបក្ស​ប្រជាជន​ជា​អ្នក​ទទួល​បន្ទុក​វិញ បន្ទាប់ពី​​មាន​ការ​រិះគន់​នៅ​តាម​បណ្ដាញ​សង្គម​ និង​មជ្ឈដ្ឋាន​នានា​ដែល​ថា​មាន​ទំហំ​ធំធេង​។

ចំនួន​ថវិកា​ចំណាយ​ដែល​មាន​រហូត​ដល់​បី​ពាន់​លាន​រៀល​ដែល​លេចធ្លាយ​​បាន​ធ្វើ​ឲ្យ​មាន​ការ​ខឹង​សម្បា​ពី​ក្រុម​ប្រឆាំង​និង​ក្រុម​សិទ្ធិ​មនុស្ស​ជា​ហេតុ​ធ្វើ​ឲ្យ​គណបក្ស​ប្រជាជន​ចេញ​​​រ៉ាប់រង​​​​ជំនួស​វិញ។

បើ​តាម​​លិខិត​មួយ​របស់​លោក សាយ ឈុំ ប្រធាន​ព្រឹទ្ធសភា​​ដែល​បាន​​សរសេរ​កាលពី​ថ្ងៃ​សៅរ៍​ថា៖ «ប៉ុន្មាន​ថ្ងៃ​នេះ​ខ្ញុំ​ឃើញ​មាន​ព័ត៌មាន​​ផ្សាយ​ថា​រាជរដ្ឋាភិបាល​បាន​សម្រេច​ដក​ថវិកា​រដ្ឋ​ចំនួន​បី​ពាន់​លាន​រៀល​សម្រាប់​ចំណាយ​​លើ​ការ​រៀបចំ​បុណ្យ​សព សម្តេច​វិបុល​បញ្ញា សុខ អាន»។

លិខិត​នេះ​បាន​បន្ត​ថា​៖ «​ផ្អែក​​លើ​នេះ​ ខ្ញុំ​បាន​ប្រជុំ​​គណៈ​ប្រចាំការ​នៃ​គណៈអចិន្រ្តៃយ៍​នៃ​គណៈកម្មាធិការ​​កណ្តាល​គណបក្ស​ប្រជាជន​កម្ពុជា​​​នៅ​រសៀល​ថ្ងៃ​ទី​ ១៨ ខែ​មីនា​ឆ្នាំ​ ២០១៧ ​នេះ​ហើយ​អង្គ​ប្រជុំ​បាន​​ឯកភាព​គ្នា​ឲ្យ​ខ្ញុំ​ធ្វើ​សំណើ​គោរព​ជូន​សូម​សម្តេច​នាយក​រដ្ឋមន្រ្តី​មេត្តា​បង្វែរ​លុយ​ខាង​លើ​នេះ​ចូល​ទៅ​ក្នុង​ថវិកា​រដ្ឋ​វិញ​ រីឯ​ការ​ចំណាយ​សម្រាប់​រៀបចំ​ពិធី​បុណ្យសព​សម្តេច​វិបុល​បញ្ញា​ សុខ អាន ​គណបក្ស​ប្រជាជន​កម្ពុជា​សូម​ទទួល​រ៉ាប់រង​ទំាង​ស្រុង​»។

លិខិត​នេះ​ត្រូវ​បាន​​ចុះ​ហត្ថលេខា​យល់​ព្រម​ដោយ​លោកនាយករដ្ឋមន្រ្តី ​ហ៊ុន សែន​ នៅ​ថ្ងៃ​​ដដែល​នោះ។

ទាំង​គណបក្ស​ប្រជាជន​កម្ពុជា​ និង​គណបក្ស​សង្គ្រោះជាតិ​​បាន​ទុក​រឿង​នយោបាយ​មួយ​ឡែក​សិន​កាលពី​ម្សិលមិញ​ដោយ​បាន​នាំ​គ្នា​ចូលរួម​គោរព​​​វិញ្ញាណក្ខន្ធ​សព​លោក សុខ អាន ​ប៉ុន្តែ​សម្រាប់​អ្នក​វិភាគ​សង្គម​លោក មាស នី បាន​ថ្លែង​កាលពី​ម្សិលមិញ​ថា​ការ​ចេញ​សេចក្តី​សម្រេច​​បង្វែរ​ថវិកា​ចូល​​ថវិកា​រដ្ឋ​វិញ​​​គឺ​គ្មាន​អ្វី​សង្ស័យ​ទេ​ព្រោះ​វា​ត្រូវ​​បាន​ឲ្យ​តម្លៃ​ដោយ​សាធារណជន ប៉ុន្តែ​​វា​ជា​រឿង​យឺត​ពេល​បន្តិច​។

លោក​បាន​បន្ត​​ថា​ប្រជាពលរដ្ឋ​​អាច​​ឆ្ងល់​​ថា​ តើ​លុយ​នោះ​​ពិតជា​ត្រូវ​បាន​បង្វែរ​ចូល​រដ្ឋ​វិញ​​ ឬ​គ្រាន់​តែ​ជា​ការ​​បង្ហាញ​។

លោក​បាន​ថ្លែង​​ទៀត​ថា​៖ «​​ពួកគេ​បាន​ឃើញ​ប្រតិកម្ម​​ពី​សាធារណជន​។ ​ចំពោះ​ខ្ញុំ ​​ខ្ញុំ​សរសើរ​​ការ​បង្វែរ​នេះ​ព្រោះ​យ៉ាង​ហោច​ណាស់​​វា​ត្រូវ​បាន​បង្វែរ​សម្រាប់​ប្រជាជន​ និង​ថវិការដ្ឋ​»។

ប៉ុន្តែ​លោក នី បាន​​ក្រើន​រំឭក​​ជា​ញឹកញាប់​​ថា​មាន​ «​ភាព​ខុស​គ្នា​តិចតួច​» ​រវាង​ថវិកា​របស់​រដ្ឋាភិបាល​ និង​​របស់​គណបក្ស​ដោយ​លើក​ឡើង​ថា​ពេល​ខ្លះ​ការ​ធ្វើ​​យុទ្ធនាការ​នយោបាយ​​អំណោយ​អង្ករ​របស់​រដ្ឋ​​ត្រូវ​បាន​​ដាក់​ស្លាក​ជា​​គណបក្ស​ប្រជាជន​។ លោក​ថា៖«​​វា​បង្ហាញ​ថា​គណបក្ស​ប្រជាជន​កម្ពុជា​មាន​លុយ​ច្រើន ប៉ុន្តែ​តើ​លុយ​នោះ​មកពី​ណា?»។

ចំណែក​អ្នក​នាំពាក្យ​​គណបក្ស​ប្រជាជន​លោក សុខ ឥសាន ​បាន​ថ្លែង​ថា​គណបក្ស​​មិន​ចង់​យក​ថវិកា​រដ្ឋ​​ «​ព្រោះ​នៅ​ពេល​យក​ច្រើន​ពេក​វា​នឹង​ធ្វើ​ឲ្យ​មាន​បញ្ហា​​ និង​ប៉ះពាល់​ដល់​ថវិកា​ជាតិ​»។

Content image - Phnom Penh Post
ការ​រៀបចំ​ពិធី​បូជា​សព​លោក សុខ អាន ពី​ម្សិលមិញ​​។ ផា លីណា

លោក​បាន​ថ្លែង​ថា​៖ «​យើង​មិន​ចង់​ឲ្យ​បងប្អូន​ដែល​មិន​យល់​បញ្ហា​នេះ​​មិន​សប្បាយ​ចិត្ត​»។

លោក​បាន​ថ្លែង​ថា​ការ​ដក​ថវិកា​ពី​គណបក្ស​​នេះ​​នឹង​​មិន​បង្ក​ឲ្យ​មាន​បញ្ហា​​សម្រាប់​យុទ្ធនាការ​បោះឆ្នោត​នា​ពេល​ខាង​មុខ​ទេ​​ការ​បរិច្ចាគ​ទៀងទាត់​គឺ​បាន​មកពី​សមាជិក​បក្ស​ហើយ​ថវិកា​បោះឆ្នោត​​ត្រូវ​បាន​រៀបចំ​រួច​ហើយ​។

លោក ស្រី មូរ សុខហួរ អនុប្រធាន​គណបក្ស​សង្គ្រោះ​​ជាតិ​បាន​ជ្រើសរើស​យក​វិធី​​មិន​ធ្វើ​អត្ថាធិប្បាយ​ពី​​​ថា​តើ​ការ​សម្រេច​ចិត្ត​របស់​គណបក្ស​ប្រជាជន​គឺជា​ការ​ត្រឹមត្រូវ​​​​ឬ​អត់​ទេ​។ ​លោកស្រី​បាន​ថ្លែង​ថា​តំណាង​ពី​គណបក្ស​របស់​លោកស្រី​បាន​ចូលរួម​ពិធី​បុណ្យ​សព​នេះ​លើកលែង​តែ​​​លោក​ កឹម សុខា​ ​ដែល​កំពុង​ស្ថិត​នៅ​ក្នុង​ប្រទេស​ថៃ​​ដើម្បី​ព្យាបាល​ជំងឺ​។

លោកស្រី​បាន​ថ្លែង​ថា​៖ «​​វា​ពិត​ណាស់​ជា​កិត្តិយស​រដ្ឋ​សម្រាប់​លោក សុខ អាន។ ​ខ្ញុំ​មាន​អារម្មណ៍​ថា​អ្នក​រាល់​គ្នា​​មាន​អារម្មណ៍​ក្រៀមក្រំ...វា​ជា​ពេល​ក្រៀមក្រំ​»។

លោកស្រី​បន្ត​ថា​ចំណេះដឹង​ និង​ជំនាញ​ជា​អ្នក​ចរចា​របស់​លោក សុខ អាន ​បាន​ «រួម​ចំណែក​​យ៉ាង​ខ្លាំង​»​ចំពោះ​ការ​អភិវឌ្ឍ​​កម្ពុជា​។

ពិត​ណាស់​តួនាទី​ និង​តំណែង​ជាច្រើន​​ដែល​កាន់​ដោយ​លោក សុខ អាន ក្នុង​អំឡុង​អាជីព​នយោបាយ​​របស់​លោក​ត្រូវ​បាន​សរសើរ​នៅ​ក្នុង​​វិយោគ​កថា​ដែល​អាន​ដោយ​ប្រធាន​ព្រឹទ្ធសភា​លោក សាយ ឈុំ។

លោក សាយ ឈុំ បាន​ថ្លែង​ថា​៖ «​​មរណភាព​របស់​សម្តេច​វិបុល​បញ្ញា សុខ អាន គឺជា​ការ​បាត់បង់​ឥស្សរជន​ដ៏សំខាន់​ម្នាក់​​ជា​ធនធាន​មនុស្ស​​ដ៏កម្រ​»។

លោក​ថា​លោក​ សុខ អាន បាន​ទទួល​ការ​ព្យាបាល​នៅ​ប្រទេស​សិង្ហបុរី​ចាប់​តំាងពី​ខែ​កក្កដា​ឆ្នាំ​មុន​ហើយ​ត្រូវ​បាន​​បង្វែរ​ទៅ​ទីក្រុង​ប៉េកាំង​នៅ​ដើម​ខែ​មីនា​ពី​មុន​ពេល​លោក​ទទួល​មរណភាព​កាលពី​​ថ្ងៃ​ពុធ​។

ប្រជាពលរដ្ឋ​មួយ​ចំនួន​ក្នុង​ខេត្ត​តាកែវ​​ដែល​ជា​មណ្ឌល​​តំណាងរាស្រ្ត​របស់​លោក សុខ អាន ​បាន​ចូលរួម​កាន់​ទុក្ខ​ចំពោះ​មរណភាព​របស់​លោក​​ក្នុង​ជន្មាយុ​ ៦៦ ​ឆ្នាំ។

លោក អឿង ញ៉ាញ់ ​អាយុ​ ៧០ ​ឆ្នាំ​បាន​ថ្លែង​ថា​៖ «​​ខ្ញុំ​ចាត់​ទុក​គាត់​ជា​វីរបុរស​របស់​យើង​​សម្រាប់​ជាតិ​»។ លោក​បាន​បន្ត​ថា​៖ «​យើង​មាន​ការ​​ក្រៀមក្រំ​​ខ្លាំង​ណាស់​ និង​គ្មាន​អ្វី​អាច​ប្រៀបធៀប​ចំពោះ​មរណភាព​​​របស់​លោក​បាន​ទេ​»។

ស្រដៀង​គ្នា​នេះ​លោក អ៊ុច វណ្ណារិទ្ធ អាយុ​ ៦០ ​ឆ្នាំ​ដែល​ជា​​​ប្រជាពលរដ្ឋ​មកពី​ខេត្ត​តាកែវ​ដែរ​នោះ​បាន​ថ្លែង​ថា លោក សុខ អាន ជា​អ្នក​ដែល​បាន​​សាងសង់​វត្ត​ ផ្លូវ​ថ្នល់ ស្ពាន​និង​ប្រឡាយ។

លោក​បន្ត​ថា​៖ «​​គាត់​ជា​អ្នក​ស្នេហា​ជាតិ​ និង​បាន​ជួយ​ប្រជាពលរដ្ឋ​​​ដោយ​ការ​​​បូជា​ពេលវេលា​ និង​សុខភាព​​ដើម្បី​អភិវឌ្ឍ​ប្រទេស​ជាពិសេស​នៅ​ក្នុង​ខេត្ត​តាកែវ​»។

កូនប្រុស​ច្បង​បង្អស់​របស់​លោក សុខ អាន លោក សុខ ពុទ្ធិវុទ្ធ ដែល​រៀបការ​ជាមួយ​កូនស្រី​លោកនាយក​រដ្ឋមន្រ្តី ហ៊ុន សែន ​ឈ្មោះ ហ៊ុន ម៉ាលី ​និង​ជា​ប្រធាន​សហព័ន្ធ​អង្ករ​​កម្ពុជា​មិន​បាន​ថ្លែង​អំពី​ឪពុក​របស់​លោក​ទេ ប៉ុន្តែ​បាន​ថ្លែង​អំពី​ឪពុក​ក្មេក​​របស់​​លោក​គឺ​សំដៅ​លោក​នាយករដ្ឋមន្ត្រី​ ហ៊ុន ​សែន​។

លោក​បាន​ថ្លែង​ថា​​៖ «​តាង​នាម​ឲ្យ​គ្រួសារ​របស់​ខ្ញុំ​ ​ខ្ញុំ​សូម​ថ្លែង​អំណរ​គុណ​សម្តេច​តេជោ...​ដែល​បាន​ខិតខំ​អស់​ពី​សមត្ថភាព​​ដើម្បី​ជួយ​​​គ្រួសារ​​របស់​លោក​ក្នុង​ការ​រៀបចំ​ពិធី​​នេះ​តាំងពី​ដើម​ដល់​ចប់​»។

នៅ​ក្រោយ​ពិធី​ចប់​មាន​អដ្ឋិធាតុ​របស់​សព​លោក សុខ អាន ខ្លះ​ត្រូវ​បាន​​យក​ទៅ​ដាក់​នៅ​ក្នុង​ទន្លេ​ចតុមុខ​៕ PS

0

Comments

Please, login or register to post a comment