ភ្នំពេញៈ សភាអូស្ត្រាលីកំពុងពិចារណាលើសំណើមួយដែលស្នើឲ្យថ្កោលទោសចំពោះការបង្ក្រាបរឿងនយោបាយរបស់ប្រទេសកម្ពុជាដោយក្នុងនោះសមាជិកសភាលោក Mark Butler បានប្រកាសថាអូស្ត្រាលីមាន «កាតព្វកិច្ចដ៏សំខាន់»មួយដើម្បីចាត់វិធានការការពារ «លិទ្ធិប្រជាធិបតេយ្យក្មេងខ្ចី» របស់ប្រទេសកម្ពុជា។
លោក Butler បានថ្លែងនៅក្នុងសុន្ទរកថា បើកអង្គប្រជុំមួយកាលពីថ្ងៃចន្ទ ដោយលោកកត់សម្គាល់អំពីការចាប់ខ្លួនមេដឹកនាំគណបក្សប្រឆាំងលោក កឹម សុខា និងការរំលាយគណបក្សសង្គ្រោះជាតិក៏ដូចជាការបិទបណ្តាញសារព័ត៌មានឯករាជ្យ និងអង្គការគាំទ្រដល់ដំណើរការលិទ្ធិប្រជាធិបតេយ្យមួយចំនួនដោយលោកបានលើកឡើងថា៖ «ប្រទេសកម្ពុជាបានឈានដល់ចំណុចវិបត្តិនយោបាយដ៏ជ្រៅមួយ»។
សំណើរបស់លោក Butler ពីដំបូងត្រូវដាក់ចេញកាលពីខែតុលាដោយបានទាមទារឱ្យមានការដោះលែងលោក កឹម សុខា និងដកចេញការរឹតត្បិតលើអង្គការសង្គមស៊ីវិលជាមួយគ្នាក៏បានថ្កោលទោសចំពោះការរំលាយគណបក្សសង្គ្រោះជាតិផងដែរ។
លោក Butler បាននិយាយថា «សកម្មភាពចុងក្រោយថ្មីៗនេះគឺជាការបំពានមួយដែលមិនអាចប្រកែកបានពីរបបមួយនេះ ហើយវាត្រូវតែមានការឆ្លើយតបផ្នែកការទូតនូវកម្រិតខ្ពស់បំផុត» មួយ។ ប៉ុន្តែលោក Butler មិនបានបញ្ជាក់ឲ្យបានច្បាស់អំពីចំណាត់ការផ្នែកការទូតថាវាអាចជាទម្រង់អ្វីនោះទេ។
លោកគ្រាន់តែបានបន្ថែមថា៖ «ខ្ញុំសូមអំពាវនាវដល់សភាឱ្យទទួលស្គាល់ថា ប្រទេសអូស្ត្រាលីមានតួនាទីសំខាន់ក្នុងការការពារ និងលើកកម្ពស់លិទ្ធិប្រជាធិបតេយ្យនៅកម្ពុជា»។
ប្រធានបទនេះនឹងត្រូវបានពិនិត្យឡើងវិញនៅឯអង្គប្រជុំសភាដែលគ្រោងនឹងចាប់ផ្តើមនៅថ្ងៃទី ១២ ខែកុម្ភៈនេះ។
ប្រតិកម្មដំបូងរបស់អូស្ត្រាលីចំពោះការរំលាយគណបក្សសង្គ្រោះជាតិ គឺធ្វើឡើងដោយរដ្ឋមន្ត្រីការបរទេសអូស្ត្រាលីលោកស្រី Julie Bishop ដែលបានសម្តែង «ការព្រួយបារម្ភ» ខណៈដែលលោកស្រីបានសង្កត់ធ្ងន់ថាប្រទេសកម្ពុជាគឺជា «មិត្ត» របស់ប្រទេសអូស្ត្រាលី។
ពិតណាស់អ្នកនាំពាក្យរដ្ឋាភិបាលលោក ផៃ ស៊ីផាន កាលពីម្សិលមិញបានថ្លែងថាលោកមិនចាប់អារម្មណ៍ចំពោះការលើកឡើងរបស់លោក Butler នេះទេ ពីព្រោះប្រទេសទាំង ២ នៅតែយកចិត្តទុកដាក់ចំពោះកិច្ចសហប្រតិបត្តិការ និងទំនាក់ទំនងល្អ។
លោកថ្លែងថា៖ «ពួកគេមិនមានសិទ្ធិជ្រៀតជ្រែកបញ្ហាផ្ទៃក្នុងរបស់យើងទេ»។
ទន្ទឹមនឹងនេះដែរអតីតអនុប្រធានគណបក្សសង្គ្រោះជាតិលោកស្រី មូរ សុខហួរ បានកោតសរសើរចំពោះសំណើរបស់លោក Butler នេះ។
លោកស្រី មូរ សុខហួរ បានថ្លែងថាគណៈប្រតិភូគណបក្សសង្គ្រោះជាតិមួយក្រុមនឹងធ្វើទស្សនកិច្ចទៅកាន់ប្រទេសអូស្ត្រាលីពេញមួយខែមីនា ហើយគ្រោងជួបជាមួយលោក Butler និងសមាជិកសភាដទៃទៀតដោយផ្ទាល់តែម្តង។
ទោះបីជាមានការព្រមានពីលោកនាយករដ្ឋមន្ត្រី ហ៊ុន សែន កាលពីពេលថ្មីៗនេះចំពោះអតីតអ្នកនយោបាយរបស់គណបក្សសង្គ្រោះជាតិថាមិនឱ្យមកជិតតំបន់ «អាស៊ី» ក្រែងពួកគេអាចត្រូវចាប់ខ្លួនក្តីក៏លោកស្រី មូរ សុខហួរ បានថ្លែងថាគណបក្សសង្គ្រោះជាតិក៏គ្រោងនឹងចាប់ផ្តើមជំនួបប្រជុំផ្លូវការជាមួយបណ្តាប្រទេសអាស៊ានផងដែរដើម្បីស្វែងរកការគាំទ្រដល់បុព្វហេតុរបស់ពួកគេ។
លោកស្រី សុខហួរ បន្តថា៖ «វាជាពិភពលោកសេរីលិទ្ធិប្រជាធិបតេយ្យគឺជារបស់សកល។ គាត់ចង់មកចាប់ខ្ញុំ? មិនអីទេ ប៉ុន្តែខ្ញុំនឹងមិនអនុញ្ញាតឱ្យលទ្ធិប្រជាធិបតេយ្យនៅកម្ពុជាស្លាប់ទេ»។
លោក ផៃ ស៊ីផាន បានថ្លែងថារដ្ឋាភិបាលបានបញ្ជាក់យ៉ាងច្បាស់ថាពួកគេចង់ឱ្យបណ្តាប្រជាជាតិអាស៊ានបញ្ជូនអ្នកទាំងនោះត្រឡប់មកវិញដើម្បីប្រឈមនឹងតុលាការ។
លោកមានប្រសាសន៍ថា៖ «យើងមានសិទ្ធិស្នើសុំធ្វើបត្យាប័ន»។ លោកក៏បានបន្ថែមថា បើខកខានធ្វើបែបនេះ នោះគឺបង្ហាញអំពីចេតនា «មិនសហការជាមួយកម្ពុជា»៕ NS