.jpg)
មនុស្សជាច្រើននាក់បានប្រើហិង្សាទៅលើអ្នកបើកបរដែលបង្កគ្រោះថ្នាក់ចរាចរណ៍។ រូបថត ហ្វេសប៊ុក
ភ្នំពេញៈ ក្រុមសមត្ថកិច្ចកំពុងស្រាវជ្រាវស្វែងរកចាប់ខ្លួនក្រុមជនបង្កអំពើហិង្សាទៅលើអ្នកបើកបររថយន្តម្នាក់ឲ្យរងរបួសធ្ងន់ ក្រោយពេលគាត់បានបង្កគ្រោះថ្នាក់ចរាចរណ៍ដោយបុកអ្នកបើកបរម៉ូតូម្នាក់នៅខណ្ឌឫស្សីកែវ ហើយព្យាយាមបើករត់។
លោក សែម សុគន្ធា អនុប្រធាននគរបាលចរាចរណ៍ រាជធានីភ្នំពេញបានប្រាប់ភ្នំពេញប៉ុស្តិ៍ពីម្សិលមិញថា លោក ស៊ុយ សារ៉េត អាយុ ៥២ ឆ្នាំជាសាស្ត្រាចារ្យភាសាអង់គ្លេសនៅសាកលវិទ្យាល័យកម្ពុជាត្រូវបានគេរាយការណ៍ថា បានបើករថយន្តបុកអ្នកបើកបរម៉ូតូម្នាក់នៅម្ដុំវត្តទួលអស់លោក (វត្តទួលសន្តិវ័ន) ស្ថិតក្នុងសង្កាត់-ខណ្ឌឫស្សីកែវ ហើយមិនព្រមឈប់ដោះស្រាយដោយបានព្យាយាមបើករត់គេចដែលនាំឲ្យមានហ្វូងមហាជនជិះម៉ូតូតាមដេញចាប់ និង បង្កហិង្សាទៅលើគាត់យ៉ាងធ្ងន់ធ្ងរដែលហេតុការណ៍នេះបានកើតឡើងកាលពីវេលាម៉ោងប្រមាណជាង ៥ ល្ងាចថ្ងៃអាទិត្យ។
លោក សុគន្ធា បានបញ្ជាក់ថា៖ «គាត់ [ស៊ុយ សារ៉េត] ត្រូវបានហ្វូងមហាជនវាយដោយដុំថ្ម បណ្ដាលឲ្យរងរបួសយ៉ាងធ្ងន់ធ្ងរនៅផ្នែកក្បាល និង មុខ ដោយបែកឈាមហូរស្រោចពេញខ្លួន និងត្រូវបានក្រុមគ្រួសារបញ្ជូនទៅកាន់មន្ទីរពេទ្យក្នុងប្រទេសវៀតណាម ដើម្បីព្យាបាលទាំងយប់»។
លោក សុគន្ធា បានបន្ថែមថា៖ «យោងព័ត៌មានដែលយើងប្រមូលបានក្នុងជំហានបឋម លោក ស៊ុយ សារ៉េត ដែលជាជនបង្កគ្រោះថ្នាក់ចរាចរណ៍ ហើយក្លាយជាជនរងគ្រោះដោយការប្រើអំពើហិង្សាពីហ្វូងមហាជននោះ គឺគាត់បានបុកអ្នកបើកបរម៉ូតូមួយគ្រឿងនៅក្នុង សង្កាត់-ខណ្ឌឫស្សីកែវ ហើយបើករត់គេចរហូតដល់ម្ដុំពេទ្យលោកសង្ឃស្ថិតក្នុងសង្កាត់ទឹកល្អក់ ២ ខណ្ឌទួលគោក ដោយកាត់តាមផ្សារធំថ្មី សណ្ឋាគារស និងបើកគេចមកតាមផ្លូវកម្ពុជាក្រោម ទើបត្រូវក្រុមមហាជនតាមទាន់ និងវាយប្រហារដោយកំរោល បណ្ដាលឲ្យគាត់រងរបួសធ្ងន់»។
លោកបានបន្តថាយ៉ាងណាក៏ដោយនៅក្នុងករណីនេះ សមត្ថកិច្ចនគរបាលជំនាញផ្នែកព្រហ្មទណ្ឌរាជធានីភ្នំពេញ កំពុងមានចំណាត់ការស្រាវជ្រាវ ដើម្បីស្វែងរកអត្តសញ្ញាណក្រុមជនបង្កហិង្សា ដើម្បីធ្វើការឃាត់ខ្លួនមកផ្ដន្ទាទោសទៅតាមផ្លូវច្បាប់។
ប៉ុន្តែរហូតមកទល់ពេលនេះសមត្ថកិច្ចនៅមិនទាន់ធ្វើការឃាត់ខ្លួនក្រុមជនបង្កអំពើហិង្សាណាម្នាក់នៅឡើយទេ ខណៈអ្នកបើកបរម៉ូតូ ដែលរងគ្រោះថ្នាក់ស្រាលដោយសារតែ លោក ស៊ុយ សារ៉េត បើកបររថយន្តបុកនោះ សមត្ថកិច្ចក៏នៅមិនទាន់ទទួលបានអត្តសញ្ញាណនៅឡើយដែរ។
កាលពីរសៀលថ្ងៃម្សិលមិញ អ្នកស្រី ជា លីន ដែលអះអាងថាជាមិត្តភក្ដិស្និទ្ធស្នាលរបស់ភរិយាលោក ស៊ុយ សារ៉េត បានប្រាប់ភ្នំពេញប៉ុស្តិ៍ថា៖ «នៅពេលនេះស្ថានភាពរបួសរបស់លោក សារ៉េត បានធូរស្រាលបន្តិចហើយ ដោយគាត់អាចនិយាយបានតិចៗខ្លះហើយ បន្ទាប់ពីក្រុមគ្រូពេទ្យជំនាញវៀតណាមបានពិនិត្យព្យាបាលដោយកាំរស្មីអ៊ិច្ស»។
ដោយឡែកស្ត្រីជាអាជីវករមា្នក់នៅឯកន្លែងដែលមានការផ្ទុះហិង្សាដោយហ្វូងមហាជនទៅលើលោក ស៊ុយ សារ៉េត បាននិយាយថាមានម៉ូតូរាប់សិបគ្រឿងបានដេញតាមឡាននោះហើយឡាននោះបានឈប់ដោយសារបានបុកជាមួយឡានឡង់គ្រីស័រមួយ ដែលធ្វើឲ្យរថយន្តនោះមិនអាចទៅមុខបាន ដែលធ្វើឲ្យក្រុមអ្នកបើកម៉ូតូប្រដេញតាមទាន់ ហើយនាំគ្នាវាយប្រហារលើគាត់ ដោយដុំថ្ម។
អ្នកស្រីបាននិយាយថា៖ «ខ្ញុំឃើញគេយកដុំថ្មវាយទៅលើគាត់។ ខ្ញុំអាណិតគាត់ខ្លាំងណាស់តែខ្ញុំមិនអាចជួយគាត់បាន ដោយពេលនោះប្រជាជនកំពុងផ្ទុះកំហឹងវាយទៅលើរូបគាត់។ ខ្ញុំយល់ថា ពួកគេមិនគួរវាយគាត់ដល់ថ្នាក់នេះទេ។ ការវាយទៅលើរូបគាត់បែបនេះវាពិតជាសាហាវខ្លាំងណាស់។ បើប៉ូលិសមកជួយគាត់មិនទាន់ពេលវេលាទេនោះ គាត់ប្រាកដជាត្រូវពួកមហាជនទាំងនោះវាយស្លាប់មិនខាន»។
ស្ត្រីរូបនេះបានបន្តថា អ្នកស្រីមិនដែលស្គាល់មុខអ្នកដែលវាយដំទៅលើអ្នកបើករថយន្តនោះ ព្រោះពួកគេមិនមែនជាអ្នករស់នៅម្ដុំនេះទេ។ ពួកគេវាយគាត់ហើយក៏បំបែកផ្លូវគ្នាចេញទៅអស់ គឺនៅវេលាម៉ោង ៧ យប់។
ចំណែកអ្នកស្រី ប្រាក់ ហាក់ អាយុ ៦០ ឆ្នាំដែលរស់នៅម្ដុំនោះដែរបាននិយាយថា ដោយសារឡាននោះបានបុកគេរបួសហើយបើករត់ ហើយពេលគេតាមទាន់គឺត្រូវឈឺសាច់បែបនេះ។
អ្នកស្រីបានបន្តថា៖ «ហេងហើយដែលបុកនៅពេលថ្ងៃ បើពេលយប់វិញម្ល៉េះគាត់នឹងបើករត់រួចខ្លួនមិនខាន ហើយបើគាត់កុំតដៃជាមួយនឹងក្រុមម៉ូតូ ដែលប្រដេញតាមមកនោះ ក៏ពួកគេមិនវាយគាត់ទ្រមដល់ថ្នាក់នេះទេ តែដោយសារគាត់តដៃដោយចង្អុលមុខពួកគេធ្វើឲ្យពួកគេខឹងវាយគាត់រឹតតែខ្លាំង។ មិនថាខ្ញុំមិនថាគេទេតែបុកហើយរត់ គឺពិតជាមានកំហឹង ហើយនៅពេលតាមទាន់ចាប់បានគឺត្រូវតែវាយខ្លះហើយ»។
លោក តន់ រ៉ាវី នាយនគរបាលប៉ុស្តិ៍សង្កាត់ទឹកល្អក់ ២ បានប្រាប់ភ្នំពេញប៉ុស្តិ៍ថា គាត់ [ស៊ុយ សារ៉េត] បានប៉ះគេតាំងពីនៅឯកន្លែងផ្សេង ហើយគាត់មិនព្រមឈប់មើលគេ ដូច្នេះបានជាគេតាមគាត់ ដោយកំហឹង និងតាមការស្រែកញុះញង់ថាគាត់បានបុកគេ «ស្លាប់»។
លោកបានបញ្ជាក់ថា៖ «នៅពេលនេះយើងកំពុងតាមអ្នកដែលបានវាយទៅលើរូបគាត់ ហើយយើងបានមានតម្រុយខ្លះៗហើយ»៕
