Search form

Login - Register | FOLLOW US ON

Logo of Phnom Penh Post newspaper Phnom Penh Post - សមត្ថកិច្ច​ចាប់​បញ្ជូន​សកម្មជន​បរិស្ថាន​លោក អាឡិច ចេញ​ពី​ប្រទេស​កម្ពុជា

លោក អាឡិច ហ្សង់ដ្រូ ហ្គន់សាឡេស ដេវិតសិន ពេល​ត្រូវ​បាន​សមត្ថកិច្ច​ធ្វើ​ការ​ចាប់​ខ្លួន កាល​ថ្ងៃ​ម្សិល​មិញ។
លោក អាឡិច ហ្សង់ដ្រូ ហ្គន់សាឡេស ដេវិតសិន ពេល​ត្រូវ​បាន​សមត្ថកិច្ច​ធ្វើ​ការ​ចាប់​ខ្លួន កាល​ថ្ងៃ​ម្សិល​មិញ។ រូបថត អ្នក​រត់​តុកតុក​ដែល​ជា​សកម្មជន IDEA

សមត្ថកិច្ច​ចាប់​បញ្ជូន​សកម្មជន​បរិស្ថាន​លោក អាឡិច ចេញ​ពី​ប្រទេស​កម្ពុជា

ភ្នំពេញៈ សកម្មជន​ការពារ​ព្រៃ​ឈើ​នៅ​តំបន់​អារ៉ែង ដែល​ប្រឆាំង​ទៅ​នឹង​ការ​អភិវឌ្ឍ​ទំនប់​វារី​អគ្គិសនី លោក អាឡិច ហ្សង់ដ្រូ ហ្គន់សាឡេស ដេវិតសិន និង​សមាជិក​របស់​ខ្លួន​ជា​ជនជាតិ​ខ្មែរ​ម្នាក់​ត្រូវ​បាន​សមត្ថកិច្ច​ធ្វើ​ការ​ចាប់​ខ្លួន​នៅ​តាម​បណ្តោយ​ផ្លូវ ព្រះ​ស៊ីសុវត្ថិ នៅ​វេលា​ម៉ោង ១ និង ១៥ នាទី នៅ​ក្នុង​ភោជនីយដ្ឋាន Fish ប៉ុន្មាន​ម៉ោង​បន្ទាប់​ពី​ការ​ព្រមាន​ជា​សាធារណៈ​របស់​លោក​នាយក​រដ្ឋ​មន្ត្រី ហ៊ុន សែន ប្រតិកម្ម​ទៅ​នឹង​អ្នក​រិះគន់​រដ្ឋាភិបាល​ដែល​មិន​បាន​ពន្យារ​ទិដ្ឋាការ​ដល់​ជន​បរទេស​រូប​នេះ។

លោក សុខ សីហា ដែល​ជា​បណ្តាញ​សមាគម​សេដ្ឋកិច្ច​ក្រៅ​ប្រព័ន្ធ និង​ជា​អ្នក​រត់​តុកតុក នៅ​កន្លែង​កើត​ហេតុ​បាន​ឃើញ​ផ្ទាល់​ភ្នែក បាន​ថ្លែង​ថា នៅ​វេលា​ម៉ោង ១ និង ១៥ នាទី មាន​សមត្ថកិច្ច​ចម្រុះ​ប្រមាណ​ជា ២០ នាក់ ដែល​មាន​ពាក់​ផ្កាយ ១ ផ្កាយ ២ និង ស្លៀក​ពាក់​ស៊ីវិល បាន​ចូល​ទៅ​ចាប់ លោក អាឡិច និង​ជន​ជាតិ​ខ្មែរ​ម្នាក់ ដែល​គេ​ដឹង​ថា ឈ្មោះ ស៊ុន ម៉ាឡា នៅ​ក្នុង​ភោជនីយដ្ឋាន ហ្វីស។

លោក​បាន​ថ្លែង​ថា៖ «គេ​ចាប់​គាត់​បណ្តើរ​ចូល​ក្នុង​ឡាន ឡង់រ៉ូវែរ រួច​វាយ​ខ្នោះដៃ​គាត់ ហើយ​ប៉ូលិស​ខ្លះ​ថា យក​ទៅ​ក្រសួង​មហាផ្ទៃ ប៉ូលិស​ខ្លះ​ថា យក​ទៅ​ខាង​អន្តោ​ប្រវេសន៍។ ខ្ញុំ​សោក​ស្តាយ​ណាស់​គេ​ខំ​ការពារ​ធនធាន​ធម្មជាតិ​បែរ​ជា​ចាប់​គេ​ទៅ​វិញ»។

លោក​នាយ​ឧត្តម​សេនីយ៍ ខៀវ សុភ័គ អ្នក​នាំ​ពាក្យ​ក្រសួង​មហាផ្ទៃ​បាន​ថ្លែង​ថា សមត្ថកិច្ច​បាន​ធ្វើ​ការ​ឃុំ​ខ្លួន​លោក អាឡិច កាល​ពី​ថ្ងៃ​ម្សិល​មិញ​ដោយ​អនុវត្ត​ទៅ​តាម​ប្រកាស​របស់​ក្រសួង និង​ច្បាប់​របស់​ប្រទេស​អធិបតេយ្យ​មួយ ដូច្នេះ​ពុំ​មាន​អ្វី​ដែល​ត្រូវ​ភ្ញាក់​ផ្អើល​នោះ​ទេ នៅ​ពេល​ណា​ដែល​ទិដ្ឋាការ​អស់​សុពលភាព​គឺ​ត្រូវ​ឲ្យ​ទៅ​វិញ ហើយ​ម្យ៉ាង​ទៀត​អាជ្ញាធរ​បាន​ប្រើ​វិធាន​ការ​ជា​ច្រើន​រួច​មក​ហើយ​ដូច​ជា​ការ​ចេញ​ជា​សំបុត្រ ការ​ប្រើ​ភាសា​ខ្មែរ ហើយ​ហៅ​ទូត​អេស្ប៉ាញ មក​និយាយ​ភាសា​អេស្ប៉ាញ ជាមួយ​គាត់​ទៀត ខ្លាច​គាត់​ស្តាប់​មិន​បាន ប៉ុន្តែ​និយាយ​ភាសា​គាត់​ហើយ​គាត់​នៅ​ស្តាប់​មិន​បាន។

លោក​បាន​ថ្លែង​ថា៖ «យើង​មិន​ឃុំ​ខ្លួន​គាត់​ទេ គឺ​គ្រាន់​តែ​បង្ខំ​ឲ្យ​គាត់​ចេញ​តែ​ប៉ុណ្ណោះ។ យើង​មាន​សិទ្ធិ​ចាប់​គាត់​បញ្ជូន​ទៅ​តុលាការ​ដាក់​ពន្ធនាគារ​ពី ១ ខែ​ដល់ ៣ ខែ ប៉ុន្តែ​យើង​មិន​ធ្វើ​អ៊ីចឹង​ទេ​គឺ​យើង​គ្រាន់​តែ​បណ្តេញ​ចេញ​ទៅ​វា​ស្រាល»។

បើ​តាម​មន្ត្រី​ម្នាក់​ដែល​សុំ​មិន​បញ្ចេញ​ឈ្មោះ​បាន​ឲ្យ​ដឹង​កាល​ពី​យប់​មិញ​ថា លោក អាឡិច ត្រូវ​បាន​អនុញ្ញាត​ឲ្យ​ចេញ​ពី​ប្រទេស​កម្ពុជា នៅ​ថ្ងៃ​អង្គារ។

លោក​នាយ​ឧត្តម​សេនីយ៍​បាន​ថ្លែង​ថា ទាក់​ទង​ទៅ​នឹង​ការ​ឃុំ​ខ្លួន​ជន​ជាតិ​ខ្មែរ​ម្នាក់​នោះ​លោក​ពុំ​បាន​ដឹង​ទេ ប៉ុន្តែ​បើ​គាត់​រារាំង​សមត្ថកិច្ច​គឺ​គាត់​អាច​នឹង​មាន​ទោស​ដែរ។

លោក ស៊ីម សំណាង សមាជិក​បណ្តាញ​មាតា​ធម្មជាតិ បាន​ថ្លែង​ឲ្យ​ដឹង​ថា ការ​ចាប់​ខ្លួន​លោក អាឡិច ពុំ​មាន​អ្វី​ប៉ះ​ពាល់​ទៅ​ដល់​គម្រោង​ដែល​កំពុង​ធ្វើ​ការ​តវ៉ា​ដើម្បី​ប្រឆាំង​ទៅ​នឹង​ការ​អភិវឌ្ឍ​វារី​អគ្គីសនី​នៅ​ក្នុង​តំបន់​នោះ​គឺ​ពលរដ្ឋ​នឹង​ធ្វើ​ឲ្យ​ខ្លាំង​ជាង​មុន។ លោក​បាន​ថ្លែង​ថា៖ «អ្វី​ដែល​សោក​ស្តាយ​គឺ​មិន​គួរ​ចាប់​បណ្តេញ​ជន​បរទេស​ដែល​ស្រឡាញ់​ខ្មែរ​ចេញ​ពី​ទឹក​ដី​ខ្មែរ​នោះ​ទេ»។

ក្នុង​ពិធី​ចែក​សញ្ញាបត្រ​ដល់​និស្សិត​សាកល​វិទ្យាល័យ​ជាតិ​គ្រប់​គ្រង កាល​ពី​ម្សិល​មិញ លោក​នាយក​រដ្ឋ​មន្រ្តី ហ៊ុន សែន បាន​មាន​ប្រសាសន៍​ថា ប្រទេស​កម្ពុជា​ជា​រដ្ឋ​អធិបតេយ្យ​មួយ ហើយ​ប្រសិន​បើ​ជន​បរទេស និង​ប្រជាជន​ខ្មែរ​ណា​បំពាន គឺ​ត្រូវ​តែ​មាន​ទោស។ ករណី​នេះ កំពុង​តែ​ធ្វើ​ឲ្យ​ស្ថានការណ៍​កាន់​តែ​អាក្រក់ ដែល​អាច​នឹង​នាំ​ឲ្យ​មាន​ការ​បណ្តេញ​ចេញ និង​ត្រូវ​ចូល​បញ្ជី​ខ្មៅ​របស់​រដ្ឋាភិបាល​កម្ពុជា។

លោក​បាន​បញ្ជាក់​ថា៖ «អ៊ីចឹង​យើង​ចេញ​ទៅ​សិន​ទៅ រួច​ហើយ​ចាំ​សុំ​ត្រឡប់​មក​វិញ វា​ទាស់​ខុស​អី។ ចាំ​បាច់​បង្កើត​ស្ថានភាព​នេះ​ឲ្យ​កាន់​តែ​អាក្រក់។ តែ​គេ​បណ្តេញ​ចេញ​ហើយ វា​ត្រូវ​ចូល​ក្នុង​បញ្ជី​ខ្មៅ។ វា​ចប់​ហើយ»។

លោក អាឡិច ផ្ដល់​បទ​សម្ភាស​នា​ពេល​កន្លង​មក។
លោក អាឡិច ផ្ដល់​បទ​សម្ភាស​នា​ពេល​កន្លង​មក។ ហេង ជីវ័ន

លោក​នាយក​រដ្ឋ​មន្រ្តី ក៏​បាន​ស្នើ​ឲ្យ​អ្នក​នយោបាយ​មួយ​ចំនួន​ពិចារណា​លើ​ករណី​នេះ ដោយ​លើក​ឡើង​ថា មិន​មាន​ជន​បរទេស​ណា​ដែល​ស្រឡាញ់​ខ្មែរ​ជាង​ប្រជាជន​ខ្មែរ នោះ​ទេ។

លោក​បាន​ថ្លែង​ថា៖ «មិន​ថា​ជន​បរទេស​បំពាន​ទេ ជនជាតិ​ខ្មែរ​បំពាន​ក៏​ត្រូវ​តែ​មាន​ទោស​ដែរ​។ អំណាច​រដ្ឋ ម្យ៉ាង​ទៀត ក៏​សូម​ផ្តាំ​ផ្ញើ​អ្នក​នយោបាយ​មួយ​ចំនួន សូម​បញ្ជាក់​ឲ្យ​ហើយ គ្មាន​បរទេស​ណា ស្រឡាញ់​ខ្មែរ​ជាង​ខ្មែរ​ទេ។ ប៉ុន្តែ​សង្ឃឹម​ថា រឿង​អស់​ទាំង​នេះ ត្រឹម​តែ​រដ្ឋ​មន្រ្តី​មហាផ្ទៃ ដោះ​ស្រាយ​បាន​ហើយ។ គេ​ទៅ​រំខាន​ដល់​ព្រះ​មហាក្សត្រ»។

លោក​នាយក​រដ្ឋ​មន្រ្តី ក៏​បាន​រិះគន់​អ្នក​នយោបាយ​មួយ​ចំនួន ដែល​បាន​សរសេរ​លិខិត​សុំ​អន្តរាគមន៍​ពី​ព្រះ​មហាក្សត្រ ដែល​លោក​ចាត់​ទុក​ថា នេះ​ជា​រឿង​រំខាន​ព្រះ​មហាក្សត្រ។ លោក​ថា ត្រឹម​តែ​រដ្ឋ​មន្រ្តី​ក្រសួង​មហាផ្ទៃ ដោះ​ស្រាយ​បញ្ហា​នេះ​បាន​ហើយ។ រដ្ឋាភិបាល​បាន​កំពុង​តែ​ទាក់​ទង​ទៅ​ស្ថានទូត​អេស្ប៉ាញ ដើម្បី​ឲ្យ​លោក អាឡិច ចេញ​ទៅ​ក្រៅ​ប្រទេស​តាម​សម្រួល។

លោក​បាន​ថ្លែង​ថា៖ «គ្រាន់​តែ​រឿង​អ៊ីចឹង​សោះ ឆ្លេឆ្លា សរសេរ លិខិត​ថ្វាយ ព្រះ​មហាក្សត្រ ហើយ​មក​រវល់​ជាមួយ​នាយក​រដ្ឋ​មន្រ្តី រក​តែ​ពេល​ដេក​គ្មាន ផ្តាំ​ផ្ញើ​តាម​មាត់​អត់​ទេ។ លិខិត​របស់​អគ្គ​នាយក​អន្តោ​ប្រវេសន៍​ប្រាប់​ថា លោក​ឯង​អស់​វីសា​ហើយ វីសា​គេ​គង់​តែ​ធ្វើ​ទេ​កុំ​ឆ្ងល់​ពេក។ បើ​អ្នក​ឯង​អស់​ទិដ្ឋាការ​ហើយ ត្រូវ​តែ​ចេញ។ បើ​តាម​ដឹង ក្រសួង​ការ​បរទេស បាន​ទាក់ទង​ទៅ ទូត​អេស្ប៉ាញ​ថា ឲ្យ​មក​យក ប៉ុន្តែ បើ​មក​យក​គួរ​តែ​មក​យក​ពេល​មុន​អស់»។

លោក អាឡិច បាន​ថ្លែង​ប្រាប់ ភ្នំពេញ ប៉ុស្តិ៍ នៅ​ពេល​ព្រឹក​មុន​ចាប់​ខ្លួន​ថា លោក​នឹង​ចាក​ចេញ​ពី​ប្រទេស​កម្ពុជា មួយ​រយៈ ប្រសិន​បើ​មាន​ការ​សន្យា​ជាក់​លាក់​ថា នឹង​មាន​ការ​ផ្តល់​ទិដ្ឋាការ​ឲ្យ​លោក អាច​រស់​នៅ​កម្ពុជា​វិញ។

សូម​រំឭក​ថា កាល​ពីថ្ងៃ ទី១៦ ខែ​កុម្ភៈ ប្រធាន​គណបក្ស​សង្គ្រោះ​ជាតិ លោក សម រង្ស៊ី បាន​ផ្ញើ​លិខិត​ជូន​រដ្ឋ​មន្ត្រី​ក្រសួង​មហាផ្ទៃ លោក ស ខេង ដោយ​ស្នើ​ឲ្យ​លោក អន្តរាគមន៍​ទៅ​នាយកដ្ឋាន​អន្តោ​ប្រវេសន៍​នៃ​ក្រសួង​មហាផ្ទៃ បន្ត​ទិដ្ឋាការ​ឲ្យ​លោក អាឡិច ដើម្បី​អាច​មាន​សិទ្ធិ​បន្ត​ស្នាក់នៅ​ក្នុង​ប្រទេស​កម្ពុជា។ ចំណែក​ អនុ​ប្រធាន​គណបក្ស​សង្គ្រោះ​ជាតិ និង​ជា​អនុ​ប្រធាន ទី១ នៃ​រដ្ឋសភា​លោក កឹម សុខា ក៏​បាន​ផ្ញើ​លិខិត​មួយ​ទៅ​ប្រធាន​រដ្ឋសភា​លោក ហេង សំរិន និង​មួយ​ទៀត​ផ្ញើ​ថ្វាយ​ព្រះ​មហាក្សត្រ​ដែល​មាន​ខ្លឹមសារ​ដូច​គ្នា គឺ​សុំ​ឲ្យ​អន្តរាគមន៍​ទៅ​ស្ថាប័ន​ពាក់ព័ន្ធ​ជួយ​បន្ត​ទិដ្ឋាការ​ដល់​លោក អាឡិច បាន​ស្នាក់​នៅ​ក្នុង​ទឹក​ដី​កម្ពុជា ដើម្បី​ជួយ​ការពារ​ធនធាន​ធម្មជាតិ​នៅ​កម្ពុជា។

ចំណែក​ឯ​ក្រុម​អង្គការ​សង្គម​ស៊ីវិល​ក្នុង​ស្រុក​ចំនួន ៨៣ ស្នើ​ឲ្យ​រដ្ឋាភិបាល​បន្ត​ទិដ្ឋាការ​ឲ្យ​លោក អាឡិច ជនជាតិ​អេស្ប៉ាញ ដែល​ជា​ស្ថាបនិក​ចលនា​មាតា​ធម្មជាតិ និង​ជា​សកម្មជន​ការពារ​បរិស្ថាន ដើម្បី​ឲ្យ​ជន​បរទេស​រូប​នេះ​បាន​ស្នាក់​នៅ​ក្នុង​ប្រទេស​កម្ពុជា បន្ត​ទៀត ដើម្បី​ឲ្យ​ជន​បរទេស​រូប​នេះ​អាច​ចូល​រួម​សកម្មភាព​អភិរក្ស និង​ការពារ​ធនធាន​ធម្មជាតិ​នៅ​តំបន់​អារ៉ែង​បន្ត​ទៀត។

លោក អំ សំអាត មន្ត្រី​ស៊ើប​អង្កេត​ជាន់​ខ្ពស់​អង្គការ​ការពារ សិទ្ធិ​មនុស្ស​លីកាដូ​បាន​ថ្លែង​ថា តាម​ពិត​បើ​ទោះ​បី​ជា​ទិដ្ឋាការ​របស់​គាត់​អស់​សុពលភាព​ក៏​ដោយ​ក៏​គាត់​អាច​បន្ត​រស់​នៅ ក្នុង​ប្រទេស​កម្ពុជា បាន ១ ខែ​ទៀត​ដោយ​បង់​ប្រាក់​ពិន័យ​មួយ​ថ្ងៃ ៥ ដុល្លារ​ប៉ុន្តែ​គាត់​នៅ ទើប​តែ​បាន ៣ ថ្ងៃ​ក៏​ត្រូវ​បាន​ចាប់​ខ្លួន។

លោក​បាន​ថ្លែង​ថា៖ «ការ​ចាប់​ខ្លួន​នេះ​គឺ​ដោយ​សារ​ប្រសាសន៍​របស់​លោក​នាយក​រដ្ឋ​មន្ត្រី​ដែល​ជួយ​អនុ្តរាគមន៍ ប៉ុន្តែ​អ្វី​ដែល​នៅ​ពី​ក្រោយ​ការ​ចាប់​ខ្លួន​នោះ​គឺ​ដោយ​សារ​តែ​ក្រុម​ហ៊ុន​ដែល​អភិវឌ្ឍន៍​នៅ​អារ៉ែង​នោះ​គឺ​ក្រុមហ៊ុន​ចិន​ជាមួយ​នឹង​ក្រុម​ហ៊ុន ភាពីម៉ិច ដែល​កំពុង​បង្ក​បញ្ហា​នៅ​បឹងកក់​សព្វ​ថ្ងៃ​នេះ»។

លោក អាឡិច ជា​ជនជាតិ​អេស្ប៉ាញ ដែល​បាន​មក​រស់នៅ​លើ​ទឹក​ដី​កម្ពុជា​នេះ​ជាង ១០ ឆ្នាំ​មក​ហើយ និង​ចេះ​និយាយ​ភាសា​ខ្មែរ​បាន​យ៉ាង​ច្បាស់​លាស់ ព្រម​ទាំង​បាន​បង្កើត​សមាគម​ការពារ​ព្រៃ​ឈើ​មួយ​ឈ្មោះ​ថា មាតា​ធម្មជាតិ ដែល​មាន​សមាជិក​ភាគ​ច្រើន​ជា​ជនជាតិ​ដើម​ភាគ​តិច​នៅ​តំបន់​អារ៉ែង៕

0

Comments

Please, login or register to post a comment